Sunday, August 1, 2010

من ذكــرى غزو



هذه مجموعه صغيره من كلمات كثيره


تمر على بالي


بس أحد يذكر أو يطري الغزو جدامي


بعيدا عن تلك الكلمات


في خاطري أسألكم سؤال


ودي أسأل


الصامد فيكم .. ليش صمد ؟؟ ليش قرر إنه يبقى بالكويت ؟؟


و اللي طلع فيكم ؟؟ ليش طلع و ترك الكويت ؟؟


و لو الله لا يقـــــــول .. انعاد هالسيناريو أو صار سيناريو شبيه


إنت يالصامد .. راح تصمد هالمره بعد ولا بتطلع ؟؟


و إنت ياللي طلعت ؟؟ بتطلع بعد ولا بتغير رايك هالمره و بتتمسك بأرضك ؟؟


تتوقع قرارك اللي خذيته أو اللي راح تاخذه


هو تصوير لــ وطنيتك ؟؟


أم للوطنيـــه .. معنى آخــر ؟؟

12 comments:

le Koweit said...

انا وقت الغزو كان عمري سنة وحدة
فعشان اكون صريح معاج ما اقدر اقولج شنو كان شعوري وقتها
لوووووول

بس انا اهلي كانوا مسافرين اساسا قبل الغزو
وصار الغزو واهم برا فما قدروا يرجعون الا بعد التحرير

لكن انا عن نفسي ....
ما راح اقول لو يتكرر السيناريو لانه انشالله ما راح يتكرر
بقول لو ترجع ايام الغزو
واكون انا بهالسن وقتها
ما اتوقع اني بطلع من الديرة :)


والله يحفظ ديرتنا

مَـــــعْــــمَــــعَـــــه said...

بذاك الوقت ما كنا نقدر ناخذ قرار و بالاحرى القرار ما كان بيدنا بحكم السن

والله لا يعيد ذيج الايام بس ان ردت من المستحيل نطلع عن الكويت وتستحق التضحيه المسأله مو وطنية ولا وعاطفيه بس تستاهل الكويت رد الجميل

فيلسوف said...

اللهم احفظ الكويت واهلها من كل شر

يوم لن ننساه ابدا

مهما حاولوا ان يزيفوا الحقائق

الوتيــــــــــن said...

آنا كنت صامدة بس أقل من شهر بالغزو .. أبوي طلعنا من الكويت لأن هالوقت كان عطلة .. وأمي كانت مسافرة ديرة واحنا وابوي ديرة .. وللأسف ردينا قبل أمي .. ماهدالها بال ليمن شافتنه كان عمري وقتها 7 سنين

اخواني هم كانوا صغار .. بعدني أذكر لمن أخوي يه البيت منكسر بأول أيام الغزو وقال حق أبوي أنهم مارضوا يسجلونه مع المقاوة لأنه صغير ..وبعدني اذكر أبوي الله يرحمه الي كان بالنسبة لي رمز كبرياء .. بجى عند عتبة باب بيتنه مثل ياهل مضيع أهله .. صج الكل انكسر من هالصدمة بس الحمد لله الكويت ردت

عاد ندش للموضوع .. ليش طلعنا او انحشنا .. كان الامر مو بيدنا كنا صغار وابوي خاف يكون سبب في هلاكنا وبيده يطلعنا

ولو لا سمح الله ينعاد الزمن .. ماكنت راح أطلع

تدرين ليش؟

لأني مالقيت كرامتي غير بديرتي .. صج إنا لمن رحنا السعودية عاملونا زين .. بس كان ضغط نفسي لمن نكون برة الديرة وكأطفال الاسئلة من الغير كثرت .. وصرنه في حيره ..

كنت أفكر وقتها لو لا سمح الله راحت الكويت شلون راح أعيش بدون وطن؟

كانوا يعيبون علينا " ياللاجئين" وكان أمر شي على قلبي والشي اللي خلاني أضرب عن المدرسة هناك اني لمن كنت اوقف بالطابور ويحيون علمهم أقعد أبجي وأقول للأبلة ما أعرف غير وطني الكويت .. كنت أكسر خاطرها

ولمن ييت بعد الغزو كنت اسمع سوالف بنات خالاتي عن شلون عاشوا بالغزو كنت أقول لهم تدرون ياحظكم؟ لأني تعذبت أكثر منكم وآنا بره .. وانذليت ونفسيتي ميته وآنا حيه


لأ كنت راح أقعد .. وراح أقعد عيالي لو عندي .. يموتون في أرضهم أشرفلهم

صدقيني هالإجابة راح تلاقينها عند كل كويتي طلع أيام الأزمة

وكنت اهني تفيد الانتهاء يارب لا يعودها أيام ويحفظ الكويت .. يارب

Anonymous said...

مثل ما قالوا اللي قبلي انا كنت وايد صغيرة
ما كان القرار راجعلي
ابوي طلعناو رجع اهو لأن ما كان فينا احد كبير أختي أكبر وحده كان عمرها 11 سنة
اذكر ان احنا سكنا في منطقة قريبة من الكويت و يت فترة صدام قصف السعودية فكانوا يقولولنا ييتوا و يبتوا صواريخكم وياكم :s
لو صارت مرة ثانية الله لا يقوله اكييد اقعد و ما اخليها الله يحفظها

SHOOSH said...

يا مرحبا يا مرحبا

آنا هم نفسكم .. عمري كان صغير و قراري مو بيدي


أمي كانت مسافره مع وحده من خواتي


انا و أبوي الله يحفظه و باجي خواتي و إخواني كنا بالديره


وحده من خواتي كان عمرها 4 سنين


قعدنا بالكويت تقريبا 4 أشهر


طلعنا آخر احدعش


إختي الصغيره كانت ميته من الشوق على أمي .. و أبوي تعذب فبنا و توهق معانا ليش كلنا كنا فوق بعض تقربا بالأعمار



شهر إحدعش طلعنا .. و صلنا الوالد و واحد من ربعه الى حدود قطر



ليش ان سياره وحده ما شالتنا حنا و اغراضنا



استلمونا من قطر جماعه لنا هناك



و الوالد نزلنا عندهم و رد دش الكويت اهو و صاحبه مره ثانيه


شلون و ليش رد دش مادري


و الله لا يعودها من ايام


كانت مؤلمة

Safeed said...

صامد .. ليش؟
لأن والدي الله يرحمه قرر الصمود .. ولأن عمي اللي كان ساكن عندنا قرر ان يكون من قوة 25 فبراير
نسيتي تكتبين
رمانة = قنبلة يدوية
:)

N.Rhythm said...

يدتي ترد على سؤالج لو ينعاد الوقت
ما نطلع من الديره
وبنتم فيها
كافي إنا بديرتنا
كافي إنا نتنفس هواها
وببيوتنا وعارفين جيرانا
عارفين بحرها وبرها
عارفين كل شيره فيها
وكل طوفه وكل شارع وكل عكرف لف

آنا توني كنت ببطن أمي يوم صار الغزو
أهلي تموا شهر وطلعوا
وأبوي يقول مهما صار وبيصير إحنا قاعدين بالكويت
:)

عين بغزي said...

رائع

q8y_saint said...

قوه
و الله لا يعيد ذيج الايام
بس لاسمح الله و انعادت
ما اتوقع راح يتغير رايي وراح اظل قاعد
-
-
-
-
-
بالغزو كان عمري 16
و بحكم العمر فالقرار ماكان بيدي حتى اوخر نوفمبر اذا ما خانتني الذاكره


لما يه اخوي البجر و اعلن انه راح يطلع اهو وعياله ولي يبي يطلع منا احنا اخوانه حياه الله وياه
بحكم ان ابوي الله يطول بعمره كان رافض فكرة الخروج من الكويت جمله و تفصيلا
وهنيه صرنا بين حانا و مانا

موقف البوي الرافض الخروج قطعيا و موقف اخوي

يومها ابوي قال كلمه مستحيل انساها

قال الله يطول بعمره

هذي ارضي و ارض ابوي و يدي تحملو الفقر فيها و التعب و عقب ما كانت بر و يال صارت ديره و عمار ايي انا ابيعها و انحاش عشان عراقي
لا ماهمني العراقي مثل ما نولدت فيها ما اموت ان شاء الله غير فيها
و اذا وقت العازه ماتلاقيني شفايدتي كويتي
و كمل الله يطول بعمره
الي يبي يطلع فيكم يطلع
بس لا ولدي ولا اعرفه
ولما ينطرد العراقي وترجع الديره لا ايني ولا يواريني ويه.
انتهى كلام ابوي
و محد طلع منا و حتى اخوي لغى الفكره من راسه
صدقيني وقتها قلت ابوي مال شعارات
بحكم عمري
بس الحين فهمت معنى المواطنه و معنى الولاء
فإجابه على سؤالج
لا ماراح اطلع لانها ارضي و ارض ابوي ويدي
وبس طولت عليكم اسف على الازعاج

رورو الشخبوطه said...

هم انا كنت صغيره وصامده مع اهلي واموت بديرتي ولا انذل برا..

والله يحفظ الكوي يارب ولا يكرر اللي صار..

مشكوره..

basees@bloggspot.com said...

كلهم روائع، وعجبني بالخصوص لوحة الواحد والوحدة. بس عندي سؤال

ليش معصقلين جذي؟