Monday, September 14, 2009

دايــــــــم السيــــــــــف


مووودي صاير مووود ميانين .. مره فوق و مره تحت


شوي ميته ضحك و شوي ميته بجي


شوي أصير دينه و شوي أتحلطم على الدين


أصلي القيام تالي الليل لما رجلي تطيح .. ولي خلصت أقعد أطالع روتانا أغاني لي أذان الفجر


شوي أصير فيلسوفه و أتفلسف عالكل و ما أخلى حكمة و لا نظرية إلا و أقطها و آنا أسولف .. و شوي أصير سخيفه و أقعد أنكت و أملق لما تلوع جبدهم مني


أكون ميته يوع و من أشوف الأكل أشبع


شوي راسي حار و مريضه عقبها بساعه أقوم جني غزاله (مو حصان) ما فيني شي


أشتط أمسك كتاب أبي أقرى .. دقيقتين أمل و يصير فيني نومه


الصبح مزاجي عبادي و بالليل أقلب ميامي


أشوف برنامج وثائقي عن هتلر .. عقب ساعتين قاعدة أشوف توم و جيري

أدز مسجات حق رفيجتي و أحن عليها دقي علي بسولف معاج ودي أسولف .. و لما تدق يصير مالي خلقها و أحقرها و ما أرد


رفيجتي متهاوشة مع مسؤولتها بالدوام .. تجي عندي و أستن عليها نصايح و الدنيا ما تسوى و ما يصير جذي و أغير مووود البنت لما ترتاح و تستانس .. تطلع من صوب و أقفل الباب وراها و أقعد أبجي جني ياهل و أقول الدنيا ما فيها خير و الواحد يموت أحسن


مادري شالسالفه


هل ما سبق .. عرض من أعراض إنفلونزا الخنازير ؟؟؟


ما علينا


اليوم قاعده أقرى ديوان شعري حق دايم السيف .. عادي بالليل أقرى قصة يابانيه


:)


المهم .. يا أخي شنو هالإنسان حساس .. أحبه


أترككم مع بعضا من أبياته متمنية أن تحوز على إعجابكم و رضاكم و كل عام و أنتم بخير و حفظ الله الكويت و شعبها من كل مكروه



ومـــا عـــلى الــــدنيا عــجـــــب

15 comments:

أبو الدســتور said...

عادى
ُآثار شهر كامل من الصوم

SHOOSH said...

أبو الدستور
============

تهقى جذي ؟؟

عاد و آنا و الأكل كلش مو ربع

ابوالوليد said...

اتوقع القصيدة هذي لدايم السيف تناسبج

قالت من انت وقلت مجموعة انســـان
فيني نهار وليل وافراح واحــــزان

SHOOSH said...

أبو الوليد
===========

Exactly !

:)

مجموعة إنسان بإنسان

تحياتي للوليد

Deema said...

فهو رد عليك و قال لك لا تعجبين من أمرك العجيب

لأن ما تدور فينا الدنيا إلا لين نصير بين هذا و ذاك :)

SHOOSH said...

Deema
=======

نورتي المدونه


انا عمري ما تعجبت من الدنيا .. بس اهيا اللي متعجبه مني

عبدالرحمن said...

عندي وعندج خير

انا اكثر منج واغرب

اكثر شي مؤثر فيني اني ماقمت اعرف اسوق مع اني مضرب مثل بالقياده الرزينه بين الربع

ماكو رصيف ماكو احد مالف عليه الله يستر لا اعدم العالم


اذا لقيتي حل قوليلي واذا ماكو مالنا الا نروح حق شيخ يقرا علينا لعل وعسى



بالنسبه لدايم السيف

بحر من الاحساس والحكمه

واختيارج موفق للابيات

Addictioneer said...

أصلي القيام تالي الليل لما رجلي تطيح .. ولي خلصت أقعد أطالع روتانا أغاني لي أذان الفجر


The same here. But I quit music right after praying....errr..emm... To be honest, sometimes I listen to music in the middle of the day... Just sometimes... Bo 6bai3

:)
very nice article

SHOOSH said...

عبدالرحمن
=========

الحمدالله طلعت مو بروحي

:)

نورت

SHOOSH said...

addictineer
===========

شلونك ؟؟

والله آنا مو ذاك الزود مع الأغاني كلش

بس مرات أحط روتانا عشان يصير في حس بالغرفه علشان ما أستاحش

Addictioneer said...

انا بخير عساج بخير

نفس اختي بس اختي طايحتله
mbc 2 and 4

الوحدة وما تسوي

Enter-Q8 said...

ايه ترى عادي بدون صيام الانسان يصير فيه جذيه
اما دايم السيف
فحتى اختيار اللقب ماله عجيب

{~المباركية~} said...

تقريبا نفسي جذي احس صاير اهبل او استهبل

هذا ثاني عرض من اعراض الانفلونزا

-mate said...

me 2!!

i think its BAD not a swine flu, it stands for bipolar affective disorder .. Where you find both mood elevation o depression o kel shay el3aks at the same time :P

allah yaster bas
:)

well_serviceman said...

عادي ، هذي آثار الملل طال عمرج

خوش ابيات جنه؟

تحياتي