شـــــوش .. الطفـــله الفصــــله

نعم عزيزي القاريء

كنت طفله فصــله جدا جدا

وذلك حسب شهادة أمي

أبوي

مدرساتي

إخواني و خواتي

و المصدر الأهم .. صور طفولتي الموثقة

اللي عجزت و آنا أدور صورة تكانه لي ما لقيت

يعني خواتي طالعين بالصور مرتبين .. لابسين على سنع .. مشطين شعورهم .. لابسين ميداليه .. شايلين كاس .. ماسكين شهادة تفوق .. هديه .. لا بسين روب التخرج

إلا آنــــــــا

صوري يا متفصخه

يا ألفح بشعري

يا رابطه خصري

يا أهز

يا شعري كشه

يا فانيله من غير بنطلون

يا بنطلون من غير فانيله

يا نفانيف حفر و قصار و شفافه أشبه بقمصان النوم و الإيعاذوووو بالله

يا حاطه مكياج

يا لابسه قترة أبوي

يا لا بسه حجاب أمي

فـــلم

ولا صورة محترمه

و الأهم من هذا اني دايما أكون بالصوره مسويه بووووووز

غير مباليه بشعري الكشه

أو حلجي اللي كله كاكاو

أمي تقول ان ربعي كانوا كلهم صبيان ما كان عندي رفيجات بنات

و أبوي يقول إنه كان من ياخذني من المدرسه و يركبني السياره أفصخ نفنوفي و أفل شعري و أطلع راسي من الشباك ليما نوصل البيت

لوووول

من خلصت الإبتدائي تسنعت

المهم

الآباء و الأمهات اللي قد يكون عندهم بنات فيهم من نفس صياعتي و آنا ياهل

لا تخاااااافووووووووون

ترى بيكبروون و يعقلووووووون

:)

تــــكــــا

صباح الخير

اليوم سويت غلطه فزيـــــــــــعه

مسحت البوست اللي طاف بتعليقاته

ما خليت شي

عندي اثنين تحت نفس العنوان .. واحد درافت و الثاني الأصلي إللي كنت منزلته

مسحت الاصلي و خليت الدرافت

معلش

تصيــــــر عند أحسن البلوقرز

المهم

كنا مسوين باربيكيو أي حفل شواء بالشاليه

عادة اكون مشغوله بأي شي حزة الشوي و ما أجي إلا حزة الاكل و إلي أصلا يكونون الاهل مزهبين لي اكلي المعتاد لاني ما احب الشوي نفسهم

الباربيكيو إللي طاف

ما كان عندي شي و كنت شاهده على جميع مراحل الشواء

شفت فيها للأسف التكــــا

و استرجعت معاها كل الذكريات السيئه من أيام الطفوله

التكــا قد لا تعني شي لكم

بس آنا تعنيلي كل ذكرى سيئه و محرجه و مقرفه

لا اخفي عليكم أعزائي القراء

إن خمسة و سبعين بالإميه من طفولتي قضيتها من غير أسنان

نعم

من غير أسنــان

لا طواحن لا أضراس لا قواطع ولا شي

تقريبا من عمر 5 سنين لي 10 سنين و آنا حلجي يصفر إلا من ضرس أو أثنين

ماكو شي

و فوق هذا .. كانت هوايتي الترزز بالصور و تشريع حلجي و كأني فخوره بالفضاوه اللي فيه

و كانت التكا ماي نـــايت ميــــر

و خصوصا .. آااااه يا قلبي

خصوصا لما أضطر (أمثل) إني آكلها جدام الأقرباء و الغرباء و في المطاعم و الاماكن العامه

تذكرت الشرقه

و الغصه

و الصراع الأبدي بيني و بين لحمة التكا

إللي عمري ما فزت فيه

تدرون شنو كنت أسوي

كنت أعلجها بحلجي و آخر شي أطلعها بهدوء و أحذفها تحت الطاوله بالمطعم

من غير لا يحس فيني احد

اي شسوي ما أقدر عليها

يابسه علي

و الجماعه عبالهم أعرف آكلها و احبها

عسى ما شافو تكا ولا أي نوع من أنواع اللحم العرد إلا جدموا لي إياه

لا اخفي عليكم اني آخر مره بالشوي خذيت وحده و جربت آكلها

أمام الملأ

و كنوع من انواع التحدي و الإنتقام

لأني ألحين الحمدالله ما صار عندي أسنان بس لااا .. بل أنياب بعد

بس تصدقون

هم ما قدرت آكلها و أقصصها

يخرب بيتها من لحمه

ده كان يوم إسود إللي فكرت آكل فيه تكا