Friday, January 8, 2010

شوش تحت الإصــابه



قاعده شاغله روحي بروحي .. فاكه العالم من شري .. مالي شغل بأحد .. أطقطق بالموبايل


و إذا بها إختي تدش علي الصاله بعدتها


مقصات .. شرايط .. تيجان .. ورد .. مسدس شمع .. عفسه عفسه


لوهله .. عبالي أحد عندنا بيتزوج و مو قايلين لي


سألتها شعندج ؟؟ قالت أسوي تيجان يهال الروضه عندنا حفله


رديت انشغلت بروحي .. بس كنت ألتفت عليها كل شوي أشوفها شتسوي .. إستانست على مسدس الشمع


عجبني


مال واحد يلعب فيه و يلزق و يخربط


وإذا بي أقترح عليها


شوش: انتي الحين ماسكه التاج ب إيد و الشمع ب إيد .. يطلع عوي جذي .. مسكي لي التاج و آنا ألزق الورد بالشمع


إختي: اي والله انا بعد حاسه انه عوي


واستانست .. و طلعت الشغله سهله .. و استهنت بالموضوع .. أول تاجين كنت اركز و أفكر و أمخمخ و أهندس .. ساعه يالله اقرر وين احط الشمع


عقب خامس تاج صرت خبيره و بلشت أشتغل بسرعه .. و بديت استهتر و أتهور


اختي: شوش حبيبتي ديري بالج ترى الشمع حار .. عدال شوي شوي


شوش: لا عادي ما يبيله شي .. بعدبن انتي عندج شكثر هذيل متى تخلصينهم اذا كل واحد تقعدين عليه ساعه


و فجـــــأه


التاج السابع .. حسبي الله عليه من تاج .. عســــاه ينكسر يارب .. حطيت الشمع على التاج و يايه برفع المسدس .. ولا للحين لازق فيه شمع ويلشطني على خدي


آاااااه يا خدي .. خذيت كف شمعي حار و محترم


سويت فلم بالبيت ما أكو أحسن منه .. حتى سعاد حسني ما تقايش يمي .. بالأخير أقنعوني إنه قضاء و قدر و الحنه ما منها فايده


سكت .. صار الليل .. رحنا الشاليه


قررو يلعبون كرة قدم


بما إني ميسي (اخاف بس) العايله .. و الكل يستذبح عشان أكون ضمن فريقه .. و لازم يصير هواش علي .. قررو إني ما ألعب معاهم


استبعدوني جليلين الحيا للأعذار التاليه


خوافه


ما تعرفين تشوتين


بسرعه يقطعون منج الكره


اذا يت الكره صوبج توخرين


أعذار مالها من الصحه أساس .. شوي و يقولون عني حوله بعد .. المهم رديت بواسطه و لعبت غصبا عليهم


و ليش اني لاعبه غصبا عليهم طلعوا الحره فيني على أرض الملعب القاسيه


هدوا القوووول و قاموا ينيشنون علي و يشوتون الكره صوبي بأقوى ما عندهم الححححح


بدال كرة قدم صار قنص .. الشاطر اللي يشوتني


يعرجبوني لما أركض


يدزوني


طيحوني أربع مرات .. و فوق كل هذا لما أقولهم فاول يقولون لي إنتي دلوووووعه .. هذي كرة القدم ما تبين تتعورين لا تلعبين


آاااااه يا جروحي


ما ظل فيني شي صاحي


ها أنا ذا .. أكتب لكم البوست .. و الآيس باج بإيدي


شوي رافعته على خدي من حرقة الشمع .. و شوي منزلته على كوعي


أعالج جروووحي بروووووحي


حسبي الله و نعم الوكيل


إنشالله كل اللي طيحوني اليوم يطيحوووون باجر


و مسدس الشمع إنشالله ينفجر بروحه و يتفلش


قولوا أميــــــــــــن

25 comments:

Hamad said...

looooool ajer o 3afya shoosh t3eesheen o takleen '3eerha ely ybi elda7 ma yegool aaa7 :)

enzain abi a3arf shai hathool el3ayla wela barnamaj el7e9en 3ala eltekfe5 ely feeech :P ?

ولاّدة سابقاً ... رانيا السعد ...رانية المنيفي حسب الأوراق الرسمية said...

سلامات ألف سلامة

مسدس الشمع يذكرني بأيام الصبا لما كنا نختب بالتحضير للفالنتين وعلى عين مشاريع وتلصق بمسدس الشمع أنا وصديقاتي
والفكرة تتعمم على الجميع ويحصل كل المحبين هدايا متقاربة متشابهة من مجلس التعاون البنّاتي

reemas said...

looooooooooooooool

سلامااات ما تشوفين شر
بس ما قالولج الحنه مو زينه و ما تفيد ؟
ليش للحين تحنين ؟

get well soon :)

الاوركيده said...

خطاج السو وماتشوفين شر

حطي بالج احد يتهور بمسدس الشمع كثري من دهان الميبو علشان لايترك اثر مرتين باليوم على الاقل ، ليش تلعبين كره وانتي ماتعرفين ؟

Engineer A said...

وييييي ما تشوفين شر .. أجر وعافية

أخاف هذي حوبتي ؟؟ لوووووووووول

لا أتغشمر معاج بس صج فعلاً أثبتي بهالبوست انج "مو دعله" ولا تعرفين للحنة طريق ههههههه


الحمدلله على سلامتج :)

رورو الشخبوطه said...

سلامات..

الحرق حطي عليه ميبو زين ويوخر الاثار..

وماتشوفين شر..

joe said...

سلامات
اهمه استبعدوج عن اللعب خايفين عليج عشان لاتحوشج اصابه وراح ينزلونج بالعلب النهائي على الكأس عشان يبوج تبدعين

هي هي هي انما الصمغ كان اهون مره انا كنت بالورشه ريشة حديد مالت درل لشطتني تحت عيوني يعني على مسافة اقل من شعره

يعطيج العافيه

Seldompen said...

مسـاء الخير ..

سلآمات عزيزتي ما تشوفين شر ,,

ما يحس بحرارة مسدس الشمع إلا اللي أحترق منه :(

وأنا منهم ,,


.....

زيارتي الأولى هاهنـا =)

أسعدتني ..

سأكمل جولتي هاهنـا ,,

أرق التحـايا لكِ ..

Sami said...

سلامات ..ما تشوفين شر
عسى بس مو حوبت زميلج
انا متعاطف مع اختج ..الاصابه يت بالتاج السابع ما امداج تساعدينها

فريج سعود said...

لاعبة مع منتخب الكاميرون ؟

Mariam B.D_Q8 said...

سلامات يا الغالي سلامات
لا لا اجر او او عافيه يوبا او ما تشوفين شر
بس هذا درس على شان اتعرفون ان الطفاقه شينه و انا اختج :)
بس بصراحه اخسروج في المبارات ميخالف ترا اللي ما يعرفج ما يثمنج :) على الاقل جان حطوج حكم

Hope said...

ويييييييي
سلامات ما تشوفين شر
ديري بالج مره ثانيه مع مسدس الشمع
واي كسرتي خاطري .. حارقه خدج مره وحده !!!

و سالهف الكره .. مره ثانيه انتي عوريهم عشان لا يتجرئون عليج

SHOOSH said...

Hamad
=====

7ata el 7e9en ar7am menhum :/

SHOOSH said...

ولاده
=====

الله يسلمج

أول مره أستخدمه أمس و عطاني فكرة جدا سيئه عنه

ما أتوقع أتواجه معاه مره ثانيه

و آنا أشووف مدونتي منوره

مادريت إنج معلقه عندي

:)

SHOOSH said...

reemas
=======

مو قاعده أحن

قاعده أقص لكم شصار

SHOOSH said...

دمعة المقهور
=============

خطاكم اللاش

رحت الصيدليه و عطاني ميبو

كل شوي نازل وداش بحلجي

لوووول

كليت ميبو ليما شبعت

SHOOSH said...

Engineer A
===========

أتوقع حوووووبتج

:)

SHOOSH said...

رورو الشخبوطه
==============

أهلا يا شخبوطه

حاطه ميبو والله

و يسلمج يا عسل

SHOOSH said...

..pen seldom
=============

سعيده بزيارتج أكثر

:)

SHOOSH said...

Sami
====

زميلي عطيته المصفط

ليش حوبه بعد ؟؟؟

SHOOSH said...

فريج سعود
==========

لأ .. مع أندونيسيا

SHOOSH said...

Mariam B.D_Q8
=============

يسلمج و يخليج و يعافيج

حتى حكم ما بغوني

:/

SHOOSH said...

Hope
====

إي والله

شوهني

:(

NewQ8 Bride said...

slamaaaat dear looool walah tha7kteneee heheheh

ana kilsh ma agreb halswalef heheh

uniquegrl said...

7abebty walla salamaaaat o ma etshofen shar
enshallah ye6e7oon elyoom ;)