هـل تغـني و إنـت تســـوق ؟

هل تغني و إنت تسوق ؟

سواء بصوت عالي أو واطي ؟ و هل تحس روحك أهبل و أنت تغني باندماج ؟

ســؤال علمـي أطــرحه عليكم بعد ان طرحته على زملائي بالعمل

طبعا إنت ما تحس روحك أهبل لأنك تغنـي بنص الشـارع لأ

ولو إنه قد يكـون سبب كــافي

تحس إنك أهبل لأن النـاس تعطيك نظرات من نوع

شعلامه هذا مجنون؟

يكلم روحه؟

شوف الأهبل مندمج و مغمض عينه

شوف الهبله تهز راسها

يــا ويلي المجنون يهز رقبته

أكثر شي ضحكني في إجابات زملاء الدوام أثنيــن

خالد: لا ما أغني .. أصفر .. هاهاهاها

عبدالله: لا يبا ما أغني .. أقصــد قصيـــد

:)

أبو محمد عـلى محور آخـر حسسني إني فيفي عبده لمـا رد علي و قــال

لا .. أعوذ بالله ثلاثا من اللي تقولينه .. انا أسمع الذكرالحكيم .. إذاعة القرآن

عظــــامي

بينما أنا منهمكة في العمل ..لا أريد أن أضيع أي جزء من الثانية

على برامج تسلية المراهقين .. من تويتر و فيس بوك و ام اس ان و غيره

و بينما كنت أنهي أحد التقارير الثرية اللتي أكتبها

و أردت أن أضع عليها صورة شعار الشركة حتى يتبارك التقرير

و بينما كنت أبحث في فولدر الصور

و جدت هذه الصورة الغريبة

و ما استوعبت وش هي

حتى أسعفتني ذاكرتي الغراء .. حيث عادت بي إلي يجي سنه وره

عندما سقطت و ما أدري شصار في يدي

المهم انتهينا بجبس لمدة ثلاثة أسابيع

و هذه أحبائي القراء .. صورة أشعة عظــام يدي الفقيره لله

مازلت أتذكر الدكتــور و أهو يقولي: إنتي من صجج ؟ طيحة نفس هذي تسوي فيج جذي ؟

عندكم عيش في بيتكم ؟

إنتي تاكلين ؟

طبعا كان يتكلم باستهزاء و يضحك بحكم ان الطيحه كانت بسيطه ومو من مكان مرتفع

هممم أخبي عليكم ليــه ؟؟ تقلبت على سريري المنخفض و اندمجت وانا أتقلب و خذت راحتي و خلص السرير علي فجأه و طحت

بس جذي .. طيحه بارده ما كان فيها أكشن

المهم

الدكتور كان يقول عظامي عـامله زي أعواد الأكل هذي اللي ياكلون فيها الصينيين

الجب ستيك

تشوب ستيك

إسمها سبه يا لطيف

يمـكن بحـكم إنك تـاكل فيها و تحـط الأكل داخل فاهـك و بالتــالي غصبا عليك تسكت فعشان جذي إسمـها

جب ستيك ؟

جـــايز

مــا علينا

المهم: أنا أتطنز على عظــامي كيفي .. ملوووتي .. اللي يتطنز فيكم يــاويله و يا ســواد فجره و ظهره و عصره و ليله

وبعد: ايش رايكم في كــلمة فــاهك ؟

أسألـــكم الـــدعـــاء

إدعـــولي قبــل أن أدعــي عليـــكم

هــا هــا هــا

هو أنــا أأدر؟

عـن جــد أسـألكــم الدعــاء

و إللي مـا يعـرف يـدعي يوديني أسبــانيــا أعــالج علــى حسـابه

أو يشتري لي بنتلي لأن حزتها أكيــد بطيب

بســنا غشمـــره

آنــا عن جـــد تعبــت

:(

كمــاشه

بينما تغرد العصافير بالقرب من شباك غرفتي .. و تدق أشعة الشمس باب حوشنا .. يعني إستكــانه

أنهض من سبات نومي .. بكل حيوية و نشاط .. يسبقها حبي للعمل .. أخاف بس

ألبس ملابسي .. و أهرول ناحية سيارتي البنتلي القابعه أمام باب بيتنا .. يارب يجي هاليوم و ترزقني بنتلي يـــــــــارب

أسوق سيارتي بكل هدوء .. فالشوارع هادئه خاليه .. الا من بعض السناجب و الفراشات .. خيال كويتي

أصل المكتب .. و الإبتسامة تملىء و جهي .. كلي حماس للعمل .. طـــل

و بينما أنا منهمكه بين الأوراق و الأقلام .. يدخل علي أقدم موظف عندنا بالشركه .. أيام التعيين من غير شهادات

يدرعم على وجهه من غير لا احم و لا دستور ..مستعجل و يركض كعادته

شووووش شووووش

هلا والله بو فالح آمر

عطيني كماشه ؟

ها ؟ اش كماشته ؟؟ شنو هذي ؟؟

يوووه يا شوووش بسرعه كماشه كماشه

لوهلة حسيت اني اشتغل بقراج /كراج تصليح السيارات .. اهو منخش تحت السياره يصلح و أنا أناوله العده

شنو كماشه هذي ما أعرفها !!!؟

و بينما عيونه تتلاقط على سطح مكتبي يمين و يسار يدور المدعوه كمـــاشه .. بدأت أنا أعطيه و أوريه كل شي عندي

علي ألقى الكماشه اللي يدورها

ما ظلت دباسه .. ولا قلم .. ولا مسطره .. ولا دبوس و كان كل مره يقوول

لا يا شوووش لاااا .. كمااااااشه الله يصلحك كمـــاشه

بديت أتنرفز .. قلت له خلاص ما عندي .. كل شي أوريك تقول لي لأ .. هذي كمــاشه مالتك شيسوون فيها ؟

شوووش كماشه هذي اللي يشلعون فيها الضروس

نعم !! ضروس ؟ لا حول ولا قوة إلا بالله .. مساع عده و سيارات وألحين ضروس و تشلع؟

اي شوووش الي نشلع فيها الأسنان .. مالت الورق .. شسمهم .. الدبابيس

لما قال دبابيس بغيت أقتل روحي

لك ساعه محيرني مره كماشه .. مره تقول ضروس و مره أسنان

طلع يبي هذي .. حسبي الله عليها .. أزمتني

الله يصلحك با ابو فالح

الا انتوا شتسمونها ؟؟ لا يكون كماشه بعد ؟

فـــزت ب كــاديلاك

حتى الآن آنا فايزه يجي بـ ستعش كاديلاك و عشرة بي أم دبليو

ما تعـدل حظي الا مع السيد ديــوك

قبل لا تقـرى الإيميل ضروري تـاخذ لك عشــر دقـايق ترتب فيـها الكلمـات و الجمــل

طبعا الحـراسة الخـامس هذي أكيد فئة الكـاديلاك إلي ربحتها

و تـعزيز منسـق ما يبيله .. أكيد شعارهم

الفــال لــــكم إنشــاءاللــه

كيـــف تعبــــرعـن حبــــك ؟

أتـــوقع أنــا من أكثــر النـــاس اللــي مـا يعــرفون يعبـــرون

فـأنــا اللهــــم يــا كـــافـي

إذا حبيتـــك .. هجـــمت علــيك

و كفـــختك و تليـــت شعـــرك و عضيـــت إيــدك

و عطيـــتك كلمتيـــن وقــلت لــك

يـــا أحمـــق أحبـــك

هــذي أنا في قمــة حبــى و هذا هــو منتهــى الصفــاء و الــروحانيــه عنـدي .. أبعــدكم اللــه عنهــا و كفــاكم شــرها

فضـــروري الآن

تــوريني .. و تعلمنــي

كيــف تعبــر عـن حبــك ؟

شوووش في معرض الكتاب

مســاء الخيــر

تغطية شوشية سريعة لمعرض الكتاب

طقس من طقوس الشوش ضروري تعرفونه

ما أروح المعرض الا أول يوم و الصبح

انا و اللي يفتتحون المعرض ندخل يميع

أخاف بس

اليوم أنا أصلا شهدت تفرقه عنصريه

صافطه عند مدخل قاعه خمسه

باب مشرع شكبره .. جيت بدخل ولا يقولي .. لأ لأ .. خشي من قاعة ستة

بيني و بين قاعة سته مشي عشر دقايق

ليش عاد سيبني أخش ؟

طبعا هذي أنا بالمصري .. شي عجيب

لا يا ستي ما ينفعش هنا الافتتاح

اخش بسرعه محدش يشوف

محدش ايه مش شايفه الناس دي كلها ؟

تركته و مشيت لي مدخل قاعه سته .. كان للجناح الكويتي و السعودي المساحه الأكبر

القطري دار نشر وحده و كانت هيئه عامه نسيت اسمها

الاماراتي ثنتين

العماني وحده و هم مؤسسه حكومية

كتب عن تاريخ الكويت و جغرافيتها و قبائلها و الأنساب

السعوديه مليانه كتب دينيه و سيرة و صحابة و كتب تطوير الذات المترجمه

تعلم كيف تصلح البانشي

كون صداقات في ثلاث أيام

كيف تصبح موظف بشوش

طبعا في عدد جيد من الهيئات العامه الي توزع منشورات مجانية

تالي عاد صالة خمسه

هذي فيها المصري و السوري و اللبناني و قليل من الأردني و التونسي و المغربي

الجناح اللبناني يليه السوري كانوا الأفضل بوجهة نظري

كتب صراحة متنوعة و قوية

كتب جغرافيه سياسية إقتصادية فلسفيه و مطبخيه و فنيه و شعريه و نكتيه و كل اللي بدك

كتب في الديانات و في الأساطير و في الخرافات و الخزعبلات و السحر و تربية الحصن و صنع الكب كيك

في سكشن للأطفال و سكشن لبرامج الكمبيوترات

و جاليري فنون تشكيلية

أنا شريت بما قيمته ستون دينار كويتي و سكر المعرض عالأخير

المعرض بصفه عامه حلو و قوي و منوع .. فيه كتب قيمة للي يبسط و يدور و يقلب الكتب و ينشف ريج اللي يبيع مثلي

أطلع قيمة الكتاب قبل لا آخذه

في الجناح اللبناني واحد شرح لي كتاب كنت مختارته ..بس للأمانه أنا ما قلت له اشرح .. اهو رز وجهه و شرح لي

آخر شي قلت له طيب كم الكتاب ؟

قالي أربعه وبعد الشرح سته

قلت أجل خله عندك

مادموزييييل ولو خدي بلااااااش إزا بدك

في مكتبه مصرية نسيت اسمها عالطرف .. عينه علي .. كل ما رمقت كتاب بنظره

جه يركض و مسكه .. بووصي حدرتك ده أحسن إصدار نزل سنة 2010 في الموضوع ده

كل كتبه أفضل .. ما عنده كتاب ثاني أفضل إصدار

يا ويل حالي

المهم .. ملاحظات شوشية

مازلت مو قادره أفهم الدوار اللي قدام قاعة سته .. كل معرض أقول لا هالمره بتعلم عليه

يا اخي مدري كيف صاير .. اليوم صرت وجه بوجه مع دوريه

لا ولما صار قدامي أأشر له بيدي إرجع ورى

يكون أهو داش غلط يعني

لوووول

زوالي المعرض هالسنه مو جديده .. ما كان في ريحة بتكس مثل آخر مره

و حاطين تحتها وايرات شكثر أتوقع للإضاءة .. أنصح الشابات ما يلبسون كعب عالي

أنصحكم تروحون المعرض جدا حلو

و طبعا اللي بالصورة مو أنا .. هذا أمير الحمالي الهندي

على فكرة .. أحذر من أي تعامل معاه .. هذا أنا حذرتكم

ما شال أكياسي إلا ساعة ولما جيت بعطيه دينارين ونص بغى يشوتني

زين ما خذه أكياسي و راح

يقولي ثاني ماما يعطي أنا خمسه سته شنو دينارين و نص

لا و هذا انا مشربته عصير و موكلته كتكات

والله قوي عين .. انا شريت لي بيبسي و أخذت له بطل ماي من كيفي

أخذ الماي مني و حقرني كلم الهندي اللي يبيع ورده و أخذ عصير

لا ومو عاجبته

يقولي أبي خمسه

المهم

كنت أدور كتب في المذاهب الإسلاميه غير السنية

يكون يعني أتكلم بصورة غير مباشرة

بس ما مداني ألقى شي .. راح أعاود زيارة المعرض السبت إنشالله

روحوا لا يطوفكم