الكـــويتيون و تــويتر

لا يخفى عليكم و على الجميع الهبّة الغيــر إعتيادية التي هبّ بها الشعب الكويتي العــريق في المضروب على عينه المدعو

تـــويتر

إللي لو يدرى إن الكويتيـيـن بيسووون فيــه جــذي كــان إنتحــر منــذ مبطــي

إليكــم نمــاذج من أحــلى الشخصيــات الكويتيــة

@al-3asheq: سيدتي يا أنثى الأشواق أدرك أنك أنثاي وأدرك أنيّ مشتاق أخجلُ حين أراكِ ضاعت أوهامك في الأنفاق #أحبك

@7alema_4_ever: صباحكم طيب .. صباح يملأه الحب و طاعة الرحمن و كوب قهوة ساخن من حلاته ما ودي أشربه .. تمنيت صحبتكم الطيبه معاي #تويت من شرفة المنزل

@Nejri: قطيعة .. شنو هالجو .. غبار غبار غبار .. حتى راعي البنك مو قاعد عالدوار ! ألعن أبو اليوم إللي قعدتوني فيه من النوم اللي يدز لي شي أطقه أن فولو#وجع

@mothaqafa_w_agra_kotob: قرأت لكم اليوم كتاب من عجائب عالم الدوود .. و إليكم هذه المعلومات .. هل تعلم أن دودة الغز تسوي فنايل قطن؟ #من مكتبتي

@Thawri_q8i09: لله درك يا شباب الثورة .. نحن معكم إخوانكم من الكويت .. ثوروا ثوروا ثوروا و حنا نتابعكم من الدوانية #سوريا #ليبيا #مصر #الواق واق # غانا #كمبوديا

@SalafSaleh_21: لا إله إلا أنت سبحانك إني كنت من الظالمين .. ندعوا بالهداية لنا و لكم رزقنا الله الجنة أجمعين .. أتركوا عنكم المنكر و مشاهدة الزفاف الملكي .. فهذا ما هو إلا من رجس الشيطان و لإلهائكم عن أداء صلاة الجمعة #إصلاح

@little_cool_grl: woooow its thursday already ! cant wait to meet the girls in the avenues for some guys chasing and halaga ! #gazz

@GeekyQ8i: Updating my iPhone and my iPad and my MacBook #iloveapple

@aal_albait: المرجع أجاز يا أخي رجاءا لا تسب .. لكم دينكم و لي ديني #مرجع

@seyaseya: متى الله يفكنا منه و يفرج علينا .. تعبنا #مهمود #منى واسف #إرهل

@kuwaity_wld_b6nha: أنا أسواك و أسوى عشره منك يا ... يا .... يا .... #معصب

@salooom23: إنت لو فيك خير ما انحدرت بالنقاش لي هالمستوى .. انا مادري ليش تسبون !! يا .... يا .... #تسب أسب

@lovelyTiger: #NP i love u, u love me from barny while waiting for my dinner to be ready and downloading new episode of #Glee

@Barshlooni: شباب تكفون سكروا ليتات الدوانية لما تطلعون #بروح أنام

@sweetcupcake: توني طالعه من العرس و الماشات اللي براسي تعورني .. منو يطلعهم من شعري #تعبانه

و من أشهر هاش تاقات الكويتيين

#غبار

#أفنيوز

#بنك بيري

#العشق الممنوع

#ماكي

#الراشد

#البراك

#المسلم

#شعر

#سلوى الجسار

#أسيل العوضي

#نبيل العوضي

#الوطن

#العبدالجليل

#مهمود هيدر

#حكومة

#كافي

#سور5

#إرحل

#إرحل

#إرحل

#إرحل

هذا و أي تشابه بالإسماء و الله و بالله غير مقصود

:)

و تقدرون تتابعوني في تويتر على هذا النك نيم

@shooshness

شوش و البرود كاست مسج

ان أدش مكتب و ألقى شخص يحوس بين البلوقات و فاتح مدونتي و يقرى فهذه تصير

ان أفتح الوطن أون لاين و ألقى بوست من بوستاتي محطوط بالصفحة الرئيسية فهذا يحصل وايد

ان ادش منتديات و ألقى إنهم ناقلين مواضيعي و حاطينها عندهم فأيضا هذي تصير

لـــــــــــــــــــــــــكن

ان اصحى من النوم وألقى بوست من بوستاتي واصلني على طريقة برود كاست مسج فهذه جديده

صدقوني أعزائي القراء .. كانت أول مره أصحى من النوم وقافي .. يعني وقفت على طول ما مريت على مرحلة القعده فوق السرير من كثر ما استغربت و مت ضحكا بنفس الوقت

مت ضحكا حتى كدت أن أمووت صج

كانت تعابير وجهي تقول جمله وحده

إشــــــدعوا عليــــــــكم

يا ربــــــــــــــاه

مابي أنغر والله مابي

عن جد .. ما كنت أدري صراحة ولا حتى أتصور إن ممكن الناس تحب بوستاتي لدرجة إنها تنقلها

حتى صار ودي أستعبط و أرد أنزل بوست الشعر اللي كتبته مره .. جني مادري يعني .. يمكن ينقلونه بعد و يشوفه رويشد ولا راشد اماجد و يعجبه

ولا فايز السعيد يلحنه لي

إحمدوا ربكم إني متواضعه و ماقلت فيروز مع إني أدري انها بتموت و تغني خليجي

بس جماعة البرود كاست الله يهداهم لو حاطين عالأقل عنوان المدونه جان أحسن .. رفرينس عالأقل

يالله يالحبايب .. مشكووووورين

المهم .. أبي أتعلم فارسي .. شلوووون ؟

فســــر حــــلمك

لـــك يـــا لطيـــف شــــو مزعجــه هالخـــدمـــه

مضبــــــوطيـــــن

موقتيـــن روحــهم على نــومة و قعـــدة الأوادم

ما يدزون المسج إلا عقب نص ســاعه من قعــدتي من نــومة الصبح

و عقب نص ساعــه من قــعدتي من قيلــولة الظــهر

و في الغــالب مــا أكــون صــج حلمـــانه

شكل أهــل العـــلم متكيين و دلال قهــوة وشــاي و نــاطرين النــاس يقعــدون علشــان يفســرون أحــلامهم

اللــه و التفسيــر عــاد

عــانس: بتتزوجيــــن

متزوجــه: بتحمليــــن

حامــل: يتجيبيـــن ولــــد

عندج ولـــد: بيحفظ القــرآن و بيصيــر دكـتـــور

عندك تجـــاره: الله بيفتـــح عليــك

ما عندك و لا شي من اللي طــاف: أطغـــاث أحـــلام

عندك كل شي من اللــي طــاف: رؤيـــة

آنــا مو غــاثني إلا ال 300 فــلس بالدقيقــه

و آنــا أحــلامي غالبــا أفــلام هنديــه الشخــص فيها يكون رجــال

ثم يتحـــول أســــد مادري شلــــون

بعديـــن نطلــع قاعديـــن في ماكدونـــالدز

بعديـــن تقــلب حــرب و صـــواريخ

قــصص قــصص

يعني حــلمي علشـــان أقــوله بــس بيكلفني 30 دينــــار

يـــا ســـــــــاتــر

THANK YOU iCITY

بعد ما نزلت بوست الماك بوك بأقل من يومين وصلني بريد إليكتروني من مدير صالات العرض و الدعم في معارض آي سيتي .. الوكيل المعتمد لمنتجات أبل في الكويت

المدير ما قصر و قام بالإتصال المباشر بي و عرض علي أنه يساعدني شخصيا في تحويل تجربتي مع الباك بوك إلى تجربه أكثر إيجابيه بعون من الله

هذا مع إني مو شارية الجهاز من آي سيتي

:)

هذا نص الإيميل

Dear SHOOSH,

I read your article about your experience with the MacBook. I am not aware from which retailer you purchased your MacBook, never less and even if you didn't purchase it form iCity, I would like to help you out to turn it into a positive experience as Apple products are made to make your life easier; please contact me directly.

و شكرا آي سيتي

Thank you iCity for your prompt action .. that was so professional and supportive !

Your Cooperation is highly appreciated !

شووش و المــاك بـــوك

خفت أكتب ماك عبالهم ماكدونالدز

كتبت ماكنتوش قالولي كاكاو

المهم

لا هذا و لا ذاك

قصدي عن الماك بوك .. اللاب توب

لا أخفي عليكم .. إلا صج شرايكم في مقطع لا أخفي عليكم ؟؟ حلو صح ؟؟

المهم

لا أخفي عليكم قرائي الأعزاء إني شريت هذا الجهاز المشئوم إلي إسمه الماك بوك برو قبل تقريبا شهرين و نص

و لا أخفي عليكم أيضا إني من شريته و اهو طايح بجبدي .. عاله على مكتبي .. غاثني .. قاهرني

حسبي الله على تلك اللحظه اللي تهورت فيها و قطيبت 530 دينار كويتي .. دينار ينطح دينار على هالجهاز التعيس

نزل المعاش الساعه خمس .. الساعه سبع الماك بوك عندي

لا و مو بس جذي .. عبالي روحي خبيره

شريت سماعات .. و ماوس من غير واير و يطلع ليتات .. و ستين جنطة لاب توب .. و 3 طاولات هذيل ملوت الرجل علشان السيفتي يعني

و كفرات و عفسه

و آخرتها .. طايح كأنه قتيل على الأرض

حسبي الله على تلك اللحظه النحس اللي سمعت فيها كلام ربعي و عيال عمي و إخواني

ودرووووني

ضيعوووني

فلسووووووني

حسبي الله عليــهم حسبي اللـــه

فروا مخــي

شووووش شخباري ويندوووز ويييييع ويييع حدج قديمه

شووووش لما بتستخدمين الماك بتكرهين روحج ليش كنت ما تستخدمين إلا ويندوز

شووووش الماك شي مو طبيعي و الأبليكيشنز فيه مووو صج

شووووش ماكو مقارنه بين شاشته و شاشة اي لاب توب ثاني

شوووووش مافيه فايروس

وااااااي وااااي واااااي .. صورووووه لي وكأنه شي نازل من السما .. حلفت آخذه آخذه

لما إنطقيت على عيني و خذيته

خلوا رفيجاتي على صوب .. الفلبيني اللي بالمحل .. كرهني برووحي ليش أستخدم ويندوز

يقولي ماااااااااااااام شنو لاب توبات استخدمتي

قلت له آي بي إم

سوني

إتش بي

و كل ما أقول شي يعطيني نظره من فوق لي تحت

حسسني إني طالعه من جليب ماي و ما ادري الدنيا شصاير فيها

يقول لي : سووووو فريندلي مدااااام

فريندلي بعينك عمى بعينك .. ساعه بصغر الويندو مالت سفاري ما عرفت

و قعد يخربط على راسي لما شريته

الزبده

الجهاز ما عرفت أسوي فيه شي .. بس قاعده أطالع فيه أفلام دي في دي

اهو صج فيه حركات بس هم مو قادره أستغني عن الويندوز

حاولت بيني و بينكم أصرفه

مسخروووووني

شوش: شراااي ؟؟

أخوي العود: شنو ؟؟

شوش: الماك بوك

أخوي: 250 ؟؟

شوش: نعم !! شاريته 530 !! يالظالم طيحت منه وايد

أخوي: كيفج والله

***

شوش: شراااي ؟؟

أخوي الصغير : شنوو سيارتج ؟؟

شوش: لا لا الماك ؟؟

أخوي الصغير: 300 ؟؟

شوش: انتوا شنو ما تفهمووون ؟؟ أقولكم 530 شنو 300 حرااام

أخوي الصغير: مستعمل بعد شنو

شوش: ما إستخدمته

أخوي الصغير: طلعتيه من الكرتون ؟؟

شوش: اي

أخوي الصغير: بس طاحت إميه

شوش: نعم ؟؟؟

أخوي الصغير: شغلتيه ؟؟

شوش: اي

أخوي الصغير: بس طاحت إميه ثانيه

شوش: والله صج ؟؟؟ انقلع زين الشره علي آنا اللي ببيبعه عليك

***

شوش: شرااايه ؟؟

إختي : الماك ؟؟

شوش: اي

إختي: كاااااااااااااااااك كنت حاسه انج متوهقه فيه .. امووووت و اعرف ليش تكابرين .. دام مو قد الماك شكو تتليقيفين و تاخذينه

شوش: ما تبينه يعني ؟؟

إختي: لا خل يطيح بجبدج تستاهلين خبيتنا عليه و مشغله لاب توبين يدامج جنج كونداليزا رايس

***

شوش: شراااي ؟؟

ولد عمي: إنتي كله تبيعين ؟؟

شوش: واااي قطيعه .. يا إي يا لأ ليش التفلسف

ولد عمي: مادري شنو بس ماني شاري ما تعرفين تسوين تسويق و لسانج طويل

وبس .. يأست و أنا ملوله و صارت السالفه عناد .. أعلى سعر حصلته ثلاث إميه

بايعه بقره مو لاب توب

أمس عرضت على أخوي بو ميتين و خمسين أبيعه عليه بثلاث إميه و هم قال وايد

جان تلوع جبدي منهم .. و قررت أشيل من بالي فكرة البيع وأستغله و أستخدم البرامج اللي اعرف استخدمهم فيه

والله و شغلته و انا متحمسه و كلي إيجابيه

وانصدمت إني ما اعرف استخدم الا الدي في دي بلاير

صعقـــه صعـــــقه

جهاز ب 530 أشوف فيه أفلام بو نص

أتوقع من كثر ما حنيت على ال 530 حسيتوا شكثر معوره قلبي هالخمسيه

أااااخ يــا قلبي

المهم

عاد قررت أشوف فيه أفلام بس

و أسويله عملية تحويل من ماك بوك إلا دي في دي بلاير

و أمري لله

منكم لله يالي قصيتوا علي