Monday, June 14, 2010

الكويتيووون في السينمــا


يقعد بالسينما كأنه قاعد بصالة بيتهم .. يسولف .. يتكلم تلفون .. يتسدح .. يتشردغ .. يتمردغ .. عادي جدا تلف وجهك يمين ولا رجل واحد بن *** فوق راسك


ياكل النفيش كأنه ياكل عيش مخلط مع حصى .. يضرب إيده بالخمس داخل البوكس .. ودوور فيها يالشمالي دور فيها .. و يحوس .. خوووش خوووش خوووش .. إلا المشهد خلص و ما سمعت شي من إزعاجه


طبعا أشكالهم و أهم داشين تقول رايحين كشته بالبر .. بيبسي .. نفيش .. ناتشوز .. هوت دوغ .. بيرير .. كلينكس .. أعواد .. عفسه عفسه .. ناقص بس مطاطير شاهي و قهوه


الفلم ما بقى عليه شي و يخلص و الناس للحينها تدش و تطلع


لازم لازم .. بل يكاد يكون ضروري .. أن يدوس أحد على رجلك وهو يحاول الوصول لكرسيه .. او وحده تلفحك بوجهك بجنطتها .. أو مره تغطيك بعباتها أو أن تتحول انت بالذات إلى مسند يقضبونك و أهم ماشين خوفا من التعثر لا سمح الله


شيين أثنين غالبا ما ياكلون عليك نص الشاشه .. شماغ اللي جدامك .. أو بف إللي قاعده يمه


بالرغم من التطور الكبير .. و الإنترنت .. و الأقمار الصناعية .. و الإنفتاح العالمي .. مازلت السينما و بلا منافس .. تعتبر المكان المفضل للمواعد .. حيث إنها وحدها وبلا منازع .. ظلمه .. الناس جاية تشوف فلم و ذيلي جايين يحبون .. شيفكك منهم عاد


المهم .. ما علينا من كل هذا


شرايكم بألمـــانيـــا أمس ؟؟


الألمـــاني مــا كان طبيــعي

22 comments:

Anonymous said...

انا مو من الكويت
لكن خلال زيارتي لدول الخليج ادخل السينمات
من بعد الظهر الى الساعة 4
لأنه احساسي الشانيلي مايتحمل الزحمة
وانا جاية اتفرج على فيلم واحد
مو اتابع الافلام اللي تصير حولي

والمشكلة
ماكو احسااااس
كانهم لحالهم وباجي امة محمد عاملين لهم ديليت

ترى اول مرة ادش واعلق
صاكتني الغلقة بالدوام
الله يعين بس
وشووووووووووش يابشر

why me said...

لووووول



عدل كلام عدل عدل




انزين



انا ابي




الكويتيووون في الافنيوو بليز

;p

الزين said...

كله صوب

والمواعد بصوب يا شوش

الله يانا سمعت سوالف هذاك اليوم

شاب شعر راسي منها

....

الدســتور said...

يابنت الحلال
التصرفات بكل مكان غير مقبولة
يعني عاجبج اللي قاعد يصير بالشارع
و لا عاجبج اللي قاعد يصير بأي طابور سواء مطعم أو معاملة

شعب يحتاج ألف دورة ليتعلم

Danderma said...

هذاك اليوم توالي الليل في الأفنيوز و الفيلم يخرع يخرع

إلا 2 من جنسية عربية يدشون بنص الفيلم و ريال و مره بو 35 40
و يقعدون يمنا

من قعدوا ما سمعنا شيء عقب إلا سوالفهم و يا بعض و الخشخشة مالت الناشوز و البوب كورن!!!!

كملها عليهم رضيع ما طلع من النفاس و يا امه ياي جدام بنبع في الفيلم لين قال بس

وااق وااق ويييق ووااااااا اااااااا وااااااااق

من كثر ما أزعج السينما في ريال و مرته طلعوا ملوا

و يوم طلعها مال السينما برة وقفت عند الباب و هالبيبي يفحط و اهي تبي تكمل تطالع تحلل سعر التذكرة العمة

إنزين مصاصة ماكو؟

عاد انا اشتكيت للسينما بالأيمايل.. انا لو سمحتوا وقفوا احد عند الباب إذا بيبي باللفة بيدش فيلم كبار ردوه و عطوه فلوسه يا ربي مالا معنى بيبي بالسينما

قالوا لا ما نقدر انقول حق الأوادم لا تيبيون يهال

بس تعرفون تقولون لا تيبون أكل من برة مو؟

الشرهه مو عليهم

الشرهه على اللي قاعد يروح سينمتهم

و لا رافعين اسعار التذاكر بعد

SHOOSH said...

NoNoChanel
===========

الكويت و لا مو الكويت

الناس اهي الناس

حياك الله

:)

SHOOSH said...

why me
======

بوست الافنيوز قديم

يااااه

طلعتي مو قاريته ؟؟

مخصوم عليج شهر

http://shooshness.blogspot.com/2010/02/blog-post_21.html

حطيته لج

SHOOSH said...

الزين
=====

ليش ما وديتيني معاج

تستاهلين

:)

SHOOSH said...

أبوالدستور
==========

البعض

:)

SHOOSH said...

Danderma
========

لووول

ىنا ما يلوع جبدي صج الا سياسة الاكل هذي

مره كان معاي بيبسي مو مفتوح جديد

قالي قطيه تكرمين بالزباله و دشي

:/

الجودي said...

شوش

ما يبتي طاري اليهال لما تقعد أمهم في سطر و حاجزت لهم ما شاء الله اهم و عيال خالاتهم و يهال جيرانهم في السطرين إلي فوق و يا بختج إذا كنتي في السطر الثالث بس يا بابا عيب خل اختك لا تطقها قعدوا عجال خل نشوف الفلم
و المشكله الفلم مو للأطفال
"
"
"
ومره كنت رايحه فلم كان فيه مشهد مؤثر و انا مندمجة حدي و إلا العايله إلي قاعدين يمنا وياهم يهال يا قلبي مو عارف شالسالفه حسباله الموقف يضحك و يضحك من كل قلبه اهو و اخوه يعني كانوا بعمر إلي ما يميزون هذول شنو سالفتهم ويا السينما بفهم بس قعدوهم بالبيت وشوفوا الفلم وياهم بالبيت وفكونا


مشكورة شوش على الموضوع أتوقع يوصلني برود كاست قريبا ;p

فيلسوف said...

حدي انغث من هذولي اللي يحسون انهم في صالة بيتهم على قولتك

يعني شويه احساس احنا جايين عشان نشوف الفيلم مو عشان نسمع سوالفك لا و المشكله يطول صوته بعد المسكين منزعج من صوت الفيلم

اتمنى تكون فيه بلاك لست في بعض السينمات عشان نروح لها مرتاحين و نقدر نتابع الفيلم على راحتنا

و نصيحه اخيره لشركة السينما الكويتيه
لما تشو ان الفيلم كله لقطات ما ودهم ينزلونها و يبون يقطعونها و تكون في عمق الفيلم و كل قصته
من الاول لا ينزلونه و يقصون علينا
في فيلم ما تفهم منه شي بسبب التقطيع

وسلم لي على السينما

ebreeq said...

مشكلة الشعب الكويتي

يكمن من وجهت نظري


في الخلط بين الوعي بالحقوق

وبين

الانانية

داش بفلوسي> دون معرفة ان الشيء هذا
ينتفعون منه الاخرين وايضا بفلوسهم

:)))

خلط في منظومة القيم


مودتي

Mariam B.D_Q8 said...

:)
انا ما يبط جبدي بالسينما اللا اللي يبون يهال اب فلم كبار ولا اللي ماتحلالهم السوالف اللا بالسينما
او شوفي لبس هذي او شوفي ويه هذا
بعرف ليش رايحين السينما من الاساس اي قعدو بالقهاوي الافنيوز او علقو على كيفكم
و المواعد بعد حدث ولا حرج او كلا مراهقين توهم صايدين الحركه ما يوعون الاا الليت عليهم ولي ما يشتري يتفرج


او بالنسبه المانيا
اقولج خيتو الكاس الماني

Crazy Girl in aGood Way said...

اول تعليق لي بالمدونه بس مو اول مرور .. انا متابعه من بعيييييد

هالبوست يبتيه رااايت .. خاصه الشماغ والبف

مااحب اكل بالسينما لاني مااسمع شي من صوت التقرمش لوووول

لوتشوفين الالمان شاقين الكشره والهرنات

ويبونها نجمه رابعه .. اتوقع لهم الكاس


ملاحظه:كويتيه متغربه في المانيا

تسلم الايادي على البوست

جبريت said...

فكي عمرج واخذي لج تذكره بالفي اي بي وتمغطي وتردغي على كيفج ولا احد درا عنج بينج وبين الكرسي الي يمج اسبوعين مشي شتبين بعد اكثر من جذي

SHOOSH said...

لا يطووووفكم


حصري و على الوطن


مسخره لايف

http://www.alwatan.com.kw/ArticleDetails.aspx?Id=36001

أحلى شي إللي متهمني إني أقلد مدونه صاحبها كاتب موضوع الكويتيوون بالطياره


لوووووووووووووووووول


يبا آنا و الله آنا

Ahmed Al-Salami said...

فكرة الموضوع وايد حلوه وبسيطه وبنفس الوقت قدرتي تسلطين الضوء على (مشكلة) مهمة تحتاج إلى دراسة الأسباب والبحث عن حلول لها.. طبعا لو كنا في مجتمع (غربي) إدارة شركة السينما اهي نفسها اللي بدور على حل.. لكن بما إننا في مجتمع (شرقي) فماراح يكون في شي مهم وعشان جذي الكل بيقول (طنش عش تنتعش)..
بصراحة ضحكت من كل قلبي على كل اللي تفضلتي فيه.. مشكوره

فيلسوف said...

هههههههههههههههههههههههههههههه
هههههههههههههههههههههههه
هههههههههههههههههههههههههههه

شفيهم قلبوا عليج

يا حليلهم الكويتيين ما يتقبلون النقد
:P

والله ضحكوني بس جد احسن شي نقولهم

shooooosh


إلى الامام اختي مواضيعك روعه

سلة ميوّة said...

هاهاههاهاهاي

قريت اللينك...
من صجهم شاشو الربع
شفيهم هيههيهي
اظاهر ماراحو من قبل سينما...


وانا عجبني الي يقول الشعب الكويتي ذرب ومثقف


انزين منو قال غير هالشي؟؟؟

حمدالله والشكر

:)


نرجع لموضوعنا...


الله يهداج


ذاك اليوم بدش فيلم ومعاي تايك اواي قهوة


قالي ممنوع
قتله بسم الله توني شريتها مابردت حتى مايمديني اشربها
قالي قطيها
:)
قتله نعمت الله ماقطها اشربها انت
سكت قالي مابيها
قتله خلاص خلني ادش فيها
يقولي ممنوع!
قتله يعني لو شريتها من كفتيريتكم المحزرة عادي؟

قالي إي
قتله انزين وان شريت نفيش وحطيتها بالجيس يم النفيش وانت مادريت شبتسوي؟

سكت...ابتسم..قالي اختي القانون
قاطعته
ماشالله ..قانون؟؟؟

انزين.....بنمشي عالقانون

كبيتها
وتلذذت بقههوتهم المحزرة وانا اطالع الفلم :) مع نفيش

هيههيهي



وعلى الطوابير...


افا عليج...
ماشفتيهم بطابور العيادة...
ماشالله كلمن يبي يدش قبل الثاني

ما خلصنا من الريش الي على راسهم
ويعه...


مساج الله بالخير والنور والكرامة:*

Anonymous said...

صاحب المدونه مريض نفسيا
كويتي قبل الجنسيه الاولى
====================
مع ان هاذي اقوى جملة .. بس مو مقتبستها why?

;)

حكيم عيون
وبفهم بال_وما

Her said...

looooooool neseaty e7jab bu taf5a w teg3ad jedamech w ely yayeb 3yala elyahal filem esa3a 12 belael