Tuesday, October 6, 2009

I WISH I WERE A PRINCESS



اليوم دق علي مسؤولي بالدوام الساعة خمس العصر


خمس العصر كل يوم آنا نايمه .. قيلولة بعد الدوام


unless


مو مداومة و شبعانه نوم .. مريضه .. طالعه أو أي شي ثاني


العادة تلفوني سايلنت .. ما أحب صوت التلفون . بس إن كنت ناطره إتصال مهم أضطر أخليه يرن


و آنا بعز نومي .. يصرخ تلفوني كأنه أهبل على هيئة رنة هبله و عبيطه نفسه


الله د إي اللخبطه دي إيه ياللي خاطفني ياريت تؤوووول لي إيـــــه حصل لي


أكثر من اللخبطة إلي آنا فيها ماكو .. حتى موبايلي فيه لخبطة


أفتح نص عين و آخذ المويبايل


ألوو


السلام شوش .. لوسمحتي لا تنسين تخلصين أوراق البروجكت علشان نقدر نعرضها في إجتماع باجر .. دزيت لج إيميل فيه بعض التعديلات


إنشالله بو عبدالعزيز ألحين أجيك الإيميل و أعدل الجداول و إنشالله كل شي يكون تمام باجر .. لا تحاتي


يعطيج العافيه .. مع السلامه


بـــــاي


أقط الموبايل لأبعد ما يمكن أن توصل له إيدي .. و أرجع أسكر عيوني و على طول أنام


بعد ربع ساعة يصرخ موبايلي برنة أعبط من الأولى


إلحـــق عيـــني إلحــق إلحـــق لا يروح منـــك حبيبــــك


أووووووف .. أدور بيدي تلفوني ليما أطيح عليه


ألووو


شوش


هااا


قطيعة إنتي كله نايمه


قطيعة تقطعج !! آنا قطيعه !! شتبين داقه !! أحد يدق الظهر يالي ما علموج الإتكيت


خليت لج الإتكيت يا أم إتكيت .. بيأذن المغرب يبا .. قومي ناخذ قميص بولو اللي كنا طالبينه .. الفلبينية شلختني تلفونات


أي قميص ؟؟؟


إلي طلبنا تييب لنا منه .. إلي ذاك اليوم شفيج ؟؟


مشلختج تلفونات !! إللي يقول شارين يخت مو قميص .. عالعموم آنا ما أبيه


ليش ما تبينه ؟؟!! لوعنا جبد المره لما دبرت لنا قياسج !! ألحين ما تبينه ؟؟


إي ما أبيه .. مفلسه


يبا آنا أسلفج قومي


مابي سلف .. تاخذينه لي هديه أقوم .. تدفعين لي فلوسه و تالي أردهم لج مابي


ما عوزج أهديج قميص ب 70 .. عساج ما خذيته


أيا الجعصه ؟؟؟؟؟؟


قومي يالله قومي .. باي


بــــاي


أرد أحذف تلفوني و يرد يرن عقب دقائق بسيطه


شتبي ؟؟؟


قومي !! إنتي مو مواعدتني تروحين معاي الأفنيوز ؟؟؟


آنا ؟؟؟


إي إنتي .. يالله قومي عفيه خل إشتري الهديه و أفتك


أي هديه ؟؟؟



إلي قلت لج عنها .. ما أقدر أتحجى ألحين .. أمي على راسي


هممممم .. أقوم على شرط


شنو ؟؟


أبي 80 دينار بس ها .. هديه مو سلف


حق القميص طبعا


أواللله 80 ليش ؟؟؟


ألحين 80 صارت أولللله


آنا طالب ما أشتغل حتى الخمسين عندي أولللللله


مالت


عليج يا عسل


والله صج ؟؟؟


قومي عاد


زين باي


و بس .. طارت مني النومه .. ظليت أتقلب بالفراش بو عشر دقايق و يرجع يدز لي مسج


قمتي ؟؟؟


رديت عليه و آنا سارحه بأفكاري


I wish I were a Princess


رد علي .. تستاهلين


ما قمت من فراشي .. و ظليت أنط من فكره هبله .. إلى فكره أهبل منها


اللــــــــــــــــــــــــــــه .. جان زين آنا أميـــــره


أميره أميره نفس اللي بالفيري تيلز


مو أميره بو طقه


جان صرت أكسل أميرة يعرفها التاريخ


أدري في وايد أميرات يشتغلون و يكدحون .. بس كلهم عندهم أوبشن إنهم يحطون ريل على ريل و ما يسوون شي


آنا أبي هالأوبشن


لو كنت أميره .. جان ما اضطريت أقوم كل يوم الصبح من الفير .. حتى الديج ينام أكثر مني .. و لا أضطريت أداوم .. و أكرف لي الساعة ثلاث العصر .. و إشي مدير يزفك .. و إشي مدير ما يعجيه شغلك .. و إشي مدير يحاسبك على الخمس دقايق


جان ما إضطريت أسوق سيارة بالزحمة .. جان عندي هليكوبتر حق تنقلاتي .. توديني وين ما أبي بدقايق


جان عمري ما عرفت الجزيرة ة ولا الوطنيه و لا حتى البرتش و اللوفتهانزا .. إي نعم .. آنا أميره و عندي برايفت جت أونلي فور مي


جان ما اضطريت كل يوم أتصارع مع ملابسي اللي بالكبت علشان أقرر اش بلبس باجر حق الدوام ؟؟ أطلع كل الملابس من الكبت .. يــــا كثرهم .. كبتي 6 بيبان و بغصب يسكر.. و تالي أعصب و أقعد أتحلطم و دموعي تارسه عيوني و أقول .. شنو هذا ما عندي هدوووووم


لو كنت أميره لكان عندي مصمم أزياء خاص فيني .. يصمم لي ملابسي و آنا مكاني .. و ماكو سوق و فراره و عوار راس


لكان عندي خدم سنعين .. مو مثل اللي عندي .. يا حارقه ملابسي يا مضيعتهم


لا و قشره .. أقول لها ليش حارقة نفنوفي ؟؟؟


هذا واجد خفيف .. بالبيت لازم خراب إنتي ليش ما يودي مصبغه ؟؟؟


والله صج عمتي ؟؟ و عيل إنتي إش مهنتج ؟؟؟ هذا قميص خمسين دينار إنتي هذا شهر ماكو معاش


الحمدالله آنا في فلوس .. أووووخذي خمسين مو مشكله الله موجود


بللللللللللللللللللللل تحسب الله بعد


لو كنت أميره جان عمري ما فلست .. مو عقب أسبوعين من المعاش أفلس .. أول شي أبدى أتسلف من أقارب الدرجة الأولى .. إذا خلصوا .. أتسلف من خدامتنا النحيسه .. شكثر فلوووووسها


لوووول .. عاد اليوم متسلفه منها


عندج سلف ؟؟؟


جم يبي ؟؟؟


جم عندج ؟؟


يبي عشرين ؟؟؟


آنا قاطه و يهي على عشرين ؟؟؟؟ لا أبي خمسين


آنا يعطي عشرين ولا يعطي خمسين كلو خلاص اليوم .. آنا بس يعطي عشرين


بالله هذي حاله


لو كنت أميره جان عندي ناس ذربة تقعدني من النوم و بهدوء .. مو وحده داقه تقولي قطيعه إنتي كله نايمه !!؟؟


لو كنت أميره جان ما اضطريت أقول هالشهر جوتي الإل في ولا جنطة شانيل ؟؟؟ جان خذيتهم كلهم و فوقهم 600 جنطة على الراهي


لو كنت أميره لكان بالي فاضي .. ناس تفكر لي .. ناس تقرر لي .. ناس توكلني .. تاس تلبسني و تشربني ..دماغي فاضي


جان أكيد تعدل نومي


و صحتي صارت أحسن


جان وزني صار إميه من قعدة البيت


جان ما فجيت بلوق أتحلطم فيه


جان آنا ألحين دكتوره من غير ما أدرس


جان كل ما ضاق خلقي طقيت طيارتي سلف و سافرت .. مو رحت كوفي شوب أقرى كتاب و يمر علي واحد يقولي بونجواااااار


لو كنت أميره جان مو قاعده أعاطس للحين .. جان سافرت علاج بالخارج حق نشلتي الغريبه


همممممممممم


أمبيييييه .. كل إلي أدوره مادي !! فلوس و جناط وطياره وسفرات .. اي بس آنا صاجه عند ربي .. الفرق بين الناس العاديين و الأمراء هالسوالف بس


لوووووووول


رفيجتي تقولي عن شنو تكتبين ؟؟؟


قلت لها جان زين آنا أميره


جان تقولي: حــامض على بــــوزج


بووووزج عاااد ؟؟؟ بووووووزج


ماكو تيرم أيدد


تكفون بس ط المصطلحات


وااااااي يا ربي .. لو أميره جان غيرت رفيجاتي


لووووووووووووووووووووول


قريت لها البوست .. تقولي هذا فيرجن الأميره الهيزه


هيزه ؟؟؟؟ هييييزه ؟؟؟ ينصر دينج من وين يايبه هالمصطلح


قلت لها والله .. ودي ودي أصير أميره يوووم واحد .. الكل يجابلني و يشوف طلباتي و ماكو شي إسمه لأ


ردت علي .. ترى الأميرات يسوون أعمال خير .. جاريتي وورك .. مو بس يلبسون و ياكلون


أأجرج إنتي تسوين لي الجاريتي بإسمي


ردت علي بكل قسوه .. لو صرتي أميره جان حسدوج و صار فيج سرطان


سرطان ها ؟؟؟؟ الشرهه علي إلي قاعده أقرى لج .. ولا إنتي كفو أجابلج ؟؟؟


لو آنا أميره جان عندي معجبين و معجبات يحبون أي شي أكتبه مو مظطره أقرى لج .. حتى لو أنزل بوست فيه نقطه وحده بس ألأقى 198 تعليق


ونـــــــــــــــاسه


منو وده يصير أمير ؟؟؟ ولا أميره نفسي ؟؟؟؟



27 comments:

don_veto said...

great post, made me laugh :D

Dark angel said...

في داخل كا بنت أميرة :)

aL-NooR . said...

صبــاح التحلطم اللي ماله حدوووووود
:p
الله ياخذ بليــــسج ..موتيني من الضحك ..من صباح الله خيــــر ..


اممممممممم
اصير اميرة ..مو وايد ودي ..لا لا لا انا مقتنعة اني اميــــرة نفسي ...حلوة الثقه صح ؟ :P

تدرين احس حياتهم ملل ..و كله مكتئبين ..و دكاترة نفسيييين ....اوكي يمكن فيه شغلات تونس بس شفايدتها اذا اساسا بالي مو رايق و مرتــــــــاح


يسعد لي صباح الرايئـــــن ..
و اذا صرتي اميــرة ابي منج عزيمة ..بالبرايفت جت
:Pp

*******************

الزين said...

لووووول


يسعد لي هالصباح المشتط

والأميرات الإشتطاطيات


:))


وعلى فكرة انا كلش ماودي اصير اميرة

تدرين ليش!!

لأني انا اصلا ملكه

اييييييو

حد الملاقه

ادري ادري


:/

Sweet Revenge said...

بدعت شوش بس من قالج الاميرات مايشتغلون
مكلة بريطانيا عنده جدول حافل طول اليوم وتقعد من الساعة 6
انت احسن منها
ومن اليوم ورايح انت الاميرة شوش
بعد شتبين :)

الدســتور said...

مستعيله على التعليقات

Hamad said...

looooooooool 7adech bada3tay bs 3ogob kil hatha sharaitay elqamee9 wela la'a :p

joe said...

شعليه صرتي ملكه الكل يدق عليج
و كله نايمه بعد شتبين اكثر من هالدلع ;p

قواج الله

فريج سعود said...

قريت نص البوست وباجر اكمل الباجي

SHOOSH said...

don_veto
=========

Glad I made u laugh :)

welcome to my blog

SHOOSH said...

Dark angel
===========

في وحده أعرفها داخلها يني

:$

SHOOSH said...

aL-NooR
========

صباحج عسل

من صجج حياتهم ملل

:)

إذا صرت أميره نروح موناكو آنا وياج .. أطق لج هرن و طلعيلي

بابرايفت جت طبعا

SHOOSH said...

الزين
=====

صباحج زين يالزين

:)

إنتي ملكه من زمان

SHOOSH said...

Sweet Revenge
=============

ملكة بريطانيا ما عندها سالفه

:**********

شكرا على لقب الأميره يا أميره إنتي

SHOOSH said...

أبو الدستور
============

آنا مستعيله على كل شي

:)

SHOOSH said...

المباركيه
=========

من قال كله نايمه ؟؟؟

هذي إشاعة مقرضه

SHOOSH said...

فريج سعورد
===========

و النبي ؟؟؟؟؟

لو ىنا أميره جان قريب بلوقي كله من أول بوست لي آخر واحد بساعه

SHOOSH said...

Hamad
=====

Big Nooooooo !

بدون تعليق said...

تدوينة حلوة

جان زين انتي اميرة وانه بعد جااان زين امير

بس عاد امير مثل القصص يعني عنجه قصر وكل يوم يحاوط بفرسه يشم هوا ويشوف الزرع والخضار

حسافتج يا كويت said...

إن شاء الله تصيرين اميرة وشيخة بنت شيوخ ويصير عندج بزنس مثل الشيخة فريحة





























قولي آمين

SHOOSH said...

عبدالله
====

إنشالله يا أمير يا ابن الأمراء

:)

SHOOSH said...

حسافتج يا كويت
==============

لوووووووووول

أميــــــــــــــــــن

أقوووووولها بأعلى صوتي

و إنشالله إنت تصير بعد شيخ نفس الشيخ أحمد فهد الاحمد

b.Oz said...

7atah ana aby a9eer amerah/ameer .. Or ay shay ya m3awdah yewady!

AL Ro0oR said...

خخخخخ عشت جو إني أميرة خخخ

شكرا خليتيني اضحك ومالي خلق خخخ

Ra-1 said...

سؤال
...
..
.

ليش مفلسة؟
وين المعاش!
:p

bent el deera said...

مت من الضحك ههههه

Faddoosh said...

hahahaha Amazing u made me laugh unbelievable :D
great one ^_^