القـــادســـية .. الكـــويـــت

آنا قدساويه .. بس اليوم كويتاويه

لا تنسون العمـــــيد

اليوم الثلاثاء الساعة 6 على ملعب نادي الكويــت

الكرامة السوري VS الكويت الكويتي

اختـــكم

شوش نهير بدر المطوع أحمد عجب السلامه

ملاحظات

قسما بالله إللي يقولي ماكو شغل تطالعين أندية كويتية يا ويله مني

شكرا للأخ الفاضل حاكي عقالي على صورة شعار نادي القادسية الشوشي

إنفـــلونـزا الخنـــازيــر ؟؟؟

دعــــــواتــــــــكم

يا فتاح يا عليم ..يا مغازلجي يا لئيم

صبــــــــاح الخيــــــــــر

كيف أصبحتم ؟؟؟؟ إنشالله بخيـــــر ؟؟؟

اليوم قعدت من النوم الساعة سبع الصبح .. عندي شغله بخلصها على العشر .. من أمس كنت مقرره إني أصحى مبجر و أروح أقعد لحالي بكوفي شوب عالبحر أغير جو و أقرى كتابي .. بما إن الجو صاير صراحه عجيب الصبح فكانت فرصه أطلع

الساعة ثمان إلا ربع بالضبط كنت قاعده في كاريبو كوفي .. بما إني ما أحب القهوه .. فشربت عصير برتقال و كليت براوني لأني كنت ميته يوع

بلشت أقرى كتابي .. و بعد مرور ربع ساعة بالضبط و إذا بي ..... أسمع صوت تصفـــــيــــــــــــر

إلتفت وراي بشوف شالسالفة (لأن أصلا كان فاضي و مافيه إلا آنا) و ياليتني ما التفت .. ولا شباب أثنين قاعدين يضحكون

قلت بيني و بين نفسي بعد ما رديت راسي بكتابي .. الحمدلله و الشكر !! و الله فراغه !! شمقعدهم هذيل من الصبح ؟؟؟

في أحد يغازل على الريج !!! بعدين شخباري فكرة المغازل أصلا !! منو يصفر هالأيام !! كناري آنا تصفر لي ؟؟

المهم .. تغافلت التصفير و رديت أحاول أركز في كتابي .. حلفت ما أقوم .. آنا طالعه و طاقة طريج من الصبح و الجو شحلاته .. محد يخرب طلعتي

و في وسط إمتعاضي و تحلطمي على روحي و إذا بالشاب رقم واحد يصرخ قائلا

شاب رقم 1 : يا حليــــــــــــــلها قاعده تدرس

شاب رقم 2 : لا و فرنسي بعد

شاب رقم 1 : بووووووووووووووو نجوااااااااااااااااااااااااااااااااااااار

شاب رقم 2: يو قو إكسااااااااام تودااااااااااي ؟؟؟

نعم ؟؟؟؟ بونجوااااار شنو ؟؟؟؟؟ بونجور بس على وزن بونسوار مثلا ؟؟؟؟ و بكيف منو إستنتجت إني قاعده أقرى فرنسي يا خبل يا بو إكساااااام ؟؟

و آناأسمع كلامهم كانت ردت فعلي كالآتي طبعا بيني و بين نفسي

Excuse meeeeeeeeee !!!!!

Seriously !!!!!!!!!!!!

تعوذت من إبليس و قلت أكيد بيذلفون الحين لما يعرفون إني ما راح أرد عليهم .. أصلا طول الوقت و آنا عيني بكتابي و مسويه روحي صمخه بيملوون و يقوموون .. توني قاعده حرام أقوم ألحين أصلا ما قريت شي

و في وسط الإمتعاظ و بعد ما ملوا مني فإذا بهم يتحركون بعيدا .. فكه .. و في طريقهم للخروج و إذا بالشاب رقم واحد يصرخ مره أخرى

بووووووونجوااااااااااار سنيــــــــــــــــــــــــــــورا قـووووووووووووووود بـــــــــــاي

!! يرحم أمك إنت شسويت باللغه !! فرنسي على أسباني على إنجليزي

كله كووووم و بونجواااار بكووووم

يعني آنا حجي ما أعرف أتحجى أقووم أغازل بعد ؟؟؟ لا و بصوت عالي و الساعه ثمان الصبح و بلغة أجنبيه !! تحطمني صراحة ثقة بعض الشباب عندنا

أوووووووووووووف

على ما الإخوان مشو .. إلا الجو الحلو بدى يندثر .. و طلعت شمس الكويت الحنانه .. فما كان أمامي إلا أخذ كتابي الإمريكي بس إللي عطوه جنسية فرنسية و صار من المزدوجين اليوم و قلاص عصيري .. و أكمل مشواري بالسياره

أمم أوربا كلها غازلتني اليوم

من قدي

:/

أشكر الشاب رقم واحد و الشاب رقم أثنين إلي خربوا علي مشواري الصباحي و إلي كانوا وقود هذا البوست

إي وقود .. لأني ناويه أشب حريجه

حسافه على فزعتي من الصبح

و بونجواااار

حـــــرب الــدينـاصـــــورات

هل صحيح إن الرئيس التنفيذي لمؤسسة البترول الكويتية سعـد الشـويب .. بره ؟؟

طبعا بره بذرابه

يعني

إما أن يتم تعيينه كمستشار للمؤسسة

أو يحيلونه للتقاعد

أو إنه يقدم إستقالته

طيب .. إنتهاء العقود باقي له سنه .. يعني تو الناس .. ليش الحنه و المناوشات و نشر الغسيل و ترشيح الأسماء مبلش بدري ؟؟؟

هل ممكن مثل ما تناقلت بعض الصحف إن يكون هذا كله حرب إعلامية و إشاعات الهدف منها الضغط على الشويب علشان يترك القطاع لحاله ؟؟؟

و إذا كان الخبر إلي تناقلته الجرايد فعلا صحيح

فمن بعد الشويـــب ؟؟؟

أتـــوقع بعـــد العيــد بتبدى حرب الديناصورات النفطية .. و كل من بيطلع بلاوي الثاني

Al SABAH BAKERY مخبـــز الصبــــاح

Al Sabah Bakery (Located in Fahaheel, Mecca St.) is one of the very old and traditional bakeries in Kuwait. The Bakery was
established in 1967.

They bake traditional, old fashion cakes and deserts in addition to new cakes of new recipes, petit four, biscuits, bread, toast and others.

All their cakes are natural with no flavorings or preservatives. They use basic materials only such as flour, eggs, butter and oil.

Other than the bakery it self, you can find their delicious cakes at many co-ops here in kuwait as they distribute to them.

You can find it in Shamiya, Qadsiya, Dasma, Salwa, Keifan, Police co-op, Sabah Al-Salem, Jaber Al-Ai, Regga, Sabahiya, Ali Sabah Al-Salem and Fahaheel.

The place has been renovated, but the owners have no intention to change anything to their delicious old fashion recipes as people just love it the way it is!

The cake is very famous specially for Eid early morning breakfast, You can enjoy it along with ur milk, tea, coffe or 7atta pepsi :)

Yaaaah ! and I guess they deliver !

Sallaaaaaaaaaam !

كاااااااااااااااااك

قد لا يخفى على بعضكم حقدي الدفين و كرهي البغيض على وانيتات الرقي المنتشره على الخطوط السريعة و الدواوير

و قد سبق لي أن تحدثت في بوست سابق شلون كان ممكن أموت و أدش بشبه و السبه إن الآوادم يقررون إنهم يبون رقي مره وحده و يا يدوس بريك قوي جدامك يا يلف عليك

بالحالتين ممكن إنه يودرك

و يودر اللي وراك بعد

كل يوم و آنا أطالعه من الدوام أشوفهم و أمتعض يعني أتحلطم و أتأفأف و أتمنى لو يشوفونهم البلديه و يفكونا من شرهم

كل يوم أنطر الإشارة تفتح علشان آخذ الخط و أشوف راحوا و لا للحين الجماعة غافلين عنهم

ودائما ما أصاب بخيبة أمل و ينكسر خاطري و ألقاهم ماخذين راحتهم

إشي وانيت أحمر

إشي وانيت أبيض

إشي رقي

إشي فقع

إشي رمان

حتى كلينكس و فوط يبيعون

لوهلة تضن إنك بسوق اليمعه مو الخط السريع

ناقص يجيبون شواذي و طيور و يبيعونهم عالشارع بعد

المهم

اليوم و لله الحمد صوتي وصل و ربي أخذ بثاري

واقفة بالإشاره إلي تنزل على الخط السريع

و وراي دورية

تأملت فيها خير

بس دشينا الخط السريع آنا و زميلتي الدورية

و لا أصحاب الوانيتات يختبون

إشي مداه يشيل بضاعته و يروح

و إشي واحد توهق قاعد يحاسب زبون

و إشي واحد ما مداه يسكر دبة سيارته عدل

و إشي

إشي

إشي واحد نط بوانيته على طول و نسى الرقيه فوق

كااااااااااااااااااااااااااااااااااااااااااااااااااااك

فطست عليه ضحك

إستغفر الله يارب

بدددددددددع

لدرجة إني خذيت يمين وراه بس علشان أصوره

و تالي توهقت و ضيعت

لوووووووول

يمهل و لا يهمل

يمهل و لا يهمل

ملاحظة: الصورة الأولى وأهم توهم بينحاشون و الثانيه أخينا إلى نسى رقيته و مانزلها

عملاء و عميلات

مديري الجديد ما عنده ثقه في مهاراتي و قدراتي .. و بنفس الوقت .. ليس لديه فرصه حاليا و لا حتى وقت لإكتشافها .. جلساتي معاه كانت قليله جدا .. تعريف سريع على مهام العمل الجديد .. توجيهات تصلني عن طريقه مره .. عن طريق سكرتيرته مره .. و عن طريق السوبر فايزر مره أخرى

مللت التهميش و الجلوس على المكتب لأداء مهام عمل روتينيه يمكن لل تي بوي إنه يسويها .. تمردت و قمت أحاول أتنطط هنا و هناك .. أحاول جاهده إني أبين له مهاراتي .. سرعتي في أداء المهام .. نباهتي مرات .. حتى صارت محاولاتي البائسه لجذب انتباهه لوجودي واضحه للعيان

الاسبوع اللي فات خلاني مشغوله في بروجكت متروس أرقام .. من شهر يناير حتى شهر أغسطس .. تاسك سهل .. بل سخيف .. و لكنه طويل .. و دمه ثقيل .. و الأرقام دايما تسبب لي دوخه .. حتى حسيت إني صرت حوله .. خصوصا و إنه قص ظهري باشتراطه إستخدام عدوي اللدود برنامج الإكسل ابو دم ثقيل

اشتغلت عليه ليله و ضحاها .. و كنت كل ما أخلص شهر أقول شفايدة هالريبورت ؟؟؟ إنا بشهر 8 و أكتب عن شهر 2 ليش ؟؟ حتى تيقنت أنه عنده نسخه خالصه و جاهزه و ان مصير ريبورتي هذا التراش كان و ما هدفه إلا إشغالي عنه

المهم .. بداية الأسبوع دخل علي و وراه عربانه فيها تقريبا 7 كراتين .. مليئه بالأوراق .. نسخ عربيه و نسخ إنجليزيه .. شرح لي الموضوع .. و هو عباره عن إستبيان عن خدمات الشركه .. و طبعا المفروض إنه يتوزع على عملائنا الكرام و المستفيدين من الخدمات .. و طبعا آنا إللي راح أوزعه وهذا طبعا كفيل بإبقائي مشغوله و لاهيه بالاستبيان طوال الشهر الفضيل

ست ساعات و أنا أفتر بين هذا و ذاك علهم يعطوني بعضا من وقتهم و يحلون لي جم ورقه .. الاستبيانات دمها ثقيل .. انا بنفسي أكرهها و يضيق خلقي لي شفت واحد مجبل علي و بيده أوراق .. يعني بضاعتي باختصار غير مرغوب فيها .. و هنا تأتي الأخلاقيات مع إحترامي للجميع و إيماني بإن كل شخص حر نفسه .. يقبل على ما يريد و ينفض عن ما لا يريده

جملتي باختصار : صباح الخير .. قاعدين نسوي استبيان عن خدمات الشركه .. عندك مانع تحل/تحلين معاي واحد ؟؟ هذا طبعا مع ابتسامه مني و مع تقديم قلم أزرق هديه

ردود الإناث من العملاء

مالي خلق
مابي
تعبانه
ضرسي يعورني
راسي يعورني
لازم ألحين؟
أقدر أقول تقريبا 70% منهم يدقروني و يردوني

ردود الذكور من العملاء

إنشالله
من عيوني
أكيد
تامرين
ليش لأ
عشانج أسوي
أقدر أقول 1000 بالإميه كلهم يتجاوبون معاي

تتوقعون ليش البنات (صغار و كبار) يردوني و الشباب (شباب و شيبان) وايد إيجابيين ؟؟ مع إن التكنيك إللي استخدمه واحد

هل مازالت المرأه عدو المرأه ؟؟

يالله تعدي هالاستبيانات على خير .. لإني بصراحه ما أحب أنرد و لا أحب أندقر ولا أحب أفرض شي على غيري .. نتحمل و أمرنا لله

شكرا نصـــره

شكرا لنارك التي شوت 48 جسدا

شكرا للهيبك اللذي شوه 60 جسدا

شكرا لغيرتك و حقدك و انتقامك اللذي خلف 48 بيتا للعزاء

شكرا نصـــره

فقد اختصرت طريقهم إلى الجنــه

الجهراء

اللهم اغفر لهم و ارحمهم

وعافهم واعفوا عنهم

اللهم شافي مرضاهم

اللهم آمين