Thursday, November 4, 2010

إجتمـــاع أوليـــاء الأمـــور



بغض النظر عن ما وصلت إليه من منصب بدرجة وكيل وزارة حاليا في العمل


و بغض النظر عن تفوقي الباهر في الثانوية العامة لحقه تفوق أبهر منه أي أشد إبهارا في دراستي الجامعية


فإنني لا أنــسى


و لا تغيب عن ذاكرتي


تلك السنة النحسة


الله لا يعيدها من سنة


سنة ثالثة إبتدائي .. يا ويـــل حالي عليها من سنة


حيث إني و بسبب ظروف غامضة غير قادره حتى الآن على تحليلها


جبت أربعتش من عشرين في مادة الرياضيات في الشهادة


و أربعتش عند أمي معناها إني قمة في البلادة


و ما بين فيني تعبها المزعوم


المهم .. حزتها كان بعد كل شهادة .. في إجتماع أولياء أمور


و الإجتماع كان غالبا العصر .. ليييييش ؟


أكيد مو علشان الجو أحلى و أبرد !! لا طبعا


علشان كان لزوووم الطالب يحضر مع أهله الإجتماع .. ليييييش ؟


غير إنها حركة تلخص نحاسة و ثقل دم و خباثة إدارة المدرسة


كانت إدارة المدرسة تهدف إلى أن تكون الفضيحة علنية


و الزف من الأهل يكون قدام المدرس .. و الملاحظات من المدرس تكون قدام الأهل


فكــان هذا الإجتماع أبو أربعتش من عشرين جعل الله يغربله .. كابوس بالنسبه لي


و إحراج محقق .. خصوصا و أن أمي عصبية


يعني عادي تطق راسي بطاولة المدرس .. سهالات الوالدة .. ماكو مشاكل


من حرتها تحس إنها هي اللي جايبة أربعتش مو أنا


المهم .. عاد آنا شسويت ؟


ثاني يوم الصبح قبل الطابور


رحت و قطيت وجهي


أقصد إشتركت في نشاط الإخصائية الإجتماعية


و استعرضت عليها مواهبي


و استعدادي لتقديم خدماتي في تنظيم الإجتماع


و عطوني أرقى وظيفة


مسكوني دله و فناجيل


و كنت واقفه عند باب المدرسة أصب قهوة للأهالي .. و بنفس الوقت دلتي كانت عذر إني ما أدخل الإجتماع


معقوله يعني ؟! أهد دلتي و أدخل الإجتماع يما ؟؟ ما يصير .. عيب أنا ملتزمة مع الإخصائية


من يقهوي الأهالي .. الناظرة مثلا ؟

19 comments:

SHOOSH said...

شــاركوني ذكرياتكم .. وهل سبق أن جبتواأربعتش من عشرين ؟

أبوفلان said...

ههه

نفس حالتج يبت 14 من عشرين بالإنجليزي

وكان مدرسنا جزائري الله يذكره بالخير

رديت البيت أمي قامت تبجي ههههه ما ادري ليش

لا وبعد كان عمي وكيل المدرسة عاد راح أبوي كلمه وقاله الولد ياخذ عشرين الشهر الجاي قال مايصير خاطرك الا طيب ويبتها غصبن عن خيشومه

SHOOSH said...

أبوفلان
=======

وااااسطه يابوفلان ؟؟؟


وااااسطه ؟!؟!؟

رورو الشخبوطه said...

انا امي توقف معاي ضد الابله خخخ..

لانه العاده اكون يايبه درجات بس ينقصوني بالشفوي :\

وعجبتني فكرتج خخخخ..

بس احنا اجتماعنا الصبح واذكر مره بالثانوي انا وامي نكلم الابله الابله بي تصرفني امي مارضت :)

Frankom said...

عمري مايبت علامة أقل من 16 أو 17 من 20
بس بالجامعة سهالات الواحد ياخذ
F

مادري الخلل فيني أنا ولا بالجامعة ولا بالدكتور
ولا بمناهجنا أيام الدراسة ؟

Anonymous said...

بغض النظر عن ما وصلت إليه من منصب بدرجة وكيل وزارة حاليا في العمل
----
من صبابة قهوة الى منصب وكيل وزارة !!!

ذكرتيني باللاعب الاوحد الفذ العصامي ( بيليه ) من ماسح للأحذية الى اسطورة الملاعب .

شوووش الله يخليج اشوي اشوي علينا ترى مانستوعب اذا طاح علينا شي كبير مرة وحدة ,, اعتقد ولا انتي تستوعبين الاثقال والاوزان الكبيرة ,,

ودي اصدق ودي ,, بس ثقيلة ثقيلة

SHOOSH said...

رور الشخبوطة
=============

الأمهات عدوات بعض الأحيان

:)

SHOOSH said...

Frankom
========

فيك


:)

SHOOSH said...

Anonymous
=========

كل هذا و ما استوعبت انه سالفة وكيل الوزارة غشمره ؟؟

قويه


:)

Katkoota xD said...

خخخ

العام كانت درجتي ناقصه بالرياضيات

مادري شكثر لما استلمت الشهاده ما عطيتها امي

و حسستها الوضع طبيعي ماكو شي

لما سألتني عن الشهادة

ولا اقولها زينه مافيها شي .. قلتها نسبتي و بس

و كنت بطلع مع خالتي فقبل ما اطلع عطيتها الشهاده

قلتلها مالج شغل بالدرجات اهم شي النسبه

و طلعت مع خالتي .. عساس الحق على نفسي من الزفه

xD

Яeema said...

Kint om egleeeeeb hahahahahah

Kanaw elmodaresat emsameeeny <<< metza3ma 7ezb elmo3aratha bel class

panadool said...

لووووووووووووووووووووول

أبوي قرص أذوني جدام المدرس لما صارت أذوني حمره وبعدين بغي المدرس يوخرني عنه وجان يقوله أبوي مو شغلك

لووووووووووووووووووووول

كانت بثالثه متوسط

Anonymous said...

SHOOSH said...
Anonymous
=========

كل هذا) و ما استوعبت انه سالفة وكيل الوزارة غشمره ؟؟

قويه

============

ليش انتي قلتي شي يوحي انها غشمرة حتى يكون ( كل هذا ) ؟
استوعبت او صدقت ؟ تفرق

وان استوعبت سالفة وكيل وزارة غشمرة لازم بعد استوعب صبابة قهوة غشمرة والبوست كله وسالفة المدرسة كله فلم وغشمرة ,, ولا بس منصب وكيل الوزارة الله حباها بالدغدغة؟

كبر اللي طاحت على هيروشيما وناجازاكي

كبيرة

:)

Engineer A said...

انا اذكر في ابلة فيزيا عندنا واهي الوحيدة بالمدرسة بالنسبة لي كانت فيلم رعب!! باجتماع اولياء الأمور لا أنا ولا أهلي نقرب صوبها واهي الوحيدة اللي كنت ما اواطنها:(

ساره النومس said...

لوووووووووووول شوشو يا
geeeka

شكلج امج مو كويتية :p

يبا عادي ماكو احد ما يفشل اينشتاين فشل كذا مرة وتعلم لا تخلين هالسنة في ذاكرتج استانسي لانج عشتي البلادة في فترة من الفترا

Safeed said...

بالابتدائي عمري ما رحت اجتماع اولياء الأمور
ولا اذكر إن أمي او ابوي الله يرحمه سأل عني! في المتوسط .. يمكن مرتين
وبروحي بحكم إن المدرسة يم البيت
وسمعتي كطالب مؤدب ومهذب وشاطر كانت تسبقني
:)
بالثانوي
اذكر الكيميا
يبت بالشهر الاول 19.5 من 20
وفي الشهر الثاني يبت 8 من 25
:)

وبما أني كنت في طور "المراهقة" يعني ريّال .. محد سال عني
ولا درى

ولا تزال هالدرجة سر .. محد يدري عنه بالعايلة

noro said...

walla 3afyaa 3alich ta3rfeen etfkreen ;pP

أحمد محمدي said...

والذي فلق الحبة وبرأ النسمة
اني كنت ايب بالكيميا والفيزيا والرياضيات الدراجات التالية

نص من عشرة
واحد ونص من عشرة

DK said...

LOOL 3afia 3leech mo hayna ;p