Wednesday, October 28, 2009

شــوش فــي معــرض الكتـــاب




أتوقع آنا أول وحده داشه المعرض



هذي أول طلعة لي عقب السواين على فكرة



المهم



لما نزلت من سيارتي كانت الساعة تشير إلى عشر و ثمنتعش دقيقة



لوية بره .. سيارة إسعاف .. دوريات .. سيايير التلفزيون



أتوقع هذا كله علشان تغطية الإفتتاح أكيد عيل حقي ؟؟ إللي الحمدالله كان شكله توه خالص لما دشيت



ماحب اللوية و الزحمة و التلفزيونات



البابارتزي وين ما أروح ألقاهم من جذي طالعه الصبح



المهم



توني داشه المعرض ولا يمسكني واحد من تلفزيون الكويت .. تسوين لقاء ؟؟ قلت له لأ مشكور ما أحب



مشيت



ولا ياربي !! التلفزيونات تلاقطني



صدقت روحي .. طلعت منظرتي أطل فيها .. لبست نظارتي .. أنا كله عبالي إن لبست النظارة محد يشوفني .. قلت لكم ما أحب الباباراتزي .. الشهره متعبة مالي خلق .. و كملت أمشي



إختي ممكن نسوي معاج لقاء سريع عن المعرض ؟؟



ههههه لا لا مشكور .. و إبتسامتي ماكو أعرض منها



صباح الخير مدام .. تحبي نعمل معك إنترفيو سريع ؟؟؟



لا لا .. هههه .. لا لا مابي



مادري ليش كانت تجيني الضحكه كل ما وقفني أحد ! حسيت روحي مهمة يمكن ؟



المهم



وقفت في مكتبة من مكاتب الجناح السوري و لا أسمع وحده من وراي



هــــاي



آنا حاقرة عبالي ما تحاجيني



ردت البنيه .. هـــــاي



شوش: هلا هلا



تعملي لقاء تؤولي رايك في المعرض لبرنامج رايكم شباب ؟؟



شوش: هههههه جتني الضحكه مره ثانيه .. لا لا مابي أستحي



لقاء صغير أوولي المعرض حلو مش حلو .. عاجبك مش عاجبك ؟؟؟



شوش : لا مشكورة مابي



و فجأه إذا بصاحب المكتبة مادري اللي يبيع فيها بو كرش يحدثني قائلا



مكتبجي: ليش ما عملتي معها اللقاء ؟؟؟



شوش: بقلبي أقول: و إنت شكو ؟؟؟ نعم ؟؟ لا مابي



مكتبجي: ليش ما بدك ؟؟؟



شوش : ياربي !! مابي أستحي ما أحب



مكتبجي : إي ما بدها حيا هاي !! كلمتين بتؤوليهم و هن بيزبطو كل شي

شوش: بعد مابي



مكتبجي: إي والله حــرام



شوش: وانت ليش ضايق خلقك هالكثر ؟؟؟ خو اللقاء معاي مو معاك ؟؟؟



مكتبجي: إي كنتي عملتي دعاية للمكتبه !! مو إنتي وااااءفه فيها !! إي كانت حلوه إلنا و إلك



يمه منه .. يدور الدعاية على حسابي .. و آنا عبالي يبيلي الشهره



مالت



المهم



المعرض بوجهة نظري المتواضعة مو حلو .. بل قد يكون يقلب الجبد .. بل قد يكون سيء .. بل قد أعطيه أربعة من عشره



ما فيه شي جديد .. كتب قديمه مكرره



الجناج المصري تقريبا كان أحسن شي بس هم مبالغ بكتب عبدالحليم و كوكب الشرق و الملك فاروق



الجناح السوري كان أوكي



الأردني كله عن الملك عبدالله



السعودي .. مره أخرى كله عن الملك عبدالله



البحريني جنه كان مكتبة وحده بس و فيها كتب أطفال



اللبناني مع إحترامي لكل المذاهب بس ما شفت عندهم غير كتب الشيعه و حزب الله و نصر الله و الأئمة .. إنصدمت إن أغلب مكاتبهم إسلامية



الكويتي أغلبه عن حكام الكويت و أصول القبائل



طبعا ماكو كتب باللغة الإنجليزية إلا قصص الجهال .. كنت بتحلطم بس تالي ذكرت إنه معرض الكتاب العربي سو مالي حق



المهم



و آنا أفتر بالمعرض كان في واحد الظاهر يطوف عالمكاتب بنفس الترتيب اللي آنا أدور فيه .. كل ما أدش مكتبة .. شوي و يدش وراي .. و كل ما يسبقني و يطلع أكمل المكتبات بالدور ألاقيه جدامي



المهم .. كان طول ماهو يفتر و أهو يسأل عن كتاب .. كل ما يسأل عنه يقولون له ماكو .. ممنوع .. ما طلع من الرقابة



الشاب: لقيتي شي حلو ؟؟



شوش: لا والله .. إنت ؟؟



الشاب: يعني .. أغلب اللي أبيه ما لقيته .. معرضنا صاير مو شي



و فتح جيسه يوريني كتبه بس ميوله غير عن ميولي



بالنهاية .. و تقريبا على ما طاحت ريلي و آنا أدور .. صادفته و قالي ترى لقيت الكتاب



صج ؟؟؟ مو ممنوع ؟؟؟



رد علي إمبلا .. جزئين مشوهم الرقابة و جزء مسجون .. روحي إخذيه ترى حلو



و ما طلعت من المعرض الا ب هالكتاب إللي أصلا مادري شسالفته بس من كثر ما كان الشاب متشوق يدوره خذيته





ملاحظات شوشيه من المعرض



الأسعار مبالغ فيها .. أقل كتاب 5 و 6 دنانير .. إســـــدعواااااا



زوالي المعرض جديده .. كوني رايحه مبجر كانوا للحين يلزقون فيها .. ريحة المعرض كانت بتكس



دوار المعرض الي جبال قاعة ستة ليش سايدين رايح و راد ؟؟ حاشتني حالة إنفصام شخصية و شيزوفرانيا ليما إستوعبته و تفاهمت معاه و طلعت منه



ماكو أحد يبيع برد ولا ذرة ولا نفيش ولا بيبسي .. كنت ميته يوع و عيوني إتلاقط أدورهم بس ما حصلتهم.. يمكن علشان رايحه الصبح ؟؟



أحلى شي .. في مكتبة حاطه كتبها للعرض فقط .. مادري ليش



الكاتب الزميل أحمد الحيدر منزل كتاب فاضي بالإضافة إلى كتابه خنفروش .. إيمانا منه إن الحياة صفحة بيضة .. الكتاب هذا يتوزع ببلاش



أشكر الشياب الكويتيين اللي كانوا قاعدين في ... فييييييي .. ياربي نسيت إسمها .. بس هذي مالت التراث الكويتي .. المهم كل اللي يبيعون فيها شياب كويتيين بس نشيطين ماشالله



ثلاث مرات و آنا أتمشى ينفصخ عزكم الله نعالي من ريولي .. بغيت أقلب على ويهي أكثر من مره



اللقاءات مو علشان آنا باريس هلتون النسخة الكويتية .. بس علشان المعرض فاضي و ما فيه أحد غيري



وبس



كان معكم من معرض الكويت الدولي للكتاب العربي القديم المكرر الغالي و شوي مغبر و لازم تنظفه بكلينكس ديتول



شــوش نجيــب محفــوظ نـــزار القبـــاني

45 comments:

عين بغزي said...

انا مارحت للحين ناطر تقاريركم وصدق ضني
تنقلون الحدث كما هو
تقريرج ماشجعني اروح واتعب حالي مع مقص الرقيب :)
شاكرلج
بس سؤال ليش ماسويتي لقاء عشان دعاية جناح هالسوري لووووول

SHOOSH said...

عين بغزي
========

آنا أقول روح

تدري الأذواق تختلف

يمكن تلاقي شي يعجبك

يمكن آنا ما عندي سالفه

منور

نمووول said...

شكرا على تغطية الفعالية
من عمر واسعارهم غاليه

شكراً

Anonymous said...

أحلى شي .. في مكتبة حاطه كتبها للعرض فقط .. مادري ليش
:s laish yayeen 3ayal!!

lilly said...

اشوه انج قلتيلي عاد كنت ناويه أروح بس على هالكلام الجميــــل جدا لا ولا لا شناويه على عمري :p

frankom said...

اخر مرة رحت فيها معرض الكتاب لما كنت بالمتوسطة

مستوى الكتب والشعب اللي هناك مو مستوى كتب وعلم مع احترامي للاقلية

مـغـاتيــــــــــــر said...

شكرا على التغطية
يعني نفس كل سنة من 20 سنة
;p

reemas said...

بصراحه ما همتني المعلومات و لا شنو كان في المعرض
اللي شدني اسلوبج اللي موتني من الضحك
بصراحه ابداع في السرد
و دم خفيف في الكتابه

صدقيني مو مجامله
فعلا استمتعت بقرائتي للبوست

شكرا و تحياتي
:))

enter-q8 said...

انتي كنتي رايحه معرض الكتاب
و الا
معرص الكتاب ترى تفرق

مالومك من الانفلونزا و الله

الا ما قلتي شنو اسم الكتاب اللي اشترتيه

7osen said...

انا رايي إن المعرض مميز ووايد حلو
وفيه الكثير من الكتب المهمة في كافة المجالات بس يبيلة شوية تدقيق وفحص وتمحيص وفرارة

يعني والله صج مادري بس أنا شفت وااايد كتب حلووة وتلبي جميع الاذواق

طبعاً في أشياء ممنوعة بس هم في اشياء مو ممنوعة ومميزة

وشكراً على هذا التقرير المميز

SHOOSH said...

نمووول
======

العفو

بعض الكتب كانت أسعارها مبالغ فيها

SHOOSH said...

7aitho Inna!!
==============

exactly !

hatha kan so2aly !

SHOOSH said...

lilly
=====

روحي و شوفي بنفسج

الأذواق تختلف

SHOOSH said...

frankom
========

انت من شريت الماك و انت راسك كبران علينا

:)

SHOOSH said...

مغاتير
=======

من 34 سنه

SHOOSH said...

reemas
======

عن جد

شكرا على المجامله

فرحتني

:)

SHOOSH said...

Enter-Q8
========

لووووووووووووووووول


هل كيف محد صاد البدلية غيرك

أول مره تكون عندي بدليه بالعنوان

صلحناها

:)

SHOOSH said...

7osen
======

صحيح

الأذواق تختلف

و كل واحد مقاييس الجوده عنده قد تختلف عن الآخر

علشان جذي قلت بالبوست انها وحهة نظري الشخصية


حلو انك لقيت شي يعجبك

و سعيده بمرورك

صقر قريش said...

معرض جدا جدا جدا سخيف اللهم الي فيه كتب محمد عابد الجابري وابوبلال عبدالله الحامد( مو كل كتبه قليلة جدا واخاف يشيلونهم بعد)

حصلت كتاب صغير وجميل للأستاذ عباس محمود العقاد بعنوان على الأثير (هو عدو للمرأة لكني انصح بقراءة كتب العقاد:)).

بعض كتب الصوفية واشطب على معرضنا البائس:(.

الاسعار يقول من كثر الي يشترون!!.

غالي وايد ومعرض مايسوى

YusuF.AsKR said...

هههههههههه

شووش

مادري , أحس أنج سويتي اللقاء التلفزيوني بس ماتبي تقولين !

عاد انا بتابع كل التقارير التلفزيونه عن المعرض (: و أول بنت تطلع إهي انتي ! ههه بإعتبارج رحتي مبجر !

ليييش أسوي كل هذا

بلاااااغة شف (:

عاد شوقتيني للروحه خصوصاً أني ادور على جم كتاب لـ غازي الصيبي ومو محصلهم

بس ما أظن الرقابه تخلينا نقرأ على كيفنا !

على فكره ,, المدونه فيها ريحة باتكس

ههههههههههه

may said...

لوووول
ذكرتيني مرة يوم كنت بالمتوسط ، قابلوني تلفزيون الكويت ..
وطبعا وااافقت بصدر رحب..
وحطوا اللقاء من باجر الخميس الظهر وانا بالزوارة في بيت عمي..
خخخخخخ
حسيت ان العالم كله يعرفني وصرت مشهورة..

عثماني said...

صبحج الله بالخير شوش

:)

سبحان الله .. قايل بخلص قهوتي و بطلع من المكتب و بروح المعرض

و قلت خن اسير على مدونتج .. والقى سوالفج عن المعرض

شكلي بهون عن الروحة بسبتج

:)

Sweet Revenge said...

شكرا علي التغطية
وودي اروح بس ماشجعتيني

نون النساء said...

مارحت للحين




اتلوع جبدي من المصافط والزحمة أنا بروحي ما أعرف أسوق إلا سيدا سيدا
وكل ما أروح أضيع مكان السيارة
و أتسمّر وأحاول أرسم خريطة بالصور بمخي شنو شفت اول ما نزلت ومن وين مريت
عشان اقدر اعرف وين مكاني


هههههههههههههههههههههههه

aL-NooR . said...

انا ناويه ارووووووح
جني هونت
:(
بشري يسوى الكتاب اللي شريتيه ؟

و الله طلعتي سليبرتي
و يلحقونج الباباراتزي

;p
***********

Hope said...

افااااااا
طلع مو خوش معرض
و مافيه كتب انجليزيه
=[
عاد كنت ناويه اروح .. بس خلاص جني هونت

يعطيج العافيه ع التقرير المميز
=p

Shaikha said...

LOL
اهم شي الباباراتزي ;P

ان شاء الله لنا روحه ..
قواج الله شوش ، خوش بوست حده ظريف
;P

رورو الشخبوطه said...

السلام..

رحت له ونصدمت..

بنزل عنه ان شاءالله بس نوعا ما بطب فيه :\

مال احمد الحيدر بلاش اللي يبيع جنه قالي بدينارين ونص اهو ماغيره الفاضي..

ومشكوره..

bokeh of magic * said...

شوووش طيحتي حظ المعرض لوووول
بس هم بروحله ادري نفس كل سنه ماني محصله بس نطمش شنسوي بعد ,
شسم الكتاب اللي شريتيه شوقتيني عليه ؟

SHOOSH said...

صقر قريش
=========

أهلا أهلا بالصقر

نورت مدونتي

و صـــاج

عدد كبير من الكتب أسعارها مبالغ فيها

SHOOSH said...

أبو غرايم
=========

والله ما سويت

والله مو آنا

:)

يا ظــــالم

مدونتي رخــام أصلا

ماكو بتكس

:)

SHOOSH said...

مي
==

لووووووووووووول

انتي عالأقل سوو معاج لقاء و طلعتي بالتلفزيون


آنا ما سوو معاي و حسيت روحي برتني سبيرز

SHOOSH said...

عثماني
=======

منور المدونه

و قهوة العافية

و رووووووح يا معود

حسيت الأوادم هونو عن المعرض و السبه انا

:/

SHOOSH said...

Sweet Revenge
==============

تكفيييين روحي

SHOOSH said...

نون النساء
===========

لووووول

انا من ادش احفظ اسم المكتبه اللي يم الباب علشان لا اضيع

SHOOSH said...

al-Noor
=======

رووووووووووووووحي

روووووووووووووووووووووووحي

يا ربي حاسة بتأنيب الضمير

الكتاب للحين ما قريته

بس اسمه يشوق

SHOOSH said...

Hope
====

ما فيه

واذا فيه تلاقينه قديم

SHOOSH said...

Shaikha
========

اي اي

تلوع جبدي من الباباراتزي

علشان جذي ما اطلع الا الصبح

Hamad said...

madri laish a7es ena wedch tkoneen moraslah bs ma nfa3 m3aaach bel bedaya .. bs el9ara7a 3afya 3alaich .. oo ma awa9ich elqay na'6rah 3ala elktaaab o tell us etha yeswa wela nooo :)

SHOOSH said...

رورو الشخبوطه
==============

ناطره بوستج

:)

SHOOSH said...

*Being one
===========

روحي

انا كل سنه اتحلطم بس لازم كل سنه اروح

:)

SHOOSH said...

Hamad
======

loooooooooool

la wallah

beda el 7elm met2a5er

Q80-ChillGirl said...

LOL

u really made me laugh, bs am curious, what was the book you bought? i hope u answer b4 i go there tomorrow morning :p 3lshan ashoofa

Anonymous said...

لووووووووووول طلعتي مشهورة

بس ماقلتي شنو اسم الكتاب اللي شريتيه؟؟

وحلو فكرة الدار اللي تعرض بس ماتبيع

لان من اسمه معرض ويعرض الكتب مو محلات للبيع!!

كادي

amani said...

والله انا عن نفسي منذ مبطي اكره معرض الكتاب الكويتي قاصييين علينا فيه كتب وكتب واخرتهاا طنق فش لا كتب سنعه ولا شي

و قدسيتهم لحكاامهم سبحان الله جنه ماافي غيره يااا اخي خله يمووت بعدين طلع محاسنه مووو واحد بايع ثلاث ترباع ديرته ومسويله كتاب ومعضمينه ولا ثاني دايس ابطن ثلاث ترباع شعبه ومخلينه ابهه .. مافي غير الكتب اللي تتكلم عن اشياء خرافيه اساطير قصص يعني ما اقول الا الله يخلي السلسله الخضراء كل سنه اجدد الاعداد بنفس الاسم . لووول ..

اما حتى التاريخ خربووطي يمشوون اللي عاجبهم واللي ما يعجبهم ماطلعووه من ديرتهم خير شر والكتب اللي فيهااا فكر معين للاسف تنمع يا عميي اهواا كاتب خاب عمره وسهران سنه سنتين ودفع دم قلبه على حبر واوراق واخر شي مانعيلي كتابه شنو بني ادم ماعنده عقل يعرف الصح من الغلط ولاا احد بيقووم عليكم حب تطفل لا اكثر ولا اقل واذا قصص الاطفال مافي غير سالي ذهبت الى السوق تشتري بسكوت وماغير امي اعتبرها مثلي الاعلى تنظف وتطبخ وتسمع كلام ابوي ,,, يا حبايبي عيالنا عقلهم غير عن عقلنااا القديم غيرو حركه شدو الطفل للقراءه مافيه اللحين طفل يحب يقرا ولا يمسك كتاب ويتصفحه بس من باب التسليه والسبب مافي تطور او خليني اقول فيه كتب مشوقه تنباع في الاسواق الاوربيه والكثير من الدول العربيه استقدمتها بس هني الحبايب لا ماينفع شسالفه الله واعلم عشان جذي اقولج الله يخلي السلسله الخضراء .. يا خلاف علينااا مخاسير وحجز قاعات وحالتنا حاله ومقابلات صحفيه ومهاايط على الفاااضي على ورقه وخرجه مامنهم فايده ... ما اقول الا الله يخلي الانترنت مع هالكتب الممنوعه اللي مااشوف منها فايده ليش مانعينهاا ... وياريت يجيبون شي جديد يجذب النااس يقرون مره ثانيه