مرحبا يا حلوين
كنت صراحه ناوية أكتب عن رحلتي للديار المقدسة .. الخمسة أيام اللي فاتت كانت أعمال شاقة بالنسبه لي
يوم في جدة .. يوم في مكة .. يوم في الدوحة و يومين في دبي
الحرم المكي بالنسبة لي كان صدمة .. المفروض كانت رحلة للتأمل بالخالق
بس إنقلبت و صارت تأمل بالمخلوق
و ما أدراكم ما المخلوق .. عجب عجاب شفته هناك
ما علينا
قبل أكثر من سنة أو يمكن زود .. أيام ما الناس هبت تشوف نور و مهند
كنت قاعده قدام التلفزيون و مهند على الشاشة .. بالرغم من إني ما تابعت المسلسل إلا إني ما أنكر إني شفت يمكن حلقة أو ثنتين
و بينما أنا مندمجة في الشاشة إللي فيها مهند .. يدخل ولد عمي صارخا
منو هذا ؟ من زينه ؟ ما ذبحتونا فيه ؟
منو ؟؟؟ شفيك ؟
هذا مهند زفت الطين
ليش عاد ؟ مزيون ما فيه شي
يرد و بكل عصبية : لا والله !! أصلا هذا مو رجاااال
و ظل ولد عمي كل ما شاف رقعة وجهي قالي إن مهند موووو رجاااال كما يزعم .. حتى كرهت مهند و سنين مهند
بعدها بفترة .. حبيت لاعب يلعب بالمنتخب الإيطالي
كنت كل ما أسولف عنه بالدوام .. يطمر خالد زميلي في المكتب و كأنه أحد صافقه كف ويصرخ
من زين وجهه عاد ؟؟ أصلا هذا مووو رجاااااال
و بات يكرر .. مووو رجااال مووو رجاااال
إلا أن كرهت الطليان كلهم
اليوم من غير أي قصد وحنا متجمعين .. كنت حاطه إم بي سي فور و لا فيها مسلسل تركي يطلع فيه واحد مزيون إسمه ماهر
و يدخل علي ولد عمي مرة أخرى و يشوفه .. و يبدأ يقلد ماهر و هو يتكلم .. متمسخرا طبعا
حبيبتي .. أديـــه أنا بحبك و بشتألك
سامعه شلون يتكلم .. تدرين ؟؟ أصلا هذاااا
أدري .. و الله أدري .. مو رجاااال صح موووو رجاااال ؟
إي مو رجاااال - بنرة حاده و عصبية
أصلا ما كو بالدنيا كلها رجااااال إلا إنت صح ؟
غصبا على خشمج
و قعدنا نضحك
ألحين أنا عندي ســؤال محيرني
ليش الرجــال الكويــتي لأنـي ما شفت هالعقــده إلا عنــده كــل ما شاف واحــد حلــو و مزيـــون يستذبح علشان يطلعه
مووووو رجااااال ؟
