Tuesday, December 28, 2010

تصبحـــون علــى خيــــر


المكان ؟ المستشفى الأميري .. على سريري مغطاة بفراش وردي مرسوم عليه كيتي


الزمان ؟ منتصف الليل .. قبل ثلاث أيام من بداية السنة الجديدة


المزاج ؟ رايق إلا من صوت صراخ عجوز جنبي ربي يشفيها


الهمه ؟ عالية بإذن الله يغلبها خوف بسيط و ترجع تغلبه


النفسية ؟ مية مية يتخللها رهبة من إني أصحى من البنج و هم لسه ما خلصوا


اش جابك هنا ؟ عندي قسطره بكره في الساعة السابعة صباحا


تدخنين ؟ طبعا لأ


عمرج فوق الستين ؟ بالله عليك !! تتمسخر ؟ و لا حتى فوق الثلاثين .. لسه شباب


أجل ليش القسطره ؟ نصيب


طيب و ش تبين ألحين ؟ بعايد ربعي بالسنه الجديده


لسه بدري !؟ بدري من عمرك .. آنا بعايدهم ألحين .. بنشغل نقاهه و مواعديني يسفروني


وين بتروحين ؟ بيروت


تحبيها ؟ عادي


كيف كانت 2010 ؟ عجيبه


حبيتيها ؟ مررررره


وش تعلمتي منها ؟ وااااااجد


عطيني رؤوس أقلام ؟ لا ألحين دايخه أعطيك اياها لما اطلع من العمليات بخير


كيف ودك تكون 2011 ؟ أبيها حلوه .. و شفافه .. و سريعه .. و كلها مفاجآت طيبه .. و كل أحبابي بخير .. و ما أفقد أحد منهم .. و أكون أنا أكبر و أحسن .. أبي أروح ديزني لاند .. و أبي أشتري رولكس .. و أبي جنطه هيرميس برتقاليه .. و أبي أصير دكتوره


تصدقي إنك أنانية؟ أفا .. ليش عاد ؟


كل اللي تمنيتيه لك .. ما تمنيتي شي لغيرك !؟ ما علينا .. و الكويت ؟


وشفيها الكويت ؟


كيف ودك تكون ؟ هممم .. الكويت هي الكويت


و ناس الكويت ؟ ياااه .. غلبه .. أقولك لما أصحى


خايفه ؟ هممم أربعه من عشره


تخافي الموت ؟ لأ


أجل ليش كاتبه وصية ؟ علشان حلالي لا يضيع


عندك فلووس ؟ لوول .. عندي .. على قدي


تبين أنام عندك ؟ همم .. اي ليش لأ


تسولفين لي ؟ لا .. تسولف لي


تبين شي من ربعك ولا خلاص ؟ أبي


و شتبين ؟ أبي يدعون لي أقوم بعافيه .. ولا عاد أجي هني مره ثانيه


إنت ضعيفه ؟ أتحدى تكون مكاني .. و بتعرف شكثر أنا أقوى منك


تعور الإبره اللي بيدك ؟ نتفه بس .. ما عدت أحس فيها ألحين


ليش خليتيني أصورك ؟ ذكرى .. عشان لا جيت هنا بعد سنه أقرى و أضحك


تحبي توثقي ؟ لازم نوثق


ننام ألحين ؟ ننــام

29 comments:

مَـــــعْــــمَــــعَـــــه said...

أسأل الله العظيم رب العرش العظيم ان يشافيج ويعافيج ويخليج حق اهلج وربعج وناسج وكل من يعزج وتعزينه

ما تشوفين شر والحمدلله عالسلامه مقدما ان شاء الله

عين بغزي said...

ما تشوفين شر ان شاء الله و أجر و عافية
أتمنى لج الصحه و العافية و نجاح عمليتج

NewQ8 Bride said...

ma tshofeen shar yaraaab 7abeebteee :* 6amneena 3aleech

فــــــرنـــــــاس said...

في مواقف متعددة تذهب مني أغلب الكلمات ولا اهتدي لها درباً. وما قرأته أضاع مني ما تبقى منها.

لا بأس يا عزيزتي .. أنا متأكد بأنكِ سوف تحتفلين بالسنة الجديدة بفرح وبابتسامة رائعة كما كنتِ ترسمين الابتسامة الدائمة على وجوهنا كلما زرنا هذا المكان

كل عام وأنتِ بخير وصحة وعافية وسلامة
فرناس

حياتي هدف مو عبث said...

الله يقومج بالسلامة
وماكو إلا العافية القسطرة صارت سهله لا تحاتين

إن شاء الله تردين وانت بصحة وعافية وماتشوفين شر ياااارب

(:

7osen said...

ماتشوفين شر
الله يقومج بالسلامة

اجر وعافية

Anonymous said...

الله يشفيج ان شاء الله بحق أمير المؤمنين علي بن ابي طالب

خديجة البهاويد said...

حياتييييييييييييييي :(
تقومين بالسلامة ان شاء الله باذن واحد احد

FourMe said...

Alah yshafech o y3afech w yb3id 3anich kl mrath wla y3oodich 7ag hal mokan. Rabich gadir 3ala kl shay o gowy. Salmat shooshz matshofeen shar dear :*

La tkhafen mn shay sahalat. Ajir w 3afya inshallah.

Sn3a said...

salamaaat dear
ma tshofeen shr

lebanon 3ad?;p
chan waddoch naqaha london

Sweet Revenge said...

الله يارب يشفيج ويعافيج وبيت مكة يوديج
وعسا هالسنة سنة خير وعافية علينا كلنا
وتحصلين كل الي تبين

Sami said...

الله يقومج بالسلامه ..مأجوره انشالله

الاوركيده said...

ماتشوفين شر انشاء الله واجر وعافيه ولاباس عليج والله يقومج بالسلامه انشاء الله ويشافيج ويشافي جميع مرضى المسلمين اللهم آمين

Anonymous said...

زعلت وانعفس صباحي والظاهر كل يومي
اي جناح واي غرفة انا بروح برج احمد آخذ ارباح الاسهم وامر عليج اعطيج من دمي فصيلتي
o
أنا ماعرف اسمج ولا شكلج ,, بس اذا شفتي شايب يطل عليج ويروح ترى انا ,,

طهور ان شاء الله
^
^
^
^
^
^
شايب مزيون

д7ℓάм said...

اسأل الله العظيم رب العرش العظيم ان يشفيك
ماتشوفين شر يارب
ربِ يقومك بالسلامه
وتفرحين اهلك واحبابك
وتحققين طموحاتك
وان شاءالله سنه خير عليك يارب

سلة ميوّة said...

ماتشوفين شروعسى الله يشفيج

يايتج باجر


بتبطلين عيونج والا تفاحه واقفه فوق راسج:****

عسى ربي ياجرج ويقومج بالسلامة :**

عثماني said...

سلامات ان شالله

و ما تشوفين شر

عسى الرحمن يشفيج و يرجعج سالمة غانمة

بومريوم said...

سلامات
انا مسويها مرتين....

تقومين بالسلامة

Danderma said...

Insha2 Allah ma 3leech illa il 3afiya... salamat hon ma etshofeen shar...

why me said...

حبيبتي شوش

:*


كل عام وانتي بخير مقدما


ويارب
تقومين لنا سالمه وانتي بصحه وعافيه



هذي الدنيا


حبيبتي
أتمنى لج دوام الصحه والعافيه
:*

~أم حرّوبي~ said...

أجر وعافيه والله يقومج بالسلامة يارب

رورو الشخبوطه said...

تقومين بالسلامه يارب..

واجر وعافيه..

الجودي said...

ما تشوفين شر حبوبه

أنا أحبج إنت بطلة روحج الحلوة إلي

كتبتي فيها حبيتها ربي يشفيج

طهور يا قلبي و إن شاء الله تطلعين

بالسلامه من المستشفى و نتايج القسطرة

ماكو احلى منها ولا تحتاجين تعودينهم

آمين

Manal said...

ما تشوفين شرحبيبتي شوشو
والله يقومج بالسلامة وتحتفلين بالسنة الجديدة في بيروت عند الصخرة بالروشة
:))

بالجو الحلو والصحبة الاحلى واذا تبين مرافق ترا جاهزين
:))

وان شاء الله السنة الجديدة تكون سنة خير عليج وتكونين بصحة وعافية يا رب

:)

Safeed said...

ما تشوفون شر إن شاء الله،
أجر وعافية، وتقومون بالسلامة بإذن الله
وأسأل الله عز وجل أن تكون سنة خير وعافية وصحة لكم

Katkoota xD said...

حياااتي ما تشوفين شر انشالله

اجر و عافية ..

Hope said...

اجر و عافيه ان شاء الله
الله يشافيج يا رب

maram said...

ما تشوفين شر أجر و عافيه

دستورنا سورنا said...

أسأل الله العظيم رب العرش العظيم ان يشافيج ويعافيج ويخليج حق اهلج وربعج وناسج وكل من يعزج وتعزينه

ما تشوفين شر والحمدلله عالسلامه مقدما ان شاء الله