Tuesday, November 24, 2009

لا قـــراده .. مثــل قـــرادتــي



ترن ترن ترن


شوش: ألووو


هيون: شووووش ؟؟


شوش: لأ يدتها !! شرايج يعني ؟؟؟


هيون: وااي مليقه .. و ينج من مساع ما تردين


شوش: مادري عن الموبايل .. في شي منفجر ولا محترق ؟؟ داقه 5 مرات شعندج ؟؟


هيون: قومي نروح سينما ندش فلم


شوش: والله صج ؟؟ طبيعي اللي يروح سينما بيدش فلم ما بيبسط يبيع فوط يعني


هيون: عفيه قووومي بشوف الفلم هذا قبل لا يشيلونه


شوش: خلاص أوكي بس لا تحنين لأني توني راده و مو نايمه الظهر و راسي بينبط


وبعـــد أقــــل مـــن ســــاعه


ترن ترن ترن


شوش: نازله نازله


بالسيــــاره


هيون: بنروح ترى الكوت


شوش: نعم ؟؟؟ ما أكو أبعد ؟؟؟


هيون: لا علشان بمر المنشر تالي


شوش: المنشر ؟؟ إنتي ماخذتني أشوف فلم و لا أخلص معاج مشاويرج ؟؟


الســـاعه ست وصلنــا الكوت و الفلم يبدى ست و نص


على الكاونتر


شوش: لو سمحت فلم الساعه ست و نص


الهندي: فوووووول


شوش: شنوو فوووول !! عمري ما رحت سينما و كانت فول !! وي آر اونلي تو ماكو سيــــتس ؟؟؟


الهندي: نو مادام أووول فول


شوش: هيون يقول فل ؟؟


هيون: تصدقين عاد توقعت .. اليوم أثنين


شوش: أثنين بعينج عمى بعينج !! مطلعتني من بيتنا و يايبتني هني و تالي تقولين توقعت !! شكو يايبتنا دام تدرين أثنين و التذكره بدينار و نص


هيون: شوفي الكتلوج نفس الفلم ست و ربع بالبيرق يمدي


شوش: أي بيرق هذا ؟؟


هيون: مجمع يديد لازق بالكوت


و عقب 20 دقيقه بالزحمه


شوش: هذا اللي لازق بالكوت ؟؟


هيون لا تعليق


ماظل أحد ما طقينه له هرن .. ما ظل رصيف ما صعده جيب هيون .. حتى لقينا مصفط و ركضه للسينما .. ما تشوفون ورانا إلا غبرتنا


هيون: لو سمحت فلم ست وربع


الفلبيني: نو مدام فلم بادي صارله نص ساعه


هيون: اي بندش عادي


الفلبيني: نو مدام آي كانت


هيون لي ألحين مصره تدش .. تكاسر مع الريال جنها بتشتري بدله


شوش: إمشي لا بارك الله بالطلعه إلي طلعتها معاج انا بروحها نفسيتي صفر اليوم


هيون: عفيه عفيه شوفي الحين الساعه 6 و ثلث و يبدى نفس الفلم سبع بليلى .. نتمشى عالراحه للسالميه شرايج ؟؟


شوش: إنتي مستوعبه إنج وديتيني الفحيحيل و تالى العقيله و الحين ناويه تردين السالميه ؟؟


هيون: نتمشى ما ورانا شي


ورضيت و صكتنا الزحمه اللي لها اول ومالها تالي .. ما أشوف إلا ليتات و ما أسمع إلا هرنات و هيون المسكينه حتى ما تحاجيني خايفه مني


الفلم سبع و ربع و ما وصلنا ليلي إلا ثمان إلا ربع


ونفس السيناريو ..الفلم بدى و زحمة ومادخلونا


بس رفيجتي ما عندها شي إسمه يأس .. إلا تدش غصب طيب


هيون: شوشه والله آخر مره .. على حسابي .. الأفنيوز ثمان و نص و في آي بي شقلتي ؟؟


شوش: إنتي ما تفهمين صح ؟؟؟


هيون: بليــــــــــز


و نروح الأفنيوز و امة محمد كلها هناك


شوش: ليش زحمه ؟؟


هيون: اي اي عشان العيد


شوش: والله صج ؟؟ يعني انتي تدرين لوية عيد و تذكره بدينار ليش يايبتنا هالحزه ؟؟؟


وماكو مصفط .. صفطنا فوق سطح الأفنيوز و الاصنصير خربان .. نزلتني ستعش دري


و تتوقعون آخر شي شنو ؟؟؟


طلع في كرسي واحد


!!!!!!!!!!!!!!!!!!!!!!


آاااااااااااااااااااااااااااااااخ يا ربي .. بغيت أطقها بجنطتي والله


لا و تقول حق الريال أقعدها بحظني عادي


سهالات البنت .. عبالها السينما شراكه بين أبوي و أبوها


تقوله عفيه دور عدل


الحمدالله والشكر .. خو كرسي مو إبره .. شنو دور عدل !!! الريال عنده سيستم يااااااا


و بس .. ما شفنا لا فلم و لا عماة عين


هيون: تبين كرسبي كريم


شوش: إنتي للحين تعزمين ؟؟ لا مابي


هيون: زين ليش معصبه ؟؟


هيون: ألحين نرجع البيت و نحجز من النت حق باجر


شوش: والله صج ؟؟


هيون: اي اي أبي المنشر


واااي بغيت أذبحها صج .. رديت البيت راسي وارم


يمكن لو البنيه موديه أحد ثاني جان لقت مكان


بس المتعوس متعوس لو حطوا فوق راسه ميــــت فانوس


كان معاكم من كل مجمعات الكويت بلا إستشناء من الفحيحيل إلى السالميه


شوش سيني سكيب ألفين و إثنعش

32 comments:

جبريت said...

هههههههههههههههههههههههههههههههه

اي شوفي الفلم معاها باجر يمكن القراده راحت منج لوووول

{~المباركية~} said...

انا مادري شنو الي طرى على بالي امس ورحت السينما على بو انه بدخل فلم 2012
كل ما اروح مكان يقولي ماكو حجز و نفس سالفتج رحنه من مجمع لي مجمع
اخر شي رحنه فلم اطفال اسمه شيرت كان حده فلم حلو وقوي مادري ليش القاعه كانت خاليه
وبعدها رحنا تعشينا بهارد روك

نون النساء said...

لوووووووووووووووول


انتي صكيتي علي بالقرادة


ولا طالعه من البيت ابنجر على طريج الفحيحيل أرد اطلع السالمية
تصيدني الكاميرا طايفه الإشارة خلال ساعتين




هههههههههههههههههههههههههههههههه
ماسوت عليج فلم


انتي سويتي لنفسج فلم

:P~


خلاص حجزو مبجر من النت وخلصوا اموركم

Zaydoun said...

انزين ما قلتيلنا أي فيلم كنتوا بتشوفونه

reemas said...

LOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOL

والله ضحكتيني

اكو احد الحين يطلع بدون ما يحجز اون لاين ؟
بس ودي اعرف اي فيلم هذا ؟

((( أبـوغــرايــم ))) said...

ههههههههه

يابووووووي

شكثر ما إتحلطم هالبنت

أنتي على تحلطمج هذا أكيييد بتصكج القراده هههه

والله تبين الصراحه ,, عفيه عليها تحملتج :))

زين لي ما رحتوا سينما الجهره عالاقل تشوفون أفلام واقعيه و حقيقيه صجج هههه

أقووووووول

يالله عاد بسج تحلطم

البوست الجاي أبي نكت زييين

هههههه

عاادي امووون اموون

:)))

aL-NooR . said...

لأ لا مو صج !!
اهيا مسكينة ..تبي تونسج بس الظاهر كا كنتي مشتاهية الطلعة وايد ..لو صج بخاطرج جان ..من اول مرة
دشيتوا ..

اي فلم ؟
باجر اطرشلج كومار اييبلج اياه
:p

*********************

الزين said...

لوووووول

ولهت على سوالفج الناطعه


والقراده لها اصحابها بعد قلبي


الله يبعدج عنها

:**

sayed said...

مدونة جميلة جدا بالتوفيق
الراي والراي الاخر
http://sayedahmed.blogspot.com/
فرص عمل
http://sayedahmed.blogspot.com/2008/08/blog-post_13.html
اخر نكتة
http://aboezeec1.blogspot.com/
مشروعات صغيرة
http://mony99.blogspot.com/

Hamad said...

LOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOL

Shoosha la wallah mo 9ej kil hal toqobs o still 3aysha allah yekoon eb 3oonch wallah .. bs jad hayoon hathe ma 3ema3t aw sheft a7ad eb qowat bas'ha etha 7a6at shai in her mind tsawee tsawee :) .. bs mako fayda dam elmoraselah lel7een feech .. allah ye7af'6ch men hal qaradaaaaaaaaaaaa

رورو الشخبوطه said...

السلام..

واي لو انا جان نتحرت خخ..

بس زين عندها اراده وزين انج مسكتي نفسج..

عاد بتروحون اليوم او لا :p

ChuBBy-Doll said...

hehehehehe Masewat 3aleech hal lafah ..

Shaikha said...

LOOOOOL !
انا وحده ، اشاركج القراده ذاتها ;P
لاني مريت بالموقف نفسه تماماً !

SHOOSH said...

جبريت
=====

إنســـــى

:)

SHOOSH said...

المباركية
=========

لا آنا إلي ماي راسها قافل إلا فلمها ولا ماكو

SHOOSH said...

نون النساء
===========

آنا مره مخالفاتي كانت 450 دينار

أسبوع منخشه بداري ما أطلع من الخوف

:)

لا تطوفين إشارات

SHOOSH said...

Zaydoun
=======

يا مرحبا يا مرحبا

زيدون معلق عندي ؟؟؟

:)

2012

فلم نهايةالعالم على قولتهم و نهاية يو كلن من أتعس أيام حياتي

SHOOSH said...

((( أبوغرايم)))
===============

تمووون ليش لأ

إنشالله .. قدم طلب بمواصفات البوست إليي تبيه

:)

SHOOSH said...

reemas
======

إي .. إاللي يطلع على غفلة نفسنا

:/

SHOOSH said...

الزين
=====

و عنج يالزين

:****

SHOOSH said...

aL-NooR.
========

آنا أعرف راااااج

:)

SHOOSH said...

ChuBBy-Doll
============

7addah !

SHOOSH said...

رورو الشخبوطه
=============

و عليكم السلام

لا ثم لا ثم لااااا

:)

SHOOSH said...

Hamad
=====

te'97ak huh ??

SHOOSH said...

Shaikha
========

و الحل ؟؟؟

شنو علاج القرادهو الحظ الردي ؟؟؟

شاي الضحى said...

لوووووووووووول

انا اذا بروح السينما لازم احجز اون لاين لو شنو ما اروح واوقف وانطر يقولي في حجز ولا لا

واذا كان معلق ادق على المدير يحجزلي لوووووول

Sweet Revenge said...

واي شوش ابداع
طلعه خيالية ,ذكرتيني بوحدة رفيجتي موديل لايأس مع الحياة
جربي اليوم يمكن الحظ المنسدح يقعد
;)

Engineer A said...

hehehe UNbelievable!!

at least u had a road trip from south to north!

Better luck next time!

SHOOSH said...

شاي الضحى
==========

إنتي كشخه تعرفين المدير

إحنا ما نعرف

:)

SHOOSH said...

Sweet Revenge
=============

هذيل الي نظام لا يأس مع الحياة بالهم طوييييل

أحسدهم عليه

:)

SHOOSH said...

Engineer A
==========

Exactly ! South to North!

sღღʍγ ℓღνєℓγ said...

LoooooooooooOOOOOooooooooooooLz

فطست ظحك

لووول

يالله خيرها بغيرها