Tuesday, December 1, 2009

بوست بطاريته تعبانه



أمس .. و لو أول مره في حياتي توقف علي السياره


إهي ما وقفت


إهي عيت تشتغل


يعني خلصت مشواري و ركبت السياره و كلي ثقه إني بروح البيت


ألف المفتاح يمين يسار .. السيارة تكح


يتني ضحكه


آنا: لا لااا مو من صجها


و أرجع أشيل المفتاح و ادخله مره ثانيه ..بقص عليها يعني يمكن تهون و تشتغل


السياره: كحح كححح


آنا: كاااااك لا لا !! من صجها هذي ؟؟


أشوف جدامي ولا ماكو علامه مو شابه ليت


إهي علامة البطاريه .. علامة شي مقلوب و ينقط ماي مادري بانزين مادري دهن


المهم .. عرس كان بالسياره


إشي ليت أصفر .. إشي ليت أحمر


طقتني حوله


نزلت و كسرت خاطر عيال الحلال و سوولي إشتراك


المصري بعد ما خلص تصليح: طرباخ طربااخ طرباااخ


يطق على دبة السيارة إللي جدام .. مادري يسمونها دبه ولا شي ثاني


المهم


آنا: نعم ؟؟؟


المصري: إفتـــــحي


آنا: أفتــح شنووو ؟؟؟


تكفين يعني يبيج تفتتحين شنو و اهوا يأشر لج و يطق لج على دبة السياره اللي جدااام و شوي و يبو س الدبه ؟؟


المصري: إفتحي آنا خايف اكون نسيت المفتاح بتاعي جوه


آنا: ما اعرف من وين تعال إنت شوف


فجها و خذه الريال شغله


المصري: إنتي لازم تركبي بطاريه جديده .. انا عندي وحده موديل طاطوطيط طاطوطيط طاطو طيط


و يشرح ساعه و نص عباله آنا أفهم بهالسوالف .. يعني حده مو وقتك تمشي شغلك !! تشوفني واقفه بنص الشارع و حالتي حاله


المهم


اشتغلت سيارتي و مشت عادي زي الفل .. كان ليل بس ساعة سيارتي اقلبت توقيت فلوريدا و صارت ثنتين الظهر مادري ليش .. آنا بصراحه ما قلت شي خفت تعصب و تقلب فيني


وآنا راده مريت ماكدونالدز .. كنت ميته يوع


درايف ثروووو


لما وصل دوري آخذ طلبي .. قال لي الفلبيني صفطي و آنا أييبلج الطلب لانه زحمه


لووول طبعا مو بهالأسلوب .. جذي يطلع كويتي جنسية أولى مو فلبيني .. قالها لي بالإنجلش بس آنا بعطيكم المخلص


رحت و صفطت .. و عشت الجو .. و سكرت السياره .. و نزلت الشباك .. و رديت الكرسي ورى


مكيفه حدي


آخر روآااان


وصل الطلب


رديت الكرسي و ضبطت أمووووري .. أشغل السياره ولا ال .... تسوي فيني نفس الحركه


آنا: هذي من صجها .. و احاول يمين يسار


السياره: و لا كلمه حتى كحه ما تكح


بغيت أمووووووت


و نطرت ساعه على ما جو خذوني .. إستغليت الساعه و كليت و جبتي


المهم


كان يوووم منيل


بس الحمدالله طاااف


عالعموم


آنا صار عندي خبره ألحين


قمت اعرف أفج الدبه اللي يدام


شوفوا يعني قبل كان ممكن ممكن أفجها


بس طبعا عقب ما أقفل البيبان بالغلط و أطق هرن بالغلط و أقفل الشبابيك بالغلط و افج مال البانزين بالغلط و الدبة ورى بالغلط


تــــالي أطيح على هذا اللي يفج اللي جدام و أفتحها و علامة النصر على ويهي و إبتسامتي من شويخ لي الاحمدي


المهم


صرت أعرف أسوي إشتراك


أفهم بانواع البطاريات


و اهم شي أفهم بالأسعار


بس أبي أحد يعلمني شلون أركب البطاريه اليديده


إلي يبي شي لا يرده إلا جيبه .. و الباجي علي


مع تحياتي/ شوش غلام خلدون مصطفى


اللي يقول هذيل أسامي منو اعطيه بطارية بلاااااش


سؤال بره الموضوع لعموم المدونين .. عنوانكم سندون حبا بالكويت .. و انتوا بتوقفون تدوين ؟؟ شلون ؟

18 comments:

joe said...

لووول قصتج تضحك مادري تبجي
بس بغيت اقولج نصيحه اذا السياره اختربت من المعروف انه لازم على طول تروحين البيت ماكو تروحين يمين او يسار بعد ماتدرين شنو يصير بنص الطريج او يصير اي عطل ثاني

بكل كل شي في سبيل اليوع نسويه لوول

قواج الله

Anonymous said...

يدام يعنى جدام

لوووووووووووووووووول

لالاموصج

Mohammed said...

لووووووووول

خوش بوست والله يعطيج العافيه بس قللي من الفاست فوود يمتن ترا

والله يعينج كل شي ولا السياره توقف فيج مشكله مشكله وربي

Hamad said...

looooooool shosh tekfain entay mea'athya 5alg allah aw mesawya shai laish kil hal blawi t9eerlch ?!!

thani shai shako tsakreen elsayarah tadreen ena ba6aryat elsayarah 5arbana :)

the names shakelhom ely sawa elba6arya wely marooch :p

إنسانة said...

خوش بطارية .. قصدي خوش قصة


المهم موضون ندون و ما ندون

مثل الطفل لما ياكل غداه لأنه يرضي أمه .. و لا ما ياكل كاكاو لأنه يرضي أمه

مرة ياكل و مرة ما ياكل من أجل رضا أمه


و رضا الأم هنا هو رضا الوطن

و الإبن هو روح المواطنة اللي فينا

الزين said...

لوووول

عسل وربي عسل



تبين بطاريتي
!!!

Engineer A said...

hehehe ...

9ij mawqef la t7sadain 3alaih!

o 3la ma a3teqed esm el "dabah elamameyah" "'3abaq" :)

yalah et3esheen o takleen '3airhaaa :)

darkness said...

مسكينه السياره كسرت خاطري

:(

عموما خاطج السو و مره ثانيه على طول دقي على واحد من اخوانج لازم نكدشهم

هههههههههههههه

:)

Anonymous said...

good for u ta3alamti wayed ashya2 o nabahteeni inni ma a3arf aba6el el dabah elly jedam 3ala goltich:p

Anonymous said...

سلامتج وسلامه سيارتج من الكحه

يمكن فيها انفلونزا (:

بعض المدونين متوقفين لانهم مع الخيل يا شقرا

eshda3wa said...

ya3ni allah yhadach elsayarah wagfa 3alaich ray7altli macdonalds!

soosh 7adich mazaaaaaaj

aL-NooR . said...

بشري شنو طلع فيها ؟
غيرتي البطارية ؟
بس اشوة استفدتي شي
;p


صبحج الله بالخير

*******************

شاي الضحى said...

لوووول وعليه

اختربت سيارتج يعني وقت ماكدونالدز اكلي من بيتكم والحمدلله انها وقفت فيج وانتي صافطه مو بنص الشارع

يالله هذا درس انشاءالله تتعلمين منه


شكرا

رورو الشخبوطه said...

السلام..

الله يعينج مو خوش موقف صار فيني مليون مره خخخ..

وسلامتها سيارتج..

وبالعافيه الوجبه..

ChuBBy-Doll said...

الدبه اللي جدام = كبوت
يومج كان اخر حلاوه
لووووووووووول

Made n Q8 said...

لوووووووول

لا مو خوش موقف


بس الحمدالله عدت على خير

شحرورة said...

لووول

انا بطارياتي لا يمكن أن تخلص

SHOOSH said...

:*

to all of u