Sunday, August 8, 2010

في الجمعيـــة



أربع صبيان قاعدين بره عند مدخل الجمعيه على الدرج لابسين دشاديش و يشربون بيبسي و ياكلون كتكات .. واحد منهم ماسك عصاية و يرسم أحلامه على الأرض


صبيان أثنين أعمارهم تسع و ثمن سنين يدزون عربانات فاضيه بسرعه قاتله في الممرات و ياخذون لفات كبيره على غفله .. يا يدوسون على عباية وحده .. يا يدعمون مطوع من ورى


حجية تقلب بالأغراض و تسأل .. وين العرووض ؟؟؟ ماكو عروووض ؟؟ ماكو شوربه مع قلاصات ؟؟ حليب مع صحون ؟؟ ماي مع كرتون بيبسي هدية ؟؟ طيح الله حظكم من جمعية


سايق هندي ماسك ورقه محتاس فيها كل شوي موقف أحد يقوله: بابا هذا شنو ؟؟ ماما ممكن يشوف مدام شنو يبي ؟؟ آنا مادري ليش مدامته كاتبه لستتها بالعربي و هو ما يعرف يقرى !! تتوقعون كاتبه اللسته لنا ؟؟


خدامه كاسره بيض عالأرض .. مو آنا مداام !! واللهي مو آنا !! هادا كلووودي


واحد أخذ بطل ماي و شرب نصه و رد حذفه بالثلاجه جنه محد شاف


الحجيه اللي مساع مسويه لويه .. هالمره تصارخ و تنادي تبي أحد ينزل لها كرتون دياي


نفس الحجيه لما توصل عند الكاشير بتحاسب .. يمااا بس يوصل حسابي ثلاثين دينار وقف


عين الحجيه على الهندي اللي يحط أغراضها بالجياس ..شوي شوي .. ديربالك .. صابون بروح أكل بروح .. حط في العربانه جياس زياده حق البيت .. يحط لها ما يعجبها .. تقوم و تخمط هي زياده


واحد ملقوف ينقز بويه الحجيه .. حجيه عندج رقم ؟؟ إذا ما عندج أعطيج رقمي طقيه


إنت من صجك ؟؟؟ إنت لو شايفها و هي تدور العروض تتأكد إنها مستحيل تشتري حتى علج بو سهم من جمعية مو مساهمه فيها


خدامه اندونيسيه تدز عربانه إرتفاع الأغراض فيها متر و تسعين .. كل ما بغت تلف فتحت رجلها زاويه منفرجه و طيحت 3 أرباع الأغراض عالأرض و قعدت تلملم


واحد عربانته متروسه وصاف دور جدام الكاشير .. توه وصل دوره جان ينط واحد جدامه .. ما عليه أحاسب قبلك ؟؟ قوطي زقاير بس ؟؟ تفضل .. خلص بو زقاير نطت له وحده .. ولي يعافيك ما عندي الا قوطي هالحليب .. يصير أحاسب قبلك ؟؟ تفضلي .. خلصت أم حليب .. نط له واحد ثالث و لي يعافيك بطل فيمتو بس ؟؟ أووف إنتوا صج ما تنعطون وجه! ما يسوى علي عربانتي المتروسه !! الجمعيه كلها حاسبت قبلي


واحد و زوجته يحاسبون .. هي تشيل الأغراض من العربانه و تحطهم على حزام الكاشير و هو وراها يشيل من العربانه و يطلع اللي ما يعجبه و يحذفه على ثلاجة البيبسي اللي يمه .. ما تحبونه .. ما تاكلونه .. أمس يايب منه


جهاز كي نت واحد يفتر بين عشر كاشيرات .. وانطر دورك عاد .. لو ساحب فلوس أشرف لك


وحده كاشخه آخر كشخه و تتكلم بالتلفون .. و وراها واحد كاشخ آخر كشخه و يسولف بالتلفون .. طبعا أكيد الأثنين ما يحاجون بعض .. على قولة مريومه اللي بالفيسبوك .. شخباري بالجمعيه !! وااااي هلاااااكه

19 comments:

le Koweit said...

واحد و زوجته يحاسبون .. هي تشيل الأغراض من العربانه و تحطهم على حزام الكاشير و هو وراها يشيل من العربانه و يطلع اللي ما يعجبه و يحذفه على ثلاجة البيبسي اللي يمه .. ما تحبونه .. ما تاكلونه .. أمس يايب منه



^^^^^^^^^^


هههههههههههههههههههههههههههههههههههههه
لا لا بس مت من الضحك هههههههههههههه

الله يعطيج العافية شووش
وسعتي صدري على هالبوست الحلو :)

DK said...

Love your post :*

you made my day like always hhehee

Sami said...

مريومه ...صاجه

why me said...

وحده كاشخه آخر كشخه و تتكلم بالتلفون .. و وراها واحد كاشخ آخر كشخه و يسولف بالتلفون .. طبعا أكيد الأثنين ما يحاجون بعض


===


LOOOOOOOOOOOOOOOOOL



حسبي الله على ابليسج


ضحكت من قلب


مبارك عليج الشهر
:)



نبي شوش في رمضان
;p

Ra-1 said...

بسم الله هذا وين
:p

الدســتور said...

هالسوالف بأي جمعية عشان اروح

SHOOSH said...

أصبحنا و أصبح الملك لله

لااااا إله إلا الللللله

محمدون رسووول الله

:)

le koweit
==========

يعافيك و يخليك يبا

الحلو ذوقك

SHOOSH said...

Dk
==

thanks a million for the nice words

glad u love my posts :)

SHOOSH said...

Sami
====

بس مريومه اللي صاجه ؟؟؟


و طايحة الحظ اللي كاتبه البوست مالها أي نوع من أنواع الإطراء ؟؟


سامي ؟؟

إنت محروم من الميراس

SHOOSH said...

Why me
======

إنت من صجج ؟؟


في شوش قبل رمضان


شوش في رمضان

شوش في العشر الاواخر

و

شوش في العيد

:)

SHOOSH said...

Ra-1
====

في الجمعيه

:)

SHOOSH said...

الدستور
=======


في جمعيتنـــا


اي اي جمعيتنـــا


مالت أبوووي


:)

عين بغزي said...

جهاز كي نت واحد يفتر بين عشر كاشيرات .. وانطر دورك عاد .. لو ساحب فلوس أشرف لك



صارت معاي ومن يومها كرهت ادش الجمعية و مو معاي كاش :)

Noor said...

حجية تقلب بالأغراض و تسأل .. وين العرووض ؟؟؟ ماكو عروووض ؟؟ ماكو شوربه مع قلاصات ؟؟ حليب مع صحون ؟؟ ماي مع كرتون بيبسي هدية ؟؟ طيح الله حظكم من جمعية
----------
هههههههه عجيبة العييز اهم شي انها خامة الاولي و التالي و فوقهم طيح الله حظكم :)

Engineer A said...

LOL


انتي مو صج ههههههههه

بوست عجيب :)) وترى صوغتج موجوده وين ايبها لج؟
;p

الزين said...

شوووش

اي جمعية رايحة انتي

صاجه مريوم
كلهم هلااااكه

هديــل said...

هههههههههههههههههه

الله يرج عدوينج :)

صاجة والله

صح لسانج

=)

فرَح said...

هههههههههههههههه الله يونسج مثل ما ضحكتيني

وااي حبيت الحجية :P

مريم الملا said...

واااي لأ...الله يونسج بالعافية..ضحكتيني