Sunday, January 17, 2010

تــــكــــا



صباح الخير


اليوم سويت غلطه فزيـــــــــــعه


مسحت البوست اللي طاف بتعليقاته


ما خليت شي


عندي اثنين تحت نفس العنوان .. واحد درافت و الثاني الأصلي إللي كنت منزلته


مسحت الاصلي و خليت الدرافت


معلش


تصيــــــر عند أحسن البلوقرز


المهم


كنا مسوين باربيكيو أي حفل شواء بالشاليه


عادة اكون مشغوله بأي شي حزة الشوي و ما أجي إلا حزة الاكل و إلي أصلا يكونون الاهل مزهبين لي اكلي المعتاد لاني ما احب الشوي نفسهم


الباربيكيو إللي طاف


ما كان عندي شي و كنت شاهده على جميع مراحل الشواء


شفت فيها للأسف التكــــا


و استرجعت معاها كل الذكريات السيئه من أيام الطفوله


التكــا قد لا تعني شي لكم


بس آنا تعنيلي كل ذكرى سيئه و محرجه و مقرفه


لا اخفي عليكم أعزائي القراء


إن خمسة و سبعين بالإميه من طفولتي قضيتها من غير أسنان


نعم


من غير أسنــان


لا طواحن لا أضراس لا قواطع ولا شي


تقريبا من عمر 5 سنين لي 10 سنين و آنا حلجي يصفر إلا من ضرس أو أثنين


ماكو شي


و فوق هذا .. كانت هوايتي الترزز بالصور و تشريع حلجي و كأني فخوره بالفضاوه اللي فيه


و كانت التكا ماي نـــايت ميــــر


و خصوصا .. آااااه يا قلبي


خصوصا لما أضطر (أمثل) إني آكلها جدام الأقرباء و الغرباء و في المطاعم و الاماكن العامه


تذكرت الشرقه


و الغصه


و الصراع الأبدي بيني و بين لحمة التكا


إللي عمري ما فزت فيه


تدرون شنو كنت أسوي


كنت أعلجها بحلجي و آخر شي أطلعها بهدوء و أحذفها تحت الطاوله بالمطعم


من غير لا يحس فيني احد


اي شسوي ما أقدر عليها


يابسه علي


و الجماعه عبالهم أعرف آكلها و احبها


عسى ما شافو تكا ولا أي نوع من أنواع اللحم العرد إلا جدموا لي إياه


لا اخفي عليكم اني آخر مره بالشوي خذيت وحده و جربت آكلها


أمام الملأ


و كنوع من انواع التحدي و الإنتقام


لأني ألحين الحمدالله ما صار عندي أسنان بس لااا .. بل أنياب بعد


بس تصدقون


هم ما قدرت آكلها و أقصصها


يخرب بيتها من لحمه


ده كان يوم إسود إللي فكرت آكل فيه تكا

16 comments:

Anonymous said...

اووول كومنت
اووول
:P

جبريت said...

شوقتيني على تكا مهياوه الي بالبحرين يا سلاااااااااااااام

والادهى والامر ما في الموضوع اني مشتهي جلو كباب يعني وضعتيني بين نارين الحين شسوي؟؟؟

SHOOSH said...

Anonymous
=========

اي اي

اوووووووووول

:)

SHOOSH said...

جبريت
====

المفروض على هالبوست تلوع جبدك ما تتشهى اكل

لوووول

لا كباب و لا تكا

نودلز و إقطـــــع

:)

New Bride said...

waaaaay nbee nshoof pic :P hehehe ee walh el la7am el 3rd ma agdar aklah

Hamad said...

loooooooooooooool

ya3ni foog kil hatha ham m9amema ench takleenha oo mako fayda 7enday rabech first teeths fee '3eerhom bas hathool mako 3an el3eb shoosha

ebdaaaaaaa3 ebdaaaaaaa3 :)

Mariam B.D_Q8 said...

لووووووووووووووووووووول
الله يعينج على هالذكريات الاليمه
بصراحه عورتي قلبي او ما اللومج اذا مستحي البلوق اللي فات بالغلط كلا بسبت التكا ثولتج :)
يالله الحمد الله كبرتي او الله رزقج بالضروس يدد عاد مالا داعي اتهور مره ثانيه و تردين على التكا

Engineer A said...

حسافة عاد كنت معلقة تعليق "عجيب" على البوست الأولي ;P

بالنسبة للتكا .. حتى أنا ما أحبها بس عادي إذا اضطريت ممكن أكلها ..

اللي ماتعرفينه عني يا صديقتي العزيزة
ان عندي عقدة من الصغر عن شي اسمه "علج" ما اعرف آكله واقص فيه!!

علشان جذي لليوم ما احبه :)

بوست "ايوع" ما تغدينا للحين :)

Frankom said...

زعلاة على بوست انمسح ؟؟

عيل مادريتي عني

في عام 2006 انمسح البلوق مالي بكبره بغلطه سخيفة مني أنا

:)

مركبنا said...

هههههههههههههه

مت مت مت من الضحك !
اغلب طفولتج بدون ((=

طالبي وزارة الصحة تعويض لانج وفرتي عليهم شفل بضروسج وتكاليف علاج طوال هذه السنية التى عادتا ماتحفل بزيارة طبيب الاسنان

Her said...

lol thakartiny b2ayam el dereesha:P

Cesc said...

لول حده التكا تغث بس الحمدلله ع النعمه
وفعلا تخرب الضروس..

رزنامـــــة said...

بعد تحذيراتك في البوست السابق عن الضحك ااثرت اني ما اكتب فيه حتى لا يحوشني اي طشار لوووووووول

نرجع للتكا
انصحك تروحين اليابان عندهم تكا على حبوب ، ونودلز مكعبات ، كل شي عندهم كبر النملة لووووووول يستاهل بؤك واسنانك اللي زي النملة مع تجاهل اي انياب تكون موجودة :)

الدانة said...

مساج الله بالخير ياحلوة ..
بالنسبة للبوست اللي انمسح . صراحة قهر بس يالله غلطة الشاطر وانشالله ماتنعاد ..
اما بخصوص ظروسج فالعبرة بالنهاية ..
اهم شي ظروسج الحين شلونهم ؟ :)
تحياتي لج
الدانة

msha3erha said...

لنا ملاحظة العموم ما يحبون التكا بس ياكلون كباب لووول

صمت البوح said...

هههههه يينا حق الفضايح

مي تو ما اقدر اكلها

بس اذا ماقدرت عليها طلعتها وعقيتها
ومرات اعاند فعمري واكلها قصب طيب انمضغت ولا ما انمضغت
وعقب اشرب الماي ..عشان ما اغص لووول

تسلمين خيتوو ع البوست