Wednesday, December 30, 2009

شـــاعرة الملـــيون .. شوووش



بينما كنت في المكتب أمارس عملي .. و بينما كنت أتسامر مع بعض الأصدقاء في برنامج المحادثة .. الماسنجر .. أرسلت إلى احدى الصديقات قائلة


ودي أصير شاعره ؟؟


شدي حيلج و صيري


طبعا ودي أصير شاعره رغبة تنظم إلى سابقاتها من الرغبات من مثل ودي أصير أميره و ودي أصير مصوره


المهم


ما مدى رفيجتي تدزلي صيري شاعره و شدي حيلج حتى جاء على لساني من غير حتى ما يمر على مخي بيتين شعريين


بيتين مو واحد


القصيده كاملة ما خذت مني عشر دقايق


يا إلهي


هاو كوووووول أي أاااام


تتابعت الأبيات تتساقط على لساني دون توقف .. حتى بلشت أضحك على روحي


معقوله عندي موهبة شعريه و آنا ما ادري


الحمدالله يارب إن اكتشفتها قبل لا امووت


المهم


رفيجتي كنت كل ما ادز لها بيت تدز لي


لوووول


تخيلوا معاي قرائي الاعزاء .. لووول .. مستهزئة بكلماتي


بس ما ألومها ..ما تعرف شي بالشعر نفسي


ما علينا


بكتب لكم بعضا من ابيات قصيدتي


و قسما بالله العظيم .. اللي ما تعجبه و لا يحاول إنه يتطنز .. راح انزل فيه ديوان شعري ساخر كامل


إستمتعوا .. إي صح


القصيده مالها عنوان .. لأني اتوقع اي عنوان يركب عليها .. قصيده كووول و فليكس آااابل


أقووووول


إنــت أحــلى إنســان بــالدنيـــا

إنــت شعــــــــر إنــت إغنيــه


إنــت كــلامك عجــيب

إنــت أفعــــالك قــويــه


إنــت طيــب فــي صفــاتك

إنــت مـا فيـــك عنجهيـــــه


إنــت تشـــيل عنــي همومــي

إنـــت تستـــــاهل هديــــــــــه


إنــت مــا مثـــلك أحـــــــد

إنـــت روحــك جوهـــريه


إنـــت غيـــمه في سمــــاي

إنـــت امطــــار موسميــــه


هذا جزء من قصيدتي


طبعــا آنا أقدر أحولها من قصيده إلى ملحمه شعريه من ألفيـــــن بيت .. و ذلك لكثرة الكلمـــات التي تنتهي بمقطع


يه يه يه يه


:)


سلامتكم و تعيشون


شــوش إحســــاس مــــرهـــف


ملاحظه : العشاق و الحبيبه .. مرخصة لكم إن تتابدلون كلام قصيدتي بينكم سواء بالايميل او المسجات أو البي بي إم

Saturday, December 26, 2009

هــل نحــــن شعــــب دعـــله ؟




بالضبـــط


هذا شكل و جهي عقب ما أقرى الجرايد و أسمع الأخبار و أشوف المواضيع بالمدونات


إكتشفت إن إحنا شعــــب دعـــله


دعــله و مـــاصخ و دمــه بدى يصيــر ثقيــل


مثل الجاهل المدلل مفرط الحساسية .. إللي إن أحد قال له شي مد بوزه و زعل و كسر ألعابه


ما يعجبنا شي


على كل شي نتحلطم


كل شي نبي


ما نحترم أحد


على كل شي نحتج و نعتصم و نتظاهر


معاهم معاهم .. وراهم وراهم


نحب اللويه


بكل شي مدخلين روحنا


عبالنا محد يفهم الا إحنا


نحب نمسخر بعض


ما نستقــوى إلا على بعض


شمــــاته درجه أولى


مهنتنا التفلسف


نمــــوت على الشعـــارت


مهندسين حملات .. كل شي سوينا له حمله


أهل هبــــات و أتوقع آخر هبه اهي الصراخ و السب و التفلسف بالعلن


آنا ما أقـــول إلا اللــه يستــر عليـــنا من نفسنـــا


حفـــظ اللـــه الكويــت و شعبهــا من كـــل مكـــروه


كـــان معكـــم : شوش الوحيده ال مو دعله الكويتي

Monday, December 21, 2009

عطــاء لا يتوقـــف







هــم صنــعوا البــدايه

و نــحن

نكــمل المشــــوار

شــركة نفــط الكــويت

خمســة و سبــعين عــاما مـن العطــاء

Saturday, December 19, 2009

كتــابي المستعبـــط



بسم الله و الحمد لله و الشكر لله


بعون و فضل من الله


خلصت كتابي اللي قاعده اقراه صارلي


هممممم


والله مادري شكثر صارلي بس وايد


خلصت كتابي و جيت بسكره


كل ما أسكره ينفتح بروحه


الحمدالله و الشكر


أسكره يفرش روحه كما تشاهدون في الصورة أعلاه


أتوقع إن ما خاب ظني .. إما إنه لاعت جبده و صار فيه شلل وما قام يتحكم بأطرافه


أو إنه يستهبل


و آنا أرجح كفة السبب الثاني .. ببساطة لان الكتب مايحوشها شلل


ههههههه


ما يبيلها هندسة يعني


المهم


على سياق آخر .. عندي بوك إل في .. شاريته قبل جم شهر .. غالي حسبي الله عليه


ما كنت بستخدمه حزتها ليش كنت أستخدم واحد توني شاريته بعد .. و خايفة خدامتنا العبيطة تقطه مني ولا مني و اهي تنظف


من حرصي الزايد و خوفي على بوكي إللي قطيت فيه تقريبا نص معاشي خشيته بمكان صعب عشان لا تدله الخدامه


وللأسف


و بفضل و عون من الله


مع مرور الوقت .. نسيت وين خشيت البوك


من كثر ما المكان صعب حتى آنا نسيته


لا حول ولا قوة إلا بالله


شلون ألحين ؟؟ وين البوك ؟؟


شكرا لكم و لمتابعتكم


شوش أمين محفوظ دان براون الطنطاوي


Monday, December 14, 2009

تبـــــــونـي؟؟؟



تبـــونـي أرجـــع ؟؟ و لا أظــل قــاعده عندهـــم ؟؟


ملاحظة: اللي يكسر بخاطري و يقول لي خلج عندهم يعتبر روحه قتيـــل


مع تحياتي: شوش إليزابيث تشارلز البيكاديلي

Sunday, December 6, 2009

مـــا أبيـــــــكم



بس بس بس


ما أبيـــــــــكم


و بــــروح و أخليــــــكم


ملاحظة: ركــزوا على القافيــــه


و مـــا علي فيـــــكم


و لن لن لن أحـــاجيـــــكم


خلكـــم لاهيـــــن في بلاويــــــــكم


واي واي واي إش حلاة كلامي .. بيغمى علي


*Faking a Faint then a Heart Attack*


مع جـــوكم إلي قـــاص عليــــــكم


الصبح شتـــوي و الظهر صيفي يقلــب عليـــكم


حتى الجـــو عامــل عمـــايله فيـــكم


خلــكم مع إستجواباتكم و ندواتكم و إعتصاماتكم و هواشكم و نجرتكم


و حيـــاتكم الكويتــيه الرتيبـــه المملـــه المضجـــره الكئيبـــه المليــقه الرائعـــه اللطيفـــة المتألقــة


قوموا داوموا من الصبح و ردوا بيوتكم العصر جنه مع عندكم هدف بالحيــاة


كل أهدافكم و أهداف مدربينكم آااااوت آااااوت آاااااوت


لا تدريب و لا معسكر ينفع فيـــــكم


ملاحظة: القافية ضاعت مني بس رديتها


لااااااا مالـــت عليــــكم


حتى البرد ما يبـــيــكم


قلب و صـــار رطـــوبه عنــــاد عليـــــكم


وااااي بس تعبت .. حنجى إنكـــسر


المهم


هذا اللي فوق كله علشـــــان أقولــكم إني بســافر و اخليــــكم


بس عيني عليـــــكم


و بعدين يعني ؟؟


بس بس بس


آخـــر مــره


عشر أيــام بالتمـــام و الكمـــال و راده


أقسم بالله إللي ما يشتاق لي و ما يمر هني كل يـــوم و يسأل عني ل ل للل للل


أزعـــل عليـــــكم


و سلامتكم و تعيشوووون


لا توصوني على شي لأني يالله أشيل روحي و أشيل أغراضي


مع تحياتي: الكـابتن شوش جناح اللوفتهانزا الطيار

Tuesday, December 1, 2009

بوست بطاريته تعبانه



أمس .. و لو أول مره في حياتي توقف علي السياره


إهي ما وقفت


إهي عيت تشتغل


يعني خلصت مشواري و ركبت السياره و كلي ثقه إني بروح البيت


ألف المفتاح يمين يسار .. السيارة تكح


يتني ضحكه


آنا: لا لااا مو من صجها


و أرجع أشيل المفتاح و ادخله مره ثانيه ..بقص عليها يعني يمكن تهون و تشتغل


السياره: كحح كححح


آنا: كاااااك لا لا !! من صجها هذي ؟؟


أشوف جدامي ولا ماكو علامه مو شابه ليت


إهي علامة البطاريه .. علامة شي مقلوب و ينقط ماي مادري بانزين مادري دهن


المهم .. عرس كان بالسياره


إشي ليت أصفر .. إشي ليت أحمر


طقتني حوله


نزلت و كسرت خاطر عيال الحلال و سوولي إشتراك


المصري بعد ما خلص تصليح: طرباخ طربااخ طرباااخ


يطق على دبة السيارة إللي جدام .. مادري يسمونها دبه ولا شي ثاني


المهم


آنا: نعم ؟؟؟


المصري: إفتـــــحي


آنا: أفتــح شنووو ؟؟؟


تكفين يعني يبيج تفتتحين شنو و اهوا يأشر لج و يطق لج على دبة السياره اللي جدااام و شوي و يبو س الدبه ؟؟


المصري: إفتحي آنا خايف اكون نسيت المفتاح بتاعي جوه


آنا: ما اعرف من وين تعال إنت شوف


فجها و خذه الريال شغله


المصري: إنتي لازم تركبي بطاريه جديده .. انا عندي وحده موديل طاطوطيط طاطوطيط طاطو طيط


و يشرح ساعه و نص عباله آنا أفهم بهالسوالف .. يعني حده مو وقتك تمشي شغلك !! تشوفني واقفه بنص الشارع و حالتي حاله


المهم


اشتغلت سيارتي و مشت عادي زي الفل .. كان ليل بس ساعة سيارتي اقلبت توقيت فلوريدا و صارت ثنتين الظهر مادري ليش .. آنا بصراحه ما قلت شي خفت تعصب و تقلب فيني


وآنا راده مريت ماكدونالدز .. كنت ميته يوع


درايف ثروووو


لما وصل دوري آخذ طلبي .. قال لي الفلبيني صفطي و آنا أييبلج الطلب لانه زحمه


لووول طبعا مو بهالأسلوب .. جذي يطلع كويتي جنسية أولى مو فلبيني .. قالها لي بالإنجلش بس آنا بعطيكم المخلص


رحت و صفطت .. و عشت الجو .. و سكرت السياره .. و نزلت الشباك .. و رديت الكرسي ورى


مكيفه حدي


آخر روآااان


وصل الطلب


رديت الكرسي و ضبطت أمووووري .. أشغل السياره ولا ال .... تسوي فيني نفس الحركه


آنا: هذي من صجها .. و احاول يمين يسار


السياره: و لا كلمه حتى كحه ما تكح


بغيت أمووووووت


و نطرت ساعه على ما جو خذوني .. إستغليت الساعه و كليت و جبتي


المهم


كان يوووم منيل


بس الحمدالله طاااف


عالعموم


آنا صار عندي خبره ألحين


قمت اعرف أفج الدبه اللي يدام


شوفوا يعني قبل كان ممكن ممكن أفجها


بس طبعا عقب ما أقفل البيبان بالغلط و أطق هرن بالغلط و أقفل الشبابيك بالغلط و افج مال البانزين بالغلط و الدبة ورى بالغلط


تــــالي أطيح على هذا اللي يفج اللي جدام و أفتحها و علامة النصر على ويهي و إبتسامتي من شويخ لي الاحمدي


المهم


صرت أعرف أسوي إشتراك


أفهم بانواع البطاريات


و اهم شي أفهم بالأسعار


بس أبي أحد يعلمني شلون أركب البطاريه اليديده


إلي يبي شي لا يرده إلا جيبه .. و الباجي علي


مع تحياتي/ شوش غلام خلدون مصطفى


اللي يقول هذيل أسامي منو اعطيه بطارية بلاااااش


سؤال بره الموضوع لعموم المدونين .. عنوانكم سندون حبا بالكويت .. و انتوا بتوقفون تدوين ؟؟ شلون ؟

Thursday, November 26, 2009

كــل أضحــــى و حبــايبــي بخيـــــر




إللي بالمسنجر عايدناهم



وإللي بالفيس بوك عايدناهم



و إللي بالتويتر عايدناهم



وإاللي موجودين بالبلاك بيري ماسنجر عايدناهم



وإللي مخزنينهم عندنا بالموبايل .. هم عايدناهم



و مـــا بقى إلا إنتوا



آنا خاشتكم حق آخــــر شي .. لأنــي أحبــكم أكثـــر شي



طبعــا آنا نفس اليهــال .. من أمــس مجهزه ملابسي و ساعتي و خواتمي و تراجيي و عفستي .. و كــل شوي أسوي برووووفه علــى قولتي و ألبسهم و أتمشى بداري و أرجع أفصخهم



شــــدعوا عـــلي .. كل هــذا حمـــاس ؟؟



حمــــاس و لا حــركة أمــل ؟؟؟



أحبـــــكم



و عســـاكم من العـــايدين و الفـــايزين



محدثتـــكم : شــــوش عيـــد ضحـــوي كشخه كشخه

Tuesday, November 24, 2009

لا قـــراده .. مثــل قـــرادتــي



ترن ترن ترن


شوش: ألووو


هيون: شووووش ؟؟


شوش: لأ يدتها !! شرايج يعني ؟؟؟


هيون: وااي مليقه .. و ينج من مساع ما تردين


شوش: مادري عن الموبايل .. في شي منفجر ولا محترق ؟؟ داقه 5 مرات شعندج ؟؟


هيون: قومي نروح سينما ندش فلم


شوش: والله صج ؟؟ طبيعي اللي يروح سينما بيدش فلم ما بيبسط يبيع فوط يعني


هيون: عفيه قووومي بشوف الفلم هذا قبل لا يشيلونه


شوش: خلاص أوكي بس لا تحنين لأني توني راده و مو نايمه الظهر و راسي بينبط


وبعـــد أقــــل مـــن ســــاعه


ترن ترن ترن


شوش: نازله نازله


بالسيــــاره


هيون: بنروح ترى الكوت


شوش: نعم ؟؟؟ ما أكو أبعد ؟؟؟


هيون: لا علشان بمر المنشر تالي


شوش: المنشر ؟؟ إنتي ماخذتني أشوف فلم و لا أخلص معاج مشاويرج ؟؟


الســـاعه ست وصلنــا الكوت و الفلم يبدى ست و نص


على الكاونتر


شوش: لو سمحت فلم الساعه ست و نص


الهندي: فوووووول


شوش: شنوو فوووول !! عمري ما رحت سينما و كانت فول !! وي آر اونلي تو ماكو سيــــتس ؟؟؟


الهندي: نو مادام أووول فول


شوش: هيون يقول فل ؟؟


هيون: تصدقين عاد توقعت .. اليوم أثنين


شوش: أثنين بعينج عمى بعينج !! مطلعتني من بيتنا و يايبتني هني و تالي تقولين توقعت !! شكو يايبتنا دام تدرين أثنين و التذكره بدينار و نص


هيون: شوفي الكتلوج نفس الفلم ست و ربع بالبيرق يمدي


شوش: أي بيرق هذا ؟؟


هيون: مجمع يديد لازق بالكوت


و عقب 20 دقيقه بالزحمه


شوش: هذا اللي لازق بالكوت ؟؟


هيون لا تعليق


ماظل أحد ما طقينه له هرن .. ما ظل رصيف ما صعده جيب هيون .. حتى لقينا مصفط و ركضه للسينما .. ما تشوفون ورانا إلا غبرتنا


هيون: لو سمحت فلم ست وربع


الفلبيني: نو مدام فلم بادي صارله نص ساعه


هيون: اي بندش عادي


الفلبيني: نو مدام آي كانت


هيون لي ألحين مصره تدش .. تكاسر مع الريال جنها بتشتري بدله


شوش: إمشي لا بارك الله بالطلعه إلي طلعتها معاج انا بروحها نفسيتي صفر اليوم


هيون: عفيه عفيه شوفي الحين الساعه 6 و ثلث و يبدى نفس الفلم سبع بليلى .. نتمشى عالراحه للسالميه شرايج ؟؟


شوش: إنتي مستوعبه إنج وديتيني الفحيحيل و تالى العقيله و الحين ناويه تردين السالميه ؟؟


هيون: نتمشى ما ورانا شي


ورضيت و صكتنا الزحمه اللي لها اول ومالها تالي .. ما أشوف إلا ليتات و ما أسمع إلا هرنات و هيون المسكينه حتى ما تحاجيني خايفه مني


الفلم سبع و ربع و ما وصلنا ليلي إلا ثمان إلا ربع


ونفس السيناريو ..الفلم بدى و زحمة ومادخلونا


بس رفيجتي ما عندها شي إسمه يأس .. إلا تدش غصب طيب


هيون: شوشه والله آخر مره .. على حسابي .. الأفنيوز ثمان و نص و في آي بي شقلتي ؟؟


شوش: إنتي ما تفهمين صح ؟؟؟


هيون: بليــــــــــز


و نروح الأفنيوز و امة محمد كلها هناك


شوش: ليش زحمه ؟؟


هيون: اي اي عشان العيد


شوش: والله صج ؟؟ يعني انتي تدرين لوية عيد و تذكره بدينار ليش يايبتنا هالحزه ؟؟؟


وماكو مصفط .. صفطنا فوق سطح الأفنيوز و الاصنصير خربان .. نزلتني ستعش دري


و تتوقعون آخر شي شنو ؟؟؟


طلع في كرسي واحد


!!!!!!!!!!!!!!!!!!!!!!


آاااااااااااااااااااااااااااااااخ يا ربي .. بغيت أطقها بجنطتي والله


لا و تقول حق الريال أقعدها بحظني عادي


سهالات البنت .. عبالها السينما شراكه بين أبوي و أبوها


تقوله عفيه دور عدل


الحمدالله والشكر .. خو كرسي مو إبره .. شنو دور عدل !!! الريال عنده سيستم يااااااا


و بس .. ما شفنا لا فلم و لا عماة عين


هيون: تبين كرسبي كريم


شوش: إنتي للحين تعزمين ؟؟ لا مابي


هيون: زين ليش معصبه ؟؟


هيون: ألحين نرجع البيت و نحجز من النت حق باجر


شوش: والله صج ؟؟


هيون: اي اي أبي المنشر


واااي بغيت أذبحها صج .. رديت البيت راسي وارم


يمكن لو البنيه موديه أحد ثاني جان لقت مكان


بس المتعوس متعوس لو حطوا فوق راسه ميــــت فانوس


كان معاكم من كل مجمعات الكويت بلا إستشناء من الفحيحيل إلى السالميه


شوش سيني سكيب ألفين و إثنعش

Thursday, November 19, 2009

إلـــى متــــى ؟




إلــــى متـــى و آنــا أتغــدى بالسيــــارة كـــل يـــوم ؟؟؟



فــي أحــد نفســي مــا يطـــلع من الــدوام إلا العـــصر و يكـــون ميـــت يـــوع و درب و زحمــه علــى مــا يــوصل بيتهـــم و مــا يمديـــه يــاكل غــداه إلا بالسيــــاره ؟؟؟

Sunday, November 15, 2009

نهـاركم عبيط مثل عباطة اللي معبين لي الإستبيان

تعــريف المفهــــي




والله صج ؟؟ آنا أكمل عنك مثلا؟؟؟

==========

تعريف اللي مالـــه خلــق




طبعا كل الأسئلة جوابها رقـم 2

==========

تعريف العبيـــــط





يعني إذا السالمية مو بحولي عيل وين ؟؟؟ حيدر أباد مثلا ؟؟؟

==========

تعــــريف المستعبــــــط



والنـــــبي ؟؟؟؟ أختـــار بكيف أبـــوي مثلا ؟؟؟

==========

تعــــريف النصـــــاب

ينـــصر ديــــنك على هـــــيك مواصـــفات

أمـــــــــــــــــــوت و أعـــــرف ويـــن تشتغـــــل ؟؟

Monday, November 9, 2009

الكــويت .. الــوطن الغــائــب



إلى كل من يكبرني سنا .. إلى كل من يفوقني علما و منصبا .. إلى كل من أعطته الحياة فرصا أكبر مما أعطيت



إلى من عاصر الكويت وقت ما كانت كويت .. إلى من رأى الكويت حلما .. و عاشه واقعا على أرضها قبل عشرات السنين



إلى من أرهقه الغوص حتى أخرج دانته بيديه .. إلى التاجر الشريف اللذي اشترى و باع الدانه



إلى من زرع نخلا في تراب وطني .. إلى من نقل الماء العذب على ظهره يوم لم يكن هناك غير المالح على أرضي



إلى كل صاحب حظ عظيم .. أعطته الحياة فرصة أن يعيش زمن الكويت الذهبي .. عندما كانت الكويت وطنا .. و كانت الكويت هوية



إلى من عاشوا بسكينة الوطن .. و روحه .. إلى من عاشوا آمنين .. إلى من عاشوا راضين .. إلى جيل أحمد الجابر .. إلى جيل عبدالله السالم .. إلى جيل صباح السالم



إليكم .. أرسل رسالتي



أين انتم مما أنا فيه ؟؟



أين أنتم من الكويت ؟؟


ماذا فعلتم بي ؟؟ ماذا أعطيتوني ؟؟



أتنعمتم بنعم وطني و نسيتوني ؟؟؟



ماذا تركتم لنا ؟؟؟



ماذا علمتم أبناءكم ؟؟ آباؤنا ؟؟ إخواننا ؟؟



أ غلب حب المال حب الوطن ؟؟



أ بنفسي أفدي وطني ؟؟ أو بوطني أفدي نفسي ؟؟




لماذا لم أرى من الكويت ما رأيتم منها ؟؟؟




لماذا عشتم الكويت واحة أمان .. بينما أعيشها حروب و نزاعات و قاعدات عسكريه ؟



لماذا اختلفت معاني الحياة .. بيننا و بينكم ؟؟



كيف عشتم الديموقراطيه بلا سب و قذف ؟؟ كيف كنتم مسلمين بلا تشدد و إرهاب ؟؟ كيف كان غنى النفس أغنى من غنى الجيب ؟؟



لماذا نختلف عنكم ؟؟



بماذا نختلف عنكم ؟؟



لماذا عشتم ديموقراطية بينما أعيش أنا بين أشباحهها ؟؟


لماذا كان إسلامكم راقي بينما إسلامي تشوبه الفتن ؟؟


تنظيمات .. أحزاب .. تفريق .. تشديد ... ترهيب .. إلزام .. إجبار



أ إسلامكم شيء .. و إسلامنا شيء آخر ؟؟


لماذا عشتم راضين .. بينما أعيش أنا بين أناس يتصارعون على المال .. على المنصب .. على الكرسي ؟؟


لماذا كنتم تعملون للوطن .. بينما من أعيش معهم يعملون لحساب الكل إلا الوطن ؟؟



كيف كانت تشبعكم التمره .. بينما من أعيش معهم لا يشبعهم حتى التراب ؟؟



أين الكويت من كل هذا ؟؟؟



محبطة أنا مما أراه .. و محبطة أرضي بهم



ياليتني ولدت قبل زمني بسنين



ياليتني عشت معكم زمن بيوت الطين .. زمن صراع أمواج البحر .. زمن الغاصه .. فيحنها .. كانت الكويت وطنا



و في حيني .. فالكويت ليست إلا وطنا غائب



فمتى تعودي يا كوبت ؟؟

Friday, November 6, 2009

كـــــــــــــــــاك



كــــــــــــــــــــــــاك



إلي يقول ديزني لاند أورلاندو



إلي يقول ديزني لاند إل إيــــــــــه



إلي يقول يورو ديزني باريــــس



لا لا لا ديزني لاند هونج كونج



كـــــــــــــــــــــاك



كل هالطق و التكسر و التفلع علشان الجنــــدول ؟

Tuesday, November 3, 2009

القـــادســـية .. الكـــويـــت


آنا قدساويه .. بس اليوم كويتاويه


لا تنسون العمـــــيد


اليوم الثلاثاء الساعة 6 على ملعب نادي الكويــت


الكرامة السوري VS الكويت الكويتي


اختـــكم


شوش نهير بدر المطوع أحمد عجب السلامه


ملاحظات


قسما بالله إللي يقولي ماكو شغل تطالعين أندية كويتية يا ويله مني


شكرا للأخ الفاضل حاكي عقالي على صورة شعار نادي القادسية الشوشي

Friday, October 30, 2009

محــــاولات شــــوشيه



محاولات بائسة مني للبحث عن هــواية


إلا غصب يصير عندي هــوايه مالي شغل


غير القراءة و النت و السوق و النوم و الأفلام


أبي هواية من نوع آخــر


حاولت أكتب طلعت فاشله


بصير شاعرة غصب .. بيتين على بعض ما عرفت أركب


قلت برسم .. كل ما مسكت الورقة لا إراديا أرسم رسميتين ما أعرف أرسم غيرهم من كنت بالإبتدائي


قطوه لابسه شباصه


و سيـــارة طالع منها دخــان


اللي يشوفها يقول صــاروخ باتريوت مو سيــارة


لا و دايما أرسم الجامات فيها حماية ما أدري ليش


بس أهم شي إن سيارتي ب تايريـــن فقط مو أربعة


لووووول و نسيت قمة التناقض بقطوتي


لابسة شباصة بس كله أحط لها شوارب مادري ليش


المهم .. ما نفعت رسامه .. قلت أصير رياضية


دشيت جيم و حاشتني السواين فلو .. أتوقع هذي كانت إشــارة من الله يحاول يبين لي فيها إن إنتي وين و الرياضة وين


المهم .. قمت أصور


ما ظل قلم .. ما ظلت كيكة .. ما ظلت وردة ما ظل قوطي بيبسي .. كل شي صورت


ما يصير يعني ما أفلح بشي


حتى جاءت هذي اللحظه


وإلي كنت فيها على الشاطيء


و لقطت هالطير


و صورته خـــوش صورة


شــــرايكم ؟؟؟ أنفع مصــورة ؟؟


خلوني آنا .. شرايكم بطيري بس و الحركة الرياضية اللي مسويها ؟؟


حطمــــــــــــني

Wednesday, October 28, 2009

شــوش فــي معــرض الكتـــاب




أتوقع آنا أول وحده داشه المعرض



هذي أول طلعة لي عقب السواين على فكرة



المهم



لما نزلت من سيارتي كانت الساعة تشير إلى عشر و ثمنتعش دقيقة



لوية بره .. سيارة إسعاف .. دوريات .. سيايير التلفزيون



أتوقع هذا كله علشان تغطية الإفتتاح أكيد عيل حقي ؟؟ إللي الحمدالله كان شكله توه خالص لما دشيت



ماحب اللوية و الزحمة و التلفزيونات



البابارتزي وين ما أروح ألقاهم من جذي طالعه الصبح



المهم



توني داشه المعرض ولا يمسكني واحد من تلفزيون الكويت .. تسوين لقاء ؟؟ قلت له لأ مشكور ما أحب



مشيت



ولا ياربي !! التلفزيونات تلاقطني



صدقت روحي .. طلعت منظرتي أطل فيها .. لبست نظارتي .. أنا كله عبالي إن لبست النظارة محد يشوفني .. قلت لكم ما أحب الباباراتزي .. الشهره متعبة مالي خلق .. و كملت أمشي



إختي ممكن نسوي معاج لقاء سريع عن المعرض ؟؟



ههههه لا لا مشكور .. و إبتسامتي ماكو أعرض منها



صباح الخير مدام .. تحبي نعمل معك إنترفيو سريع ؟؟؟



لا لا .. هههه .. لا لا مابي



مادري ليش كانت تجيني الضحكه كل ما وقفني أحد ! حسيت روحي مهمة يمكن ؟



المهم



وقفت في مكتبة من مكاتب الجناح السوري و لا أسمع وحده من وراي



هــــاي



آنا حاقرة عبالي ما تحاجيني



ردت البنيه .. هـــــاي



شوش: هلا هلا



تعملي لقاء تؤولي رايك في المعرض لبرنامج رايكم شباب ؟؟



شوش: هههههه جتني الضحكه مره ثانيه .. لا لا مابي أستحي



لقاء صغير أوولي المعرض حلو مش حلو .. عاجبك مش عاجبك ؟؟؟



شوش : لا مشكورة مابي



و فجأه إذا بصاحب المكتبة مادري اللي يبيع فيها بو كرش يحدثني قائلا



مكتبجي: ليش ما عملتي معها اللقاء ؟؟؟



شوش: بقلبي أقول: و إنت شكو ؟؟؟ نعم ؟؟ لا مابي



مكتبجي: ليش ما بدك ؟؟؟



شوش : ياربي !! مابي أستحي ما أحب



مكتبجي : إي ما بدها حيا هاي !! كلمتين بتؤوليهم و هن بيزبطو كل شي

شوش: بعد مابي



مكتبجي: إي والله حــرام



شوش: وانت ليش ضايق خلقك هالكثر ؟؟؟ خو اللقاء معاي مو معاك ؟؟؟



مكتبجي: إي كنتي عملتي دعاية للمكتبه !! مو إنتي وااااءفه فيها !! إي كانت حلوه إلنا و إلك



يمه منه .. يدور الدعاية على حسابي .. و آنا عبالي يبيلي الشهره



مالت



المهم



المعرض بوجهة نظري المتواضعة مو حلو .. بل قد يكون يقلب الجبد .. بل قد يكون سيء .. بل قد أعطيه أربعة من عشره



ما فيه شي جديد .. كتب قديمه مكرره



الجناج المصري تقريبا كان أحسن شي بس هم مبالغ بكتب عبدالحليم و كوكب الشرق و الملك فاروق



الجناح السوري كان أوكي



الأردني كله عن الملك عبدالله



السعودي .. مره أخرى كله عن الملك عبدالله



البحريني جنه كان مكتبة وحده بس و فيها كتب أطفال



اللبناني مع إحترامي لكل المذاهب بس ما شفت عندهم غير كتب الشيعه و حزب الله و نصر الله و الأئمة .. إنصدمت إن أغلب مكاتبهم إسلامية



الكويتي أغلبه عن حكام الكويت و أصول القبائل



طبعا ماكو كتب باللغة الإنجليزية إلا قصص الجهال .. كنت بتحلطم بس تالي ذكرت إنه معرض الكتاب العربي سو مالي حق



المهم



و آنا أفتر بالمعرض كان في واحد الظاهر يطوف عالمكاتب بنفس الترتيب اللي آنا أدور فيه .. كل ما أدش مكتبة .. شوي و يدش وراي .. و كل ما يسبقني و يطلع أكمل المكتبات بالدور ألاقيه جدامي



المهم .. كان طول ماهو يفتر و أهو يسأل عن كتاب .. كل ما يسأل عنه يقولون له ماكو .. ممنوع .. ما طلع من الرقابة



الشاب: لقيتي شي حلو ؟؟



شوش: لا والله .. إنت ؟؟



الشاب: يعني .. أغلب اللي أبيه ما لقيته .. معرضنا صاير مو شي



و فتح جيسه يوريني كتبه بس ميوله غير عن ميولي



بالنهاية .. و تقريبا على ما طاحت ريلي و آنا أدور .. صادفته و قالي ترى لقيت الكتاب



صج ؟؟؟ مو ممنوع ؟؟؟



رد علي إمبلا .. جزئين مشوهم الرقابة و جزء مسجون .. روحي إخذيه ترى حلو



و ما طلعت من المعرض الا ب هالكتاب إللي أصلا مادري شسالفته بس من كثر ما كان الشاب متشوق يدوره خذيته





ملاحظات شوشيه من المعرض



الأسعار مبالغ فيها .. أقل كتاب 5 و 6 دنانير .. إســـــدعواااااا



زوالي المعرض جديده .. كوني رايحه مبجر كانوا للحين يلزقون فيها .. ريحة المعرض كانت بتكس



دوار المعرض الي جبال قاعة ستة ليش سايدين رايح و راد ؟؟ حاشتني حالة إنفصام شخصية و شيزوفرانيا ليما إستوعبته و تفاهمت معاه و طلعت منه



ماكو أحد يبيع برد ولا ذرة ولا نفيش ولا بيبسي .. كنت ميته يوع و عيوني إتلاقط أدورهم بس ما حصلتهم.. يمكن علشان رايحه الصبح ؟؟



أحلى شي .. في مكتبة حاطه كتبها للعرض فقط .. مادري ليش



الكاتب الزميل أحمد الحيدر منزل كتاب فاضي بالإضافة إلى كتابه خنفروش .. إيمانا منه إن الحياة صفحة بيضة .. الكتاب هذا يتوزع ببلاش



أشكر الشياب الكويتيين اللي كانوا قاعدين في ... فييييييي .. ياربي نسيت إسمها .. بس هذي مالت التراث الكويتي .. المهم كل اللي يبيعون فيها شياب كويتيين بس نشيطين ماشالله



ثلاث مرات و آنا أتمشى ينفصخ عزكم الله نعالي من ريولي .. بغيت أقلب على ويهي أكثر من مره



اللقاءات مو علشان آنا باريس هلتون النسخة الكويتية .. بس علشان المعرض فاضي و ما فيه أحد غيري



وبس



كان معكم من معرض الكويت الدولي للكتاب العربي القديم المكرر الغالي و شوي مغبر و لازم تنظفه بكلينكس ديتول



شــوش نجيــب محفــوظ نـــزار القبـــاني