Wednesday, March 16, 2011

عنــدما كــنت طفــلة




دايما يقولون في بريعصي طايح بـ برادة الماي مالت المدرسة و دايما الماي حار و اللي مايها بارد بعيدة .. على ما توصل لها إلا طاق الجرس

كان بطني يعورني لما تجي الأبلة اللي تنادي أسامي البنات اللي بيودونهم عند طبيبة الأسنان .. يا ساتر

في جني بالحضيرة اللي بالساحه الخلفية .. أهم شي إن الحضيرة ما فيها إلا فيران

كان في يوم بالمدرسة إسمه يوم النظافة يختارون أنظف وحده بالمدرسة و يعطونها هدية صابونة .. الهدية مو منطقية

كنا نتبرع حق السور الرابع .. مادري بنوه ولا لأ


كان في صبي حول بصفي بالروضه كنت أخاف منه و ذيك السنة كنت غياب مستمر .. حرمني من أولى روضة

أكتب رسايل حق أمي و أبوي .. سوالف أفلام

ما كنت أعرف آكل التكا .. للحين ما أعرف آكلها

كنت أشوف فول هاوس بالقناة الثانية

كنا نسوي بيوت من مساند الصالة و نحذف الريموتات و المشوط على بعض و مسمين اللعبة حرب النجوم .. يعني ستار وور

كنت ألفلف ايدي و ريولي و احط لزقات و انا مافيني شي .. للحين يسوون هالحركة

كانوا المصريات بالمدرسة يلبسون تراينينق سوت الألعاب تحت نفنوف المدرسة و كنت أقلدهم عبالي كشخه .. الكحلي بو خطوط بيض


كنا نلعب كرة بالحوش و لما نخلص احسن واحد اللي يحل المكيف و يوقف جدامه و يلزق وجهه بفتحات التكييف

كان عندنا حوض سباحه نايلون مرسوم عليه حيوانات زرافة و فيل و أسد تترسه لنا أمي إذا كان في ماي صليبي فقط

كنت أحب ريكو

خواتي يحطون هدومي بجنطة و يقولون لي اني بنت الخدامة مو اختهم
.. إن كيدهن لعظيــم

12 comments:

@alhaidar said...

:)

ام بناتي said...

Loooooooooooool

اذا ماخاب ظني انتي مواليد الثمانيناات

الله على ألعابها اول نسوي بيوت بالمطارح و المساند
او متاعه و نكت ماي عالزووليه!!!! و اللي يلقاه اهو الفايز

السور الرابع أبوي عطاني ٢٠ دينار اتبرع فيهم اذكر تطوعي كباابيس و باجات شكثر

نون النساء said...

قصة اليني بو الكف الأحمر
في الحمام
واللي يخطف البنات بالهدة يوم الأربعاء فقط وتتم محبوسة ويلقونها السبت صايرة عيوز



كنت من صجي أخاف
ومادش حمامات المدرسة بالحصة الأخيرة أو بالهدة
لو شنوووووووووووووووووووو

Sweet Revenge said...

خواتي يحطون هدومي بجنطة و يقولون لي اني بنت الخدامة مو اختهم


لوووووووووووول اذكر كنت اسويها مع بنت خالي كنت اقولها لقيناج يم المسيد
مسكينة اذكر بجت
عسل يا شوش الله يحفظج
ذكرتيني بسالفة السور الرابع
وينه؟

Engineer A said...

ياحلوها من ذكريات :)

شايب مزيـون said...

*
الصورة حلوة وملامحها شقية
ناااضجة بطلتها
وبسمتها بـهية
ناقصة اصبع اليد
يقطع نص الفم والانف
وتصدر اش شوووش

*
*

الطفولة
تـجينا ان جينا نرتاح
خذتنا هناك لاول خطاوينا

للطفولة والعبث المستباح
قبل لا يستشري القانون فينا

*
*
مشكلتي
مع الصور مطروحة
مشكلتي من الأول

ماني حكيم ارواح حضرتي
أظن الصورة مشروحة

وكل ضعفي هي وكل علتـي
لان حنا اصوات
مسموعة

بين اشواك من دوحة

لأن حنـا صور
ممنوعـة

بين اسلاك مسموحة

*
*
أستاذة الكل شوش

شقاوتك لها طعم خاص
ومكانة

ومشروعة لك لانها مرتبطة
بفترة عمرية كانت
بمراحلها المدرسية

بوحك مباح ولذيذ
وخفيف نحتاجه احيان

انتي
مع طفولتك والصورة
=
شوش الشقية
^
^
^
شايب مزيون

*

Anonymous said...

كل زمن وعمر له ميزة
الطفولة والبراءة والعفوية حلوة لكن النضج احلى

تحياتي


هنووي

Little Bird said...

اول شي حركة الجني !! شائعه جدا لدرجة كان عندنا في الدرج اشاعه اصباع جني مقطوع !!!!الحقيقة انها كانت اسلاك كهربا عليها لصق
**
ثاني شي احيكي على ريكو و الاستكرزز


اول مرور لمدونتك جميله جدا

~أم حرّوبي~ said...

هههههههههههه
نفس الاشيا والله

خصوصا سالفة بنت الخدامة بس كانوا يقولون لي اني يتيمة ومربينها هع

:)

Anonymous said...

عفية عليج
ما شاء الله عليج تذكرين

ما أقول الا مشكورة على إنج شبيتي التريك بذكريات كنت أحسب إني ناسيها ولو بغيت أذكرها ما ظنتي باذكر مثل ما ذكرتيها

شكرالإعادة إحياء الذكرى بوقت كنت محتاج أذكر فيه أول الأشياء والأفعال والمواقف

Nunu-San said...

كان في يوم بالمدرسة إسمه يوم النظافة يختارون أنظف وحده بالمدرسة و يعطونها هدية صابونة .. الهدية مو منطقية

LOL!!! 3ad sij .. It doesn't make sense. She's already clean, laish saboona?! XD

dakdoka said...

hahahahaa bs mno rico ? tathekreny ;p