أووووه أفريكـــــــــا

أس ســـــــــــلام عليـــــــــــــــــــــــــكم

أحيـــي

شعـــب بـــوركــــينا فـــــاسو العــــــريق

و أهــــديه أغنيــــة راشــــد المـــــاجد

عــــلى ميـــــن تلعبــــها .. علـــــى ميــــن يا بــن النــــــاس

بطـــوا ايميــــلي ايمـــالات

مره فايزه بسيارة بي ام دبليو

مره مرسيدس

مره ولد عمي محمد عصمان ميت بحادث طياره وماكو أحد في العايله كلها حي الا أنا ولازم أستلم فلوسه

مره ولد خالي اسماعيل عبدالقادر ميت بحادث حمار (حادث حمار يعني طاح من فوق الحمار على صخره و انفجر راسه و مات) و بعد ما في أحد يستلم فلوسه الا أنا

جننوني الأفريكـــــــان مادري من دازهم علي

عن جـــــد

أوووووه أفـــريكــــــا

مو بس أووووووه

إلا وجع وجع و وجعووووووه زين

الكويتيووون في الشـــارع

دايما على باله اللي حوالينه بالشارع يعاندونه .. يخسي ما يطوف قبلي .. أخاف بس بخليك تلف .. ترك من ألحين لي باجر .. يحليله الكويتي .. نيته غالبا صافيه

ما يدور عنده ممنوع و ما يصير .. منوع تلف .. يلف .. شاف ماكو أحد بالدوار قلبه يو تيرن .. من له خلق يلف 360 درجه .. ماكو لفه .. دبر عمره و صعد رصيف و نزل بالشارع الثاني .. يحليله الكويتي .. شــقــٌردي

الكويتي كبير السن ما يعترف بإشارة السيارة .. لي بغى يلف طلع إيده من الشباك وأشر لك .. يحليله الكويتي .. إنسان عملي

اذا يبي يلف و الشارع اللي بينزل فيه زحمه و السيايير ما توقف ومحد راضي يطوفه .. يحذف سيارته عليهم علىشان يوقفون غصب .. يحليله الكويتي .. فــــــداوي

يا يمشي 140 بالحاره اليمين .. يا 80 بالحاره اليسار .. لا و إن تركت له علشان يوخر يطق لك إشاره يسار .. يعني روووح مووت ماني موخر .. يحليله الكويتي .. إنســان متفهـــــم

الكويتي المراهق .. الجو حلو .. الجو غبار .. الجو حار ما يهمه .. ينزل الجامه ويرفع ريله و يطلع صبع ريله الكبير من الشباك .. يحليله الكويتي .. مــــزاج

الكويتيه الشابه .. غالبا ما تظن ان اللي يمها قاعد يغازلها و يتحرش فيها .. يا يبه مسكره الباب على تنورتج .. يالطيبه التاير فاش .. مالك أمل .. تطالعك من فوق لي تحت و تلف راسها .. يحليلها الكويتيه .. ثقـــــه

من هواياته دوس القطــــاوه .. يعجبنــــي الكويتي .. دمــــــوي

شوش و البرود كاست مسج

ان أدش مكتب و ألقى شخص يحوس بين البلوقات و فاتح مدونتي و يقرى فهذه تصير

ان أفتح الوطن أون لاين و ألقى بوست من بوستاتي محطوط بالصفحة الرئيسية فهذا يحصل وايد

ان ادش منتديات و ألقى إنهم ناقلين مواضيعي و حاطينها عندهم فأيضا هذي تصير

لـــــــــــــــــــــــــكن

ان اصحى من النوم وألقى بوست من بوستاتي واصلني على طريقة برود كاست مسج فهذه جديده

صدقوني أعزائي القراء .. كانت أول مره أصحى من النوم وقافي .. يعني وقفت على طول ما مريت على مرحلة القعده فوق السرير من كثر ما استغربت و مت ضحكا بنفس الوقت

مت ضحكا حتى كدت أن أمووت صج

كانت تعابير وجهي تقول جمله وحده

إشــــــدعوا عليــــــــكم

يا ربــــــــــــــاه

مابي أنغر والله مابي

عن جد .. ما كنت أدري صراحة ولا حتى أتصور إن ممكن الناس تحب بوستاتي لدرجة إنها تنقلها

حتى صار ودي أستعبط و أرد أنزل بوست الشعر اللي كتبته مره .. جني مادري يعني .. يمكن ينقلونه بعد و يشوفه رويشد ولا راشد اماجد و يعجبه

ولا فايز السعيد يلحنه لي

إحمدوا ربكم إني متواضعه و ماقلت فيروز مع إني أدري انها بتموت و تغني خليجي

بس جماعة البرود كاست الله يهداهم لو حاطين عالأقل عنوان المدونه جان أحسن .. رفرينس عالأقل

يالله يالحبايب .. مشكووووورين

المهم .. أبي أتعلم فارسي .. شلوووون ؟

الكويتيووون في الطياره

لازم ياكل بالمطار .. عاد حزة وجبه .. مو حزة وجبه .. لازم ياكل .. يحليله الكويتي مداري روحه

ضروري يشتري شي من المطار حتى لو كاكاوه .. يحليله الكويتي ما يبخل على روحه

آخر ناس يدشون البوابه .. الكل يدش قبله .. يحليله الكويتي ما يحب الزحمه

يستعبطون على ضباط الأمن .. يعني يطوف تحت الجهاز بساعته و حزامه و تلفونه على أبو إنه ما يدري .. آملا في إنهم يطوفونه وما يفصخونه اللي لابسه .. فقير الكويتي ما يعرف

اذا كانوا عايله .. فاللويه حدث ولا حرج .. اليهال يتناجرون .. الأم تزف الخدامه .. الأبو يركض سابقهم بعشر أمتار جنهم مو معاه .. يحليلهم والله .. من جوهم العام تدري انهم كويتيين

الكويتي اللي يعتبر خوش كويتي .. يدش الطياره ربع ساعه قبل الإقلاع .. يحليله الكويتي المهم انه دش الطياره

ساعه على ما يتذكر بأي مخبه حاط البوردينق .. و على ما يجر جنطته بالطياره .. و يدش يقعد يبيله قرن .. و يكون بمحض الصدفه صار وراه لاين أوادم ينطرون حظرته يقعد .. يحليله الكويتي منظم

نادرا ما يعترفون بالحزام .. بو دشداشه يخاف تتعفس .. اللي معاها ولدها مالها خلق يستعسر عليها فتفضل انها تمارس كل الحيل لخداع المضيفين اللي دايما دايما يصيدونهم .. يحليله الكويتي يموووت على النظام

بس يقول الكابتن بنبدى الهبوط التدريجي الكل شغل موبايلاته .. تدريجي يا يبا تدريجي .. مسكين الكويتي .. وااايد مهم .. اي دقيقه ثانيه يكون فيها جهازه مسكر ممكن تنهار حياته

بس يسمع صوت توايرالطياره حاشت الأرض قام وقف وصف دور يعني بينزل .. يحليله الكويتي .. كل شي ولا يتأخر

اي اي نسيت .. يموووتووون اذا حطو جناطهم و جياسهم فوووق .. ما يعرفون لازم تحت رجولهم .. لووول يحليله الكويتي والله .. عجيب

هذا بالرحلات القصيره

ما قلتوا لي عاد .. شخباركم؟؟

صج العربي انطقوا أربعه ؟؟

إشــدعــــوه عليــــكم

هذا البوست برعاية المصطلح الشبابي الجديد

إشــــدعوه عليــــكم

آنا سمعت إن هالمصطلح صار قديم

و فيه واحد جديد ينقال له

عشتــــوا عليــــكم

بس عاد مادري إذا نكته ولا صج

أتمنى صراحه من أي أحد عنده تحديث في هالموضوع يبلغني

جد جد موترني

المهم

بينما كنت أتجول بالفيس بوك وصلني إنفايت على هالقروب

وللقائمين على هالقروب أقوووووووووول

إشـــــدعوه عليــــكم

ما لقيتوا تسوون هالإحصائية عاد إلا بالفيس بوك

آنا ودي بدال ما تحسبون كم شيعي .. تحسبون كم جيكر بالفيس بوك .. عالأقل أستفيد شخصيا و أعرف الجياكر منو

هذا بغض النظر عن السته و ستين بدليه مكتوبه

و بينما كنت أتصفح جوجل أو قوقل

رجاءا إللي عنده تحديث بإسم جوجل/قوقل الصحيح يبلغني

جد جد مرررره موترني

المهم .. كنت أبحث بالمتصفح المذكور أعلاه .. إاللي بدوره حذفني مشكور على هذا المنتدى

و إلي أكيد أكيد أكيد مو منتدى سلف أقوووووووووول

إشـــــدعوه عليـــــــــكم

ما تبوني بعد أكبر و ألبس ملفع لما أدش منتداكم ؟؟؟؟

إبتـــــسم فأنـــت قــدســـاوي

أستقبل التهاني و التبريكات على العناوين التاليه

shooshness@hotmail.com

shooshness@gmail.com

نعم .. تعلمنا نفتح ال

gmail

إبتسم فأنت قدساوي

و روح إذبح روحك إن كنت عرباوي

وإنتحر إن كنت كويتاوي

و أهم شي

إدعم الشبه إن كنت كظماوي

ليـــش ليـــش ليـــش يــا جــــاره

:)

جتني ضحكه ما أدري ليش

:)

المهم .. قسما عظما اللي يقولي حمدي ربج يا ويله

:)

آنا حامده ربي مليون مره .. رجاءا إخواني و خواتي البلوقريه .. لا نصير مدرسين دين و فقه على روس بعض .. فجأة الكل قام يفتي بالدين

فجأه الدنيا كلها يا ســادة يا شيــوخ دين

المهم

خــلوني بعيد عن السيــاسه و الإقتصــاد لأنهم مو مجــالي

بوست اليوم من وحي و إلهام الجو الماطر اللي اهو بحد ذاته بوست

لطالما كنت اتساءل .. و أراود نفسي .. ليش مطرنا غير ؟؟

أولا: مطرنا عبيط

ينزل فجاه و بكيفه متى ما قرر .. صبح .. مسا .. صيف .. شتا .. ينزل و بس

ثانيا: مطرنا فيه إنفصام شخصيه

فتــــــارة غزيــر و يصب صـــب و عقب دقيـــقه مــاكو شي

ثالثا: مطـــرنا وصخ و لووونه أسود

ما عنده شغــل غيــر إنه يوصخ السيايير و الحيشان و يمشي .. يا ساتر .. أمي حاشها الديسك من كثر ما تغسل حوش بيتنا

رابعا: مطــرنا ريحته تراب

يعني مطرنا رمل بس في الحاله الســائلة

خامسا: مطــرنا عنيف و وحشي

غالبا ما يسبب الزحمه و الحوادث في الشوارع و الخرير في البيوت .. بعيد كل البعد عن الرومانسية و إلهام الشعراء في الأجواء الماطره الهادية

سادسا: مطــرنا مــاله فايــده

فلا أشــوفه يطهــر الأرض .. و لا يسقي الزرع .. و لا ينفع لشرب .. تراب تراب

ســـابعـا: مطـــرنا لوتي

فبدل ما إنه يغسل الأرض و الجو من الامراض و الفيروسات .. يجيبهم لنـــا

ثــامنا: مطــرنا مــاله و ظيفه حسيــه

يعني حتى المزاج ما يعدله

تاسعا: مطرنا دمــه خفيف

يخرب شعــر البنات .. يلــزق هدوم الاوادم .. يوصخ الدشاديش من تحت .. لوووول يمسخر الناس

عاشرا: مطــرنا مجرم

يخرب مواعيد الناس .. شبكات التلفون تعتفس .. المسجات ما تروح .. الستلايت مادري شيصير فيه كل شوي أحد صاعد السطح يعدله

أكشــن أكشـــن

يالله كله خير

طين مو طين يالله .. مطر عالأليــــله

و العنــوان ماله شغل بالبــوست .. بس هالإغنيــه معلقه بمخي صــار لها أربع أيام

و زعـــلانه إنتي عليــــنا ما تردين الزيـــاره ؟؟