Thursday, October 21, 2010

كمــاشه

بينما تغرد العصافير بالقرب من شباك غرفتي .. و تدق أشعة الشمس باب حوشنا .. يعني إستكــانه


أنهض من سبات نومي .. بكل حيوية و نشاط .. يسبقها حبي للعمل .. أخاف بس


ألبس ملابسي .. و أهرول ناحية سيارتي البنتلي القابعه أمام باب بيتنا .. يارب يجي هاليوم و ترزقني بنتلي يـــــــــارب


أسوق سيارتي بكل هدوء .. فالشوارع هادئه خاليه .. الا من بعض السناجب و الفراشات .. خيال كويتي


أصل المكتب .. و الإبتسامة تملىء و جهي .. كلي حماس للعمل .. طـــل


و بينما أنا منهمكه بين الأوراق و الأقلام .. يدخل علي أقدم موظف عندنا بالشركه .. أيام التعيين من غير شهادات


يدرعم على وجهه من غير لا احم و لا دستور ..مستعجل و يركض كعادته


شووووش شووووش


هلا والله بو فالح آمر


عطيني كماشه ؟


ها ؟ اش كماشته ؟؟ شنو هذي ؟؟


يوووه يا شوووش بسرعه كماشه كماشه


لوهلة حسيت اني اشتغل بقراج /كراج تصليح السيارات .. اهو منخش تحت السياره يصلح و أنا أناوله العده


شنو كماشه هذي ما أعرفها !!!؟


و بينما عيونه تتلاقط على سطح مكتبي يمين و يسار يدور المدعوه كمـــاشه .. بدأت أنا أعطيه و أوريه كل شي عندي


علي ألقى الكماشه اللي يدورها


ما ظلت دباسه .. ولا قلم .. ولا مسطره .. ولا دبوس و كان كل مره يقوول


لا يا شوووش لاااا .. كمااااااشه الله يصلحك كمـــاشه


بديت أتنرفز .. قلت له خلاص ما عندي .. كل شي أوريك تقول لي لأ .. هذي كمــاشه مالتك شيسوون فيها ؟


شوووش كماشه هذي اللي يشلعون فيها الضروس


نعم !! ضروس ؟ لا حول ولا قوة إلا بالله .. مساع عده و سيارات وألحين ضروس و تشلع؟


اي شوووش الي نشلع فيها الأسنان .. مالت الورق .. شسمهم .. الدبابيس


لما قال دبابيس بغيت أقتل روحي


لك ساعه محيرني مره كماشه .. مره تقول ضروس و مره أسنان


طلع يبي هذي .. حسبي الله عليها .. أزمتني




الله يصلحك با ابو فالح


الا انتوا شتسمونها ؟؟ لا يكون كماشه بعد ؟

13 comments:

Q80-ChillGirl said...

لوووووووول

حسبي الله على ابليسج ،، كالعادة اسلوبج عسل و تظحكيني من كل قلبي

انا اسميها شلاعة الدبابيس :> و كماشة مادري ليش حسستني بنيتين قاعد يكمشون شعر بعض، فا تخيلت انها اكستنشن للايد فيها اصابع مخصصة للتكمش

أبوفلان said...

مبروك تعديل التعليقات :p

انا اسميها مالت الدبابيس أو شلاعة الدبابيس

بس كماشة الي امه مصرية يسميها كماشة :P

طبعا ولا مره استخدمتها بالدوام كله أستخدم الأسنان أو الاظافر

وسلميلي على بوفالح

الجودي said...

إنت شنو اتسمينها


أنا ما اعرف اسمها بس موجوده على مكتبي و استخدمها

:)

SHOOSH said...

Q80-ChillGirl
==============

نورتي يبا

:)

SHOOSH said...

أبوفلان
=======

شكرا للتنبيه

ما درينا عندنا مشكله بنظام التعليق

:)

يوصل سلامك الأحد

شاي الضحى said...

انا اسميها الي تشيل الدبابيس

:)

المقوع الشرقي said...

درنفيس

:)

انتى عسل يا شوشا
.*

شقران said...

بوفالح مشكله
:))

اسميها شلاعه مثل ماقلتلك
:)))))

مع اعذب تحايا المساء

isoulq8 said...

لوووول على قولة بوفلان
شلاعة الدبابيس

:D

خوش سالفة والله
أحسه عكر صفو هذا الصباح عليج

ولما قلتي فراشات ومادري شنو
حسيتج سنووايت بيداومون معاج في المكتب
ويساعدونج الحيوانات والطيور وتخلصين شغلج

:P

Unique Girl said...

انا اسميها شلاعه دبابيس لووول

بس وايد ناس اسمعهم يقولونلها كماشه يعني طبيعي لوول

بس صج الله يعينج لوووول

يعطيج العافيه

النوري said...

elli etshali3 eldibabis :P
komasha walla 3abali yaby gomasha looool

waleedsh said...

تصدقون هـ "البتاعة" مالها اسم عندنا :)

Anonymous said...

احنا ندلعها و نسميها
فيفي عبدة
لانها مثل الصاجات