Friday, August 27, 2010

الكويتيووون في الطابور



صاحب الشخصيه المرموقه و المعروفه: وهو عندنا إما سياسي معروف .. مطرب .. ممثل إلخ .. هذول بس يتعرف عليهم اللي واقف في الشباك و منظم الطابور .. على طول يبدى يهلي و يرحب و يسحبهم من الطابور ويفتح لهم البيبان. في حال ما تعرفوا عليه .. صاحب الشخصيه المرموقه إللي غالبا من الطبقه الألمعيه .. لا يتهاون أن يعرف عن نفسه علشان يفتك من النطره


صاحب الحظ السعيد: هذا غالبا على قد حاله و مو معروف .. بس من طالع حظه السعيد ان اللي بالشباك أو اللي صاف الدور عندهم يطلع يا رفيجه .. يا ولد عمه .. يا راضع مع أخوه .. يا ولد جيران بيت ولد خالته .. المهم .. يخلصه يخلصه وما ينطر بالطابور


صاحب اللسان الطويل و المفردات الصعبه: هذا بسبتين و صرختين ولويه لغويه بسيطه ينفتح له الطابور و اللي خلف الطابور


المعضل أبو جسم فله: هذا بس يشاوح بإيده و يخزك بعينه .. و يدعمك جنه ما يدري .. تتنازل عن دورك خوفا من إنه ياكلك


المستعبط: هذا يجي يوقف جدامك و ياخذ دورك جنه ما يدري .. وان قلت له ترى مكاني .. يقولك ببرود ينافس برودة جبال الألب: لا والله .. صج !! مادري .. سامحيني ما شفتج


العبقري: هذا بكل ثقه يوقف يمك و يخترع طابور جديد بجانب الطابور الأصلي و يجون ناس يصفون وراه


ما علينا


بخصوص زوارة خميس


آنا بعرف .. تسنيم الدينه .. ليش كله ترمش بعيونها .. بالثانيه تسعين رمشه !! تكفى يعني شنو ؟؟ حياء مثلا ؟؟


و بعدين أول رمضان زوج بثينه حط عينه على مرت أخوها و وداها شقه و قلنا ماشي


نص رمضان سعود حط عينه على مرت رفيجه اللي مات و تزوجها بالسر و قلنا أوكي


ملا أحمد عايش له غراميات طول الليل بالرازي و طوفنا


ألحين طلع ثنيان حاط عينه على أخت زجته


شي عجيب


هذا غير البنات المفاصيخ اللي مستانسين عليهم بو قتاده و بو نبيل ورازينهم بكل حلقه لسبب ومن دون سبب


ألحيـــــــــــن


كل هالمسخره و الحوارات السخيفه اللي بالمسلسلات هديتوها و ناشبتوا حليـــــمه؟


:)

19 comments:

Frankom said...

بعد اربع سنين من الحين هبة حمادة بتكون قناة فضائية تعرض عليها مسلسلاتها والتاريخ يعيد نفسه مثل ماصار مع فجر السعيد

تصوير ان الكويتيين والكويتيات على انهم بهالمستوى يطرح سؤالين لا ثالث لهما

هبة حمادة يا انها عاشت هذه القصة الواقعية مع أهلها

أو انها اخترعت هذه القصة من وحي اباطها عفوا خيالها ... والاحتمال الثالث اللي اصلا عمره مايصير انها شافت هالقصة فعلا بالكويت

الحين نأتي الى الاحتمال الثالث واهو الاقوى

كم بين بالكويت فيه مثل هالقصة ؟

بيت ؟ بيتين ؟ عشر ؟

الكويت فيها مليون بيت كويتي ليش التركيز على بيت واحد ؟




حليمة خذت حصتها (السوقية) من المدونين والمتديات ... والبقية تأتي

أنا أقول صفوا يالدور

أو وكما جار في رواية أخرى

صفوا بالطابور

بومريوم said...

الله لا يحطنى باصنصير واحد مع ثنيان....شكلة ما يعتق احد

iliveinq8 said...

والله انا مو حارني الا ان مافي احترام لشهر الله الفضيل!!!!.. كاتبه معقده نفسيًا ومريضه كل مسلسلاتها الرياييل يخونون والريايل معقدين والرياييل بدون مسؤوليه... كل مسلسلاتها بهذه الطريقه..

اتفق مع فرانكوم بخصوص القناة الفضائية حالها حال فجر السعيد ... والاحتمال الثاني .. نهايتها مشتشفى الطب النفسي... واعتقد هذا الأقرب

كلي رجاء ان القائمين على هذه البرامج يخافون الله ويحترمون شهر رمضان اللي انزل فيه القرآن هدى للناس!! هدى مو خراب بيوت....

تخيلوا بناتنا اللي اعمارهم ٨ الى ١٥ سنه اللي يتابعون المسلسل....
شنو الانطباع اللي يصير....
شنو درس الحياة اللي بتاخذه...

والله هذا خراب بيوت

وحليمه دميه بتصير قديمه وترمى مثل ما ترمى الباربي مقطوعة الراس بعد ما انمصعت من الطفله او اخوان الطفله.. الله يهدي حليمة وزوج حليمه

اشكر موضوعك اختي شوش

Anonymous said...

الغريب ليش كل هالبلاوي ماتطلع إلا في رمضان
تسلية صيام,مثلا؟

SHOOSH said...

مساء الخير يا حلوين

إنتوا ملاحظين إن بوستي عنوانه


*الكويتيووون في الطابور*

وإني عصرت مخي أكتب لكم البوست

و كلكم هديتوه

و علقتوا عالكلمتين اللي كاتبتهم عن زوارة خميس

ركزوا يا جماعه ركزوا

:)

Unknown said...

انزين بخصوص الطابور شمعنة بس تكلمتي عن الرياييل بالطابور و ما جبتي طاري البنات
و على طاري المسلسلاتصكوا على الأفلام الهندية
يعني مايصير المسلسل حلو الا اذا طلعوا كل الرياييل فيه خونة او حرامية شالعنصرية يعني و هذا غير الي يشنطحون من غير سبب
و كل هذا بكوم و بوقتادة و بونبيل بكوم مادري شفيهم هالسنه فاصخين الحيا كلش
مشكوورة على البووست و كاني كتب اول تعليق حقي علشان ما تزعلين =P

~أم حرّوبي~ said...

ههههههههه اي والله صدقتي بس عجبني المستعبط صراحة فلة ..يعرف يمشي أموره بس خوفي يطيح على حد ملسون شو يفكه منه هذرته بعدين خخخ

والمسلسل بصراحة كل واحد يعرف وحده من ورا مرته ..حتى الدين على قولتج

بس أقولج اسمها شاهه ولا بثينة ؟؟؟

هالسنة الحوار يعيد نفسه بكل مشهد
نفس الجملة تنعاد ..اوكي فهمنا وبعدين ؟؟

يعطيج العافيه ^^

Safeed said...

وفي "المتحفز" .. ينطر لحظة الفراغ بين
اللي توه خلص .. وبين تقدم اللي وراه بالطابور
ويهجم على الشباك

ويا كثرهم بصيدليات الحكومة
:)

---

حاسدين الفقير على موتت الجمعة
:)

f7ee7eely said...

بومريووم

لوووووووووووووووووول

le Koweit said...

لوووول
اي والله صاجة
:)

Shelsalfa? said...

بالنسبه حق سالفه الطابور, انا توني منزله بوست على نفس السالفه و دشت علينا صاحبه الشخصيه المرموقة =p


و بالنسبه لزواره خميس, قاهرتني ام خالد هذي !

ساره النومس said...

انا الي باط جبدي زوارة خميس


لوووول شنو يعني بورون العالم ان الاسرة الكويتية منحطة وفاسدة وكلها زنا مثلا ؟؟

Sami said...

ـ زوارة خميس ...اسفاف

YusuF.AsKR said...

:)
أكثر اللي من مستفيد من الطابور إهو أنتوا يالحريم مع هذا هم تتحلطمون

أنا أعتبر نفسي من صنف المستعبط
:))

مسلسل زوارة خميس دياثه وقلة أدب والبيت الكويتي أشرف وأطهر من هيك قصص ومسلسلات

لازلت عند رأي بأن حليمه بولند نجمة رمضان بدون منازع (: ويكفي انها تطلع بالثلث الاخير من الليل

:)

الوتيــــــــــن said...

ههههههه للأبد الحريم ماراح يعتقون حليمه مع انها خفت عن قبل وصارت خوش وحده بس ستل .. بس الظاهر صارت عاده

هالمسلسل احس لحق ماتلحق .. حاطين كل الشخصيات اللي ممكن اتيي على بالج فيه ... وثنيان ويه العنزه ام خالد غاثيني

اقصوصه said...

رمضان كريم

مبارك عليكم الشهر

وكل عام وانتم بخير :)

Unknown said...

انا مع الوتين يعني كل هالقصص بعايلة وحدة و كل الابطال يتزوجون ثانية ما ادري احسها مو قصة واقعيه و كل شي اتقبلها الا الاعجاب المتبادل بين ثنيان و اخت زوجته موزة

و بالاخير المسلسل يشوق انك تشوف نهايته :)

Maram said...

ـ زوارة خميس ...اسفاف
و حليمه بلوه من بلاوي الاعلام الفاشل

Anonymous said...

فجر السعيد = طراقات وتكفّخ
هبة حمادة = خيانات ونفاق