Monday, July 26, 2010

شوووش في المكتب


لظروف خارجة عن إرادتي .. و لضروريات العمل .. تم إنتدابي للعمل في شركة غير الشركة اللي اعمل فيها أساسا لفتره محدده


شغلتي الأساسية بعيدة كل البعد عن التعامل مع الجمهور


فتعاملي محصور بيني و بين اقلامي الرصاص و مساحاتي و مساطري .. مسؤولي في العمل .. خالد زميلي في المكتب و التي بوي


غير هذا .. ما أشوف


بينما الشغلة اللي انتدبت علشان أسويها .. فأساسها التعامل مع جمهور موظفي تلك الشركة .. إللي أقدر أعتبرهم في هذي الحالة عملاء أو كوستمرز


فكان هذا الإنتداب حبيبي القاريء بمثابة الكف


نعم .. كأنه احد صافقني كف بقوة تسعة على مقياس ريختر


أشكال و أرناق من الناس مرت علي ما أضن بتمر علي مره ثانية


ما قصروا


عطوني كورسات في البابلك ريليشنز .. الأنقر مانجمنت .. و حتى الطب البديل


إليكم ما يلي


الإنسان السعيد


و عادة ما يجي أول الصبح .. كله حماس و نشاط و مشيته بالغالب سريعه .. الإبتسامه من هوون ل هونييييك


يدخل بثلاث سلامات


السلام عليكم .. مرحبا .. صباح الخير


يطلع بثلاث سلامات


مع السلامه .. يعطيج العافية ما قصرتي .. قواج الله


وايد سريع و وايد سعيد و وايد مندفع .. من كثر إندفاعه أحسه وده يلقفني من كرسيي و يقعد مكاني


الإنسان العاطفي


أو اللي على حظي يكون هرمون العاطفه عنده طاق السقف


يحدثني قائلا


شنو يا قلبي ؟؟


وين أوقع أبووووي إنتي


مشكوووورة حبيبتي


تخيلوا .. قال لي حبيبتي


اول مرة إنقالت لي هالكلمة عصبت و وقفت و بغيت أطقه بالدباسة .. جنه سابني


ثاني مره قالها واحد آخر بينما كنت آنا منزله راسي أخلص الأوراق .. بس سمعت طيف كلمة حبيبتي مر .. جان أرفع له عيني اليمين و حاجبي اليسار و عطيته نظره خارقه شقت هدومه .. متبوعه ب أووووووف


ثالث مره عاد لاااا .. الوضع تغير .. قمت أتقبل هالنوع من الكلمات بصدر رحب .. و رووح رياضية و قد أكافئه و أعطيه إبتسامه او إثنتين .. و ما اخفي عليكم إني قمت أتضايق لما ما أسمع كلام طيب


الإنسان العصبي


عادة ما يكون كبير بالسن و مغتر و متين


الموظف اللي جدامي حبيبي القاريء كبر أبوي .. إذا مو كبر أبوي كبر جدي


طبعا آنا أناديه أقوله أخوي و بخاطري أقوله أبوي العود


شوش: إسمك مو موجود


هو: نعم !!!! شنو إسمي مو موجود ؟؟ دوري بس مره ثانيه ولي يعافيج


طبعا يحاجيني و أهو يأشر و يحرك شواربه بطريقه غريبه .. يعني أهو يتكلم و نظره رايح يسار لكن شواربه يتحركون يمين


أهو يتكلم عن اوراقه و آنا مركزه بشواربه .. كأن الشارب مخلوق منفصل عن جسمه


يا ماما .. كان فلم رعب


المهم


شوش: ماكو



هو: إنتي مداج تدورين ؟؟ طقطقتي بهاللي جدامج و قلتي مو موجود !! آنا موظف من قبل لا إنتي تنولدين .. جاية إنتي البزر ألحين تقوليلي إسمك مو موجود ؟؟


شوش: آنا بزر ؟؟ الله يسامحك بس هم ماكو


هو: وين مديرج ؟؟؟ لا باااراااك اللله فيكم من ...... حاطين بزران يتدربون على حسابنا


الإنسان الثلج .. السلو مووشين


عاد هذا نوع من انواع الأوادم إللي ما أصبر عليه .. عادي أقوله شغلك مو عندي عشان أفتك منه .. أسوي روحي ما شفته .. عادي


فلم سلوو موووشين


الجملة يبيلها ساعه و و نص علشان تطلع .. و يحرك جسمه كأنه يرقص بريك دانس و آنا طبعي حار .. ما فيني صبر


هو: سلاااام عليييكم


يفصخ نظارته بالبطيىء .. ينزلها و يسكرها .. يطلع قوطي النظاره .. يفتح القوطي .. يصفط قطعة الخام الصغيرة مالت النظاره .. يحط النظاره داخل .. يسكر القوطي .. يحط القوطي على الطاولة


و آنا ما غير متنحه بوجهه أنطر الأخ يخلص


و يقعد عالكرسي


أوووووووووف .. إنت من قالك إقعد و إستريح ؟؟ ألحين شيخلصني



هو: إختي آناااااااا


طبعا ال اااااا مالها نهاية


شوش: اي اي أدري .. عطني هويتك


أقاطعه جود نخلص و نفتك


هو: إختي هويتي بالويست بااااق بالسيارة تنترين أرووح أييبها ؟؟ دقيقه


أمبيه لأ .. ليش قلت له عطني الهوية


شوش: لا لا ما أنتر .. مابي هوية مو لازم .. يولي القانون .. تكفى بس خل نخلص


هو: إختي عندي إستفسااااااار


شوش: يرحم أمك لا تستفسر .. بعدين بعدين خلنا نخلص أوراقك


هو: إختي بنطول ؟؟ عشان ساااحبي ناترني بالسياره


نعم ؟؟ ألحين منو إللي مطولها على منو ؟؟


شوش: لا لا كانا خالصين .. وقع لي الورقة هذي لو سمحت


هو: إيييينشاااااااااالله


يرفع جمومه


يخز الورقه


يطق رقبته يمين


يردها يسار


يخز الأقلام


هو: همممممم


يختار قلم


يمد إيده


ياخذ قلم


يمسك القلم و الورقة


يرد إيده ورى



هو: هممممم لا لا أبي أزرق


يرد القلم الأسود


ياخذ أزرق



يفتح الغطى



هو: وااااي الغطا معلق


شوش: أووووف جيييب جيييب آنا أفجه .. تفضل


يوقع أول ورقه


هو: بااااااعد هذي ؟؟


شوش: اي اي كلهم


الحين عاد لوعة الجبد


يحط صبعه بحلجه


يترسه سعابيل


يحول صبعه إلى ختامه


يختم الورقه بصبعه .. تلزق الورقة أوتوماتيكي



وعلى هذا الحال ليما خلصت منه و افتكيت


طلع و خلصت منه


ما وعيت إلا هو راد


هو:وااي إختي تخيلي ؟؟ نسيت النداااره


الإنسان الراهي


هو: مرحبا أخيتي


شوش: هلا


هو : أخيتي .. يصير أدز المندوب يخلص اوراقي ؟؟


شوش: نعم ؟؟ ليش مندوب ؟؟ مقدم على فيزا ؟؟ لا ما يصير إنت تعال


هو: بس أخيتي تدرين عندي إجتماعات ومو قادر والله أحك راسي


عاد حكيت ولا ما حكيت .. آنا شكو


شوش: ما يصير .. لازم إنت تجي أخوي


هو: شوفي لي مني مناك أخيتي


شوش: ماكو



هو: أقول أخيتي ؟؟



شوش: هلا



هو: منو مديرج ؟؟



الإنسان المطوع



طبعا يحاجيني و أهو يطالع الطوفه



معطيني ظهره



طيب طالع الطوفه ما عندي مشكله



لكن حسك واطي و تتكلم و إنت تطالع الطوفه بالله شلون أفهم



لو مجابلني ممكن ممكن أشوف تعابير وجهك .. أقرى شفايفك أعرف شتبي



ساعدني يعني !! طبعا الحوار الجاي كله و هو يطالع الطوفه و معطيني ظهره



هو: إختي أهلي بإجازة أمومه و جاي أخلص شغلهم



شوش: أهلك منو ؟



هو: أهلي أهلي



شوش: إي منو يعني ؟؟



هو: المره



شوش: أخوي واللي يعافيك .. أبي إسم .. أهلي .. المره شلون أعرف آنا يعني



هو: إختي ما يجوز .. ما تشوفين الصالة متروسه موظفين كيف أقول الإسم ؟؟



منو مديرج جزاج الله خير ؟؟

30 comments:

يابختي said...

ههههههههههه

الانسان البارد على قولتج سلو موشين.. اشوف منه وايد يقهرني

احسه لما يتكلم ودي انام او اخلص انا الموضوع وارتاح

بس العجيب... المطوع

Tekana said...

واااي الله يعينج، صج الشغل اللي فيه تعامل مع المراجعين متعب ويبيلة سعة بال وصبر وقدرات خاصه ساعات. ، وتمر عليج نماين اشكال وارناق ، ميخالف محدش بياكلها بالساهل:p

Sami said...

loool الله يعينج

SHOOSH said...

يابختي
======

:)

نورتي

SHOOSH said...

Tekana
=======


شنو آكل حسره علي


ما راح آكل شي


:)

SHOOSH said...

Sami
====

يعين الجميع

:)

Hope said...

السلام عليكم

كسرتي خاطري
الله يعينج ع المراجعين
كل واحد و موده ..

الجودي said...

شووووووش

بدعتي

يا حليله المطوع ما يبي يقول اسم الأهل عندج و يسأل عن مديرج ما ترهم


صباح الورد

Mariam B.D_Q8 said...

لوووووووووول
الله يعينج خيتو بس صدقيني تغير من روتين المكتب كل يوم يمر عليج فلم يديد

هديــل said...

ههههههههههه ضحكتيني
خصوصا الباااارد والمطوع

يقهروني اللي يقولون اهلي :@

مشكووووورة =)

AuThoress said...

كلة بصووووب و أهلي / الاهل. !!

عندي وعندك خيراااات الله من هالاشكال .. اشوفهم على مرتين في السنة... خلال ايام عملي اليومي .. وخلال المعرض الدولي السنوي .. الله نماين .. انا اسميهم.. نماااين

why me said...

LOOOOOOOOOOOOL



لأ لأأ

مو صج الوضع اللي انتي فيه




طلع حالي انا أرحم منج




أتعامل مع نراهقين واللي إطولها واهي قصيره أجعمها على طووول


ماكو يمين يسار


:))



وصباح العسل يا عسل :*

SHOOSH said...

Hope
====

يعين الجميع إنشاءالله

لا الوضع أوكي

هذيل بس أغرب ما مرني

:)

SHOOSH said...

الجودي
=====


صباحك سكر


اي ما يبي يقول لي


:)

SHOOSH said...

Mariam B.D_Q8
==============

اي عادي

الوضع مو جدا سيء

:)

SHOOSH said...

هديل
=====

مشكووووره على إيش


:)


حياج الله

SHOOSH said...

AuThorees
===========

الحمدلالله إن ما عندنا معرض

جان مت


:)

SHOOSH said...

Why me
=======


ما غيرج عسل

:)

maram said...

ههههه الله يعييينج أنا بس قريت المواقف أنقهرت شلون أنتي اللي تعاملتي معاهم ؟
كل واحد ألعن من الثاني

يعطيج العافيه

AM.SA.CHANNEL said...

ههههههههههههههههههه

شو ها ما عندهم إلا وين مديرج .. و الله سير إشتكي شعليه منك

حبيبتي أوه آسفة شكلج تعقدتي من كلمة حبيبتي بسبت اللي قالج هالكلمة ههههههههه
بس أنا بنت مب ولد مافيه أنهزب بعد

بس دامنج ماشيه سيده فخلاص لا تحاتين .. أنا إشتغلت فترة جذي مع إنه كم من يوم بس لكن شو إكتشفت عجائب و غرائب و لا بعد كانوا بس حريم إذا الحريم جي الرياييل كيف ..

عادي تقبلي كل شي بس المشكلة و اللي ما يعيبني لازم تكونين بالذات و يالريايييل شوي حارة و لا بياخذ راحته

Queenalwazzan said...

لووووووووووول
والله الله يعطيج العاافيه مسكيينه

شوفي معاج بطلة رمايه
خليني اداوم يوم معاج انخش تحت المكتب متى ما يا واحد منهم ارمييه :P
لووووول

فيلسوف said...

عجبني تحليل الشخصيات
عاد ما مر عليج واحد 35 سنه
ويحسسك انه عمره مليون و ثلاثميه الف

كل ما قلتي له شي رد عليك ترا انا عمري 35 و عارف الدنيا عدل كل شي مر علي

اي درينا انه عمرك 35 مو مصدق
>>> تحسين شايل عليه

التعامل مع الناس شيء جميل
لكن هذا اذا اللي تعاملتي معاهم
(( ناس ))ء

panadool said...

التغيير زين
نوع من شحن الطاقه


والتعامل مع الناس
يبيله خبره وصبر وطولة بال

بالنهاية راح تصيرين خبيره نفسية بالخبره والممارسه
:)

تحياتى

t7l6m.com said...

صراحه بوست ولا كل البوستات
فتح قريحتي
أولا المتدين يقول الأهل وودك تقوله أي واحد فيهم بس تستحي
صراحه أول مره سمعتها من واحد معانا بالدوام (مسوي نفسه حجر)
مافهمتها
ثانيا وأخيرا حمدي ربك مراجعينج مابينهم عمال وقلاقه
كان البوست صار "وصف الروائح حسب الجنسيه" حق لوعة الكبد

فـ(المطيري)ـدكـ said...

loooooooool

الله يعينج .. قبل لا اكمل دراستي كانت حالتي من حالتج هههههه معااااانااااة بمعنى الكلمة ..

ماااااكنتوووش ..

قواج الله ^_^

alsyasya said...

هههههههههههههههههههههههههههههههه

امبي تصنيف المراجعين عندج مو طبيعي

صج يايبتهم ظبط لوووووووول

ولا الانسان البارد امبي لا انا بغيت انتحر وانا قاعده على الكرسي

الله يعينج ويوفقج ويعطيج الف عفية

الوتيــــــــــن said...

واااااااي شوش الله يعينج ..

صج صج .. عش رجبا ترلا عجبا

مايعطونكم عاد بدل تحمل؟

Safeed said...

معقولة ما مر عليكم الإنسان النكتة؟
اللي يختم كل جملة بنكتة مليقة على السريع .. يعني خفيف دم!

fatto said...

لوووووووووووول اقوى شي حوار الانسان الثلج والمطوع لوووول

f7ee7eely said...

البروووووووووووود يسببلي أعراض أقرب مالها الذبحه الصدرية ونوع من الغضب مايطفية إلا شقة الهدوم وإنبعاج بالمصران وإلتهاب بالقولون......