Tuesday, December 28, 2010

تصبحـــون علــى خيــــر


المكان ؟ المستشفى الأميري .. على سريري مغطاة بفراش وردي مرسوم عليه كيتي


الزمان ؟ منتصف الليل .. قبل ثلاث أيام من بداية السنة الجديدة


المزاج ؟ رايق إلا من صوت صراخ عجوز جنبي ربي يشفيها


الهمه ؟ عالية بإذن الله يغلبها خوف بسيط و ترجع تغلبه


النفسية ؟ مية مية يتخللها رهبة من إني أصحى من البنج و هم لسه ما خلصوا


اش جابك هنا ؟ عندي قسطره بكره في الساعة السابعة صباحا


تدخنين ؟ طبعا لأ


عمرج فوق الستين ؟ بالله عليك !! تتمسخر ؟ و لا حتى فوق الثلاثين .. لسه شباب


أجل ليش القسطره ؟ نصيب


طيب و ش تبين ألحين ؟ بعايد ربعي بالسنه الجديده


لسه بدري !؟ بدري من عمرك .. آنا بعايدهم ألحين .. بنشغل نقاهه و مواعديني يسفروني


وين بتروحين ؟ بيروت


تحبيها ؟ عادي


كيف كانت 2010 ؟ عجيبه


حبيتيها ؟ مررررره


وش تعلمتي منها ؟ وااااااجد


عطيني رؤوس أقلام ؟ لا ألحين دايخه أعطيك اياها لما اطلع من العمليات بخير


كيف ودك تكون 2011 ؟ أبيها حلوه .. و شفافه .. و سريعه .. و كلها مفاجآت طيبه .. و كل أحبابي بخير .. و ما أفقد أحد منهم .. و أكون أنا أكبر و أحسن .. أبي أروح ديزني لاند .. و أبي أشتري رولكس .. و أبي جنطه هيرميس برتقاليه .. و أبي أصير دكتوره


تصدقي إنك أنانية؟ أفا .. ليش عاد ؟


كل اللي تمنيتيه لك .. ما تمنيتي شي لغيرك !؟ ما علينا .. و الكويت ؟


وشفيها الكويت ؟


كيف ودك تكون ؟ هممم .. الكويت هي الكويت


و ناس الكويت ؟ ياااه .. غلبه .. أقولك لما أصحى


خايفه ؟ هممم أربعه من عشره


تخافي الموت ؟ لأ


أجل ليش كاتبه وصية ؟ علشان حلالي لا يضيع


عندك فلووس ؟ لوول .. عندي .. على قدي


تبين أنام عندك ؟ همم .. اي ليش لأ


تسولفين لي ؟ لا .. تسولف لي


تبين شي من ربعك ولا خلاص ؟ أبي


و شتبين ؟ أبي يدعون لي أقوم بعافيه .. ولا عاد أجي هني مره ثانيه


إنت ضعيفه ؟ أتحدى تكون مكاني .. و بتعرف شكثر أنا أقوى منك


تعور الإبره اللي بيدك ؟ نتفه بس .. ما عدت أحس فيها ألحين


ليش خليتيني أصورك ؟ ذكرى .. عشان لا جيت هنا بعد سنه أقرى و أضحك


تحبي توثقي ؟ لازم نوثق


ننام ألحين ؟ ننــام

Sunday, December 26, 2010

مــــوال .. ضـــرب المــواطنيـــن


والله حاشني عوار مزمن بالراس منكم


و صداع ثلثي و احباط عام من الدرجة الأولى


بسوي عملية بعالج فيها انفجار قولوني و السبة انتوا


ما تعبتوا ؟ ما مليتوا ؟ للحين الصوره مو واضحه ؟


عسى ما قلت شي او فتحت نقاش صكوني بنفس الجمله .. و ضـرب المواطنين ؟


بنسوي اعتصام و بنرفع اعلام برتقاليه و سوينا باجات و بنوقف ثلاث ساعات بساحة الإراده


اوكي بس يا جماعه الموضوع مو حله اعتصام و علم برتقالي


لا والله ؟ و ضرب المواطنين ؟


شايب عمره ستين سنه معتصم جدام مجلس الأمه ما يبي ياكل ولا يشرب


ليش عاد من صجه ؟ ما تسوى عليه صحته


لا والله ؟ و ضرب المواطنين ؟


ندوة بنتجمع فيها و نتكلم و تصفيق و مايكروفونات و اللي يرضى يرضى و اللي ما يرضى يورينا مراجله


طيب و العناد شيفيد ؟ انت عبالك جذي ترهب أو ترغب ؟


لا والله ؟ و ضرب المواطنين ؟


بفتح قناة تلفزيونيه و بطلع أسب و أسفل و أفضح و أنشر غسيل الكل


ليش عاد !! هذا كله اش فايدته ؟


لا والله !! و ضرب المواطنين ؟


هذي شلووون نجحت؟ هذي الوحيده اطلعت السنعه فيهم .. كفوو يا فلان .. الله يلعن علاان .. بتشوفون الإنتخابات اليايه


فكروا بموضوعيه و شوي شوي الركاده الزينه .. هذي كلها مواقف محسوبه لا تتسرعون بالحكم على أحد


لا والله ! و ضرب المواطنين ؟


بنتجمع اليوم بنقط صناديق الجريده الفلانيه بالزباله و القناة الفلانيه بنسكرها و الصحفي الفلاني محنا مدخلينه


ليش عاد ؟؟ الصندوق شكو ؟؟ و الصحفي شكو .. وين حرية الراي ؟


لا والله ! و ضرب المواطنين ؟


احنا بنعلن حالة العصيان المدني و بنمارس الضغوطات الشعبيه


لا تلعبون بعقول الناس على كيفكم حتى بو خمستعش و ستعش سنه دخلتوهم في عصيانكم مو جذي الموضوع يا يبا


لا والله ! و ضرب المواطنين ؟


امي مسويه هريس عالغدا اليوم


نعم ؟؟ هريس !! ليش مو جريش ؟؟


شكو الجريش ؟؟


لا والله !! و ضرب المواطنين ؟


يا ترى .. لو المواطنين ما (انطقوا) ماذا كانت ستكون الحجه ؟

Tuesday, December 21, 2010

شوووش و إتحــاد المــزارعيــن





واللــه و باللــه يـا جمـــاعة


إن حتــى حــديقة فـي بيـــتنا مــا عنــدنا


نخـــله عند البــاب ماكوووو


إصيص فيه نبــات صنــاعي مــا عنــدنا


هالمـــره مــــزرعة

!!


إتحـــاد المــزراعين صــك راسي .. كل يــوم دازين لي شــي


عســى مــا نزلوا سمــاد جديــد .. دزووولي


إنتخــابات .. دزوووولي


إرتفع سعــر مادري ايــش .. دزووووولي


صقيـــع .. دزوووولي


تعويضات .. دزوووولي


ورده فتحت .. دزوووولي


نخله تلقحت .. دزووووولي


أنا مــادري من قــص عليـــهم و قــال لهــم عندي مــزرعة


أنــا مزهــرية بــ داري مــا عندي


يـــا ســـــاتر

Monday, December 20, 2010

مـن لا يشــكر النـاس .. لا يشــكر اللــه




شكرا لكل من واساني و سهـر معاي .. شكرا لأصدقاء تويتر .. و الفيس بوك .. و البي بي أم


شكرا لكل من أرسل بريد إليكتروني أو رساله


شكــرا للأصدقــاء خـارج مجتمع التـدوين .. و شكرا لإخواني المدونين


أخص بالشكر


أبرار القصاب

زووز معرفي

ماجد البصيري

منال الهـزيم

مريم الشطي

محمد الزعبي

علي العلي

بو راكان

مركبنا

بو مريوم

بنت الشــــامية

النـــور

Blanche Fleur

Donveto

أبو فلان

مس مها

الفيلي

المنصوري

iSoulq8

عـــذبي المطيـــري

إستــــكانه

Hilaliya

نـــاقد

د. ريمــاس

تحرير

Kuwaitinfl

Dakdoka

FourMee

Redvellvet

Bader_q8

عبدالله القــديري

معـــاذ المنيــس

ســـوالف يـــال

Latifa_talks

Q80ChillGirl

قــرمت

عيـــن بغـــزي

حســـافتج يا كــويت

April_q8

Saroon86

I3bdallah

Gremello

FRANKOM

Ms_Aq8

مغــــاتير

أم السعــف و اللـــيف

ABOOD1990

Nouffi_

Alaftan

Moudhi

Iam_me

الـــــراية

بوجيـــج

عــــاجل

شقـــــران

الــــــزين

فــــرناس

إنشاءالله ما اكون نسيت أحد


ما قصرتوا .. لا أراكــم اللــه مكـــروه بعــزيز


أحبكــــم من كـــل قلبـــي


:*

SHOOSH

Wednesday, December 15, 2010

حــب هــذه الأرض يســـري فـي عــروقي


مـــسرى نـــور الشــمس فـي وقــت الشـــروق


معلنـــــا


روحــــي فـــــداء للكــــــويــت


وعــد حـــر في الملمــــات صـــدوق

Monday, December 13, 2010

قــاتل اللــه الشــاور بـوكــس

طبعـا أنا أخاف أنطق على بوستي


ليش الكل متنشن بالديره اللهم يا كافي


ما علينا


والله يا جماعه قبل حمامي وش زينـه .. جميل .. لطيف .. فريندلي


من يوم ما حاشه التمدين اللي حاش كل مرفقات بيتنا .. و ركبوا فيه هذا اللي اسمه شاور بوكس و انا ما عاد يهنا لي حمام


تبي تعذبني ؟ سبحني


يـــا ربـــــاه


تسبح داخله الجو دافي .. رواق .. تمام .. كل شي اوكي


تخلص تفتح بابه .. يكفخك ذاك الهوى البارد اللي ما يرحم


تقول سابح بــ مخيــم


أعوووووذ بالله


والله قبل لا أكتب بوستي هذا.. ثلاث مرات اشيل شلايلي يعني بروح اسبح .. افتح الباب اشوف الشاور بوكس أسكر الباب و أرجع انسدح عالغنفه


الى ان إرتأيت أن اروح اسبح في حمام الوالده ربي يحفظها .. ليش ان حمامها الوحيد هو اللي ما حاشه الإعمار


أبت إلا يخلونه نفس ما هو


جيت عاد بغسل شعري .. أدور شامبو .. وإلا إيش ؟




يا اللـــــه .. شخباري !! سلفكــــرين ؟


و نكهة بيض ؟


شعــر باهت ؟


لا حول ولا قوة إلا بالله .. أنا قريت بيض و باهت حاشني إحباط .. الظاهر أمي تعاني مع شعرها


ضاق خلقي عليها .. خاشه كل هذا بقلبها


ما علينا .. بيض بيض


طبعا سبحت و خلصت .. و قلت أنبش بأغراض أمي .. دام الشامبو بيض .. أتوقع معجون الأسنان نكهة تمـر


والله ولا خــاب ظني .. دورت معجــونها و لا ايش ؟




نكهة ســـواك .. مـع فلــورايد


لا حول ولا قوة إلا بالله .. ســواك عاد يا يمه ســواك


لا ولقيت درج حاطه فيه نص كونديشنر .. ربع قوطي حمام زيت .. شاور جيل مال جفنشي


إكتشفت إن أي شي آنا و خواتي نطلعه ما نبيه تاخذه و تحطه عندها


بغيت أدور أكثر .. بس الله يهداها رجتني


كل شوي طاقه الباب .. لا توصخين حمامي .. لا تلعبين بأغراضي


المهم عاد ..عقب البيض و الســواك انا إكتشفت أن أمي


أووووورجانيـــك


و أتــوقع فيجيتيـــريـــان بس مستحيــة تقـــول

Sunday, December 12, 2010

الشعـــب البـــائس



مـن هــو الشعــب البائــس ؟

البــؤس فقــر مــاده

فقــر أمــل

فقــر أخــلاق

فقــر فكــر

و فقــر عــلم

أيـن صــرنا من كـل هــذا ؟

Monday, November 29, 2010

ميلوديكــا


اسمها ميلوديكا .. بس أذكر إن كل الأبلات اللي مروا علي بإختلاف الجنسيات .. يسمونها


موووو لووووو ديييييييي كااااااااااااااااااااااا


ليش ؟؟ مادري


حتى بت أضن إنها تنلفظ جذي صج


المهم .. تذكرونها ؟


يا بووووووووي .. والله محد جاب لي الربو إلا هي


أتوقع لو يسوون دراسة ألحين لمعرفة أسباب مرض الربو في الكويت راح تكون النتايج ما يلي


شياب الكويت من مواليد الستينات و نازل فأتوقع الزقاير اللف و التتن


شباب الكويت مواليد السبعينات و الثمانينات فسببها الرئيسي


الموووو لوووو ديييي كااااا


يا جعلها الماحي


تنفخ تنفخ تنفخ لين ما تطلع عينك .. و لا يكون على كل ذاالنفخ يطلع صوت يسوي


صوت رايح مبحوح ومن إزعاج الجهال بالصف ما ينسمع



الكشخه اللي بالصف كانوا يجيبون نفس هذي اللي محطوطه في بوكس و فوطه و حركات



اللي عادي زي حالاتي يجيبون هذي اللي محطوطه بجنطه بلاستك و تتسكر مادري كيف .. بس اذكر من ورى كان البلاستك أحمر


عاد اللي أمه تحبه تجيب له أم هووز


واللي أمه تجيب اللي جدام عينها زي أمي الله يحفظها تجيب لك من هذي


يا بوووووووووووي


هذي تعذيب

عالأقل أم هوز تشوف وين تعزف .. تشوف وين تحط أصابعك .. عالأقل أم هوز تقعد و تحطها بحضنك و تعزف


هذي لااا .. ما ينفع .. لازم وقافي .. إن قعدت طقت برجلك و طلعت من حلجك ماكو فايده .. ولا تشوف شي .. تعزف عالبركه .. ان نزلتها ما توصل اصابعك تحت .. و ان رفعتها سكرت على عينك


طبعا اللحظه المرعبه .. اذا كان اللي جنبك ناسي المووو لووو ديييي كا حقته


ياااا بووووووووووي


و تقول لك الأبله .. عطه يجرب على مالتك


ويـــــع .. من حلج لي حلج


الحمدالله ما جاني ايدز


لا ولا يكون اللي جنبك ما عنده أسنان .. و كلها سعابيل .. ويـــع .. أذكر أنا كل ما أحد استخدم مووو لووو ديكتي عطيته اياها


كانت صديقتي أيام الإبتدائي بنيه سمره .. سمره بزياده شوي .. وايد سمره يعني


كنت أخــاف منها بس بحصة الموسيقى .. ليش كانت حيل تندمج بالنفخ .. و تعطيني ملامح وجه تخليني سنه ما انام

لا حول الله يا رب


طبعا غالبا الأبله مصريه .. و تضبط البنات المصريات يقعدون أول شي عالكراسي و ياخذون الاوكرديون و الإكسلفون و الأورق


حنا الكويتيات طيح الله حظنا تعطينا دف و مثلث


ولا هذي حقة الرقاصات اللي فيها سير و تمسكه بالايدين و تطقطق .. نسيت إسمها


و أمتن وحده بالصف تعطيها الطبل


و المفهين يصفقون .. عاد على مزاج الأبله .. مره بصبعين .. مره ثلاث أصابع كيفها أبله


أستغفر الله يا رب


والله تأثير حصص الموسيقى على نفسيتي أكثر من تأثير الغزو


أنا أطالب وزارة التربية بتعويض نفسي عن إثنعش سنه دراسية تحت بند بدل مسخــرة

Wednesday, November 17, 2010

في العيــــد



وااااي الكعب كسر ظهري


البدله تغزز !! متى نخلص زوارة و أفصخها و ألبس بجامتي


يا..... لا تقعد على قتـرتي


الجهال متجمعين و متربعين عالأرض يعدون العيادي


السؤال الأكثر إنتشارا .. جم حصلت ؟


يمااااا عمي سلطان ما عطاني !! شنووو ؟!! إذلف زين !! توني معطيك !! عيالكم نصابين


خالي علي آنا صرت صف خامس للحين دينار ؟؟ سؤال بتمني


شيلوا هالأغاني و حطوا السعوديه خل نشوف الحجاج .. أسلوب أمـر


يوووووه !! يعني علشان ذابحين خروفكم لازم الغدا لحم ؟؟ دلــع بنـات


يما عطيني دينار و نص بطلب مطعم .. نعم ؟؟ وين عيديتك ؟؟ شريت آي فون .. تفقق جهــال


جزاج الله خير ليش ملبسه بنتج هالقصير ؟؟ جزاج الله خير إنتي، عادي توها صغيره


انشالله هالعيد بس يوزع عيادي .. سؤال القصد منه التطنـز


منو ياخذ عشرين كامله و يعطيني دنانير ؟؟


ألووو .. لو سمحت طالبين عشا صارلنا ثلاث ساعات للحين ما وصل .. سالفة كل عيد


الرياجيل بيدشون يسلمون .. فجأه يصير بالصالة تسونامي .. وين عباتي، جيبي هذا حجابي !! عطوني ثوب الصلاة


بوك عبووود ضااااااع !! فتشوا الخـــدم


:)

Tuesday, November 16, 2010

شـــــكرا








شــــــكرا


لــكل من ســرق فكــرة من أفكـــاري



و نسبــها إلى نفســــه

Monday, November 15, 2010

أضـــحى مبـــارك




جــعل اللــه أيــــامكــم كلــها أعيــــاد


عيـــــدكم مبـــــارك


شوووش

Tuesday, November 9, 2010

عندما يطلع الكويتي زوجته



غالبا مطعم .. و الصورة أعلاه أبدا مالها شغل بالكويتي .. ولا حتى تصير له


ولا حتى يلتقون عند خامس جد .. النقيض النقيض


طبعا يخش زوجته و يقعدها بـ كبينة


و إذا المطعم ما فيه كباين .. أخذ أهو الكرسي المجابل للناس و عطاها الكرسي اللي مجابل الطوفة


و كا طير الحب .. هذا حواره


قعدي بسرعه يا معوده آنا مو قايل لج لا تلبسين كعب .. صوته عالي الكل عيونه اتلاقط يا مال عيونهم البط


لا يبا قعدي جبالي شكو أقعد يمج قاعدين على درج بصف مدرسة إحنا ؟


ليش حاطه مكياج وايد الله يهداج وين رايحين


عدلي هدومج


حطي تلفونج سايلنت رنتج عالية


تكلمي شوي شوي .. وطي صوتج يمنا ناس


لا تضحكين


دخلي شعرج


لا تحاجين القرسون آنا أكلمه بس قوليلي شتبين


ويــه هذا اللي بتاكلينه إسمه صعب .. كلمي القرسون إنتي بس ها شوي شوي


لا تتلفتين


عطرج قوي


ما عندي سوالف شتبين أسولف لج بالله ؟! خل اخلص هاللعبة عالآيفون على ما يوصل الأكل


عطيني أذوق أكلج اللي طالبته يشوق .. و طبعا ياكل ثلاث ارباع صحنها


نزلي جمج !! لما ترفعين ايدج و انتي تاكلين جمج يرتفع فوق


ما خلصتي ؟؟ إكلي بسرعه الله يهداج وراي دوانيه


أي حلو ؟! والله لج خلق .. إكلي كاكاو مع اليهال بالبيت أحسن لج


عندج كلينكس ؟ هااا ما عندج ؟! عيل جنطة هالكبر على شنو ؟


ها حبيبتي عازمتني ؟


و بالنهــاية و اهو منزلها البيت يقول لها


هـــــا .. بعد مــو تقـــولين ما يطـــلعني ؟؟

Thursday, November 4, 2010

إجتمـــاع أوليـــاء الأمـــور



بغض النظر عن ما وصلت إليه من منصب بدرجة وكيل وزارة حاليا في العمل


و بغض النظر عن تفوقي الباهر في الثانوية العامة لحقه تفوق أبهر منه أي أشد إبهارا في دراستي الجامعية


فإنني لا أنــسى


و لا تغيب عن ذاكرتي


تلك السنة النحسة


الله لا يعيدها من سنة


سنة ثالثة إبتدائي .. يا ويـــل حالي عليها من سنة


حيث إني و بسبب ظروف غامضة غير قادره حتى الآن على تحليلها


جبت أربعتش من عشرين في مادة الرياضيات في الشهادة


و أربعتش عند أمي معناها إني قمة في البلادة


و ما بين فيني تعبها المزعوم


المهم .. حزتها كان بعد كل شهادة .. في إجتماع أولياء أمور


و الإجتماع كان غالبا العصر .. ليييييش ؟


أكيد مو علشان الجو أحلى و أبرد !! لا طبعا


علشان كان لزوووم الطالب يحضر مع أهله الإجتماع .. ليييييش ؟


غير إنها حركة تلخص نحاسة و ثقل دم و خباثة إدارة المدرسة


كانت إدارة المدرسة تهدف إلى أن تكون الفضيحة علنية


و الزف من الأهل يكون قدام المدرس .. و الملاحظات من المدرس تكون قدام الأهل


فكــان هذا الإجتماع أبو أربعتش من عشرين جعل الله يغربله .. كابوس بالنسبه لي


و إحراج محقق .. خصوصا و أن أمي عصبية


يعني عادي تطق راسي بطاولة المدرس .. سهالات الوالدة .. ماكو مشاكل


من حرتها تحس إنها هي اللي جايبة أربعتش مو أنا


المهم .. عاد آنا شسويت ؟


ثاني يوم الصبح قبل الطابور


رحت و قطيت وجهي


أقصد إشتركت في نشاط الإخصائية الإجتماعية


و استعرضت عليها مواهبي


و استعدادي لتقديم خدماتي في تنظيم الإجتماع


و عطوني أرقى وظيفة


مسكوني دله و فناجيل


و كنت واقفه عند باب المدرسة أصب قهوة للأهالي .. و بنفس الوقت دلتي كانت عذر إني ما أدخل الإجتماع


معقوله يعني ؟! أهد دلتي و أدخل الإجتماع يما ؟؟ ما يصير .. عيب أنا ملتزمة مع الإخصائية


من يقهوي الأهالي .. الناظرة مثلا ؟

Sunday, October 31, 2010

هـل تغـني و إنـت تســـوق ؟


هل تغني و إنت تسوق ؟



سواء بصوت عالي أو واطي ؟ و هل تحس روحك أهبل و أنت تغني باندماج ؟



ســؤال علمـي أطــرحه عليكم بعد ان طرحته على زملائي بالعمل



طبعا إنت ما تحس روحك أهبل لأنك تغنـي بنص الشـارع لأ


ولو إنه قد يكـون سبب كــافي



تحس إنك أهبل لأن النـاس تعطيك نظرات من نوع



شعلامه هذا مجنون؟



يكلم روحه؟



شوف الأهبل مندمج و مغمض عينه



شوف الهبله تهز راسها



يــا ويلي المجنون يهز رقبته



أكثر شي ضحكني في إجابات زملاء الدوام أثنيــن



خالد: لا ما أغني .. أصفر .. هاهاهاها



عبدالله: لا يبا ما أغني .. أقصــد قصيـــد



:)



أبو محمد عـلى محور آخـر حسسني إني فيفي عبده لمـا رد علي و قــال



لا .. أعوذ بالله ثلاثا من اللي تقولينه .. انا أسمع الذكرالحكيم .. إذاعة القرآن

Tuesday, October 26, 2010

عظــــامي




بينما أنا منهمكة في العمل ..لا أريد أن أضيع أي جزء من الثانية




على برامج تسلية المراهقين .. من تويتر و فيس بوك و ام اس ان و غيره




و بينما كنت أنهي أحد التقارير الثرية اللتي أكتبها




و أردت أن أضع عليها صورة شعار الشركة حتى يتبارك التقرير




و بينما كنت أبحث في فولدر الصور




و جدت هذه الصورة الغريبة




و ما استوعبت وش هي




حتى أسعفتني ذاكرتي الغراء .. حيث عادت بي إلي يجي سنه وره




عندما سقطت و ما أدري شصار في يدي




المهم انتهينا بجبس لمدة ثلاثة أسابيع




و هذه أحبائي القراء .. صورة أشعة عظــام يدي الفقيره لله





مازلت أتذكر الدكتــور و أهو يقولي: إنتي من صجج ؟ طيحة نفس هذي تسوي فيج جذي ؟




عندكم عيش في بيتكم ؟




إنتي تاكلين ؟




طبعا كان يتكلم باستهزاء و يضحك بحكم ان الطيحه كانت بسيطه ومو من مكان مرتفع




هممم أخبي عليكم ليــه ؟؟ تقلبت على سريري المنخفض و اندمجت وانا أتقلب و خذت راحتي و خلص السرير علي فجأه و طحت




بس جذي .. طيحه بارده ما كان فيها أكشن




المهم




الدكتور كان يقول عظامي عـامله زي أعواد الأكل هذي اللي ياكلون فيها الصينيين




الجب ستيك




تشوب ستيك




إسمها سبه يا لطيف




يمـكن بحـكم إنك تـاكل فيها و تحـط الأكل داخل فاهـك و بالتــالي غصبا عليك تسكت فعشان جذي إسمـها




جب ستيك ؟




جـــايز




مــا علينا






المهم: أنا أتطنز على عظــامي كيفي .. ملوووتي .. اللي يتطنز فيكم يــاويله و يا ســواد فجره و ظهره و عصره و ليله




وبعد: ايش رايكم في كــلمة فــاهك ؟

Saturday, October 23, 2010

أسألـــكم الـــدعـــاء




إدعـــولي قبــل أن أدعــي عليـــكم




هــا هــا هــا




هو أنــا أأدر؟




عـن جــد أسـألكــم الدعــاء




و إللي مـا يعـرف يـدعي يوديني أسبــانيــا أعــالج علــى حسـابه




أو يشتري لي بنتلي لأن حزتها أكيــد بطيب




بســنا غشمـــره




آنــا عن جـــد تعبــت




:(

Thursday, October 21, 2010

كمــاشه

بينما تغرد العصافير بالقرب من شباك غرفتي .. و تدق أشعة الشمس باب حوشنا .. يعني إستكــانه


أنهض من سبات نومي .. بكل حيوية و نشاط .. يسبقها حبي للعمل .. أخاف بس


ألبس ملابسي .. و أهرول ناحية سيارتي البنتلي القابعه أمام باب بيتنا .. يارب يجي هاليوم و ترزقني بنتلي يـــــــــارب


أسوق سيارتي بكل هدوء .. فالشوارع هادئه خاليه .. الا من بعض السناجب و الفراشات .. خيال كويتي


أصل المكتب .. و الإبتسامة تملىء و جهي .. كلي حماس للعمل .. طـــل


و بينما أنا منهمكه بين الأوراق و الأقلام .. يدخل علي أقدم موظف عندنا بالشركه .. أيام التعيين من غير شهادات


يدرعم على وجهه من غير لا احم و لا دستور ..مستعجل و يركض كعادته


شووووش شووووش


هلا والله بو فالح آمر


عطيني كماشه ؟


ها ؟ اش كماشته ؟؟ شنو هذي ؟؟


يوووه يا شوووش بسرعه كماشه كماشه


لوهلة حسيت اني اشتغل بقراج /كراج تصليح السيارات .. اهو منخش تحت السياره يصلح و أنا أناوله العده


شنو كماشه هذي ما أعرفها !!!؟


و بينما عيونه تتلاقط على سطح مكتبي يمين و يسار يدور المدعوه كمـــاشه .. بدأت أنا أعطيه و أوريه كل شي عندي


علي ألقى الكماشه اللي يدورها


ما ظلت دباسه .. ولا قلم .. ولا مسطره .. ولا دبوس و كان كل مره يقوول


لا يا شوووش لاااا .. كمااااااشه الله يصلحك كمـــاشه


بديت أتنرفز .. قلت له خلاص ما عندي .. كل شي أوريك تقول لي لأ .. هذي كمــاشه مالتك شيسوون فيها ؟


شوووش كماشه هذي اللي يشلعون فيها الضروس


نعم !! ضروس ؟ لا حول ولا قوة إلا بالله .. مساع عده و سيارات وألحين ضروس و تشلع؟


اي شوووش الي نشلع فيها الأسنان .. مالت الورق .. شسمهم .. الدبابيس


لما قال دبابيس بغيت أقتل روحي


لك ساعه محيرني مره كماشه .. مره تقول ضروس و مره أسنان


طلع يبي هذي .. حسبي الله عليها .. أزمتني




الله يصلحك با ابو فالح


الا انتوا شتسمونها ؟؟ لا يكون كماشه بعد ؟