من كويت السبعينات

أهم شي أسعار التذاكر

:)

u can find more pictures posted on my twitter

@shooshness

عندما تركب معاك "أمك" السيارة

ياالللللله يا كريم

عاد آنا ما أحب أركب جدام

منو زالغ سيارتج جذي ؟

علامكم منومين الكشن!! انتوا تنامون بالسيارة و لا شنو ؟

تلقط بطول الماي و تتحلطم

قريتي دعاء الركوب و لا بس معلقته منظر ؟

شوي شوي و انتي ترجعين قري

طقي هرن يمكن وراج يهال

شوي شوي

طالعي المنظرة

هدي التلفون لا باركت الله فيه

سكري هالأغاني الله يقطع إبليسها

هذا ليش يصفر ؟؟ جم تسوقين ؟

لا تلزقين بالسيايير

وخري عن الرصيف

ديري بالج كاميرا

يماا يماا !! شوي شوي

وقفي وقفي !! صفرااااا

صفطي عدل لا يدعمون السيارة

و آخر شي و اهي نازلة

آنا ما أحب سياقتكم .. آنا قايلة آخر مره أركب معاكم .. مادري شلون معطينكم لياسن

ربعنــــا في الفنادق

اللوبي: بمثابة الغرفة الثانية و ربما الأولى في بعض الأحيان .. حيث يحلو فيه السهر حتى الفجر

موظفي الفندق: يشتغلون عند أبونا

ألوووو نسينا جنطة عبود تحت عالكرسي و اللي يعافيك خل أحد يصعدها الغرفة

الممر: عادي جدا ترى اطفال يركضون حفاي و أبوهم يطلع يوقف بنص الممر يناديهم مرتديا ما يسمى بالمكسر

باقي العشا: بره عند الباب

الأصنصير: يطقون فوق و تحت وين يبون يروحون ما تدري .. و أصلا مو مهم !! المهم يفتح الباب و يدشون و في الغالب أصلا من يفتح الباب تلقاهم بوجهك !! نبي نطلع زين شلون ؟؟

بوفيه الريوق: يشيلون من البوفيه حق باجي عيالهم إللي للحين نايمين

اذا كانوا أهل: بيبان الغرف بالعادة مشرعه .. رايحين رادين

و اليوم صار موقف جدامي ذكرني بحركة عجزت أفهم سرها

فطوووم

هلا يمااا

شيلي الشامبو و الصابون من الحمامات و خشيهم خل الرووم سيرفس يحطون لنا يدد

شوووش .. يــوم ميـــلاد للتـــوثيق

17.June

I am ONE year older !

May me, SHOOSH and YOU stay together in all my years to come !

المبدعووون الكويتيووون

البيض

لـ الأكل

لـ التعبير عن الغضب - حذف الناس بالبيض

يستخدم كوسيلة لإتقاء الحسد و إبعاد العين الحارة - أول ما نشتري سيارة جديدة نكسر بيض تحت التواير

العلاق

لتعليق الملابس

يستخدم كــ أريل للحصول على قنوات تلفزيونية اكثر صفاءا و ذلك عن طريق فتح العلاق و تمديده

أداة مفيدة جدا للترهيب و الضرب

الجرايد

نقراها

ناكل عليها

تستخدم في كثير من الاحيان كـ نوع من أنواع الستائر المؤقتة خصوصا عند النزول في منزل جديد

النعال ـ أعزكم الله

لـ اللبس

لـ الضرب

أداة للقتل بحيث يستخدم لـ قتل الكثير من الحشرات الطائرة و الزاحفة

العباة / العباية

نلبسها

ثوب صلاة - حيث إننا نلفها علينا و نصلي فيها في حال مالنا خلق ندور ثوب و لقيناها طايحه يمنا

لحاف - و خصوصا عباية الأم بحيث تستخدم كـ غطاء فعال لما ننام الظهر في الصالة

أداة لتخويف الأطفال مع شرط تغطية الوجه فيها بالكامل و تسكير الليتات - جاكم الجني

العقال

لـ اللبس

لـ الضرب و التلشيط

للتعبير عن التحية و التقدير - رمي العقال مسافة 45 سم

القحفية

لـ اللبس

إستخدامات تجميلية كتغطية الصلعة

تعمل كغطاء للعين لتفادي الإضاءة عند النوم - إذا تضايقت من الإضاءة فـ ما عليك غير إنك تسحبها من على راسك و تنزلها على وجهك

الكلينكس

إستخدام علبة الكلينكس كـ أداة للتنبيه - بحيث إذا كنت تسولف و اللي بعيد عنك غير منتبه لك فما عليك سوى حذفة بقوطي الكلينكس

في حال خلت العلبة من المحارم الورقية يتم إستخدامها في الغالب كسلة مهملات مؤقته - كليت كاكاو و حطيت القرطاس داخل القوطي

مد كف اليد و له عدة دلالات

عطني فلوس

كفك

مالت عليك - هنا يشترط رفع الكف عاموديا

هــذا ما يسمــى بإستراتيجية الإستخــدام المتعــدد

إرفــع راســك إنت كويـــتي

الكـــويتيون و تــويتر

لا يخفى عليكم و على الجميع الهبّة الغيــر إعتيادية التي هبّ بها الشعب الكويتي العــريق في المضروب على عينه المدعو

تـــويتر

إللي لو يدرى إن الكويتيـيـن بيسووون فيــه جــذي كــان إنتحــر منــذ مبطــي

إليكــم نمــاذج من أحــلى الشخصيــات الكويتيــة

@al-3asheq: سيدتي يا أنثى الأشواق أدرك أنك أنثاي وأدرك أنيّ مشتاق أخجلُ حين أراكِ ضاعت أوهامك في الأنفاق #أحبك

@7alema_4_ever: صباحكم طيب .. صباح يملأه الحب و طاعة الرحمن و كوب قهوة ساخن من حلاته ما ودي أشربه .. تمنيت صحبتكم الطيبه معاي #تويت من شرفة المنزل

@Nejri: قطيعة .. شنو هالجو .. غبار غبار غبار .. حتى راعي البنك مو قاعد عالدوار ! ألعن أبو اليوم إللي قعدتوني فيه من النوم اللي يدز لي شي أطقه أن فولو#وجع

@mothaqafa_w_agra_kotob: قرأت لكم اليوم كتاب من عجائب عالم الدوود .. و إليكم هذه المعلومات .. هل تعلم أن دودة الغز تسوي فنايل قطن؟ #من مكتبتي

@Thawri_q8i09: لله درك يا شباب الثورة .. نحن معكم إخوانكم من الكويت .. ثوروا ثوروا ثوروا و حنا نتابعكم من الدوانية #سوريا #ليبيا #مصر #الواق واق # غانا #كمبوديا

@SalafSaleh_21: لا إله إلا أنت سبحانك إني كنت من الظالمين .. ندعوا بالهداية لنا و لكم رزقنا الله الجنة أجمعين .. أتركوا عنكم المنكر و مشاهدة الزفاف الملكي .. فهذا ما هو إلا من رجس الشيطان و لإلهائكم عن أداء صلاة الجمعة #إصلاح

@little_cool_grl: woooow its thursday already ! cant wait to meet the girls in the avenues for some guys chasing and halaga ! #gazz

@GeekyQ8i: Updating my iPhone and my iPad and my MacBook #iloveapple

@aal_albait: المرجع أجاز يا أخي رجاءا لا تسب .. لكم دينكم و لي ديني #مرجع

@seyaseya: متى الله يفكنا منه و يفرج علينا .. تعبنا #مهمود #منى واسف #إرهل

@kuwaity_wld_b6nha: أنا أسواك و أسوى عشره منك يا ... يا .... يا .... #معصب

@salooom23: إنت لو فيك خير ما انحدرت بالنقاش لي هالمستوى .. انا مادري ليش تسبون !! يا .... يا .... #تسب أسب

@lovelyTiger: #NP i love u, u love me from barny while waiting for my dinner to be ready and downloading new episode of #Glee

@Barshlooni: شباب تكفون سكروا ليتات الدوانية لما تطلعون #بروح أنام

@sweetcupcake: توني طالعه من العرس و الماشات اللي براسي تعورني .. منو يطلعهم من شعري #تعبانه

و من أشهر هاش تاقات الكويتيين

#غبار

#أفنيوز

#بنك بيري

#العشق الممنوع

#ماكي

#الراشد

#البراك

#المسلم

#شعر

#سلوى الجسار

#أسيل العوضي

#نبيل العوضي

#الوطن

#العبدالجليل

#مهمود هيدر

#حكومة

#كافي

#سور5

#إرحل

#إرحل

#إرحل

#إرحل

هذا و أي تشابه بالإسماء و الله و بالله غير مقصود

:)

و تقدرون تتابعوني في تويتر على هذا النك نيم

@shooshness

فـي واجــهة مستشـــفى حكــــومي

أهــم شي إن الدكتـــور مغمــى عليـــه و الممــرضة طايحه عــلى وجهـها

أعتذر لرداءة الصورة .. حيث إني مصورتهم و هم محطوطين داخل صندوق زجاجي .. يعني كشخة