Friday, August 27, 2010

الكويتيووون في الطابور



صاحب الشخصيه المرموقه و المعروفه: وهو عندنا إما سياسي معروف .. مطرب .. ممثل إلخ .. هذول بس يتعرف عليهم اللي واقف في الشباك و منظم الطابور .. على طول يبدى يهلي و يرحب و يسحبهم من الطابور ويفتح لهم البيبان. في حال ما تعرفوا عليه .. صاحب الشخصيه المرموقه إللي غالبا من الطبقه الألمعيه .. لا يتهاون أن يعرف عن نفسه علشان يفتك من النطره


صاحب الحظ السعيد: هذا غالبا على قد حاله و مو معروف .. بس من طالع حظه السعيد ان اللي بالشباك أو اللي صاف الدور عندهم يطلع يا رفيجه .. يا ولد عمه .. يا راضع مع أخوه .. يا ولد جيران بيت ولد خالته .. المهم .. يخلصه يخلصه وما ينطر بالطابور


صاحب اللسان الطويل و المفردات الصعبه: هذا بسبتين و صرختين ولويه لغويه بسيطه ينفتح له الطابور و اللي خلف الطابور


المعضل أبو جسم فله: هذا بس يشاوح بإيده و يخزك بعينه .. و يدعمك جنه ما يدري .. تتنازل عن دورك خوفا من إنه ياكلك


المستعبط: هذا يجي يوقف جدامك و ياخذ دورك جنه ما يدري .. وان قلت له ترى مكاني .. يقولك ببرود ينافس برودة جبال الألب: لا والله .. صج !! مادري .. سامحيني ما شفتج


العبقري: هذا بكل ثقه يوقف يمك و يخترع طابور جديد بجانب الطابور الأصلي و يجون ناس يصفون وراه


ما علينا


بخصوص زوارة خميس


آنا بعرف .. تسنيم الدينه .. ليش كله ترمش بعيونها .. بالثانيه تسعين رمشه !! تكفى يعني شنو ؟؟ حياء مثلا ؟؟


و بعدين أول رمضان زوج بثينه حط عينه على مرت أخوها و وداها شقه و قلنا ماشي


نص رمضان سعود حط عينه على مرت رفيجه اللي مات و تزوجها بالسر و قلنا أوكي


ملا أحمد عايش له غراميات طول الليل بالرازي و طوفنا


ألحين طلع ثنيان حاط عينه على أخت زجته


شي عجيب


هذا غير البنات المفاصيخ اللي مستانسين عليهم بو قتاده و بو نبيل ورازينهم بكل حلقه لسبب ومن دون سبب


ألحيـــــــــــن


كل هالمسخره و الحوارات السخيفه اللي بالمسلسلات هديتوها و ناشبتوا حليـــــمه؟


:)

Tuesday, August 24, 2010

سهــــران



الغالين قراء المدونه


مساء جواهر و فطوم وغدير وعبير الكادي


و صرصرة ماي الوادي


و ودي ودي أدش نادي


مساء زهور الأندلس و الفنطاس و الرقه و عبيرها الجميل الرقيق


مساء أم الهيمان .. لكل مهبول هيمان


مساء الزبرجد واللولو و الياقوت و الأنصاري والمطيري و الهاجري و السامع يقول آمين


مساء البنفسج و زهور الليليوم وغازالهيليوم


مساء الرياحين


عسى ما بينكم نازحين


مساء الخزامى و ريح النفل


ربي يعافيكم و غالينكم و أحبابكم


و جيرانكم و قصرانكم


و أضحك الله سنكم كثر ما أضحكتموني


هاهاهاها


هذا سني


شفتوه ؟؟


أما أنا


فالوضع منتاز و سأهيم صعلوكا إلى ماشاء الله


ولا حول ولا قوة إلا بالله


مساءكم بطعم الخرز و الكرز و العنب و ميوة شويخ كلها


سلم مروركم الرقيق يالله .. خلكم لأمكم يالله


لكم مني أجمل و أرق و أعذب تحايا المساء


محبكم الصعلوك


سهـــران

Friday, August 20, 2010

سنــه حــلوه يــا شــوش



من ثلاث أيام


SHOOSH


المــدونه كمــلت سنــــه بينـــكم


عســاني كنــت خفيفــه علــى قــلوبــكم


و عســى حبيــتوني كثــر مــا آنــا حبيتـــكم


كــل سنــه و شــوش و آنا وياها بخيـــر


من ناحية أخـــرى


مجهــزه بوســت بقلــد فيـه إسلــوب جـم واحد و وحده أحبهم منكم


اللي بقلــدهم حاطتــهم في بــالي .. و بـدز لهم إيمــيل إنشالله آخــذ فيه موافقتــهم قبل لا أنــزل أي بــوست


إذا في أحــد منكم وده يــكون معــاهم يدزلي رســاله على إيميلي




نطـــروني

Monday, August 16, 2010

زوارة خميــس



ذاك اليوم كانت إسوارة كارتير بالنون


و اليو م خاتم شوبارد بالشوربه


تتوقعون نلاقي مفتاح بي أم بالقبوط الحلقات اليايه ؟

Friday, August 13, 2010

اللهم إني صــائم




أووووووووووووف


مو حاله يعني


يا يتغدون يا يتعشون


عصير رايح كيكه راده


ديايه طالعه و مجبوس لحم نازل


حتى الخبز الايراني لما شفتهم ياكلونه إشتهيته ليش اني صايمه


حتى النخي اللي ما احبه تشوقت عليه لما شفتهم ياكلوونه


حتى صوت القفاش يشوقني


آنا مادري ليش المسلسلات اللي يحطونها برمضان كلها أكل


المفروض أي مسلسل ينكتب حق رمضان يكون حتى أهما بالمسلسل عندهم رمضان


علشان ما ياكلون جدامنا


تعذيب

Tuesday, August 10, 2010

هــلالــي


غير إنه شهر عباده و صيام


فهو بلا منازع


شهر البراطم


شهر الخدود


شهر الرموش التركيب


شهر الإكستنشن


شهر الدراريع


شهر الخشوم اليديده المعدله


شهر اللي محزم معده و اللي معدل أسانه و إللي زارع له شعر


شهر الممثلين اليدد


شهر بدليات الممثلين اللي غصب يخلونهم يتكلمون كويتي


وينش يا يمااا ؟؟ ليه يا جماعة الربع ؟؟


المهم


آنا مو مشوقني شي


كثر شوقي أعرف إغنية العفاسي هالسنه شنو


قصدي نشيد زين هالسنه شنو


:)


مبـــارك عليـــكم رمضــــان


و مبـــارك عليـــكم هــلالــي اللي بالصـــوره


حــاشني شــد عضــلي و آنا مسويه الهــلال بــ يد و أصــور بـ يد ثانيــه


بس تستــاهلوووون


تــروح لـكم عضــلاتي فـدوه


ينــعاد علي و عليــكم بالخيــر


:*

Sunday, August 8, 2010

في الجمعيـــة



أربع صبيان قاعدين بره عند مدخل الجمعيه على الدرج لابسين دشاديش و يشربون بيبسي و ياكلون كتكات .. واحد منهم ماسك عصاية و يرسم أحلامه على الأرض


صبيان أثنين أعمارهم تسع و ثمن سنين يدزون عربانات فاضيه بسرعه قاتله في الممرات و ياخذون لفات كبيره على غفله .. يا يدوسون على عباية وحده .. يا يدعمون مطوع من ورى


حجية تقلب بالأغراض و تسأل .. وين العرووض ؟؟؟ ماكو عروووض ؟؟ ماكو شوربه مع قلاصات ؟؟ حليب مع صحون ؟؟ ماي مع كرتون بيبسي هدية ؟؟ طيح الله حظكم من جمعية


سايق هندي ماسك ورقه محتاس فيها كل شوي موقف أحد يقوله: بابا هذا شنو ؟؟ ماما ممكن يشوف مدام شنو يبي ؟؟ آنا مادري ليش مدامته كاتبه لستتها بالعربي و هو ما يعرف يقرى !! تتوقعون كاتبه اللسته لنا ؟؟


خدامه كاسره بيض عالأرض .. مو آنا مداام !! واللهي مو آنا !! هادا كلووودي


واحد أخذ بطل ماي و شرب نصه و رد حذفه بالثلاجه جنه محد شاف


الحجيه اللي مساع مسويه لويه .. هالمره تصارخ و تنادي تبي أحد ينزل لها كرتون دياي


نفس الحجيه لما توصل عند الكاشير بتحاسب .. يمااا بس يوصل حسابي ثلاثين دينار وقف


عين الحجيه على الهندي اللي يحط أغراضها بالجياس ..شوي شوي .. ديربالك .. صابون بروح أكل بروح .. حط في العربانه جياس زياده حق البيت .. يحط لها ما يعجبها .. تقوم و تخمط هي زياده


واحد ملقوف ينقز بويه الحجيه .. حجيه عندج رقم ؟؟ إذا ما عندج أعطيج رقمي طقيه


إنت من صجك ؟؟؟ إنت لو شايفها و هي تدور العروض تتأكد إنها مستحيل تشتري حتى علج بو سهم من جمعية مو مساهمه فيها


خدامه اندونيسيه تدز عربانه إرتفاع الأغراض فيها متر و تسعين .. كل ما بغت تلف فتحت رجلها زاويه منفرجه و طيحت 3 أرباع الأغراض عالأرض و قعدت تلملم


واحد عربانته متروسه وصاف دور جدام الكاشير .. توه وصل دوره جان ينط واحد جدامه .. ما عليه أحاسب قبلك ؟؟ قوطي زقاير بس ؟؟ تفضل .. خلص بو زقاير نطت له وحده .. ولي يعافيك ما عندي الا قوطي هالحليب .. يصير أحاسب قبلك ؟؟ تفضلي .. خلصت أم حليب .. نط له واحد ثالث و لي يعافيك بطل فيمتو بس ؟؟ أووف إنتوا صج ما تنعطون وجه! ما يسوى علي عربانتي المتروسه !! الجمعيه كلها حاسبت قبلي


واحد و زوجته يحاسبون .. هي تشيل الأغراض من العربانه و تحطهم على حزام الكاشير و هو وراها يشيل من العربانه و يطلع اللي ما يعجبه و يحذفه على ثلاجة البيبسي اللي يمه .. ما تحبونه .. ما تاكلونه .. أمس يايب منه


جهاز كي نت واحد يفتر بين عشر كاشيرات .. وانطر دورك عاد .. لو ساحب فلوس أشرف لك


وحده كاشخه آخر كشخه و تتكلم بالتلفون .. و وراها واحد كاشخ آخر كشخه و يسولف بالتلفون .. طبعا أكيد الأثنين ما يحاجون بعض .. على قولة مريومه اللي بالفيسبوك .. شخباري بالجمعيه !! وااااي هلاااااكه

Wednesday, August 4, 2010

عنــدما تـرسم شوووش

هذي رسمات تلقائية لأغلب الي تمسكهم قلم و تقول لهم رسموا

مو بس آنا


المفروض قطوه .. لكن ممكن تكون نمر .. ثعلب .. ذيب .. أي شي له أذاني و يمشي على أربع


المفروض بيت .. ممكن يصير مدرسة .. قصر .. ملجأ أيتام مسكون .. طبعا ما أدري ليش الشباك اللي بالسطح .. أو على قولة رفيجتي مو سطح هذي العليه !! نعم ؟؟ أي عليه !! و طبعا المدخنه مادري ليش


يعني ورده .. بس ممكن تكون ملاس عيش .. عادي


يعني سيارة .. بس ممكن تكون غواصه .. قطار .. باص .. أهم شي الإكزوز بو دخان


وحده و واحد .. اللي يميز الوحده عن الواحد و يفرق بينهم الشباصه .. من غير الشباصه، الهوية تضيع .. الأثنين مشروع فزاعة طيور


العصفور .. و من هنا خذى تويتر شعاره

Sunday, August 1, 2010

من ذكــرى غزو



هذه مجموعه صغيره من كلمات كثيره


تمر على بالي


بس أحد يذكر أو يطري الغزو جدامي


بعيدا عن تلك الكلمات


في خاطري أسألكم سؤال


ودي أسأل


الصامد فيكم .. ليش صمد ؟؟ ليش قرر إنه يبقى بالكويت ؟؟


و اللي طلع فيكم ؟؟ ليش طلع و ترك الكويت ؟؟


و لو الله لا يقـــــــول .. انعاد هالسيناريو أو صار سيناريو شبيه


إنت يالصامد .. راح تصمد هالمره بعد ولا بتطلع ؟؟


و إنت ياللي طلعت ؟؟ بتطلع بعد ولا بتغير رايك هالمره و بتتمسك بأرضك ؟؟


تتوقع قرارك اللي خذيته أو اللي راح تاخذه


هو تصوير لــ وطنيتك ؟؟


أم للوطنيـــه .. معنى آخــر ؟؟