Monday, November 29, 2010

ميلوديكــا


اسمها ميلوديكا .. بس أذكر إن كل الأبلات اللي مروا علي بإختلاف الجنسيات .. يسمونها


موووو لووووو ديييييييي كااااااااااااااااااااااا


ليش ؟؟ مادري


حتى بت أضن إنها تنلفظ جذي صج


المهم .. تذكرونها ؟


يا بووووووووي .. والله محد جاب لي الربو إلا هي


أتوقع لو يسوون دراسة ألحين لمعرفة أسباب مرض الربو في الكويت راح تكون النتايج ما يلي


شياب الكويت من مواليد الستينات و نازل فأتوقع الزقاير اللف و التتن


شباب الكويت مواليد السبعينات و الثمانينات فسببها الرئيسي


الموووو لوووو ديييي كااااا


يا جعلها الماحي


تنفخ تنفخ تنفخ لين ما تطلع عينك .. و لا يكون على كل ذاالنفخ يطلع صوت يسوي


صوت رايح مبحوح ومن إزعاج الجهال بالصف ما ينسمع



الكشخه اللي بالصف كانوا يجيبون نفس هذي اللي محطوطه في بوكس و فوطه و حركات



اللي عادي زي حالاتي يجيبون هذي اللي محطوطه بجنطه بلاستك و تتسكر مادري كيف .. بس اذكر من ورى كان البلاستك أحمر


عاد اللي أمه تحبه تجيب له أم هووز


واللي أمه تجيب اللي جدام عينها زي أمي الله يحفظها تجيب لك من هذي


يا بوووووووووووي


هذي تعذيب

عالأقل أم هوز تشوف وين تعزف .. تشوف وين تحط أصابعك .. عالأقل أم هوز تقعد و تحطها بحضنك و تعزف


هذي لااا .. ما ينفع .. لازم وقافي .. إن قعدت طقت برجلك و طلعت من حلجك ماكو فايده .. ولا تشوف شي .. تعزف عالبركه .. ان نزلتها ما توصل اصابعك تحت .. و ان رفعتها سكرت على عينك


طبعا اللحظه المرعبه .. اذا كان اللي جنبك ناسي المووو لووو ديييي كا حقته


ياااا بووووووووووي


و تقول لك الأبله .. عطه يجرب على مالتك


ويـــــع .. من حلج لي حلج


الحمدالله ما جاني ايدز


لا ولا يكون اللي جنبك ما عنده أسنان .. و كلها سعابيل .. ويـــع .. أذكر أنا كل ما أحد استخدم مووو لووو ديكتي عطيته اياها


كانت صديقتي أيام الإبتدائي بنيه سمره .. سمره بزياده شوي .. وايد سمره يعني


كنت أخــاف منها بس بحصة الموسيقى .. ليش كانت حيل تندمج بالنفخ .. و تعطيني ملامح وجه تخليني سنه ما انام

لا حول الله يا رب


طبعا غالبا الأبله مصريه .. و تضبط البنات المصريات يقعدون أول شي عالكراسي و ياخذون الاوكرديون و الإكسلفون و الأورق


حنا الكويتيات طيح الله حظنا تعطينا دف و مثلث


ولا هذي حقة الرقاصات اللي فيها سير و تمسكه بالايدين و تطقطق .. نسيت إسمها


و أمتن وحده بالصف تعطيها الطبل


و المفهين يصفقون .. عاد على مزاج الأبله .. مره بصبعين .. مره ثلاث أصابع كيفها أبله


أستغفر الله يا رب


والله تأثير حصص الموسيقى على نفسيتي أكثر من تأثير الغزو


أنا أطالب وزارة التربية بتعويض نفسي عن إثنعش سنه دراسية تحت بند بدل مسخــرة

13 comments:

aL-NooR . said...

ههههههههههههه
مت مت من الضحك
ولا
تفا تيفي ..تفا تيفي
تـــــــــــــــاتي
ما ادري وين و اب
اي مدرسة موسيقية
موجودة هالمقطوعة ..
كنت ارد البيت مسويه انجاز
لا حول ولا قوة الا بالله

لااااااا
و كانت ابلة الموسيقى دينة و منقبة .؟
شلوووووووووووووون @@؟
للحين ماني فاهمة



**********************

عين بغزي said...

ما تشوفين شر و ان شاء الله تتشافين من الربو

MEW said...

لووووول اي اذكرها ، كانت ابله الموسيقى تطلبها في الابتدائي و كانت عندي العادية مو ام هوز و خو الي عنده ام هوز هذا ولد مميز و الكل يبي يرافجه عشان يستعملها
يا زينهم مدرسين الموسيقى في المتوسطة ما كانوا يطلبون منه شي مو نفس الابلات : دفاتر و بيانو وميييلوووودييييكــااااا
و أنا معاج بالمطالبة بالتعويض ياما نقطع نفسنا و صرنا مواصل من وراها

شاي الضحى said...

اعرف الاله

بس ما مرت علي بالمدرسه

:)

Sweet Revenge said...

الله يواليك العافية
مت من الضحك
واحلي شي

والله تأثير حصص الموسيقى على نفسيتي أكثر من تأثير الغزو


الموووو لووووو ديييييييي كااااااااااااااااااااااا
لازم تنحط في المتحف علشان الاجيال يشوفون معانات الطالب قبل ;)

الله يونسج بالعافية ونستينا

le Koweit said...

ههههههههههههه

حصص الموسيقى هذي كانت فلم بروحها :)

دلوولي said...

وااااي صج ضحكت من قلب وذكرت ذاك الزمن الأغبر
الموووولوووديكااا اللي بدون هوز تحول عيونا علشان نشوف واحنا نعزف والابله المصرين لي اشتطت مع الصراخ تشوفين لسان الموت

يعطيك العافيه على البوست التحفه

Engineer A said...

LOOOOOOOOOOOOOOOOOOOOOOL

yo boooooooooooouyyy

entay mo 9ij !! :))))

Um il sa3af wil leef said...

الموليديكا مو شي ..كلها سعابيل
ويييع

cheers said...
This comment has been removed by the author.
عطر الحروف said...

موصج

يقولون إن واحد من الهوامير طاحت بجبدة البضاعه ويبون يصرفونها على ظهر التلاميذ المساكين

انسان said...

ياااااااابووووووي خوش مدونه موفقه

Q8-Borgy said...

هههههههههههههههههه

والله دمج خفيف

بس على فكره ترا لحقت عليها انا بنت الثمانيات ومالتنا كانت باللون البرتقالي