Thursday, January 28, 2010
Tuesday, January 26, 2010
DO-BUY !
إجــازه قصيــره لمدينة دبــي و راجعــه
و تخسي باربي .. آنا أحـــــلى
من حلاة شعرها الأحمـــر و لا ركبها المقصصه
أحـــلى شي فيــها جنــــاطها
:)
سلااااام
Saturday, January 23, 2010
!! إنشالله أقــص شعــري بــس
شربت ثلاث بطول ماي
كليت كيتاكتين
قريت أعداد مجلة الأسطوره مالت سنة 2009 كامله
رتبت جنطتي و رتبت بوكي و قطيت كل الأوراق اللايثه اللي مادري شنو سالفتها
مسحت المسجات القديمه و اللي أغلبها سوالف ب موبايلي
مسحت الصور اللي مالها خانه
سمعت و شفت بيونسيه الويـــع - اي ويع ما احبها - غصبا علي 13 مره بالتلفزيون اللي بالصالون
مروا على 12 صبيه و 7 عيايز
غسلوا شعري و مشطوه و اكشتوا فيني 4 مرات للحين
قوموني من الكرسي و قعدوا وحده ثانيه مكاني و تالي يرودني عالكرسي 5 مرات للحين
مشكلتي الوحيده إني يايه من غير موعد
انشالله بس اقص شعري
Sunday, January 17, 2010
تــــكــــا
صباح الخير
اليوم سويت غلطه فزيـــــــــــعه
مسحت البوست اللي طاف بتعليقاته
ما خليت شي
عندي اثنين تحت نفس العنوان .. واحد درافت و الثاني الأصلي إللي كنت منزلته
مسحت الاصلي و خليت الدرافت
معلش
تصيــــــر عند أحسن البلوقرز
المهم
كنا مسوين باربيكيو أي حفل شواء بالشاليه
عادة اكون مشغوله بأي شي حزة الشوي و ما أجي إلا حزة الاكل و إلي أصلا يكونون الاهل مزهبين لي اكلي المعتاد لاني ما احب الشوي نفسهم
الباربيكيو إللي طاف
ما كان عندي شي و كنت شاهده على جميع مراحل الشواء
شفت فيها للأسف التكــــا
و استرجعت معاها كل الذكريات السيئه من أيام الطفوله
التكــا قد لا تعني شي لكم
بس آنا تعنيلي كل ذكرى سيئه و محرجه و مقرفه
لا اخفي عليكم أعزائي القراء
إن خمسة و سبعين بالإميه من طفولتي قضيتها من غير أسنان
نعم
من غير أسنــان
لا طواحن لا أضراس لا قواطع ولا شي
تقريبا من عمر 5 سنين لي 10 سنين و آنا حلجي يصفر إلا من ضرس أو أثنين
ماكو شي
و فوق هذا .. كانت هوايتي الترزز بالصور و تشريع حلجي و كأني فخوره بالفضاوه اللي فيه
و كانت التكا ماي نـــايت ميــــر
و خصوصا .. آااااه يا قلبي
خصوصا لما أضطر (أمثل) إني آكلها جدام الأقرباء و الغرباء و في المطاعم و الاماكن العامه
تذكرت الشرقه
و الغصه
و الصراع الأبدي بيني و بين لحمة التكا
إللي عمري ما فزت فيه
تدرون شنو كنت أسوي
كنت أعلجها بحلجي و آخر شي أطلعها بهدوء و أحذفها تحت الطاوله بالمطعم
من غير لا يحس فيني احد
اي شسوي ما أقدر عليها
يابسه علي
و الجماعه عبالهم أعرف آكلها و احبها
عسى ما شافو تكا ولا أي نوع من أنواع اللحم العرد إلا جدموا لي إياه
لا اخفي عليكم اني آخر مره بالشوي خذيت وحده و جربت آكلها
أمام الملأ
و كنوع من انواع التحدي و الإنتقام
لأني ألحين الحمدالله ما صار عندي أسنان بس لااا .. بل أنياب بعد
بس تصدقون
هم ما قدرت آكلها و أقصصها
يخرب بيتها من لحمه
ده كان يوم إسود إللي فكرت آكل فيه تكا
Sunday, January 10, 2010
رســـــالتي
تحذير: قسما بالله اللي يحاول يضحك أو يتطنز أو يتمسخر أو يبدي أي نوع من أنواع الإستهزاء المباشر و اللا مباشر بمشاعري المكتوبه يا ويله يا سواد نهاره و ليله
صديقه من أعز و أقرب صديقاتي القديمات جدا جدا جدا
طاحت و للأسف على مذكره من مذكراتها كنت آنا كاتبه لها فيها رساله
صورت رسالتي و دزتها لي بالإيميل
فكانت الرساله كالصعقه
أقول لها رووووووحي زين هذي مو آنا .. ما تمت لي بصله
و أتفاجأ بالأسفل إني موقعه و كاتبه إسمي الثلاثي .. زين مو باصمه بعد
موثقه الرساله عدل
:)
هذا جزء من الرساله
لأن الرساله صراحه.. فضيحه
اللي بالبرتقالي فوق هذي أمنياتي لها إلي ولا وحده فيهم تحققت
لوووووووووووووووووووووول
كاتبه لها انشالله تاخذين طيار .. يظهر ان هذا كان طموحي
ترى كنا أطفال صغار .. مراهقات يانعات .. يمكن 13 سنه ما أدري
الله يهداني .. كاتبه اسمي و موقعه مليون مره و مو كاتبه التاريخ
أهم شي إني الظاهر و الله أعلم كنت أحب مصارع إسمه
Bret
حاطه اسمي + إسمها + إسمه = لووووف فوور ايفر
أمحق لوووف مكفينا ثلاثتنا
لا و راسمته .. أحلى شي الركب .. و النتوءات و الشطحات يعني عضلات .. و الشعر ما أعبـــر
و الدليل الأكبر .. اللي أهو بمثابة الرد على كل عذالي .. اللي تطنزوا على شعري في البوست السابق
أقول لكم .. آنا كنت غلطانه لما قلت أبي أصير شاعره .. لأني أصلا كنت شاعره من كنت ياهل بس ناسيه
ركزوا عالأبيات اللي كاتبتهم في رفيجتي
أقووووول فيها
أحـــبك من بيـــن كـــل الجمــــوع
إن كــان في حبــــــــــك أمـــــــون
علشـــــــانك أنتظــــــر سنـــــــون
ما أتخلى عنـــك مهمــــا يكـــــــون
يــــــــا حب في القـــلب مدفـــــــون
تقـــريييين يالحب ؟؟ أنتظر سنوووون .. صج إني مخلصه
لوووووووووووووووول
أهم شي إني آنا وياها عصرنا مخنا نبي نذكر حروف منو اللي داخل القلب الإسطوري اللي آنا راسمته .. ما ذكرنا
المهم
شوفوا .. آنا أضحك على رووحي كيفي .. إنتوا ممنوع
إرجع فووووق للتحذير
و شكرا
Friday, January 8, 2010
شوش تحت الإصــابه
قاعده شاغله روحي بروحي .. فاكه العالم من شري .. مالي شغل بأحد .. أطقطق بالموبايل
و إذا بها إختي تدش علي الصاله بعدتها
مقصات .. شرايط .. تيجان .. ورد .. مسدس شمع .. عفسه عفسه
لوهله .. عبالي أحد عندنا بيتزوج و مو قايلين لي
سألتها شعندج ؟؟ قالت أسوي تيجان يهال الروضه عندنا حفله
رديت انشغلت بروحي .. بس كنت ألتفت عليها كل شوي أشوفها شتسوي .. إستانست على مسدس الشمع
عجبني
مال واحد يلعب فيه و يلزق و يخربط
وإذا بي أقترح عليها
شوش: انتي الحين ماسكه التاج ب إيد و الشمع ب إيد .. يطلع عوي جذي .. مسكي لي التاج و آنا ألزق الورد بالشمع
إختي: اي والله انا بعد حاسه انه عوي
واستانست .. و طلعت الشغله سهله .. و استهنت بالموضوع .. أول تاجين كنت اركز و أفكر و أمخمخ و أهندس .. ساعه يالله اقرر وين احط الشمع
عقب خامس تاج صرت خبيره و بلشت أشتغل بسرعه .. و بديت استهتر و أتهور
اختي: شوش حبيبتي ديري بالج ترى الشمع حار .. عدال شوي شوي
شوش: لا عادي ما يبيله شي .. بعدبن انتي عندج شكثر هذيل متى تخلصينهم اذا كل واحد تقعدين عليه ساعه
و فجـــــأه
التاج السابع .. حسبي الله عليه من تاج .. عســــاه ينكسر يارب .. حطيت الشمع على التاج و يايه برفع المسدس .. ولا للحين لازق فيه شمع ويلشطني على خدي
آاااااه يا خدي .. خذيت كف شمعي حار و محترم
سويت فلم بالبيت ما أكو أحسن منه .. حتى سعاد حسني ما تقايش يمي .. بالأخير أقنعوني إنه قضاء و قدر و الحنه ما منها فايده
سكت .. صار الليل .. رحنا الشاليه
قررو يلعبون كرة قدم
بما إني ميسي (اخاف بس) العايله .. و الكل يستذبح عشان أكون ضمن فريقه .. و لازم يصير هواش علي .. قررو إني ما ألعب معاهم
استبعدوني جليلين الحيا للأعذار التاليه
خوافه
ما تعرفين تشوتين
بسرعه يقطعون منج الكره
اذا يت الكره صوبج توخرين
أعذار مالها من الصحه أساس .. شوي و يقولون عني حوله بعد .. المهم رديت بواسطه و لعبت غصبا عليهم
و ليش اني لاعبه غصبا عليهم طلعوا الحره فيني على أرض الملعب القاسيه
هدوا القوووول و قاموا ينيشنون علي و يشوتون الكره صوبي بأقوى ما عندهم الححححح
بدال كرة قدم صار قنص .. الشاطر اللي يشوتني
يعرجبوني لما أركض
يدزوني
طيحوني أربع مرات .. و فوق كل هذا لما أقولهم فاول يقولون لي إنتي دلوووووعه .. هذي كرة القدم ما تبين تتعورين لا تلعبين
آاااااه يا جروحي
ما ظل فيني شي صاحي
ها أنا ذا .. أكتب لكم البوست .. و الآيس باج بإيدي
شوي رافعته على خدي من حرقة الشمع .. و شوي منزلته على كوعي
أعالج جروووحي بروووووحي
حسبي الله و نعم الوكيل
إنشالله كل اللي طيحوني اليوم يطيحوووون باجر
و مسدس الشمع إنشالله ينفجر بروحه و يتفلش
قولوا أميــــــــــــن
Tuesday, January 5, 2010
أنــا و صـــديقي .. و المصفــــط
نتشارك و انا زميلي مكتب واحد و تجمعنا عشره طيبه
إلا ان زميلي هذا لووووتي حبيتين
انا بالدوام عندي مصفط خاص فيني
و بما إن زميلي مو حلو و مو كشخه و مو واسطه نفسي فما عنده
عسى ما تأخرت دقيقتين و نص إلا صفط مكاني
و كل أول نص ساعه في بداية كل يوم نتهاوش آنا وياه على المصفط
شوش: انت ليش صافط مكاني
صديقي يستعبط : عبالي منتي مداومه
شوش: و بالله ليش ما اداوم
صديقي يستعبط مره أخرى: شدراني عنج .. تبيني أروح اطلع سيارتي .. محاولا إنه يكسر خاطري و يعني طيب
شوش: من زين سيارتك عاد .. إنت سيارتك المفروض تظلل على سيايير الأوادم ما تحتاج مظله
و يضحك و أضحك و ننسى
مرات أتليعن و أخليه يطلع يحرك سيارته
صديقي عنده سلفارادو .. كل تاير جنه بير نفط
المهم
اليوم وصلت الدوام ولا بورش كاريرا صافطه مكاني
تعوذت من إبليس و قلت هذي مو سيارته
منو جليل الحيا هذا إللي يشوف إسمي شكبره و هم صافط سيارته
نزلت و دشيت المكتب
اي صح نسيت أقولكم .. انا و زميلي قصوا علينا قبل كم شهر و حطو نص طوفه و قصوا المكتب نصين
آاااال يعني كل واحد صار عنده مكتب بروحه
قمنا ما نشوف إلا روس بعض
المهم
دشيت المكتب و سلمت على قرعته .. بما إنها الشي الوحيد اللي يبين من فوق الطوفه
رد السلام و عطاني شغله و قال بروح شوي و أرد
خذيت ورقة بوست إت الصفره و كتبت عليها
الرجاء عدم الوقوف بالمصفط الخاص بي و شكرا
شوش: أميـــــــن
أمين: يس
شوش: روح بره مكان سياره مال آنا في سياره ثاني لون أسود روح حط هذه الورقه عند الباب
أمين: أوكي
توني قاعدة و مسوية حق روحي جو واشرب جاي و لا ذيج الصرخه
صديقي: شووووووووووووووووووووش
شوش: خرعتني شفيك تصارخ جذي
صديقي: أصااارخ لو بيدي أحذفج بقوطي الكلينكس اللي يدامج
شوش: ليش شنو فيه ؟؟
صديقي: حرام عليج يالظالمه امس مطلع سيارتي و مخليه الهندي يلزق ورقه على السياره بتيب احمر مال الكهربا
صارلي ساعه أشلع الستين تيب اللي ملزقهم على جامة السياره مو حرام
شوش: الكاريرا مالتك ؟؟
صديقي: اييييييي ... جان حط ورقه !! تيب تيب ؟؟؟؟
شوش: اللللللله حلوه السياره .. بعدين انت شكو تصفط مكاني ؟؟ بعدين مادري انها سيارتك .. بعدين انا عطيته بوست ات تلزق بروحها ما قلت له لزقها بتيب
صديقي: طلعي شلعي باجي التيب
شوش: أطلع ليش ما أطلع
صديقي: المصفط لي ما تبقى من هالأسبوع
لوووووول .. مسكين .. صج كسر خاطري .. كان ودي أصور التيب شسوى بسيارته بس خفت يطيح على بلوقي
يستاهل أعطيه المصفط باجر و عقبه ؟؟؟
Friday, January 1, 2010
Subscribe to:
Posts (Atom)
