عيدكم مبــــارك

تقبل الله طاعاتكم و تعودونه إن شاء الله لا فاقدين و لا مفقودين

رمضان كريم

مبــــارك عليــكم الشهـــر

و ينعــاد عليكــم بصحــة و خيــر و بركـــة

شووووش

:*

شوووش .. يــوم ميـــلاد للتـــوثيق

17.June

I am ONE year older !

May me, SHOOSH and YOU stay together in all my years to come !

عنــدما كــنت طفــلة

دايما يقولون في بريعصي طايح بـ برادة الماي مالت المدرسة و دايما الماي حار و اللي مايها بارد بعيدة .. على ما توصل لها إلا طاق الجرس

كان بطني يعورني لما تجي الأبلة اللي تنادي أسامي البنات اللي بيودونهم عند طبيبة الأسنان .. يا ساتر

في جني بالحضيرة اللي بالساحه الخلفية .. أهم شي إن الحضيرة ما فيها إلا فيران

كان في يوم بالمدرسة إسمه يوم النظافة يختارون أنظف وحده بالمدرسة و يعطونها هدية صابونة .. الهدية مو منطقية

كنا نتبرع حق السور الرابع .. مادري بنوه ولا لأ

كان في صبي حول بصفي بالروضه كنت أخاف منه و ذيك السنة كنت غياب مستمر .. حرمني من أولى روضة

أكتب رسايل حق أمي و أبوي .. سوالف أفلام

ما كنت أعرف آكل التكا .. للحين ما أعرف آكلها

كنت أشوف فول هاوس بالقناة الثانية

كنا نسوي بيوت من مساند الصالة و نحذف الريموتات و المشوط على بعض و مسمين اللعبة حرب النجوم .. يعني ستار وور

كنت ألفلف ايدي و ريولي و احط لزقات و انا مافيني شي .. للحين يسوون هالحركة

كانوا المصريات بالمدرسة يلبسون تراينينق سوت الألعاب تحت نفنوف المدرسة و كنت أقلدهم عبالي كشخه .. الكحلي بو خطوط بيض

كنا نلعب كرة بالحوش و لما نخلص احسن واحد اللي يحل المكيف و يوقف جدامه و يلزق وجهه بفتحات التكييف

كان عندنا حوض سباحه نايلون مرسوم عليه حيوانات زرافة و فيل و أسد تترسه لنا أمي إذا كان في ماي صليبي فقط

كنت أحب ريكو

خواتي يحطون هدومي بجنطة و يقولون لي اني بنت الخدامة مو اختهم .. إن كيدهن لعظيــم

الأعــراض الجانبيــة للمنحــة الأميــرية

الــوالد .. يصفق كف بكف .. متحسف إنه زوج بناته بدري .. راحوا عليــه ســت آلااااااف .. راحت عليك يا صاحبي

الزوج و الزوجــة .. تنــاجروا على آلاف العيــال .. زعلــت و راحت بيت أهلها .. عبالك بتخليك ؟

الزوج و على غير العادة ترجع الزوجه من الدوام لتلقاه نايم الظهر و قافل الباب .. ما يبي يناقش موضوع الألف .. لووول حـــركات

إجتماعات عائلية طارئة في البيوت .. لوضع الخطط و تقسيم المنحــة

المطــلق .. يتــواصل مع ربعــه المحــامين .. مستذبح يـبي يرد حضانـة عيــاله .. عليــنا ؟

الشبــاب .. رغبــة مفاجئة في الزواج من مطــلقة أو أرمــله و يفضــل عندهــا عيال .. آااال ستر آااال

الي تحــت واحد و عشــرين .. يحــاولون فتـح حسـابات خاصة علشــان لا تنوكل عليــهم فلــوسهم .. مالكم أمــل

الكويتية أم العيال و المتزوجــة من غير كويتي .. حاطه إيدها على خدها و تندب حظهــا .. مقــلب

الحامل و المتوقع ولادتها قبل فبراير .. مازالت تصلي حمد و شكر .. ما بغت تضبط

المدرسة الحامل إللي مضبطة ولادتها شهر أربعه علشان تشبكها مع إجازة الصيف .. ما زالت مصدومه .. عبالج صايدة الحركة ؟

الـدّيانه .. من ألحـــين عند البيــبان .. وليــــن

المحلات التجارية تصــدر قرار طــاريء بوقف التنــزيلات و العــروض الموسمية .. لــعـــانة

يوم الأثنين السابع عشر من يناير كان أسـرع يوم مر على الكويتيين .. لوحظ عليهم ما يلي

خفة الدم

الحب

الرومانسية

تبادل القبلات و التهاني

السعادة

الرضا

الإكتفاء الذاتي

النشاط و الحيوية

حتى معدل الجرائم و حوادث السيارات انخفض ذاك اليوم

نشكـر صـاحب السمــو على المـكرمة الأميـرية .. والله يبـارك لكم فيهـا جميــعا

تفسفسونــها فلس فلس بالعــافية إنشـاء الله

قــاتل اللــه الشــاور بـوكــس

طبعـا أنا أخاف أنطق على بوستي

ليش الكل متنشن بالديره اللهم يا كافي

ما علينا

والله يا جماعه قبل حمامي وش زينـه .. جميل .. لطيف .. فريندلي

من يوم ما حاشه التمدين اللي حاش كل مرفقات بيتنا .. و ركبوا فيه هذا اللي اسمه شاور بوكس و انا ما عاد يهنا لي حمام

تبي تعذبني ؟ سبحني

يـــا ربـــــاه

تسبح داخله الجو دافي .. رواق .. تمام .. كل شي اوكي

تخلص تفتح بابه .. يكفخك ذاك الهوى البارد اللي ما يرحم

تقول سابح بــ مخيــم

أعوووووذ بالله

والله قبل لا أكتب بوستي هذا.. ثلاث مرات اشيل شلايلي يعني بروح اسبح .. افتح الباب اشوف الشاور بوكس أسكر الباب و أرجع انسدح عالغنفه

الى ان إرتأيت أن اروح اسبح في حمام الوالده ربي يحفظها .. ليش ان حمامها الوحيد هو اللي ما حاشه الإعمار

أبت إلا يخلونه نفس ما هو

جيت عاد بغسل شعري .. أدور شامبو .. وإلا إيش ؟

يا اللـــــه .. شخباري !! سلفكــــرين ؟

و نكهة بيض ؟

شعــر باهت ؟

لا حول ولا قوة إلا بالله .. أنا قريت بيض و باهت حاشني إحباط .. الظاهر أمي تعاني مع شعرها

ضاق خلقي عليها .. خاشه كل هذا بقلبها

ما علينا .. بيض بيض

طبعا سبحت و خلصت .. و قلت أنبش بأغراض أمي .. دام الشامبو بيض .. أتوقع معجون الأسنان نكهة تمـر

والله ولا خــاب ظني .. دورت معجــونها و لا ايش ؟

نكهة ســـواك .. مـع فلــورايد

لا حول ولا قوة إلا بالله .. ســواك عاد يا يمه ســواك

لا ولقيت درج حاطه فيه نص كونديشنر .. ربع قوطي حمام زيت .. شاور جيل مال جفنشي

إكتشفت إن أي شي آنا و خواتي نطلعه ما نبيه تاخذه و تحطه عندها

بغيت أدور أكثر .. بس الله يهداها رجتني

كل شوي طاقه الباب .. لا توصخين حمامي .. لا تلعبين بأغراضي

المهم عاد ..عقب البيض و الســواك انا إكتشفت أن أمي

أووووورجانيـــك

و أتــوقع فيجيتيـــريـــان بس مستحيــة تقـــول

أضـــحى مبـــارك

جــعل اللــه أيــــامكــم كلــها أعيــــاد

عيـــــدكم مبـــــارك

شوووش

عظــــامي

بينما أنا منهمكة في العمل ..لا أريد أن أضيع أي جزء من الثانية

على برامج تسلية المراهقين .. من تويتر و فيس بوك و ام اس ان و غيره

و بينما كنت أنهي أحد التقارير الثرية اللتي أكتبها

و أردت أن أضع عليها صورة شعار الشركة حتى يتبارك التقرير

و بينما كنت أبحث في فولدر الصور

و جدت هذه الصورة الغريبة

و ما استوعبت وش هي

حتى أسعفتني ذاكرتي الغراء .. حيث عادت بي إلي يجي سنه وره

عندما سقطت و ما أدري شصار في يدي

المهم انتهينا بجبس لمدة ثلاثة أسابيع

و هذه أحبائي القراء .. صورة أشعة عظــام يدي الفقيره لله

مازلت أتذكر الدكتــور و أهو يقولي: إنتي من صجج ؟ طيحة نفس هذي تسوي فيج جذي ؟

عندكم عيش في بيتكم ؟

إنتي تاكلين ؟

طبعا كان يتكلم باستهزاء و يضحك بحكم ان الطيحه كانت بسيطه ومو من مكان مرتفع

هممم أخبي عليكم ليــه ؟؟ تقلبت على سريري المنخفض و اندمجت وانا أتقلب و خذت راحتي و خلص السرير علي فجأه و طحت

بس جذي .. طيحه بارده ما كان فيها أكشن

المهم

الدكتور كان يقول عظامي عـامله زي أعواد الأكل هذي اللي ياكلون فيها الصينيين

الجب ستيك

تشوب ستيك

إسمها سبه يا لطيف

يمـكن بحـكم إنك تـاكل فيها و تحـط الأكل داخل فاهـك و بالتــالي غصبا عليك تسكت فعشان جذي إسمـها

جب ستيك ؟

جـــايز

مــا علينا

المهم: أنا أتطنز على عظــامي كيفي .. ملوووتي .. اللي يتطنز فيكم يــاويله و يا ســواد فجره و ظهره و عصره و ليله

وبعد: ايش رايكم في كــلمة فــاهك ؟

كيـــف تعبــــرعـن حبــــك ؟

أتـــوقع أنــا من أكثــر النـــاس اللــي مـا يعــرفون يعبـــرون

فـأنــا اللهــــم يــا كـــافـي

إذا حبيتـــك .. هجـــمت علــيك

و كفـــختك و تليـــت شعـــرك و عضيـــت إيــدك

و عطيـــتك كلمتيـــن وقــلت لــك

يـــا أحمـــق أحبـــك

هــذي أنا في قمــة حبــى و هذا هــو منتهــى الصفــاء و الــروحانيــه عنـدي .. أبعــدكم اللــه عنهــا و كفــاكم شــرها

فضـــروري الآن

تــوريني .. و تعلمنــي

كيــف تعبــر عـن حبــك ؟

هــلالــي

غير إنه شهر عباده و صيام

فهو بلا منازع

شهر البراطم

شهر الخدود

شهر الرموش التركيب

شهر الإكستنشن

شهر الدراريع

شهر الخشوم اليديده المعدله

شهر اللي محزم معده و اللي معدل أسانه و إللي زارع له شعر

شهر الممثلين اليدد

شهر بدليات الممثلين اللي غصب يخلونهم يتكلمون كويتي

وينش يا يمااا ؟؟ ليه يا جماعة الربع ؟؟

المهم

آنا مو مشوقني شي

كثر شوقي أعرف إغنية العفاسي هالسنه شنو

قصدي نشيد زين هالسنه شنو

:)

مبـــارك عليـــكم رمضــــان

و مبـــارك عليـــكم هــلالــي اللي بالصـــوره

حــاشني شــد عضــلي و آنا مسويه الهــلال بــ يد و أصــور بـ يد ثانيــه

بس تستــاهلوووون

تــروح لـكم عضــلاتي فـدوه

ينــعاد علي و عليــكم بالخيــر

:*

يــوم الدقــــرات العــــالمي

في الصاله على و جبة الغداء .. الأهل يتغدون و آنا على الغنفه أغني

أخوي: بس بس سكتي

شوش: ليش ؟؟

أخوي: الأكل محطوط قاعدين ناكل

شوش: اي عادي خو إنت اللي تاكل مو آنا !! شكو أسكت ؟؟

أخوي: صوووتج يسد نفسي

!!!!!

في الشاليه نلعب كرة قدم

شوش: خلووووود كاني عطني بااااااس

خلوووود: روحي زين ما تعرفين تشوتين كل شوتاتج بره يالعميه

!!!!!

في المول أشتري ميك أب

شوش: ابي جولدن براون

اللبنانيه: مافي مداااااااام

شوش: همممم أشوووف الوردي

البنانيه: ما بيلبألك مدااام لونك بروونزاااج انتي مش بيضه كتيرهيدا اللون حلو على البيض بس

!!!!!

في الشاليه و احنا قاعدين بره عالبحر وحده من رفيجاتي تنادي

رفيجتي: حبيبتي ؟؟

شوش: هلااا

رفيجتي: مو إنتي أنادي أنوار

!!!!!

آخر شي توني رديت البيت .. دشيت داري ولا ينفجر الليت

مالت عليكم حتى مالت عليكم

كل هالدقرات بيوووم واحد

ترى آنا حســــاســــه

شينومني اليــــــــــــــــــــوم

:/

تــــكــــا

صباح الخير

اليوم سويت غلطه فزيـــــــــــعه

مسحت البوست اللي طاف بتعليقاته

ما خليت شي

عندي اثنين تحت نفس العنوان .. واحد درافت و الثاني الأصلي إللي كنت منزلته

مسحت الاصلي و خليت الدرافت

معلش

تصيــــــر عند أحسن البلوقرز

المهم

كنا مسوين باربيكيو أي حفل شواء بالشاليه

عادة اكون مشغوله بأي شي حزة الشوي و ما أجي إلا حزة الاكل و إلي أصلا يكونون الاهل مزهبين لي اكلي المعتاد لاني ما احب الشوي نفسهم

الباربيكيو إللي طاف

ما كان عندي شي و كنت شاهده على جميع مراحل الشواء

شفت فيها للأسف التكــــا

و استرجعت معاها كل الذكريات السيئه من أيام الطفوله

التكــا قد لا تعني شي لكم

بس آنا تعنيلي كل ذكرى سيئه و محرجه و مقرفه

لا اخفي عليكم أعزائي القراء

إن خمسة و سبعين بالإميه من طفولتي قضيتها من غير أسنان

نعم

من غير أسنــان

لا طواحن لا أضراس لا قواطع ولا شي

تقريبا من عمر 5 سنين لي 10 سنين و آنا حلجي يصفر إلا من ضرس أو أثنين

ماكو شي

و فوق هذا .. كانت هوايتي الترزز بالصور و تشريع حلجي و كأني فخوره بالفضاوه اللي فيه

و كانت التكا ماي نـــايت ميــــر

و خصوصا .. آااااه يا قلبي

خصوصا لما أضطر (أمثل) إني آكلها جدام الأقرباء و الغرباء و في المطاعم و الاماكن العامه

تذكرت الشرقه

و الغصه

و الصراع الأبدي بيني و بين لحمة التكا

إللي عمري ما فزت فيه

تدرون شنو كنت أسوي

كنت أعلجها بحلجي و آخر شي أطلعها بهدوء و أحذفها تحت الطاوله بالمطعم

من غير لا يحس فيني احد

اي شسوي ما أقدر عليها

يابسه علي

و الجماعه عبالهم أعرف آكلها و احبها

عسى ما شافو تكا ولا أي نوع من أنواع اللحم العرد إلا جدموا لي إياه

لا اخفي عليكم اني آخر مره بالشوي خذيت وحده و جربت آكلها

أمام الملأ

و كنوع من انواع التحدي و الإنتقام

لأني ألحين الحمدالله ما صار عندي أسنان بس لااا .. بل أنياب بعد

بس تصدقون

هم ما قدرت آكلها و أقصصها

يخرب بيتها من لحمه

ده كان يوم إسود إللي فكرت آكل فيه تكا

شوش تحت الإصــابه

قاعده شاغله روحي بروحي .. فاكه العالم من شري .. مالي شغل بأحد .. أطقطق بالموبايل

و إذا بها إختي تدش علي الصاله بعدتها

مقصات .. شرايط .. تيجان .. ورد .. مسدس شمع .. عفسه عفسه

لوهله .. عبالي أحد عندنا بيتزوج و مو قايلين لي

سألتها شعندج ؟؟ قالت أسوي تيجان يهال الروضه عندنا حفله

رديت انشغلت بروحي .. بس كنت ألتفت عليها كل شوي أشوفها شتسوي .. إستانست على مسدس الشمع

عجبني

مال واحد يلعب فيه و يلزق و يخربط

وإذا بي أقترح عليها

شوش: انتي الحين ماسكه التاج ب إيد و الشمع ب إيد .. يطلع عوي جذي .. مسكي لي التاج و آنا ألزق الورد بالشمع

إختي: اي والله انا بعد حاسه انه عوي

واستانست .. و طلعت الشغله سهله .. و استهنت بالموضوع .. أول تاجين كنت اركز و أفكر و أمخمخ و أهندس .. ساعه يالله اقرر وين احط الشمع

عقب خامس تاج صرت خبيره و بلشت أشتغل بسرعه .. و بديت استهتر و أتهور

اختي: شوش حبيبتي ديري بالج ترى الشمع حار .. عدال شوي شوي

شوش: لا عادي ما يبيله شي .. بعدبن انتي عندج شكثر هذيل متى تخلصينهم اذا كل واحد تقعدين عليه ساعه

و فجـــــأه

التاج السابع .. حسبي الله عليه من تاج .. عســــاه ينكسر يارب .. حطيت الشمع على التاج و يايه برفع المسدس .. ولا للحين لازق فيه شمع ويلشطني على خدي

آاااااه يا خدي .. خذيت كف شمعي حار و محترم

سويت فلم بالبيت ما أكو أحسن منه .. حتى سعاد حسني ما تقايش يمي .. بالأخير أقنعوني إنه قضاء و قدر و الحنه ما منها فايده

سكت .. صار الليل .. رحنا الشاليه

قررو يلعبون كرة قدم

بما إني ميسي (اخاف بس) العايله .. و الكل يستذبح عشان أكون ضمن فريقه .. و لازم يصير هواش علي .. قررو إني ما ألعب معاهم

استبعدوني جليلين الحيا للأعذار التاليه

خوافه

ما تعرفين تشوتين

بسرعه يقطعون منج الكره

اذا يت الكره صوبج توخرين

أعذار مالها من الصحه أساس .. شوي و يقولون عني حوله بعد .. المهم رديت بواسطه و لعبت غصبا عليهم

و ليش اني لاعبه غصبا عليهم طلعوا الحره فيني على أرض الملعب القاسيه

هدوا القوووول و قاموا ينيشنون علي و يشوتون الكره صوبي بأقوى ما عندهم الححححح

بدال كرة قدم صار قنص .. الشاطر اللي يشوتني

يعرجبوني لما أركض

يدزوني

طيحوني أربع مرات .. و فوق كل هذا لما أقولهم فاول يقولون لي إنتي دلوووووعه .. هذي كرة القدم ما تبين تتعورين لا تلعبين

آاااااه يا جروحي

ما ظل فيني شي صاحي

ها أنا ذا .. أكتب لكم البوست .. و الآيس باج بإيدي

شوي رافعته على خدي من حرقة الشمع .. و شوي منزلته على كوعي

أعالج جروووحي بروووووحي

حسبي الله و نعم الوكيل

إنشالله كل اللي طيحوني اليوم يطيحوووون باجر

و مسدس الشمع إنشالله ينفجر بروحه و يتفلش

قولوا أميــــــــــــن

مــــزاج إتش ون أتشـــــوووو إن ون

محكورة بالغرفه صارلي أربع أيام

عسى ما شافوا يدة باب داري تحركت إلا صرخوا

وااااااااااااااااااااااااي

دشي داخل

يمااااااااااااااااااااا

لا تطلعيـــــن

أوينــــــك أوينــــــك

بالله هذي اوينك اوينك شتبي؟؟؟

محسسيني إني ذبانه

مو بس ذبانه

ذبانه وصخه حتى ربعها الذبان ما يبونها

الله يالدنيا

يقولون اللي يمرض يدلعونه

وآنا أبوي يقول حق الدكتور ما تنومونها عندكم أحسن ؟؟؟؟

كل هذا خـــووووووووووووووف

الله كـــــريم

وين الحب و الحنان ؟؟ وين السابوووورت وين ؟؟

مو كفاية تخنزرنا ؟؟؟؟

نمت إحتياط لي ستعش سنه جدام

إستخدمت ثلاثتعش كرتون كلينكس في أربع أيام

صندوقين برتقال

أربع صناديق ليمون

ثلاث كراتين بنادول

جرايد الصباح و المساء حتى الوسيط قريتها

رتبت كبتي

رتبت كتبي حسب سنة الطبعه

طبعه يعني برنت مو طبعه الغرقه مالتكم

صلحت الدي في دي الخربان

قمت أخلط عطور

احط فرنسي فوقه عربي و أشوف شيطلع

يا سلام علي .. بصك على سيد جنيد

و أحسن شي إن معاشي نازل صارله خمس أيام و ما صرفت منه شي

ثاني أحسن شي إن بخلص الكتاب اللي قاعده أقراه

عجيـــــــــــــــب و الأساطير اللي فيه أعجب

بعطيكم فيه بوست من النوع الثقافي الفلسفي الشوشي قريبا

المهم

الإغنية القادمه إكتشافي وآنا محكورة بالغرفه

My latest addiction

حلوه

إللي ما يسمعها و يحبها و الله لأطلع له و أعطس بوجهه

إذا نـــاوي تــــروح

ربعي و رفيجاتي المدونين و المدونات .. سامحوني ما أقدر أقرى بوستاتكم الشيقه و لا أعلق .. عندي مرضيه أسبوع .. كلش ما أعبر أجابل الشاشه و الله

:*

و شكرا لكل من دزلي رساله أو حط لي تعليق و تمنى لي بالشفا .. والي ما دعى لي إنشالله ياربي يتخ .. يتخخ .. ماني مكلمه

:)

How To With SHOOSH (Episode1: BlackBerry)

مرحبا مليـــــون

شلونكم و شلون غاليكم ؟؟ عساكم بخير ؟؟

هذي الحلقة الأولى من برنامج

HOW TO WITH SHOOSH

و حلقتنا اليوم عنوانها

كيف تكون مستخدم تكانه للبلاك بيري ؟؟؟

BlackBerry Covers

الشباب: لا تفكر تستخدم الكفرات الربر الفسفورية و ذات الألوان المجنونه و الفاقعه .. بتكون حد الهلاقه لو فعلت .. إنت رجل بالنهايه .. كلش ما تسوى عليك تمسخر روحك آخر عمرك على كفر موبايل .. يعني ما أتخيل رجال كاشخ و رزه و دشداشه و شماغ أحمر وماسك بيده بلاك بيري بكفر وردي فسفوري .. مو شي .. الكفرات ذات الألوان الموو تكانه تخصم من نقاطك وايد .. خل جهازك مفصخ .. مو ضروري تلبسه شي يا أخي

البنات: لا ثم لا ثم لا تستخدمين الكفرات اللي تلامع و إلي فيها فصوص و ترتر و زري و شك و عفسه جنج شايله بيدج دراعه مو موبايل .. نوت سوو كوووووول

شباب + بنات: هذا الحبل مادري شنو اللي تعلقونه بالرقبه حده مليق .. ماله داعي يعني كل واحد معلق موبايله على قلبه .. أصلا طبيا مو زين .. و بعدين يا بنيه ياحلوه .. جم شي بالله معلق برقبتج ؟؟ سلسلتج و لا كرتج الدوام و لا تلفونج .. كفايه

BlackBerry Messenger BBM

الشباب: حدك مليق و آوت أوف ستايل اذا حطيت صورة ورده كصورة شخصيه لك بالبلاك بيري مسنجر .. آنا سيمبلي تلوع جبدي مادري ليش .. و لا تحط صورر نمر و أسد رجاءا .. لا تحاول بأي طريقه ربط روحك بشخصية الحيوانات المفترسه .. ماكو علاقه يعني .. بتحط صوره حط صورتك .. حط أي شي بس تكفى ورده و قلب حب لأ لأ لأ لأ .. شخبـــــاري

البنات: إنتي بالذات لا تحطين صورتج إذا كنتي تعرفين إن صورة ويهج ما تركب .. و تكفون لا تحطون صورة أشواريا و لا كاميرون دياز .. فجأة بنات الكويت كلهم أشورايا

الشباب: لا تضيف أحد ما عطاك إذن تضيفه .. نوت كووووول و إن أبروبرايت .. إذا أحد مسحك من اللسته لا تدز له مسج وينك ما أشوووفك رد ضيفني مره ثانيه !!! ياربي ليش الإحراج ؟؟ تحرج روحك و تحرج الشخص الثاني .. يا أخي ماسحك ما يبيك .. خلاص اللي مسحك بالطقاق اللي يطقه شنو يعني ؟؟؟ لا تحنون الحنه مو زينه

البنات: لا تضيفين واحد ماخذه البين كود ماله مادري من وين و تستعبطين تسوين روحج غلطانه .. هالسالفه بدت أوائل التسعينات .. كانت ناس تدق و تقول وي سوري غلطانه .. بعدين إنتقلت للمسجات .. و من ثم الإيميلات و ألحين هني .. حركه مكشوفه

شباب + بنات: ماله داعي برودكاست كل شوي .. عسى ما ***** إلا دزيتوا فيها برودكاست .. مو حلوه .. الثقل الثقل الثقل

BlackBerry Ring Tones

شباب + بنات: إذا كل شوي يايك بي بي إم و طايحله سوالف خل تلفونك سايلنت .. لا تلج الناس و خلق الله معاك

مع تحياتي

شوش وينفري الد. فيل

العميــــده

عمتي .. بس بالضبط بالضبط هي عمة أبوي .. إخت جدي يعني

أتوقع هي عميدة العايلة .. ما أدري صراحه إذا في أحد أكبر منها و يستحق لقب العمودية أكثر منها

بس إن ما خاب ضني هي أكبر وحده

عمتي هذي مخرفة

بس تخريفها على كيفها و على مزاجها

يعني تفصل و تطقها خرفنه إذا بغت .. و ترد صاحية و مخها يوزن 60 بلد إذا بغت في أحيان أخرى

أكبر إقتصادي بالدنيا ما يقدر يقص عليها بالفلوس

عمتي عايشة في بيت بروحها .. جنية ما تخاف .. ما تبي أحد يقعد معاها .. هي و خداماتها و عندها ممرضه تروح و ترجع عليها

عيالها و عيال عيالها الكل يروح لها ما يقصرون فيهاا .. بس ما تهد بيتها و لا ترضى أحد فيهم يقعد عندها

ما علينا

في المناسبات الرسمية و الأعياد مثل رمضان .. العيدين .. و في حال كانوا الأهل مشغولين .. لازم كل عايلة تدز مندوب منها يسلم على العمة

يعني مثلا إذا أبوي راح بارك لها بالشهر ما يبين بعينها .. لازم أبوي يدز مندوب من عياله عقب يومين أو ثلاث يروح لها بعد

وهكذا هو العرف مع عمتي

وصوني أمر عليها بشهر مضان أبارك لها بالشهر و أوصل لها تحيات العايلة العطرة .. بس بصراحة ما رحت .. أول شي لأن عمري ما رحت لها لحالي .. ثاني شي لأن لسانها طويل .. ثالث شي لأن ماكو شي إن كــومون بيني و بينها

وصوني أروح لها مره ثانية أول أيام العيد .. مو وصوني بالأحرى دبسوني و غصبوني

رحت آنا و إختي

دشينا عليها دارها و لا منسدحة

طبعا هي تستقبل الناس بدارها .. ما يدور عندها صالات و إستقبالات

و كان الحوار التالي

شوش: السلام عليكم عمتي .. ألقي السلام بكل حماس و مجبلة عليها ببوسها بعد

العمة: عمة بعينج إنشالله حتى عمة بعينج

شوش: هذي شفيها !!! الشرهة علينا يايين نسلم عليها

إختي: ما عليج عادي طوفي مره عوده و مخرفه

شوش: تجدمت بحب راسها .. ما كو يأس .. ما شالت راسها يعني بس تحوس فيه يمين و يسار .. تتغلا

إختي: شلونج عمتي ؟؟ شفيج الله يهداج تزفينا ؟؟ إنتي زعلانه؟؟

عمتي: إي زعلانه .. إحد يجي يبارك خامس أيام العيد

لوووووول لا حظوا خامس أيام العيد ها

شوش تساسر إختها: كـــــــــاك .. أي خامس !! العيد العود إن ذبح عمره أربع أيام من وين يابت عمتي خامس

إختي: إي فقيرة ما تدري وين الله قاطها .. هذا أرذل العمر خرفت بعد عمري

شوش: عمتي الله يهداج اليوم أول أيام العيد شفيج !! أصلا ما مرينا على أحد قبلج .. إنتي أول وحدة

عمتي: إي أدري إنه أول يوم بس علامكم محد فيكم مرني برمضان؟؟

شوش: إمبلا عمتي مريناج شفيج نسيتي

إختي: يالنصابة ما مريناها !! ليش تقولين لها مريناج؟؟

شوش: ألحين إنتي مو تقولين مخرفة !!! بالله شدراها جيناها ولا لأ !! قولي إي و خلاص

عمتي: أيا اليواره !!! عبالج ما أعرف !! عبالج ما أذكر !! محد فيكم مرني .. يالله !! يالله قوموا طلعوا من بيتي يالله .. و روحوا قولوا حق اللي مطرشكم مابي أحد فيكم يجبني

إختي: تقوم و تبوس راس العمة .. عمتى الله يهداج شفيج علينا محد مطرشنا بروحنا يايينج إحنا نحبج

العمة: لااااا آنا أدري منو مطرشكم .. ولا إنتوا ما تيوني بروحكم .. هذا أخوووووي مطرشكم

شوش: مالت عليج و على **** فوقج زين .. من دشينا و أهي تسب و تزف و تجعم زين ما قامت طقتنا

إختي: شوش إستحي على ويهج عيب جذي!! المرة مسكينه ما تدري وين الله قاطها قومي يالله خل نروح قبل لا تعصب أكثر

شوش: عمتي ماكو عيدية ؟؟

العمة: إنشالله لما يجي العيد أعايدكم .. تبون ماي؟؟

شوش: صج نصابة !!! مساع كان خامس أيام العيد و ألحين تسوين روحج ما تدرين عن شي

و بس طلعنا

كانت زوراة مضحكة مبكية

بس ما عليكم فيها .. لا مخرفة ولا شي .. تستعبط بس

سؤال أون ذا سايد ماله علاقة بالبوست .. منو من المدونات البنات بيحضرأكيد مؤتمر التدوين اللي بيصير الأثنين الياي؟؟؟ طبعا آنا بكيفي سويته مؤتمر .. المهم .. إذا في أحد بيروح يدز لي إيميل .. لأني بصراحة أخاف أروح و يطلع ماكو بنات .. بإختصار أبي وحدة ألزق فيها و أقعد يمها و أحن على راسها و ألوع جبدها .. لأني خجولة جدا جدا جدا و أستحي و أستاحش من الزحمة و لوية الناس

ملاحظة أخيرة: الصورة مو صورة عمتي

و شكرا

:)