الكويتيووون في الطياره

لازم ياكل بالمطار .. عاد حزة وجبه .. مو حزة وجبه .. لازم ياكل .. يحليله الكويتي مداري روحه

ضروري يشتري شي من المطار حتى لو كاكاوه .. يحليله الكويتي ما يبخل على روحه

آخر ناس يدشون البوابه .. الكل يدش قبله .. يحليله الكويتي ما يحب الزحمه

يستعبطون على ضباط الأمن .. يعني يطوف تحت الجهاز بساعته و حزامه و تلفونه على أبو إنه ما يدري .. آملا في إنهم يطوفونه وما يفصخونه اللي لابسه .. فقير الكويتي ما يعرف

اذا كانوا عايله .. فاللويه حدث ولا حرج .. اليهال يتناجرون .. الأم تزف الخدامه .. الأبو يركض سابقهم بعشر أمتار جنهم مو معاه .. يحليلهم والله .. من جوهم العام تدري انهم كويتيين

الكويتي اللي يعتبر خوش كويتي .. يدش الطياره ربع ساعه قبل الإقلاع .. يحليله الكويتي المهم انه دش الطياره

ساعه على ما يتذكر بأي مخبه حاط البوردينق .. و على ما يجر جنطته بالطياره .. و يدش يقعد يبيله قرن .. و يكون بمحض الصدفه صار وراه لاين أوادم ينطرون حظرته يقعد .. يحليله الكويتي منظم

نادرا ما يعترفون بالحزام .. بو دشداشه يخاف تتعفس .. اللي معاها ولدها مالها خلق يستعسر عليها فتفضل انها تمارس كل الحيل لخداع المضيفين اللي دايما دايما يصيدونهم .. يحليله الكويتي يموووت على النظام

بس يقول الكابتن بنبدى الهبوط التدريجي الكل شغل موبايلاته .. تدريجي يا يبا تدريجي .. مسكين الكويتي .. وااايد مهم .. اي دقيقه ثانيه يكون فيها جهازه مسكر ممكن تنهار حياته

بس يسمع صوت توايرالطياره حاشت الأرض قام وقف وصف دور يعني بينزل .. يحليله الكويتي .. كل شي ولا يتأخر

اي اي نسيت .. يموووتووون اذا حطو جناطهم و جياسهم فوووق .. ما يعرفون لازم تحت رجولهم .. لووول يحليله الكويتي والله .. عجيب

هذا بالرحلات القصيره

ما قلتوا لي عاد .. شخباركم؟؟

صج العربي انطقوا أربعه ؟؟

!! اليـــــوم ... لااااا يطـــوفكم

رســـــالتي

تحذير: قسما بالله اللي يحاول يضحك أو يتطنز أو يتمسخر أو يبدي أي نوع من أنواع الإستهزاء المباشر و اللا مباشر بمشاعري المكتوبه يا ويله يا سواد نهاره و ليله

صديقه من أعز و أقرب صديقاتي القديمات جدا جدا جدا

طاحت و للأسف على مذكره من مذكراتها كنت آنا كاتبه لها فيها رساله

صورت رسالتي و دزتها لي بالإيميل

فكانت الرساله كالصعقه

أقول لها رووووووحي زين هذي مو آنا .. ما تمت لي بصله

و أتفاجأ بالأسفل إني موقعه و كاتبه إسمي الثلاثي .. زين مو باصمه بعد

موثقه الرساله عدل

:)

هذا جزء من الرساله

لأن الرساله صراحه.. فضيحه

اللي بالبرتقالي فوق هذي أمنياتي لها إلي ولا وحده فيهم تحققت

لوووووووووووووووووووووول

كاتبه لها انشالله تاخذين طيار .. يظهر ان هذا كان طموحي

ترى كنا أطفال صغار .. مراهقات يانعات .. يمكن 13 سنه ما أدري

الله يهداني .. كاتبه اسمي و موقعه مليون مره و مو كاتبه التاريخ

أهم شي إني الظاهر و الله أعلم كنت أحب مصارع إسمه

Bret

حاطه اسمي + إسمها + إسمه = لووووف فوور ايفر

أمحق لوووف مكفينا ثلاثتنا

لا و راسمته .. أحلى شي الركب .. و النتوءات و الشطحات يعني عضلات .. و الشعر ما أعبـــر

و الدليل الأكبر .. اللي أهو بمثابة الرد على كل عذالي .. اللي تطنزوا على شعري في البوست السابق

أقول لكم .. آنا كنت غلطانه لما قلت أبي أصير شاعره .. لأني أصلا كنت شاعره من كنت ياهل بس ناسيه

ركزوا عالأبيات اللي كاتبتهم في رفيجتي

أقووووول فيها

أحـــبك من بيـــن كـــل الجمــــوع

إن كــان في حبــــــــــك أمـــــــون

علشـــــــانك أنتظــــــر سنـــــــون

ما أتخلى عنـــك مهمــــا يكـــــــون

يــــــــا حب في القـــلب مدفـــــــون

تقـــريييين يالحب ؟؟ أنتظر سنوووون .. صج إني مخلصه

لوووووووووووووووول

أهم شي إني آنا وياها عصرنا مخنا نبي نذكر حروف منو اللي داخل القلب الإسطوري اللي آنا راسمته .. ما ذكرنا

المهم

شوفوا .. آنا أضحك على رووحي كيفي .. إنتوا ممنوع

إرجع فووووق للتحذير

و شكرا

لا قـــراده .. مثــل قـــرادتــي

ترن ترن ترن

شوش: ألووو

هيون: شووووش ؟؟

شوش: لأ يدتها !! شرايج يعني ؟؟؟

هيون: وااي مليقه .. و ينج من مساع ما تردين

شوش: مادري عن الموبايل .. في شي منفجر ولا محترق ؟؟ داقه 5 مرات شعندج ؟؟

هيون: قومي نروح سينما ندش فلم

شوش: والله صج ؟؟ طبيعي اللي يروح سينما بيدش فلم ما بيبسط يبيع فوط يعني

هيون: عفيه قووومي بشوف الفلم هذا قبل لا يشيلونه

شوش: خلاص أوكي بس لا تحنين لأني توني راده و مو نايمه الظهر و راسي بينبط

وبعـــد أقــــل مـــن ســــاعه

ترن ترن ترن

شوش: نازله نازله

بالسيــــاره

هيون: بنروح ترى الكوت

شوش: نعم ؟؟؟ ما أكو أبعد ؟؟؟

هيون: لا علشان بمر المنشر تالي

شوش: المنشر ؟؟ إنتي ماخذتني أشوف فلم و لا أخلص معاج مشاويرج ؟؟

الســـاعه ست وصلنــا الكوت و الفلم يبدى ست و نص

على الكاونتر

شوش: لو سمحت فلم الساعه ست و نص

الهندي: فوووووول

شوش: شنوو فوووول !! عمري ما رحت سينما و كانت فول !! وي آر اونلي تو ماكو سيــــتس ؟؟؟

الهندي: نو مادام أووول فول

شوش: هيون يقول فل ؟؟

هيون: تصدقين عاد توقعت .. اليوم أثنين

شوش: أثنين بعينج عمى بعينج !! مطلعتني من بيتنا و يايبتني هني و تالي تقولين توقعت !! شكو يايبتنا دام تدرين أثنين و التذكره بدينار و نص

هيون: شوفي الكتلوج نفس الفلم ست و ربع بالبيرق يمدي

شوش: أي بيرق هذا ؟؟

هيون: مجمع يديد لازق بالكوت

و عقب 20 دقيقه بالزحمه

شوش: هذا اللي لازق بالكوت ؟؟

هيون لا تعليق

ماظل أحد ما طقينه له هرن .. ما ظل رصيف ما صعده جيب هيون .. حتى لقينا مصفط و ركضه للسينما .. ما تشوفون ورانا إلا غبرتنا

هيون: لو سمحت فلم ست وربع

الفلبيني: نو مدام فلم بادي صارله نص ساعه

هيون: اي بندش عادي

الفلبيني: نو مدام آي كانت

هيون لي ألحين مصره تدش .. تكاسر مع الريال جنها بتشتري بدله

شوش: إمشي لا بارك الله بالطلعه إلي طلعتها معاج انا بروحها نفسيتي صفر اليوم

هيون: عفيه عفيه شوفي الحين الساعه 6 و ثلث و يبدى نفس الفلم سبع بليلى .. نتمشى عالراحه للسالميه شرايج ؟؟

شوش: إنتي مستوعبه إنج وديتيني الفحيحيل و تالى العقيله و الحين ناويه تردين السالميه ؟؟

هيون: نتمشى ما ورانا شي

ورضيت و صكتنا الزحمه اللي لها اول ومالها تالي .. ما أشوف إلا ليتات و ما أسمع إلا هرنات و هيون المسكينه حتى ما تحاجيني خايفه مني

الفلم سبع و ربع و ما وصلنا ليلي إلا ثمان إلا ربع

ونفس السيناريو ..الفلم بدى و زحمة ومادخلونا

بس رفيجتي ما عندها شي إسمه يأس .. إلا تدش غصب طيب

هيون: شوشه والله آخر مره .. على حسابي .. الأفنيوز ثمان و نص و في آي بي شقلتي ؟؟

شوش: إنتي ما تفهمين صح ؟؟؟

هيون: بليــــــــــز

و نروح الأفنيوز و امة محمد كلها هناك

شوش: ليش زحمه ؟؟

هيون: اي اي عشان العيد

شوش: والله صج ؟؟ يعني انتي تدرين لوية عيد و تذكره بدينار ليش يايبتنا هالحزه ؟؟؟

وماكو مصفط .. صفطنا فوق سطح الأفنيوز و الاصنصير خربان .. نزلتني ستعش دري

و تتوقعون آخر شي شنو ؟؟؟

طلع في كرسي واحد

!!!!!!!!!!!!!!!!!!!!!!

آاااااااااااااااااااااااااااااااخ يا ربي .. بغيت أطقها بجنطتي والله

لا و تقول حق الريال أقعدها بحظني عادي

سهالات البنت .. عبالها السينما شراكه بين أبوي و أبوها

تقوله عفيه دور عدل

الحمدالله والشكر .. خو كرسي مو إبره .. شنو دور عدل !!! الريال عنده سيستم يااااااا

و بس .. ما شفنا لا فلم و لا عماة عين

هيون: تبين كرسبي كريم

شوش: إنتي للحين تعزمين ؟؟ لا مابي

هيون: زين ليش معصبه ؟؟

هيون: ألحين نرجع البيت و نحجز من النت حق باجر

شوش: والله صج ؟؟

هيون: اي اي أبي المنشر

واااي بغيت أذبحها صج .. رديت البيت راسي وارم

يمكن لو البنيه موديه أحد ثاني جان لقت مكان

بس المتعوس متعوس لو حطوا فوق راسه ميــــت فانوس

كان معاكم من كل مجمعات الكويت بلا إستشناء من الفحيحيل إلى السالميه

شوش سيني سكيب ألفين و إثنعش

حـــــــــالة طـــارئه

لظروف قاهره

قاهره و لا بيروت

و لأسباب خارجة عن إرادتي

و لعوامل قهرية حالت دون أن يتم تنفيذ رغباتي

و تنفيذا لتدخلات الغير

غير و لا ماكينه

ماكينه و لا سفايف

سفايف ولا براطم

و حرصا مني على الأمن و السلامه

مظطره أطلع في رحله غصبا عني علشان أسوي شي ما أبيه

أبيه و لا سي سيد

آملة أن أعود لكم أفضل من جديد

رحلة صغيرونه بسوي فيها شي صغيرون لكن إنشالله النتيجه تكون كبيره

ديروا بالكم على مدونتي .. و لا تنسون تطفون ليتاتها على الساعه 12 منتص الليل

مالي خلق البلديه

بلديه ولا الداخليه

داخليه ولا اااااا

:)

دعواتكم

شووووووووووش

ندوة اليوم .. التدوين في الكويت

ماني متكلمه عن الندوه

بس في شي لازم صفاة و القائمين عليها يعرفونه

و آنا طالعة من الندوة .. و بالتحديد عند إشارة المرينا

وقفتني دورية

نادوني بالسبيكر مالهم و صفطوني يمين

و خالفوني

مخالفة قيمتها 50 دينار

ألحين بتقولون ليش خالفتج الدوريه

آنا طفت الإشارة الحمرا .. بس والله و بالله مو قاصده

تعرفون الوضع إلي .. هااا ؟؟؟ أمشي و لا أوقف ؟؟؟ إلي قرارك بالحالتين غلط ؟؟؟

إلي تكون مسرع و على حظك الإشارة تقلب حمرا ؟؟؟

هذا كان وضعي

ومن رداة حظي الإشارة إلي يدامي بالتقاطع أول سياره فيها دورية

بس ما انتبهت لها إلا عقب ما طفت

مو دورية صغيره !! دورية جمس بعد

المهم ما علينا

أنا أطالب صفاة إنهم يدفعون مخالفتي

بتقولون ليش ؟؟؟

آنا أقولكم

لأنكم لو تحللون السالفة و تردون لي جذور المخالفة بتعرفون إن صفاة المتسبب الأول فيها و بالتالي وجب على صفاة دفع المخالفة

يعني لو آنا مو مجتهده جان ما رحت الندوة

صح ؟؟

بس آنا مجتهده .. و أحب صفاة .. و رحت علشان خاطرهم الندوة و رديت محملة بمخالفة

بالله آنا جم 50 دينار بمعاشي يعني ؟؟؟

يعني لو آنا مو رايحة و قاعدة بالبيت جان محد خالفني

المهم

آنا أناشد كل إخواني و أخواتي المدونين و المدونات

و خصوصا إلي حضروا الندوه

يساعدوني و ينضمون لي في حملة

إدفعــــها

و بميزان أعمالكم إنشالله

:)

دايــــــــم السيــــــــــف

مووودي صاير مووود ميانين .. مره فوق و مره تحت

شوي ميته ضحك و شوي ميته بجي

شوي أصير دينه و شوي أتحلطم على الدين

أصلي القيام تالي الليل لما رجلي تطيح .. ولي خلصت أقعد أطالع روتانا أغاني لي أذان الفجر

شوي أصير فيلسوفه و أتفلسف عالكل و ما أخلى حكمة و لا نظرية إلا و أقطها و آنا أسولف .. و شوي أصير سخيفه و أقعد أنكت و أملق لما تلوع جبدهم مني

أكون ميته يوع و من أشوف الأكل أشبع

شوي راسي حار و مريضه عقبها بساعه أقوم جني غزاله (مو حصان) ما فيني شي

أشتط أمسك كتاب أبي أقرى .. دقيقتين أمل و يصير فيني نومه

الصبح مزاجي عبادي و بالليل أقلب ميامي

أشوف برنامج وثائقي عن هتلر .. عقب ساعتين قاعدة أشوف توم و جيري

أدز مسجات حق رفيجتي و أحن عليها دقي علي بسولف معاج ودي أسولف .. و لما تدق يصير مالي خلقها و أحقرها و ما أرد

رفيجتي متهاوشة مع مسؤولتها بالدوام .. تجي عندي و أستن عليها نصايح و الدنيا ما تسوى و ما يصير جذي و أغير مووود البنت لما ترتاح و تستانس .. تطلع من صوب و أقفل الباب وراها و أقعد أبجي جني ياهل و أقول الدنيا ما فيها خير و الواحد يموت أحسن

مادري شالسالفه

هل ما سبق .. عرض من أعراض إنفلونزا الخنازير ؟؟؟

ما علينا

اليوم قاعده أقرى ديوان شعري حق دايم السيف .. عادي بالليل أقرى قصة يابانيه

:)

المهم .. يا أخي شنو هالإنسان حساس .. أحبه

أترككم مع بعضا من أبياته متمنية أن تحوز على إعجابكم و رضاكم و كل عام و أنتم بخير و حفظ الله الكويت و شعبها من كل مكروه

ومـــا عـــلى الــــدنيا عــجـــــب

آخر مره والله

على قرار هل سيمنع عبدالله من دخول الملعب؟؟

آنا أسألكم

هل ستتوقف فيني السياره ؟؟؟

VOTE HERE

لووووووووووووووول