Tuesday, March 2, 2010

شووش و المــاك بـــوك



خفت أكتب ماك عبالهم ماكدونالدز


كتبت ماكنتوش قالولي كاكاو


المهم


لا هذا و لا ذاك


قصدي عن الماك بوك .. اللاب توب


لا أخفي عليكم .. إلا صج شرايكم في مقطع لا أخفي عليكم ؟؟ حلو صح ؟؟


المهم


لا أخفي عليكم قرائي الأعزاء إني شريت هذا الجهاز المشئوم إلي إسمه الماك بوك برو قبل تقريبا شهرين و نص


و لا أخفي عليكم أيضا إني من شريته و اهو طايح بجبدي .. عاله على مكتبي .. غاثني .. قاهرني


حسبي الله على تلك اللحظه اللي تهورت فيها و قطيبت 530 دينار كويتي .. دينار ينطح دينار على هالجهاز التعيس


نزل المعاش الساعه خمس .. الساعه سبع الماك بوك عندي


لا و مو بس جذي .. عبالي روحي خبيره


شريت سماعات .. و ماوس من غير واير و يطلع ليتات .. و ستين جنطة لاب توب .. و 3 طاولات هذيل ملوت الرجل علشان السيفتي يعني


و كفرات و عفسه


و آخرتها .. طايح كأنه قتيل على الأرض


حسبي الله على تلك اللحظه النحس اللي سمعت فيها كلام ربعي و عيال عمي و إخواني


ودرووووني


ضيعوووني


فلسووووووني


حسبي الله عليــهم حسبي اللـــه


فروا مخــي


شووووش شخباري ويندوووز ويييييع ويييع حدج قديمه


شووووش لما بتستخدمين الماك بتكرهين روحج ليش كنت ما تستخدمين إلا ويندوز


شووووش الماك شي مو طبيعي و الأبليكيشنز فيه مووو صج


شووووش ماكو مقارنه بين شاشته و شاشة اي لاب توب ثاني


شوووووش مافيه فايروس


وااااااي وااااي واااااي .. صورووووه لي وكأنه شي نازل من السما .. حلفت آخذه آخذه


لما إنطقيت على عيني و خذيته


خلوا رفيجاتي على صوب .. الفلبيني اللي بالمحل .. كرهني برووحي ليش أستخدم ويندوز


يقولي ماااااااااااااام شنو لاب توبات استخدمتي


قلت له آي بي إم


سوني


إتش بي


و كل ما أقول شي يعطيني نظره من فوق لي تحت


حسسني إني طالعه من جليب ماي و ما ادري الدنيا شصاير فيها


يقول لي : سووووو فريندلي مدااااام


فريندلي بعينك عمى بعينك .. ساعه بصغر الويندو مالت سفاري ما عرفت


و قعد يخربط على راسي لما شريته


الزبده


الجهاز ما عرفت أسوي فيه شي .. بس قاعده أطالع فيه أفلام دي في دي


اهو صج فيه حركات بس هم مو قادره أستغني عن الويندوز


حاولت بيني و بينكم أصرفه


مسخروووووني


شوش: شراااي ؟؟


أخوي العود: شنو ؟؟


شوش: الماك بوك


أخوي: 250 ؟؟


شوش: نعم !! شاريته 530 !! يالظالم طيحت منه وايد


أخوي: كيفج والله


***


شوش: شراااي ؟؟


أخوي الصغير : شنوو سيارتج ؟؟


شوش: لا لا الماك ؟؟


أخوي الصغير: 300 ؟؟


شوش: انتوا شنو ما تفهمووون ؟؟ أقولكم 530 شنو 300 حرااام


أخوي الصغير: مستعمل بعد شنو


شوش: ما إستخدمته


أخوي الصغير: طلعتيه من الكرتون ؟؟


شوش: اي


أخوي الصغير: بس طاحت إميه


شوش: نعم ؟؟؟


أخوي الصغير: شغلتيه ؟؟


شوش: اي


أخوي الصغير: بس طاحت إميه ثانيه


شوش: والله صج ؟؟؟ انقلع زين الشره علي آنا اللي ببيبعه عليك


***


شوش: شرااايه ؟؟


إختي : الماك ؟؟


شوش: اي


إختي: كاااااااااااااااااك كنت حاسه انج متوهقه فيه .. امووووت و اعرف ليش تكابرين .. دام مو قد الماك شكو تتليقيفين و تاخذينه


شوش: ما تبينه يعني ؟؟


إختي: لا خل يطيح بجبدج تستاهلين خبيتنا عليه و مشغله لاب توبين يدامج جنج كونداليزا رايس


***


شوش: شراااي ؟؟


ولد عمي: إنتي كله تبيعين ؟؟


شوش: واااي قطيعه .. يا إي يا لأ ليش التفلسف


ولد عمي: مادري شنو بس ماني شاري ما تعرفين تسوين تسويق و لسانج طويل


وبس .. يأست و أنا ملوله و صارت السالفه عناد .. أعلى سعر حصلته ثلاث إميه


بايعه بقره مو لاب توب


أمس عرضت على أخوي بو ميتين و خمسين أبيعه عليه بثلاث إميه و هم قال وايد


جان تلوع جبدي منهم .. و قررت أشيل من بالي فكرة البيع وأستغله و أستخدم البرامج اللي اعرف استخدمهم فيه


والله و شغلته و انا متحمسه و كلي إيجابيه


وانصدمت إني ما اعرف استخدم الا الدي في دي بلاير


صعقـــه صعـــــقه


جهاز ب 530 أشوف فيه أفلام بو نص


أتوقع من كثر ما حنيت على ال 530 حسيتوا شكثر معوره قلبي هالخمسيه


أااااخ يــا قلبي


المهم


عاد قررت أشوف فيه أفلام بس


و أسويله عملية تحويل من ماك بوك إلا دي في دي بلاير


و أمري لله


منكم لله يالي قصيتوا علي

26 comments:

Anonymous said...

LoOoOoL

maskeeeena ksrtai 5a6rii ;Pp

bs haam entai shaklch 3laimeyaa shakoo sharetaaa ;Pp?!

wela ilMAC (laptop mo macdo ;Pp) 3ajeeeeb kl shay feeh bs ybelaa a7ad y3rflaa ;Pp

be3eeeh 250 w eshtrelch DVD player w 5ali o5och ystfeed a7sn ;D

P.S: la tshtren shay ma t3rfenlaa 2laa lma tjrbena w y3jbch.

abdu said...

جان تلوع جبدي منهم .. و قررت أشيل من بالي فكرة البيع وأستغله و أستخدم البرامج اللي اعرف استخدمهم فيه


والله و شغلته و انا متحمسه و كلي إيجابيه


وانصدمت إني ما اعرف استخدم الا الدي في دي بلاير


صعقـــه صعـــــقه


جهاز ب 530 أشوف فيه أفلام بو نص
-------------------------------

كااااااااااااااااااااااااك
هاردلك من قلب

كنت متحمس اخذه بس بطق بريك عقب كلامج :-\

aL-NooR . said...

وااااااي موتيني
ضحك الله يغربل بليسج
انا اشتريه بــ 301
تبيعين
:p


بس يبيلج قعدة
مع احد عنده ماك
و يعلمج عليه ..
و صدقيني تستانسين

شنو تنصحينا
موفيز ؟


***********************

Ali said...

الله يعوضج ان شاءالله
بس حبطتيني :\
انا ناوي اشتريه عاد لاتخرعينه
لان على قولتج اسعاره مو هينه
يعني جني ماخذ 3 لابتوبات اتش بي بسعره لوول
فيعني كلش ماتنصحين فيه؟

مشلخ said...

عندي لج حل ... نزلي عليه وندوز و اشتغلي عليه...

احسن من انج مسويته ديفيدي بلاير ...

روحي اي محل في حولي او icity و يسوون حقج

لا تحرين روحج كل شي له حل ..
واذا كلش كلش .. دشي دورة و تعلمي عليه عدل ,, مالج شغل في العذال :)

قرمت said...

لازم تحليلينه، ما فكرتي تدشين دورات خاصة مثل إلي بالتطبيقي؟ ترى فيه :p

Maz said...

تدرين منو اللى ربح الفلبينى الحين ماخذ بونص على هالبيعة بس على فكره ترا هذا سعره مع الكفاله جان سألتى اهل الخبره مو اهل الكشخه والتفلسف

نمووول said...

ههههههه قريت موضوعج بجريدة الوطن
مثل ما قال اخوي مشلخ
تقدرين تنزلين عليه الوندوز
وتقدرين تخلينه يشتغل على الوندوز والماك بنفس الوقت

وترى اسرع جهاز تشتغل عليه الوندوز بسلاسة هو الماك يعني ما قطيتي فلوسج عالفاضي وترا الجهاز كد ومد سألي مجرب

تحياتي ..

بنت الشاميه said...

هههههههههههههه
غشيييييت من الضحك

يعني ما تنصحين فيه

وسعي بالج وما كو الا العافيه

انا اقول اجريه
وحطي اعلان بالوسيط وشوفى العروض.....ههههههه

والا احسن شيئ
انا اشتريه منج
340
ترا هذا اعلي سعر ياج الى الحين
شرايج
هههههههههه

خيره بغيره

ماكو على الوندوز
تحياتي

ba6alah said...

mac rules

Ra-1 said...

loool
صديقتي ووايد ناس نفسج

بس انا عجبني وتعودت عليه حبيته وايد
وترا في طريقة تحطين فيه ويندوز
حطيه أحسن لج وتنحل المشكلة :)

Anonymous said...

عادي لايضيق خلقج اللي يقعد مع اهل الماكنتوش ويسمع بعضهم يتكلم عنه الى حد القداسة اكيد بفورون راسه ويشتريه لكن الواحد لما يقره ويسأل اهل الخبرة راح يعرف انه كلامهم مبالغ فيه وانه حاله حال اي نظام تشغيلي له ميزاته وعيوبه
بس انت ليش تتحسفين بالعكس الحين تقدرين تتفلسفين ركبي عليه الويندوز وجذي يصير عندج لابتوب يشغل الماك والويندوز بنفس الوقت
وقعدي تفلسفي بلابنوب لما يضربونه عين ويطيح بجبدج حزتها تحسفي
هههههههههههههههه

وهذا رابط لتحميل ثلاث كتب 2 عن ماك و1 عن ويندوز 7
سلي روحج فيهم يمكن يفيدونج

http://www.myupload.dk/showfile/44957846345.rar/

هنووي

الزين said...

حري عليه

بجم اقول
اول شي سوي اعلان بالمدونات
وحددي سعر تبلشين منه

:)

اكيد بتلاقين شراي
يمكن تضبط السالفه معاج

شنو عندج بعد بتبيعينه
؟؟

ا

Hamedo said...

Oo sorry for what happen.

U can install windows in it:

The best way is to install VM-ware or Parallel (both r available in Hawally)

Then install windows inside either of the above app

Hope this help

SHOOSH said...

توضيـــــح


يا جماه ترى مركبه عليه الويندوز

بس هم ما ارتحت في استخدامه

للأسف

ما صار

chemistry

بيني و بين الماك

مَـــــعْــــمَــــعَـــــه said...

شرايج تأجرينه ؟؟؟

الساعه 530 فلس ... دشي التجاره من اوسع ابوابها وخلال 1000 يوم راح ترجع فلوسج

Unknown said...

Salam SHOOSH
Try the apple website , they have educational video for the machine , recent switch from windows and the different programs .its going to be tough few months but im sure you will like it .

http://www.apple.com/startpage/


i made the switch about a year ago and never looked back .

Good luck

@alhaidar said...

هههههههه صج شر البلية ما يضحك :))

الله يعينج .. وانششالله تتعلمين عليه وتغيرين رايج :)

تحياتي ..

Bor8y said...

امبيييييييييييييييييه

مومنصجج انا هاذه غرامي احبه اموت عليه لابتوبي الماك برو

شريته من امريكا وماتحسفت وعلى فكره محد قالي انا بروحي رحت شريته من غير تفكير وكان غالي اول مانزل بمريكا

بس روعه روعه روعه بمعنى الكلمه

والله ثم والله كرهت الويندوز وطايح من عيني بعد بس شنسوي مالنا قناتن عنه

اذا تبين اعلمج عليه ماعندي مانع ولا تبيعينه وفي منتدى خاص حق الماك والله ان اهمه الي علموني كل شي في هالماك

تخيلي اول ماشريته ماعرف شي غير المسنجر والسفاري بس وعقب لمن طحت على هالمنتدى علموني وااااايد اشياء

يزاهم الله خير

ومثل ماقلت لج لاتفكرين تبيعينه صدقيني بتحسفين واي شي تبين والله مستعده اعلمج عليه

1plus7 said...

فتح الباب 340
من يزيد ؟

شقران said...

الغالية شوووش

مساء النوير


مبروووك دخول عالم الماك
:)

وصدقيني إن الماك أحسن ألف مرة من الويندوز...بس يبيلك وقت وبعدها راح تحسين بالفرق


نصيحة:شيلي نظام الويندوز واشتغلي بس على نظام الماك
Snow Leopard

وإذا ماتبين الجهاز أنا شراي
:)

شراي صج موغشمره....لأن الجهاز حلو ومايتطوف أبداااااااا
:))


شنو مواصفات اللي عندك؟

أهم شي يكون 13 انش والألمنيوم بودي ،،،، مو اللون الأبيض

نصيحة للمرة الثانية...الماك أفضل مليوووون مرة من الويندوز...واللي تمرين فيه حاليا سببه عدم معرفتك بنظام الماك



تقبلي مني أجمل وأرق التحايا المسائية

7osen said...

بيعيه وافتكي
وعوضج على الله

:)

لأن أهم شي تكون في ألفة بينا وبين الشغلة إللي نستخدمها

:)

why me said...

انتي مو شريتيه؟


خلاص تعودي عليه وخلاص
بعد شنو



سوي ابد ديت حق مخج
لا تخليني اطلع لج من البلوق الحين
خلج مع التكنولوجيا
:)

Anonymous said...

:$

its obvious that you don't need a macbook !

some of the best thing that macbook have is the battery life,, its the best.

also if you are a programmer or web designer ,, mac would help you alot :)

the bottom-line ,,
just give yourself some time to get use to it.

good luck

أهات عياش said...

اختي الكريمة كل فلس دفعتيه في الماك بوك ذهب في مكانه وانتي لم تسيئي الاختيار ابدا من المعروف بانه لاتوجد مقارنة بين الماك واي جهاز اخر فشركة ابل شركة متطورة جدا ومنتجاتها قوية وفاخرة ونظام التشغيل لديهم في منتهى الثبات والتطور بس انتي بكرة لما تتعلمي عليه وتتعودي عليه سوف تدركين الفرق الكبير

أهات عياش said...

وكمان تقدري تنزلي على الماك ويندوز باستخدام برنامج
Bootcamp
الملحق مع الماك بوك وبالتالي بيكون عندك ويندوز متركب على جهاز ماك سريع جدا عالي المواصفا ت فاخر وشيك
الفرق بين الماك واي جهاز اخر كالفرق مابين النور والظلام لايستويان