Thursday, October 1, 2009

نشله .. زكام .. رشح .. إلي تبون



السلام


من وين ابتدي ؟؟


يا جرحي الندي ؟؟


حسبي على الأيام


و الحظ الردي


خمس أيام و داشه بالسادس ألحين و آنا للحين فيني نشله


عفيه نشله للحين ما شبعت مني


لاعت جبدي


ودي أقص خشمي


عمرها ما مسكت فيني النشله هالكثر


شدعوا ست أيام


تعبت و آنا أعاطس


قلبي قام يعورني من كثر العطاس


صوتي مسخره


بلاعيمي ما يطق في بالها تسكر و تيبس علي إلا لي بغيت أنام


ستعش مخده تحت راسي عشان خشمي لا يسكر


دلاغات


جاكيتات


كنابل


و هم ماكو فايده


من إنسدح كل شي يتسكر


بلاعيم


خشم


إذن



و كل ما بلعت ريجي سمعت ستميه و سته و ستين صوت بإذني


فقاعات


طقطقه


مادري شالسالفه


لا و موضه يديده


صايره أسمت العطسه .. يعني أقل شي خمس عطسات ورى بعض


أتشوو أتشووو أتشوووو أتشووو أتشوووو


و الأدهى و الأمر


عطسه تسكر إذني معاها


و عطسه تفج إذني


إذن تسكر و إذن تفتح


لا .. و لا تعطس يدام أحد


العطسه الأولى يقولك يرحمك الله


الثانيه يقولك سلامات


الثالثه يخزك


الرابعه يشلع من يمك


!!!!!!!


الحمدالله و الشكر لك يارب


لا و عطستي حقيره


ما تتسلط إلا و آنا أسوق


وإذا آنا قاعده أسوق و يتني العطسه طبيعي أسكر عيوني


و إذا سكرت عيوني يا ألف على الأوادم يا أطق رصيف


ما ظل رصيف بالكويت ما صعدت فوقه


و الأحلى من هذا كله الزيرتك و الكلارينيز


لما آخذ الحبه .. حدي نص ساعه و أبدى أهلوس


الناس لي خذوهم ينامون آنا ما أدري شفيني


ما أنام بس أهلوس .. لاني صاحيه و لاني نايمه


بين الحلم و الواقع


بين الخيال و الحقيقه


بين الوعي و اللاوعي


مادري شيصير حواليني


أسطل


و الدنيا عفسه


فراشي كله كلينكس


قمت أتعرجب بكلينكساتي


و خشمي تشقق


ماظل فازلين ما ظل نيفيا ماكو فايده


إنصلخ


أحلى شي إنهم قاموا يعطوني شاش بدال الكلينكس


لأن صج خشمي راح فيها


و سلامتكم و سلامت خشومكم


سؤال الحلقه: أرسل عدد المرات التي ظهرت فيها كلمة نشله/عطسه على بريدنا الإليكتروني و ستدخل السحب على جهاز بلاك بيري شاشته مكسوره (ممكن تصلحها بشرق) .. لا تدعوا الفرصه تفوتكم


35 comments:

enter-q8 said...

ولييييه
بس يوبا بس
قمت احس اني بنتشل عاد انا فيني السكر يعني يبيلي اسبوعين يالله اطيب
قاعد اقرى بوستك و حاط الكلينكس على خشمي و معقم ديتول على الشاشة لا تنتقل
ما تشوفين شر يوبا

YusuF.AsKR said...

ههههههههه

سلامتج و ما تشوفين شر

ياخوفي لاتنتقل العدوى عبر المدونات !

حزتها شيفكج من حوبتي (:

هالله هالله بالبصل ترى زيييييين (:

عامر said...

إستنشقي بخار ماء يغلي ثلاث مرات يومياً

Anonymous said...

LOOOOOOOOOOOOOL :p
امبيه غشيت من الضحك !!
سلامات و ما تشوفين شر ..انا صارت فيني نشلة 4 أيام و 6 أيام فقدت الشم و الله خفت ما صرت اشم .. و بعدها خفت الحمدلله بس شربي مشروبات دافية و حطي الفكس و بتطيبين .

الزين said...

:)

ما تشوفين شر

عليج بالفكس

وزيت شجرة الشاي مع شوية بخار ماي

وكل الأمور تتصلح باذن الله

صقر قريش said...

باول زيارة لي لهالمدونة اقول حسيت اني منتشل:(

كلها بأجره ان شاء الله:)

بصراحة استمتعت بقراءة هذا التذمر

Dark angel said...

have some onion soup or cranberry fruit ,and i guarantee that within 2 days you'll be ok :)

Deema said...

wa 3alayaa ma tshoofeen shar!

esTeKaNa said...

سلامات يا الغالي سلامات
غدا الشر من بعد السخووونه
:p~
مادري اذا في سخونه
بس هذي اغنيه شعبيه تغنيها يدتي مع صفقه خفيفه في مثل هذي المناسبات
:PP~
ما تشوفين شر يا الغاليه
البوست مريض مريض
كسر خاطري هالبوست وصاحبته
:)

Unknown said...

ما تشوفين شر شووش
من كلامج خفت لا الماوس يعاديني

على الاقل انتي تعطسين مع صوت وطشار ودنيا
انا وحدة من اهلى تعطس بدون صوت
مدري شلون جذي تقمتها

جبريت said...

اولا سلامات ما تشوفين شر



مادري ليش وانا اقرا البوست بأذني ترن اغنية فلسطين عربيه ومحد يحكي حيك وحيك

اخر شي الفلسطيني الي معاي حاط هالرنه ويدقون عليه وما يرد

المهم ما ترين شر يا الشوش انشالله واحسن شي يبطل مسامات الخشم


جدر فيه مايه وتتنشقين البخار الناتج عن الحراره ومنها تنظيف بشره

انسي العطاس بعد هالعلاج

جبريت said...

اي وترا مو انتي الي دعمتي الرصيف اهو الي دعمج الكلب الحيوان لوووول

@alhaidar said...

سلامات ما تشوفين شر انشالله :))

بس قريت اغنية عبد الكريم العود عرفت حجم معاناتج .. الله يعينج

خطاج السو :)

Hamad said...

ma tshofeen shar ..


bs amana 3ogb kil hatha laish laish 3aysha ??!!

Butterfly Chick said...

matchofeen shar dear

go to the hosp better.. esmella 3alaich laykoon swine flue :-# lool esmella 3alaich inshalla :$

hope you get well soon..

drink orange juice or lemon.. i guess they r good

بانوراما said...

سلامات وما تشوفيين شر

الظاهر ان خشمج بيطلع لحن يديد بس مو قادر يضبطه

انصحج تسجليين عطستج

وتسوينها كاسيت وسيديات

وتربحيين 1000 بلاك بيري شاشته خربانه

SHOOSH said...

Enter-Q8:
=========

الشر ما يجيك يوووووبا

:)

SHOOSH said...

أبو غرايم
=========

لك حوبه ؟؟

الله يكافينا شرها

:)

SHOOSH said...

عامر
=====

إنشالله

مشكور

:)

SHOOSH said...

Hanan
=====

تشربت فكس

ماكو فايده

تشمين ريحة الفكس من بعد ميل

:)

SHOOSH said...

الزين
=====

الشر ما يجيج إنشالله يالزين

زيت شجرة الشاي هذا أشربه و لا أتدهن فيه؟؟؟

:)

SHOOSH said...

صقر قريش
=========

أشكر نشلتي اللي خلتك تستمتع

:)

لا تقاطع عاد

SHOOSH said...

Dark Angel
===========

I might try the cranberry :)

Thanks :)

SHOOSH said...

Deeema
======

el shar ma eyeech :*

SHOOSH said...

esTeKaNa
=========

أهلا هلا بالغاليه

نشيد سلامات هذا متوارث

الكل يغنيه الظاهر

:)

SHOOSH said...

Addictioneer
=============

آنا قبل إذا كان حواليني ناس غرب أقمت عطستي

بس قالولي مو زين

قمت أعاطس عادي

SHOOSH said...

جربيت (عنيف سابقا)
===================

حيك حيك حيك

SHOOSH said...

جبريت (عنيف سابقا)
==================

صااااااااااااج

الرصيف حول

SHOOSH said...

Hamad
======

w ma a3eeesh leeeesh ??? amoooot 3shan nashla :)

SHOOSH said...

Buttefly Chick
==============

I am mixing orange and lemon in one glass :)

don' worry .. I have already check eith the Doctor

I am swine freeeeee :*

SHOOSH said...

بانوراما
=========

الشر ما يجك

:)

joe said...

كملي هالمرض سبوع وربحي اي فون بعد شتبين اكثر من جذي لوول

تصدقين انا وايد اعطس بس مو منشول
مادري هالمرض شنو نوعه

ماتشوفين شر بعدوينج ان شاء الله ;p

joe said...

كملي هالمرض سبوع وربحي اي فون بعد شتبين اكثر من جذي لوول

تصدقين انا وايد اعطس بس مو منشول
مادري هالمرض شنو نوعه

ماتشوفين شر بعدوينج ان شاء الله ;p

Anonymous said...

امبيه لااا! البووست مالج مستحييل !
ليش جذي انتي دمج خفيف ؟؟
XD

و سلامتج ماتجوووفين شرر!

الرشح said...

الله يشفيك عندنا وعندك خير أنا راح خشمي طماطه أبي علاج يسكر الامطار اللي عندي