Friday, October 30, 2009

محــــاولات شــــوشيه



محاولات بائسة مني للبحث عن هــواية


إلا غصب يصير عندي هــوايه مالي شغل


غير القراءة و النت و السوق و النوم و الأفلام


أبي هواية من نوع آخــر


حاولت أكتب طلعت فاشله


بصير شاعرة غصب .. بيتين على بعض ما عرفت أركب


قلت برسم .. كل ما مسكت الورقة لا إراديا أرسم رسميتين ما أعرف أرسم غيرهم من كنت بالإبتدائي


قطوه لابسه شباصه


و سيـــارة طالع منها دخــان


اللي يشوفها يقول صــاروخ باتريوت مو سيــارة


لا و دايما أرسم الجامات فيها حماية ما أدري ليش


بس أهم شي إن سيارتي ب تايريـــن فقط مو أربعة


لووووول و نسيت قمة التناقض بقطوتي


لابسة شباصة بس كله أحط لها شوارب مادري ليش


المهم .. ما نفعت رسامه .. قلت أصير رياضية


دشيت جيم و حاشتني السواين فلو .. أتوقع هذي كانت إشــارة من الله يحاول يبين لي فيها إن إنتي وين و الرياضة وين


المهم .. قمت أصور


ما ظل قلم .. ما ظلت كيكة .. ما ظلت وردة ما ظل قوطي بيبسي .. كل شي صورت


ما يصير يعني ما أفلح بشي


حتى جاءت هذي اللحظه


وإلي كنت فيها على الشاطيء


و لقطت هالطير


و صورته خـــوش صورة


شــــرايكم ؟؟؟ أنفع مصــورة ؟؟


خلوني آنا .. شرايكم بطيري بس و الحركة الرياضية اللي مسويها ؟؟


حطمــــــــــــني

Wednesday, October 28, 2009

شــوش فــي معــرض الكتـــاب




أتوقع آنا أول وحده داشه المعرض



هذي أول طلعة لي عقب السواين على فكرة



المهم



لما نزلت من سيارتي كانت الساعة تشير إلى عشر و ثمنتعش دقيقة



لوية بره .. سيارة إسعاف .. دوريات .. سيايير التلفزيون



أتوقع هذا كله علشان تغطية الإفتتاح أكيد عيل حقي ؟؟ إللي الحمدالله كان شكله توه خالص لما دشيت



ماحب اللوية و الزحمة و التلفزيونات



البابارتزي وين ما أروح ألقاهم من جذي طالعه الصبح



المهم



توني داشه المعرض ولا يمسكني واحد من تلفزيون الكويت .. تسوين لقاء ؟؟ قلت له لأ مشكور ما أحب



مشيت



ولا ياربي !! التلفزيونات تلاقطني



صدقت روحي .. طلعت منظرتي أطل فيها .. لبست نظارتي .. أنا كله عبالي إن لبست النظارة محد يشوفني .. قلت لكم ما أحب الباباراتزي .. الشهره متعبة مالي خلق .. و كملت أمشي



إختي ممكن نسوي معاج لقاء سريع عن المعرض ؟؟



ههههه لا لا مشكور .. و إبتسامتي ماكو أعرض منها



صباح الخير مدام .. تحبي نعمل معك إنترفيو سريع ؟؟؟



لا لا .. هههه .. لا لا مابي



مادري ليش كانت تجيني الضحكه كل ما وقفني أحد ! حسيت روحي مهمة يمكن ؟



المهم



وقفت في مكتبة من مكاتب الجناح السوري و لا أسمع وحده من وراي



هــــاي



آنا حاقرة عبالي ما تحاجيني



ردت البنيه .. هـــــاي



شوش: هلا هلا



تعملي لقاء تؤولي رايك في المعرض لبرنامج رايكم شباب ؟؟



شوش: هههههه جتني الضحكه مره ثانيه .. لا لا مابي أستحي



لقاء صغير أوولي المعرض حلو مش حلو .. عاجبك مش عاجبك ؟؟؟



شوش : لا مشكورة مابي



و فجأه إذا بصاحب المكتبة مادري اللي يبيع فيها بو كرش يحدثني قائلا



مكتبجي: ليش ما عملتي معها اللقاء ؟؟؟



شوش: بقلبي أقول: و إنت شكو ؟؟؟ نعم ؟؟ لا مابي



مكتبجي: ليش ما بدك ؟؟؟



شوش : ياربي !! مابي أستحي ما أحب



مكتبجي : إي ما بدها حيا هاي !! كلمتين بتؤوليهم و هن بيزبطو كل شي

شوش: بعد مابي



مكتبجي: إي والله حــرام



شوش: وانت ليش ضايق خلقك هالكثر ؟؟؟ خو اللقاء معاي مو معاك ؟؟؟



مكتبجي: إي كنتي عملتي دعاية للمكتبه !! مو إنتي وااااءفه فيها !! إي كانت حلوه إلنا و إلك



يمه منه .. يدور الدعاية على حسابي .. و آنا عبالي يبيلي الشهره



مالت



المهم



المعرض بوجهة نظري المتواضعة مو حلو .. بل قد يكون يقلب الجبد .. بل قد يكون سيء .. بل قد أعطيه أربعة من عشره



ما فيه شي جديد .. كتب قديمه مكرره



الجناج المصري تقريبا كان أحسن شي بس هم مبالغ بكتب عبدالحليم و كوكب الشرق و الملك فاروق



الجناح السوري كان أوكي



الأردني كله عن الملك عبدالله



السعودي .. مره أخرى كله عن الملك عبدالله



البحريني جنه كان مكتبة وحده بس و فيها كتب أطفال



اللبناني مع إحترامي لكل المذاهب بس ما شفت عندهم غير كتب الشيعه و حزب الله و نصر الله و الأئمة .. إنصدمت إن أغلب مكاتبهم إسلامية



الكويتي أغلبه عن حكام الكويت و أصول القبائل



طبعا ماكو كتب باللغة الإنجليزية إلا قصص الجهال .. كنت بتحلطم بس تالي ذكرت إنه معرض الكتاب العربي سو مالي حق



المهم



و آنا أفتر بالمعرض كان في واحد الظاهر يطوف عالمكاتب بنفس الترتيب اللي آنا أدور فيه .. كل ما أدش مكتبة .. شوي و يدش وراي .. و كل ما يسبقني و يطلع أكمل المكتبات بالدور ألاقيه جدامي



المهم .. كان طول ماهو يفتر و أهو يسأل عن كتاب .. كل ما يسأل عنه يقولون له ماكو .. ممنوع .. ما طلع من الرقابة



الشاب: لقيتي شي حلو ؟؟



شوش: لا والله .. إنت ؟؟



الشاب: يعني .. أغلب اللي أبيه ما لقيته .. معرضنا صاير مو شي



و فتح جيسه يوريني كتبه بس ميوله غير عن ميولي



بالنهاية .. و تقريبا على ما طاحت ريلي و آنا أدور .. صادفته و قالي ترى لقيت الكتاب



صج ؟؟؟ مو ممنوع ؟؟؟



رد علي إمبلا .. جزئين مشوهم الرقابة و جزء مسجون .. روحي إخذيه ترى حلو



و ما طلعت من المعرض الا ب هالكتاب إللي أصلا مادري شسالفته بس من كثر ما كان الشاب متشوق يدوره خذيته





ملاحظات شوشيه من المعرض



الأسعار مبالغ فيها .. أقل كتاب 5 و 6 دنانير .. إســـــدعواااااا



زوالي المعرض جديده .. كوني رايحه مبجر كانوا للحين يلزقون فيها .. ريحة المعرض كانت بتكس



دوار المعرض الي جبال قاعة ستة ليش سايدين رايح و راد ؟؟ حاشتني حالة إنفصام شخصية و شيزوفرانيا ليما إستوعبته و تفاهمت معاه و طلعت منه



ماكو أحد يبيع برد ولا ذرة ولا نفيش ولا بيبسي .. كنت ميته يوع و عيوني إتلاقط أدورهم بس ما حصلتهم.. يمكن علشان رايحه الصبح ؟؟



أحلى شي .. في مكتبة حاطه كتبها للعرض فقط .. مادري ليش



الكاتب الزميل أحمد الحيدر منزل كتاب فاضي بالإضافة إلى كتابه خنفروش .. إيمانا منه إن الحياة صفحة بيضة .. الكتاب هذا يتوزع ببلاش



أشكر الشياب الكويتيين اللي كانوا قاعدين في ... فييييييي .. ياربي نسيت إسمها .. بس هذي مالت التراث الكويتي .. المهم كل اللي يبيعون فيها شياب كويتيين بس نشيطين ماشالله



ثلاث مرات و آنا أتمشى ينفصخ عزكم الله نعالي من ريولي .. بغيت أقلب على ويهي أكثر من مره



اللقاءات مو علشان آنا باريس هلتون النسخة الكويتية .. بس علشان المعرض فاضي و ما فيه أحد غيري



وبس



كان معكم من معرض الكويت الدولي للكتاب العربي القديم المكرر الغالي و شوي مغبر و لازم تنظفه بكلينكس ديتول



شــوش نجيــب محفــوظ نـــزار القبـــاني

Monday, October 26, 2009

ميثــــولــوجيـا إغــريقيــــة


صارلي فتره أقرى كتاب إسمه الإلياذة و الأوديسة


كتاب ضخم بالنسبة لي .. أول مره أقرى كتاب بالعربي و فيه فوق الأربعمية صفحة


كتاب دسم لكن لذيذ


يتكلم عن الأساطير الإغريقية .. الآلهة .. معتقداتهم .. حرب طرواده .. الشخصيات أو أبطال هذه الحرب و وايد أشياء بعد


في أشاء فهمتها .. و في أشياء لو أطق راسي بالطوفه 36 مره ما راح أستوعبها


المهم


راح أحط لكم كم أسطورة أو معتقد إغريقي/يوناني إستوقفوني بالكتاب


المرأة


تقول أسطورة إغريقية إن زيوس قرر الإنتقام من بروميثيوس .. و لما كان البشر الموجودين على الأرض جميعا من الرجال. مما يدل على أنه مجتمع سعيد فعلا!! قرر زيوس أن يرسل ل بروميثيوس هدية من نوع جديد: المرأة


تقول الأسطورة أن زيوس كلف فولكان و هو حداد بصنع المرأة الأولى. و هنا ترمز الأسطورة إلى طبيعة المرأة النارية!! تم إستدعاء سادة الأوليمب الأخرين لتقديم هداياهم إلى هذه الأنثى الأولى .. قبلتها فينوس و منحتها الجمال و الحب لكي تلهم الحب في الناس و تحبهم .. أما مينرفا فقد منحتها الذكاء .. ثم ألهمتها لاتونا أن يكون لها قلب كلب و نفس لص و عقل ثعلب


طبعا كل اللي انذكرت أساميهم فوق هذول من آلهة الإغريق .. و الأوليمب هو جبل تسكن فيه الآلهة .. طبعا كلهم ما عدا فولكان فهو حداد بشري ولا تعليق على قلب الكلب



الطاووس


الآلهة هيرا .. زوجة زيوس .. شخصية ملكية و مهيبه .. اشتهرت بالغيره على زوجها .. و كان زوجها متعدد العلاقات النسائية .. تقول الأسطورة أن هيرا أرسلت العملاق ذو المائة عين ليحرس إحدى نساء زوجها التي حولتها هي بدورها لبقرة و ربطتها بشجرة في قمة الجبل .. و عندما أغتيل العملاق ذو المائة عين .. حزنت عليه هيرا حزنا شديدا .. فنثرت عيونه المائة على ريش الطاووس


هذه أسطورة مقززة بنظري .. ظليت عشر أيام اتخيل رجال عنده إمية عين .. يا ماما .. و تالي لما جابوا سيرة الطاووس صج لاعت جبدي و كرهت الطاووس .. بصراحة تغيرت نظرتي له



البحر


تقول الأسطورة أن بوسيدون و هو إله البحر يتنقل في أعماق البحار على عربة تجرها أحصنة ذهبية حاملا حربه و عند غضبه يهيج بها أمواج البحر


أذكر إن سفينة التايتانيك كان إسمها بوسيدون .. و قالوا إنها غرقت لأنهم إعتبروها إله البحر اللذي لا يقهر



الفصول الأربعة


تقول الأسطورة أن أفروديت ربة الحب و الجمال كانت على علاقة غرامية ب أدونيس .. صياد بشري جميل .. و قرر زيوس الآلهة الأعظم أن يقضي أدونيس ستة أشهر مع أفروديت و ستة أشهر أخرى في العالم السفلي. و هكذا صارت الستة أشهر الأولى التي يقضيها مع أفروديت يعم فيها الدفء و يزهر النبات، و لكن عند هبوطه إلى العالم السفلي ينقلب الطقس باردا و يموت النبات و اتخذ اليونانيون هذه الأسطورة تفسيرا لتغير فصول السنة


الغريب عند الإغريق و اليونان أن الآلهة عندهم تكذب و تخون و تسكر و تغوي .. تتزوج الأخت من أخيها .. و الأب من ابنته .. يحبون البشر و يكونون معهم علاقات غرامية .. و قد يتزوج الآلهة من فتاة بشرية .. مفهوم جديد و مشوق للآلهة أول مرة أتعرف عليه


أقترح أن يكون هناك نسخة خليجية عن الميثولوجيا الإغريقية .. بس بدال زيوس و كرونوس و هيليوس و بروميثيوس يسمونهم راشد و خالد و طلال و سعود علشان اللي مثلي يقدر يركز و مايضيع و يفتر راسه


كان معكم من مدينة طروادة .. شوش هوميروس الآخيين

Saturday, October 24, 2009

مــــزاج إتش ون أتشـــــوووو إن ون



محكورة بالغرفه صارلي أربع أيام


عسى ما شافوا يدة باب داري تحركت إلا صرخوا


وااااااااااااااااااااااااي


دشي داخل


يمااااااااااااااااااااا


لا تطلعيـــــن


أوينــــــك أوينــــــك


بالله هذي اوينك اوينك شتبي؟؟؟


محسسيني إني ذبانه


مو بس ذبانه


ذبانه وصخه حتى ربعها الذبان ما يبونها


الله يالدنيا


يقولون اللي يمرض يدلعونه


وآنا أبوي يقول حق الدكتور ما تنومونها عندكم أحسن ؟؟؟؟


كل هذا خـــووووووووووووووف


الله كـــــريم


وين الحب و الحنان ؟؟ وين السابوووورت وين ؟؟


مو كفاية تخنزرنا ؟؟؟؟


نمت إحتياط لي ستعش سنه جدام


إستخدمت ثلاثتعش كرتون كلينكس في أربع أيام


صندوقين برتقال


أربع صناديق ليمون


ثلاث كراتين بنادول


جرايد الصباح و المساء حتى الوسيط قريتها


رتبت كبتي


رتبت كتبي حسب سنة الطبعه


طبعه يعني برنت مو طبعه الغرقه مالتكم


صلحت الدي في دي الخربان


قمت أخلط عطور


احط فرنسي فوقه عربي و أشوف شيطلع


يا سلام علي .. بصك على سيد جنيد


و أحسن شي إن معاشي نازل صارله خمس أيام و ما صرفت منه شي


ثاني أحسن شي إن بخلص الكتاب اللي قاعده أقراه


عجيـــــــــــــــب و الأساطير اللي فيه أعجب


بعطيكم فيه بوست من النوع الثقافي الفلسفي الشوشي قريبا

المهم

الإغنية القادمه إكتشافي وآنا محكورة بالغرفه


My latest addiction

حلوه


إللي ما يسمعها و يحبها و الله لأطلع له و أعطس بوجهه








ربعي و رفيجاتي المدونين و المدونات .. سامحوني ما أقدر أقرى بوستاتكم الشيقه و لا أعلق .. عندي مرضيه أسبوع .. كلش ما أعبر أجابل الشاشه و الله
:*

و شكرا لكل من دزلي رساله أو حط لي تعليق و تمنى لي بالشفا .. والي ما دعى لي إنشالله ياربي يتخ .. يتخخ .. ماني مكلمه
:)

Tuesday, October 20, 2009

يــــا كثــــر نغـــــزات زيــــن




نغـــــزه رقـــم واحـــــد





نغـــزه رقــــم أثنيــــــن




نغـــــزه رقـــــم ثلاثــــــه











صج على كثر مسجاتهم حسسوني إن ما دفعت مكالماتي ممكن يجيني شي جذي




يــــــا ســـــــــــاتــــر

Sunday, October 18, 2009

How To With SHOOSH (Episode1: BlackBerry)



مرحبا مليـــــون


شلونكم و شلون غاليكم ؟؟ عساكم بخير ؟؟


هذي الحلقة الأولى من برنامج


HOW TO WITH SHOOSH



و حلقتنا اليوم عنوانها



كيف تكون مستخدم تكانه للبلاك بيري ؟؟؟



BlackBerry Covers



الشباب: لا تفكر تستخدم الكفرات الربر الفسفورية و ذات الألوان المجنونه و الفاقعه .. بتكون حد الهلاقه لو فعلت .. إنت رجل بالنهايه .. كلش ما تسوى عليك تمسخر روحك آخر عمرك على كفر موبايل .. يعني ما أتخيل رجال كاشخ و رزه و دشداشه و شماغ أحمر وماسك بيده بلاك بيري بكفر وردي فسفوري .. مو شي .. الكفرات ذات الألوان الموو تكانه تخصم من نقاطك وايد .. خل جهازك مفصخ .. مو ضروري تلبسه شي يا أخي


البنات: لا ثم لا ثم لا تستخدمين الكفرات اللي تلامع و إلي فيها فصوص و ترتر و زري و شك و عفسه جنج شايله بيدج دراعه مو موبايل .. نوت سوو كوووووول


شباب + بنات: هذا الحبل مادري شنو اللي تعلقونه بالرقبه حده مليق .. ماله داعي يعني كل واحد معلق موبايله على قلبه .. أصلا طبيا مو زين .. و بعدين يا بنيه ياحلوه .. جم شي بالله معلق برقبتج ؟؟ سلسلتج و لا كرتج الدوام و لا تلفونج .. كفايه



BlackBerry Messenger BBM


الشباب: حدك مليق و آوت أوف ستايل اذا حطيت صورة ورده كصورة شخصيه لك بالبلاك بيري مسنجر .. آنا سيمبلي تلوع جبدي مادري ليش .. و لا تحط صورر نمر و أسد رجاءا .. لا تحاول بأي طريقه ربط روحك بشخصية الحيوانات المفترسه .. ماكو علاقه يعني .. بتحط صوره حط صورتك .. حط أي شي بس تكفى ورده و قلب حب لأ لأ لأ لأ .. شخبـــــاري


البنات: إنتي بالذات لا تحطين صورتج إذا كنتي تعرفين إن صورة ويهج ما تركب .. و تكفون لا تحطون صورة أشواريا و لا كاميرون دياز .. فجأة بنات الكويت كلهم أشورايا


الشباب: لا تضيف أحد ما عطاك إذن تضيفه .. نوت كووووول و إن أبروبرايت .. إذا أحد مسحك من اللسته لا تدز له مسج وينك ما أشوووفك رد ضيفني مره ثانيه !!! ياربي ليش الإحراج ؟؟ تحرج روحك و تحرج الشخص الثاني .. يا أخي ماسحك ما يبيك .. خلاص اللي مسحك بالطقاق اللي يطقه شنو يعني ؟؟؟ لا تحنون الحنه مو زينه


البنات: لا تضيفين واحد ماخذه البين كود ماله مادري من وين و تستعبطين تسوين روحج غلطانه .. هالسالفه بدت أوائل التسعينات .. كانت ناس تدق و تقول وي سوري غلطانه .. بعدين إنتقلت للمسجات .. و من ثم الإيميلات و ألحين هني .. حركه مكشوفه


شباب + بنات: ماله داعي برودكاست كل شوي .. عسى ما ***** إلا دزيتوا فيها برودكاست .. مو حلوه .. الثقل الثقل الثقل



BlackBerry Ring Tones


شباب + بنات: إذا كل شوي يايك بي بي إم و طايحله سوالف خل تلفونك سايلنت .. لا تلج الناس و خلق الله معاك


مع تحياتي


شوش وينفري الد. فيل


Wednesday, October 14, 2009

حـــــــــالة طـــارئه


لظروف قاهره


قاهره و لا بيروت


و لأسباب خارجة عن إرادتي


و لعوامل قهرية حالت دون أن يتم تنفيذ رغباتي


و تنفيذا لتدخلات الغير


غير و لا ماكينه


ماكينه و لا سفايف


سفايف ولا براطم


و حرصا مني على الأمن و السلامه


مظطره أطلع في رحله غصبا عني علشان أسوي شي ما أبيه


أبيه و لا سي سيد


آملة أن أعود لكم أفضل من جديد


رحلة صغيرونه بسوي فيها شي صغيرون لكن إنشالله النتيجه تكون كبيره


ديروا بالكم على مدونتي .. و لا تنسون تطفون ليتاتها على الساعه 12 منتص الليل


مالي خلق البلديه


بلديه ولا الداخليه


داخليه ولا اااااا


:)


دعواتكم


شووووووووووش


Monday, October 12, 2009

بحـــــــب بغــــــــرامـــــك






أمس كنت منسدحه بالصالة .. و قاعده أغني إغنية راشد الماجد

المســـافر راح


دش علي يدي .. قالي مو حلوه هالإغنية .. غني شي حلو يونس


قلت له شنو مثلا إللي يونسك ؟؟؟ نانسي عجرم


سوى روحه ما عرفها


قالي لأ غني ورده الجزائريه


نعم ؟؟ شخباري وردة الجزائريه



جان أغني إغنية بحب بغرامك بلائي كلامك مادري شنو أوصادي



أدري مو مالت ورده مالت سميرة سعيد بس عبالي ورده.. صدقتوا؟ يبا أدري مو مالت سميرة سعيد مالت أنغـــام


ما علينا


كنت أسولف حق يدي عن شخص مشتاقة له حيــــــل


من زمـــــــان ما شفته


و آنا أقول لجدي شكثر آنا و لهانه عليه سألني سؤال


قالي


إنتي مشتاقة له شوق العين و لا شوق القلب ؟؟؟


أول مره أدري إن في شي إسمه شوق العين


و في شي إسمه شوق القلب



تعرفون الفرق ؟؟؟




ملاحظة: الإغنية لا لوردة و لا سميرة سعيد و لا أنغام .. الإغنية مالت الشاب مامي بس كنت أتغشمر

Friday, October 9, 2009

الفيــــل كبـــر يــــا نــــاس












فيلهم كان واحد ... جم فيل صارعندنا ألحين .. نبي أحد يشيله ؟؟؟؟


المضحك المبكي إننا من سنة 1980 يعني من قبل حتى لا أنولد وإحنا نشكو المشاريع التي لم و لن تنتهي



طمــــــاشه يا ديـــــرتي .. طمــــــاشه

Thursday, October 8, 2009

بـــونجــــوار

بونجوار يا جماعة .. حياكم الله .. الريوق اليوم في مدونتي .. عليكم بالعافيه


Tuesday, October 6, 2009

I WISH I WERE A PRINCESS



اليوم دق علي مسؤولي بالدوام الساعة خمس العصر


خمس العصر كل يوم آنا نايمه .. قيلولة بعد الدوام


unless


مو مداومة و شبعانه نوم .. مريضه .. طالعه أو أي شي ثاني


العادة تلفوني سايلنت .. ما أحب صوت التلفون . بس إن كنت ناطره إتصال مهم أضطر أخليه يرن


و آنا بعز نومي .. يصرخ تلفوني كأنه أهبل على هيئة رنة هبله و عبيطه نفسه


الله د إي اللخبطه دي إيه ياللي خاطفني ياريت تؤوووول لي إيـــــه حصل لي


أكثر من اللخبطة إلي آنا فيها ماكو .. حتى موبايلي فيه لخبطة


أفتح نص عين و آخذ المويبايل


ألوو


السلام شوش .. لوسمحتي لا تنسين تخلصين أوراق البروجكت علشان نقدر نعرضها في إجتماع باجر .. دزيت لج إيميل فيه بعض التعديلات


إنشالله بو عبدالعزيز ألحين أجيك الإيميل و أعدل الجداول و إنشالله كل شي يكون تمام باجر .. لا تحاتي


يعطيج العافيه .. مع السلامه


بـــــاي


أقط الموبايل لأبعد ما يمكن أن توصل له إيدي .. و أرجع أسكر عيوني و على طول أنام


بعد ربع ساعة يصرخ موبايلي برنة أعبط من الأولى


إلحـــق عيـــني إلحــق إلحـــق لا يروح منـــك حبيبــــك


أووووووف .. أدور بيدي تلفوني ليما أطيح عليه


ألووو


شوش


هااا


قطيعة إنتي كله نايمه


قطيعة تقطعج !! آنا قطيعه !! شتبين داقه !! أحد يدق الظهر يالي ما علموج الإتكيت


خليت لج الإتكيت يا أم إتكيت .. بيأذن المغرب يبا .. قومي ناخذ قميص بولو اللي كنا طالبينه .. الفلبينية شلختني تلفونات


أي قميص ؟؟؟


إلي طلبنا تييب لنا منه .. إلي ذاك اليوم شفيج ؟؟


مشلختج تلفونات !! إللي يقول شارين يخت مو قميص .. عالعموم آنا ما أبيه


ليش ما تبينه ؟؟!! لوعنا جبد المره لما دبرت لنا قياسج !! ألحين ما تبينه ؟؟


إي ما أبيه .. مفلسه


يبا آنا أسلفج قومي


مابي سلف .. تاخذينه لي هديه أقوم .. تدفعين لي فلوسه و تالي أردهم لج مابي


ما عوزج أهديج قميص ب 70 .. عساج ما خذيته


أيا الجعصه ؟؟؟؟؟؟


قومي يالله قومي .. باي


بــــاي


أرد أحذف تلفوني و يرد يرن عقب دقائق بسيطه


شتبي ؟؟؟


قومي !! إنتي مو مواعدتني تروحين معاي الأفنيوز ؟؟؟


آنا ؟؟؟


إي إنتي .. يالله قومي عفيه خل إشتري الهديه و أفتك


أي هديه ؟؟؟



إلي قلت لج عنها .. ما أقدر أتحجى ألحين .. أمي على راسي


هممممم .. أقوم على شرط


شنو ؟؟


أبي 80 دينار بس ها .. هديه مو سلف


حق القميص طبعا


أواللله 80 ليش ؟؟؟


ألحين 80 صارت أولللله


آنا طالب ما أشتغل حتى الخمسين عندي أولللللله


مالت


عليج يا عسل


والله صج ؟؟؟


قومي عاد


زين باي


و بس .. طارت مني النومه .. ظليت أتقلب بالفراش بو عشر دقايق و يرجع يدز لي مسج


قمتي ؟؟؟


رديت عليه و آنا سارحه بأفكاري


I wish I were a Princess


رد علي .. تستاهلين


ما قمت من فراشي .. و ظليت أنط من فكره هبله .. إلى فكره أهبل منها


اللــــــــــــــــــــــــــــه .. جان زين آنا أميـــــره


أميره أميره نفس اللي بالفيري تيلز


مو أميره بو طقه


جان صرت أكسل أميرة يعرفها التاريخ


أدري في وايد أميرات يشتغلون و يكدحون .. بس كلهم عندهم أوبشن إنهم يحطون ريل على ريل و ما يسوون شي


آنا أبي هالأوبشن


لو كنت أميره .. جان ما اضطريت أقوم كل يوم الصبح من الفير .. حتى الديج ينام أكثر مني .. و لا أضطريت أداوم .. و أكرف لي الساعة ثلاث العصر .. و إشي مدير يزفك .. و إشي مدير ما يعجيه شغلك .. و إشي مدير يحاسبك على الخمس دقايق


جان ما إضطريت أسوق سيارة بالزحمة .. جان عندي هليكوبتر حق تنقلاتي .. توديني وين ما أبي بدقايق


جان عمري ما عرفت الجزيرة ة ولا الوطنيه و لا حتى البرتش و اللوفتهانزا .. إي نعم .. آنا أميره و عندي برايفت جت أونلي فور مي


جان ما اضطريت كل يوم أتصارع مع ملابسي اللي بالكبت علشان أقرر اش بلبس باجر حق الدوام ؟؟ أطلع كل الملابس من الكبت .. يــــا كثرهم .. كبتي 6 بيبان و بغصب يسكر.. و تالي أعصب و أقعد أتحلطم و دموعي تارسه عيوني و أقول .. شنو هذا ما عندي هدوووووم


لو كنت أميره لكان عندي مصمم أزياء خاص فيني .. يصمم لي ملابسي و آنا مكاني .. و ماكو سوق و فراره و عوار راس


لكان عندي خدم سنعين .. مو مثل اللي عندي .. يا حارقه ملابسي يا مضيعتهم


لا و قشره .. أقول لها ليش حارقة نفنوفي ؟؟؟


هذا واجد خفيف .. بالبيت لازم خراب إنتي ليش ما يودي مصبغه ؟؟؟


والله صج عمتي ؟؟ و عيل إنتي إش مهنتج ؟؟؟ هذا قميص خمسين دينار إنتي هذا شهر ماكو معاش


الحمدالله آنا في فلوس .. أووووخذي خمسين مو مشكله الله موجود


بللللللللللللللللللللل تحسب الله بعد


لو كنت أميره جان عمري ما فلست .. مو عقب أسبوعين من المعاش أفلس .. أول شي أبدى أتسلف من أقارب الدرجة الأولى .. إذا خلصوا .. أتسلف من خدامتنا النحيسه .. شكثر فلوووووسها


لوووول .. عاد اليوم متسلفه منها


عندج سلف ؟؟؟


جم يبي ؟؟؟


جم عندج ؟؟


يبي عشرين ؟؟؟


آنا قاطه و يهي على عشرين ؟؟؟؟ لا أبي خمسين


آنا يعطي عشرين ولا يعطي خمسين كلو خلاص اليوم .. آنا بس يعطي عشرين


بالله هذي حاله


لو كنت أميره جان عندي ناس ذربة تقعدني من النوم و بهدوء .. مو وحده داقه تقولي قطيعه إنتي كله نايمه !!؟؟


لو كنت أميره جان ما اضطريت أقول هالشهر جوتي الإل في ولا جنطة شانيل ؟؟؟ جان خذيتهم كلهم و فوقهم 600 جنطة على الراهي


لو كنت أميره لكان بالي فاضي .. ناس تفكر لي .. ناس تقرر لي .. ناس توكلني .. تاس تلبسني و تشربني ..دماغي فاضي


جان أكيد تعدل نومي


و صحتي صارت أحسن


جان وزني صار إميه من قعدة البيت


جان ما فجيت بلوق أتحلطم فيه


جان آنا ألحين دكتوره من غير ما أدرس


جان كل ما ضاق خلقي طقيت طيارتي سلف و سافرت .. مو رحت كوفي شوب أقرى كتاب و يمر علي واحد يقولي بونجواااااار


لو كنت أميره جان مو قاعده أعاطس للحين .. جان سافرت علاج بالخارج حق نشلتي الغريبه


همممممممممم


أمبيييييه .. كل إلي أدوره مادي !! فلوس و جناط وطياره وسفرات .. اي بس آنا صاجه عند ربي .. الفرق بين الناس العاديين و الأمراء هالسوالف بس


لوووووووول


رفيجتي تقولي عن شنو تكتبين ؟؟؟


قلت لها جان زين آنا أميره


جان تقولي: حــامض على بــــوزج


بووووزج عاااد ؟؟؟ بووووووزج


ماكو تيرم أيدد


تكفون بس ط المصطلحات


وااااااي يا ربي .. لو أميره جان غيرت رفيجاتي


لووووووووووووووووووووول


قريت لها البوست .. تقولي هذا فيرجن الأميره الهيزه


هيزه ؟؟؟؟ هييييزه ؟؟؟ ينصر دينج من وين يايبه هالمصطلح


قلت لها والله .. ودي ودي أصير أميره يوووم واحد .. الكل يجابلني و يشوف طلباتي و ماكو شي إسمه لأ


ردت علي .. ترى الأميرات يسوون أعمال خير .. جاريتي وورك .. مو بس يلبسون و ياكلون


أأجرج إنتي تسوين لي الجاريتي بإسمي


ردت علي بكل قسوه .. لو صرتي أميره جان حسدوج و صار فيج سرطان


سرطان ها ؟؟؟؟ الشرهه علي إلي قاعده أقرى لج .. ولا إنتي كفو أجابلج ؟؟؟


لو آنا أميره جان عندي معجبين و معجبات يحبون أي شي أكتبه مو مظطره أقرى لج .. حتى لو أنزل بوست فيه نقطه وحده بس ألأقى 198 تعليق


ونـــــــــــــــاسه


منو وده يصير أمير ؟؟؟ ولا أميره نفسي ؟؟؟؟



Monday, October 5, 2009

يا فتاح يا عليم ..يا مغازلجي يا لئيم





صبــــــــاح الخيــــــــــر


كيف أصبحتم ؟؟؟؟ إنشالله بخيـــــر ؟؟؟


اليوم قعدت من النوم الساعة سبع الصبح .. عندي شغله بخلصها على العشر .. من أمس كنت مقرره إني أصحى مبجر و أروح أقعد لحالي بكوفي شوب عالبحر أغير جو و أقرى كتابي .. بما إن الجو صاير صراحه عجيب الصبح فكانت فرصه أطلع


الساعة ثمان إلا ربع بالضبط كنت قاعده في كاريبو كوفي .. بما إني ما أحب القهوه .. فشربت عصير برتقال و كليت براوني لأني كنت ميته يوع


بلشت أقرى كتابي .. و بعد مرور ربع ساعة بالضبط و إذا بي ..... أسمع صوت تصفـــــيــــــــــــر


إلتفت وراي بشوف شالسالفة (لأن أصلا كان فاضي و مافيه إلا آنا) و ياليتني ما التفت .. ولا شباب أثنين قاعدين يضحكون


قلت بيني و بين نفسي بعد ما رديت راسي بكتابي .. الحمدلله و الشكر !! و الله فراغه !! شمقعدهم هذيل من الصبح ؟؟؟


في أحد يغازل على الريج !!! بعدين شخباري فكرة المغازل أصلا !! منو يصفر هالأيام !! كناري آنا تصفر لي ؟؟


المهم .. تغافلت التصفير و رديت أحاول أركز في كتابي .. حلفت ما أقوم .. آنا طالعه و طاقة طريج من الصبح و الجو شحلاته .. محد يخرب طلعتي



و في وسط إمتعاضي و تحلطمي على روحي و إذا بالشاب رقم واحد يصرخ قائلا


شاب رقم 1 : يا حليــــــــــــــلها قاعده تدرس


شاب رقم 2 : لا و فرنسي بعد

شاب رقم 1 : بووووووووووووووو نجوااااااااااااااااااااااااااااااااااااار


شاب رقم 2: يو قو إكسااااااااام تودااااااااااي ؟؟؟


نعم ؟؟؟؟ بونجوااااار شنو ؟؟؟؟؟ بونجور بس على وزن بونسوار مثلا ؟؟؟؟ و بكيف منو إستنتجت إني قاعده أقرى فرنسي يا خبل يا بو إكساااااام ؟؟


و آناأسمع كلامهم كانت ردت فعلي كالآتي طبعا بيني و بين نفسي

Excuse meeeeeeeeee !!!!!

Seriously !!!!!!!!!!!!


تعوذت من إبليس و قلت أكيد بيذلفون الحين لما يعرفون إني ما راح أرد عليهم .. أصلا طول الوقت و آنا عيني بكتابي و مسويه روحي صمخه بيملوون و يقوموون .. توني قاعده حرام أقوم ألحين أصلا ما قريت شي


و في وسط الإمتعاظ و بعد ما ملوا مني فإذا بهم يتحركون بعيدا .. فكه .. و في طريقهم للخروج و إذا بالشاب رقم واحد يصرخ مره أخرى


بووووووونجوااااااااااار سنيــــــــــــــــــــــــــــورا قـووووووووووووووود بـــــــــــاي


!! يرحم أمك إنت شسويت باللغه !! فرنسي على أسباني على إنجليزي


كله كووووم و بونجواااار بكووووم



يعني آنا حجي ما أعرف أتحجى أقووم أغازل بعد ؟؟؟ لا و بصوت عالي و الساعه ثمان الصبح و بلغة أجنبيه !! تحطمني صراحة ثقة بعض الشباب عندنا

أوووووووووووووف



على ما الإخوان مشو .. إلا الجو الحلو بدى يندثر .. و طلعت شمس الكويت الحنانه .. فما كان أمامي إلا أخذ كتابي الإمريكي بس إللي عطوه جنسية فرنسية و صار من المزدوجين اليوم و قلاص عصيري .. و أكمل مشواري بالسياره


أمم أوربا كلها غازلتني اليوم


من قدي


:/


أشكر الشاب رقم واحد و الشاب رقم أثنين إلي خربوا علي مشواري الصباحي و إلي كانوا وقود هذا البوست


إي وقود .. لأني ناويه أشب حريجه


حسافه على فزعتي من الصبح


و بونجواااار