Monday, October 5, 2009

يا فتاح يا عليم ..يا مغازلجي يا لئيم





صبــــــــاح الخيــــــــــر


كيف أصبحتم ؟؟؟؟ إنشالله بخيـــــر ؟؟؟


اليوم قعدت من النوم الساعة سبع الصبح .. عندي شغله بخلصها على العشر .. من أمس كنت مقرره إني أصحى مبجر و أروح أقعد لحالي بكوفي شوب عالبحر أغير جو و أقرى كتابي .. بما إن الجو صاير صراحه عجيب الصبح فكانت فرصه أطلع


الساعة ثمان إلا ربع بالضبط كنت قاعده في كاريبو كوفي .. بما إني ما أحب القهوه .. فشربت عصير برتقال و كليت براوني لأني كنت ميته يوع


بلشت أقرى كتابي .. و بعد مرور ربع ساعة بالضبط و إذا بي ..... أسمع صوت تصفـــــيــــــــــــر


إلتفت وراي بشوف شالسالفة (لأن أصلا كان فاضي و مافيه إلا آنا) و ياليتني ما التفت .. ولا شباب أثنين قاعدين يضحكون


قلت بيني و بين نفسي بعد ما رديت راسي بكتابي .. الحمدلله و الشكر !! و الله فراغه !! شمقعدهم هذيل من الصبح ؟؟؟


في أحد يغازل على الريج !!! بعدين شخباري فكرة المغازل أصلا !! منو يصفر هالأيام !! كناري آنا تصفر لي ؟؟


المهم .. تغافلت التصفير و رديت أحاول أركز في كتابي .. حلفت ما أقوم .. آنا طالعه و طاقة طريج من الصبح و الجو شحلاته .. محد يخرب طلعتي



و في وسط إمتعاضي و تحلطمي على روحي و إذا بالشاب رقم واحد يصرخ قائلا


شاب رقم 1 : يا حليــــــــــــــلها قاعده تدرس


شاب رقم 2 : لا و فرنسي بعد

شاب رقم 1 : بووووووووووووووو نجوااااااااااااااااااااااااااااااااااااار


شاب رقم 2: يو قو إكسااااااااام تودااااااااااي ؟؟؟


نعم ؟؟؟؟ بونجوااااار شنو ؟؟؟؟؟ بونجور بس على وزن بونسوار مثلا ؟؟؟؟ و بكيف منو إستنتجت إني قاعده أقرى فرنسي يا خبل يا بو إكساااااام ؟؟


و آناأسمع كلامهم كانت ردت فعلي كالآتي طبعا بيني و بين نفسي

Excuse meeeeeeeeee !!!!!

Seriously !!!!!!!!!!!!


تعوذت من إبليس و قلت أكيد بيذلفون الحين لما يعرفون إني ما راح أرد عليهم .. أصلا طول الوقت و آنا عيني بكتابي و مسويه روحي صمخه بيملوون و يقوموون .. توني قاعده حرام أقوم ألحين أصلا ما قريت شي


و في وسط الإمتعاظ و بعد ما ملوا مني فإذا بهم يتحركون بعيدا .. فكه .. و في طريقهم للخروج و إذا بالشاب رقم واحد يصرخ مره أخرى


بووووووونجوااااااااااار سنيــــــــــــــــــــــــــــورا قـووووووووووووووود بـــــــــــاي


!! يرحم أمك إنت شسويت باللغه !! فرنسي على أسباني على إنجليزي


كله كووووم و بونجواااار بكووووم



يعني آنا حجي ما أعرف أتحجى أقووم أغازل بعد ؟؟؟ لا و بصوت عالي و الساعه ثمان الصبح و بلغة أجنبيه !! تحطمني صراحة ثقة بعض الشباب عندنا

أوووووووووووووف



على ما الإخوان مشو .. إلا الجو الحلو بدى يندثر .. و طلعت شمس الكويت الحنانه .. فما كان أمامي إلا أخذ كتابي الإمريكي بس إللي عطوه جنسية فرنسية و صار من المزدوجين اليوم و قلاص عصيري .. و أكمل مشواري بالسياره


أمم أوربا كلها غازلتني اليوم


من قدي


:/


أشكر الشاب رقم واحد و الشاب رقم أثنين إلي خربوا علي مشواري الصباحي و إلي كانوا وقود هذا البوست


إي وقود .. لأني ناويه أشب حريجه


حسافه على فزعتي من الصبح


و بونجواااار

42 comments:

Frankom said...

ما اقول الا


بنجواااااار عليج وكل عام وانتي بخير

بس ترى على فكرة الكتاب فرنسي مو انجليزي لانج حاطه عليه

Shhhhhh

Diesel said...

زين عاد شسويتي بالامتحان؟:p
،
إي والله على قولتج منو ألحين يغازل صج شخباري! صراحة وأنا أقرا قاعد أقول تكفة لا يكون بيقط الرقم آخر شي حدي بنتحر.
بس استفدنا فايدة الفرع اللي رحتي له من هالكوفي هالحزة ما ينراح له الصبح عشان هالاشكال.
مشكورة

الزين said...

وبونجوارااات

لوووول

ذبحتيني ضحك على تحلطمج


:)

reemas said...

LOOOOOOOOOOOOOOOOOOOL

لا لا مو طبيعيه القصه
الامم المتحده كلهم غازلوج

مانقول الا لا حول و لا قوة الا بالله
و الله المستعان
مشكلة الثقة الزايده

Sweet Revenge said...

واي انا انقهرت
تحسبي عليهم مالج الا جذي
المرية الاية اخذي معاج رش فليت عن الذبان الصباحي

Shaikha said...

LOOOL Nice title wallah !
لول هالاجواء ما تنفع عندنا ، غالباً ودائماً بتلقين هالنمونه واقفين بالمرصاد !

Framboise said...

Hahahaha iqtalatni Bonjwaar:P Bonjour yamalik il madir shino bs tara khif 6eena shababna! loooool

{~المباركية~} said...

لو يدرون الفرنسين انه هالشاب يتكلم فرنسي جان غيروا لغتهم

عاد هالنوعيه شمقعدهم من الصبح هالنوعيه مال يطلعون الفير

بالعافيه

alwasmi said...

ترى انا للحين اغازل على الطريقة الثمانينية يعني ايام الثمانينات غترة على الجتف واغمز بالعيون

ضحكتيني يصفر الاخ كناري
اللي مايرضاه لاهله لايرضاه لغيره من الناس

بونجوووووور:)

مَـــــعْــــمَــــعَـــــه said...

الله ياخذ الع...... بس عفيه عليج ماسكه اعصابج والله والا لو وحده ثانية يمكن تسبحهم بعصير البرتقال

SHOOSH said...

Frankom
========

ينجوار عليك إنت

:)

شكوو

shhhhhh

بالفرنسي ؟؟؟

SHOOSH said...

Diesel
=======

سقطت

:p

SHOOSH said...

الزين
======

شر البلية ما يضحك

:)

SHOOSH said...

reemas
======

مو الأمم المتحده

أمم أوربا

:)

SHOOSH said...

Sweet Revenge
=============

اي والله .. خربوا علي طلعتي

SHOOSH said...

Shaikha
========

yah .. I would never do it again !

I'll read on bed bs !

SHOOSH said...

Framboise
==========

ya3ni fehum 5efat 6ina .. bs not always !!

aaal shoo ??? aaaal bonjwaaaaaaaar !

SHOOSH said...

المباركيه
=========

يعافيك

:)

SHOOSH said...

alwasmi
========

شخباري الشماغ اللي عالجتف

يالشايب

:)

SHOOSH said...

معمعه
======

لا .. آنا ردات فعلي غالبا هاديه

ما عمري حطيت لساني بلسان واحد يتحرش فيني

أحقرهم و أهم يوخرون لحالهم

Nikon 8 said...

الموقف مزعج
وصاير ظاهره ... كأن حرام يخلون أحد بحاله
!
الحلو بالموقف إنه طلع لنا بوست ظريف
مسائج عسل
:)

SHOOSH said...

Nikon8
======

إنتي العسل والله
:*

Addictioneer said...

هذا معدن المغازلجي الكويتي الخالص
يغازل حتى اخر قطرة بدمة
:p

-mate said...

جان حذفتي عليه شاهد الكتاب
shhhhhhhhhhhhhhh, i'm trying to read

جبريت(عنيف سابقاً) said...

شخباري تصفر يرقم فلبينيه شنو؟؟؟

ما اقول الا بنجوار على اللغه الي متعلمها

شكله كان هوايه يحب البلابل من شان هالشكل دا يصفر لج

او انه شايف زرزور

lilly said...

لووول صراحه ضحكتيني وأنا حدي متعسره
الله يغربل بليسهم خربوا طلعتج .. هذي سوالف الشباب ماكة شغل بس تفرفر و أذيه بهالبنات

a7mad Nabeel said...

لووووووول
سوري بس انا مت من الضحك على سالفتج
صج
الحقران يقطع المصران
هذول من وين يطلعون ؟

فريج سعود said...

بلبل ارجنتيني

أبوغرايم said...

ههههههههههههه

أمم أوربا كلها غازلتني اليوم

هههههه

حلوووووه بصرااااحه

بس ترا سبب إزعاجهم لج إهو الكتاب الامريكي

أكو أحد يقرأ كتاب أمريكي الصبح ! لاا و بكوفي شوب بعد (:

والله باايعتها (:

نسيتي أن بالديره أكو خلايا إيرانيه نائمه !!

شكووو هههههه

أنا حولت المسأله سياسيه بحته

ميييغسي باااكووغ

أحمد الحيدر said...

بونجوار ;p

ما عليه شبابنا الحلوين لازم يطلعون لج من كل حدب وصوب ..

وخيرها بغيرها انشالله :)

تحياتي ..

SHOOSH said...

Addictioneer
============

صدقت

:)

SHOOSH said...

-mate
======

لووول لا آنا بس اتحلطم

:)

SHOOSH said...

lilly
======

سلامتج من الإستعسار

:)

SHOOSH said...

a7mad nabeel
=============

من بيوتهم

:)

SHOOSH said...

جبريت(عنيف سابقا)
==================

ما لقيت احسن من الزرزور ؟؟؟

قلنا كناري يا يبا

:)

SHOOSH said...

فريج سعود
==========
بلبل أرجنتيني امه بولنديه

SHOOSH said...

أبو غرايم
=========
بونجواااااار مسيوووووو

وي وي وي

جو سوي نو باغلي سياسه

جو سوي نخاف من أمن الدوله

:)

SHOOSH said...

أحمد الحيدر
==========

جت سليمه

:)

هذا أهم شي

هالحـــــزة said...

هههههههههههههههههه

خوووش رأس موضوع شي جميل بصراحة ..

وخوش قصة بالوقت ذاته ..

تمنياتي بأسبوع سعيد لج

SHOOSH said...

هالحزه
======

تصدق ؟؟؟؟ حتى ىنا وايد عاجبني عنوان موضوعي

مرات أيدع

:)

احمد الشلقامي said...

السلام عليكم
اولا انا مش كويتي انا مصري بس مهتم بالمدونات وطرق التدوين وبصراحه كتير شفت مدونين وطرق مختلفة لكن اسلوبك بجد رائع انا مفهمتش اغلب الكلام اللي كتبتيه نظرا لاختلاف اللهجة بس التنوع حتي في الموضوع الواحد باين اوي في كتابتك خاصة الموضوع ده وتعرضك لنقطة مهمة وقضية فعلا ضرورية وهي فئة الشباب وأي حياة يعيشونها موضوع موفق اتمنالك التوفيق وتقبلي مروري

Anonymous said...

نعم للاختلاط

و ارجو محد ايشكك اباعيالنا