رمضان هالسنه .. تتنيــــــــــح + تسطيــــــــــــل
تتنيـــــــح و تسطيـــــل له أول ولا له تالي
الله يستر بس ..أول مره أكون متنحه و مسطله هالكثر .. و أحب أنوه إنه هناك فرق كبير جدا و جوهري بين التتنيح و التسطيل
التتنيح يكون على معده فاضيه ( قبل و جبة الفطور وخصوصا بالدوام ) .. تبدأ فترة التتنيح مع النهوض من النوم صباحا و تزداد التناحه تدريجيا مع مرور الوقت بالنهار حتى تصل ذروتها قبل الإفطار بنص ساعه
تتمثل التناحة ( مادري اذا في كلمة تناحه بالقاموس أو لأ ) فيما يلي
أولا: الصراع الأبدي عند النهوض من النوم على المنبه صباحا .. حيث أقوم عاده بعمل مكس و تتلخبط علي الأمور .. هل هذي قعدتي عقب قيلولة الظهر أو إنها قعدتي للدوام بعد نومة الليل ؟؟؟؟ ( تنحني أكثر ) آااااه
ثانيا: خربطة لها أول ما لها آخر عزكم الله بالحمام .. أدش حافية القدمين و لما يصقعني السيراميك البارد أذكر و أرجع قري ألبس عزكم الله النعال اللي دايما قياسه 40 مادري ليش !! مادري ليش دايما نعول الحمام قياساتها عوده !! ليش لييييش
ثالثا: إستخدام البلسم قبل الشامبو و مرات من غير شامبو خير شر و ما أتذكر إلا أذا خلصت و طلعت
رابعا: أداء صلاة الصبح من غير وضوء ( مو متعمده طبعا بس تناحه .. كله ناسيه و مشكله إني ما أذكر إلا و آنا أتشهد !!! إي لييش ما أذكر و آنا أقرى الفاتحه !! مو لازم الفاتحه .. الإخلاص مثلا !! ) طبعا ما كو شي اسمه صلاة الصبح .. في صلاة فجر بس .. صلاة الصبح هذي حق اللي يصلون متى ما إقعدوا من النوم .. الله يهديكم و يهديني معاكم
خامسا: قمة التتنيح و آنا أسوق .. أضيع اللفات .. أطوف إشارات .. ألف عالأوادم .. أطق هرن بالغلط و أخرع إللي يدامي .. أشغل المساحات .. لا تعدون
سادسا: التناحة بالدوام .. تحلطم .. مالي خلق شي .. اي أحد يسألني كله مادري حتى لو كنت أدري .. قاطه راسي عالديسك و نايمه .. استغفر الله .. ما أسوي شي له علاقة بالشغل .. أصلا الشغل خفيف
سابعا: التتنيح على السرير و النوم حتى موعد الإفطار ( ناقص يوم بس من الثلاث أيام الي صمناهم لأني طوفت فيه الفطور) إحم إحم
بعد الفطور يبتدي التسطيل و غالبا ما يرافق التسطيل إمتلاء المعده .. ومن علاماته ما يلي
أولا: مالي خلق أقوم أغسل عقب ما آكل ( جملتي المعتاده : منو يغسل ايدي ؟؟؟ مرات أقص عاليهال أعرض عليهم مغريات ماديه .. مثال .. منو يغسل ايدي أعطيه ديناااااار ؟؟ طبعا محد يلقيني ويه .. زين انا بعرف دام ناكل بشوكه و قفشه و عفسه ليش نغسل ايدنا !! لازم يعني لازم !! ) إي لازم
ثانيا: عيزانه أقوم أصلي .. أستغفر الله ( أستعبط عليهم .. يصير أصلي و آنا قاعده ؟؟؟ لا ما يصير ليش بالله شفيج عشان تصلن وانتي قاعده ؟؟؟؟ ) عبطني
ثالثا: عادة ما أصلي و أنسى جم ركعه صليت ( الله ياخذك يا شيطاني يا مسطلني ) غير شيطان ما ينمسك برمضان
رابعا: مرات بفنتق يعني .. بنوع و آنا أصلي .. خو مو كله الإخلاص !! مرات الناس مرات الفلق .. المهم وانا بالركوع أذكر إني قريت الاخلاص و الناس بالركعه الأولى !! و الله صج ؟؟ وين الفاتحه !!؟ ( سطلني أكثر ) و أكثر بعد
خامسا: بالركعه الثانيه أقرى التشهد كامل !! زين اش خليتي حق الركعه الأخيره !! ما خليت شي .. شاطره
سادسا: التسطيل يصل قمته و آنام عالغنفه بالصاله
أقعد من النوم عالعشر مرات أبجر على حسب .. هني بصراحه أكون صحصت الحمدالله
أفتح التلفزيون و أقلب بالقنوات و تلوع جبدي و أرد أسطل و أنـــــــام
سؤال: هل من مسطول و متنح برمضان غيري؟؟؟
4 comments:
نعم هناك غيرك من يسطل
انه انا
خاصه لما اصلي اطوف جم ايه وانسى التشهد مادري شسوي استغفر الله
يالله الله يعينج برمضان
تقبل الله اعمالج
شوش اهو مبين من البوست السطلان و التناحه ماخذين بطولة فيه
لدرجة ان مفهوم التناحة المفروض يكون اهو التسطيل
ازمة و تعدي
حمدي ربج انتي تسطلين انا أعصب أحاول امسك اعصابي فما اكلم احد بس امس تسحرت عدل و ما يعت فما صار فيني شي الحمدالله ,
أكلي وايد يمكن يروح التسطل :P
لوووووووووول بصراحه انا سطلت وتنحت بعد البوست هذا
والله التسطيل والتناحه موجودين بس مو هالكثر يعني
:)
Post a Comment