مديري الجديد ما عنده ثقه في مهاراتي و قدراتي .. و بنفس الوقت .. ليس لديه فرصه حاليا و لا حتى وقت لإكتشافها .. جلساتي معاه كانت قليله جدا .. تعريف سريع على مهام العمل الجديد .. توجيهات تصلني عن طريقه مره .. عن طريق سكرتيرته مره .. و عن طريق السوبر فايزر مره أخرى
مللت التهميش و الجلوس على المكتب لأداء مهام عمل روتينيه يمكن لل تي بوي إنه يسويها .. تمردت و قمت أحاول أتنطط هنا و هناك .. أحاول جاهده إني أبين له مهاراتي .. سرعتي في أداء المهام .. نباهتي مرات .. حتى صارت محاولاتي البائسه لجذب انتباهه لوجودي واضحه للعيان
الاسبوع اللي فات خلاني مشغوله في بروجكت متروس أرقام .. من شهر يناير حتى شهر أغسطس .. تاسك سهل .. بل سخيف .. و لكنه طويل .. و دمه ثقيل .. و الأرقام دايما تسبب لي دوخه .. حتى حسيت إني صرت حوله .. خصوصا و إنه قص ظهري باشتراطه إستخدام عدوي اللدود برنامج الإكسل ابو دم ثقيل
اشتغلت عليه ليله و ضحاها .. و كنت كل ما أخلص شهر أقول شفايدة هالريبورت ؟؟؟ إنا بشهر 8 و أكتب عن شهر 2 ليش ؟؟ حتى تيقنت أنه عنده نسخه خالصه و جاهزه و ان مصير ريبورتي هذا التراش كان و ما هدفه إلا إشغالي عنه
المهم .. بداية الأسبوع دخل علي و وراه عربانه فيها تقريبا 7 كراتين .. مليئه بالأوراق .. نسخ عربيه و نسخ إنجليزيه .. شرح لي الموضوع .. و هو عباره عن إستبيان عن خدمات الشركه .. و طبعا المفروض إنه يتوزع على عملائنا الكرام و المستفيدين من الخدمات .. و طبعا آنا إللي راح أوزعه وهذا طبعا كفيل بإبقائي مشغوله و لاهيه بالاستبيان طوال الشهر الفضيل
ست ساعات و أنا أفتر بين هذا و ذاك علهم يعطوني بعضا من وقتهم و يحلون لي جم ورقه .. الاستبيانات دمها ثقيل .. انا بنفسي أكرهها و يضيق خلقي لي شفت واحد مجبل علي و بيده أوراق .. يعني بضاعتي باختصار غير مرغوب فيها .. و هنا تأتي الأخلاقيات مع إحترامي للجميع و إيماني بإن كل شخص حر نفسه .. يقبل على ما يريد و ينفض عن ما لا يريده
جملتي باختصار : صباح الخير .. قاعدين نسوي استبيان عن خدمات الشركه .. عندك مانع تحل/تحلين معاي واحد ؟؟ هذا طبعا مع ابتسامه مني و مع تقديم قلم أزرق هديه
ردود الإناث من العملاء
مالي خلق
مابي
تعبانه
ضرسي يعورني
راسي يعورني
لازم ألحين؟
أقدر أقول تقريبا 70% منهم يدقروني و يردوني
مابي
تعبانه
ضرسي يعورني
راسي يعورني
لازم ألحين؟
أقدر أقول تقريبا 70% منهم يدقروني و يردوني
ردود الذكور من العملاء
إنشالله
من عيوني
أكيد
تامرين
ليش لأ
عشانج أسوي
أقدر أقول 1000 بالإميه كلهم يتجاوبون معاي
من عيوني
أكيد
تامرين
ليش لأ
عشانج أسوي
أقدر أقول 1000 بالإميه كلهم يتجاوبون معاي
تتوقعون ليش البنات (صغار و كبار) يردوني و الشباب (شباب و شيبان) وايد إيجابيين ؟؟ مع إن التكنيك إللي استخدمه واحد
هل مازالت المرأه عدو المرأه ؟؟
يالله تعدي هالاستبيانات على خير .. لإني بصراحه ما أحب أنرد و لا أحب أندقر ولا أحب أفرض شي على غيري .. نتحمل و أمرنا لله
3 comments:
مو لأن المرأة عدوة المرأة .. ولكن لأن الرجل صديق المرأة :D
مبروك على المدونة
ليت أمثالج يداومون في التعليم العالي
لأن اللي هناك مايفهمون بشغلهم
ومالهم نفس يشتغلون أصلا
أما ردا على سؤال المرأة عدوة المرأة
أنا تأكدت من هالشي من عايشة الرشيد وغيرتها من اللي النائبات
مع أنها من أشد المطالبات بدخول المرأة للمجلس
ابو الوليد
المرأه كائن غيوووووووور جدا
Post a Comment