والله حاشني عوار مزمن بالراس منكم
و صداع ثلثي و احباط عام من الدرجة الأولى
بسوي عملية بعالج فيها انفجار قولوني و السبة انتوا
ما تعبتوا ؟ ما مليتوا ؟ للحين الصوره مو واضحه ؟
عسى ما قلت شي او فتحت نقاش صكوني بنفس الجمله .. و ضـرب المواطنين ؟
بنسوي اعتصام و بنرفع اعلام برتقاليه و سوينا باجات و بنوقف ثلاث ساعات بساحة الإراده
اوكي بس يا جماعه الموضوع مو حله اعتصام و علم برتقالي
لا والله ؟ و ضرب المواطنين ؟
شايب عمره ستين سنه معتصم جدام مجلس الأمه ما يبي ياكل ولا يشرب
ليش عاد من صجه ؟ ما تسوى عليه صحته
لا والله ؟ و ضرب المواطنين ؟
ندوة بنتجمع فيها و نتكلم و تصفيق و مايكروفونات و اللي يرضى يرضى و اللي ما يرضى يورينا مراجله
طيب و العناد شيفيد ؟ انت عبالك جذي ترهب أو ترغب ؟
لا والله ؟ و ضرب المواطنين ؟
بفتح قناة تلفزيونيه و بطلع أسب و أسفل و أفضح و أنشر غسيل الكل
ليش عاد !! هذا كله اش فايدته ؟
لا والله !! و ضرب المواطنين ؟
هذي شلووون نجحت؟ هذي الوحيده اطلعت السنعه فيهم .. كفوو يا فلان .. الله يلعن علاان .. بتشوفون الإنتخابات اليايه
فكروا بموضوعيه و شوي شوي الركاده الزينه .. هذي كلها مواقف محسوبه لا تتسرعون بالحكم على أحد
لا والله ! و ضرب المواطنين ؟
بنتجمع اليوم بنقط صناديق الجريده الفلانيه بالزباله و القناة الفلانيه بنسكرها و الصحفي الفلاني محنا مدخلينه
ليش عاد ؟؟ الصندوق شكو ؟؟ و الصحفي شكو .. وين حرية الراي ؟
لا والله ! و ضرب المواطنين ؟
احنا بنعلن حالة العصيان المدني و بنمارس الضغوطات الشعبيه
لا تلعبون بعقول الناس على كيفكم حتى بو خمستعش و ستعش سنه دخلتوهم في عصيانكم مو جذي الموضوع يا يبا
لا والله ! و ضرب المواطنين ؟
امي مسويه هريس عالغدا اليوم
نعم ؟؟ هريس !! ليش مو جريش ؟؟
شكو الجريش ؟؟
لا والله !! و ضرب المواطنين ؟
يا ترى .. لو المواطنين ما (انطقوا) ماذا كانت ستكون الحجه ؟
7 comments:
أخيتي شوش
معاج أن الديرة كانت على صفيح ساخن
معاج إن الوضع محتاج لحبة ركاده وإتزان
لكن السؤال ياشوش هل كانت الوسيلة المستخدمه في تبيان رفض القمع وإسكات الأفواه بالقوه ؟؟
أنا أقولك الوسيلة على قدر الضرر ياشوش
خلينا واقعيين حبتين شوي
لابد أن نعطي كل موقف حقه في الأخذ والرد
التهدئة شي والسلبية شي ثاني
بالنسبة لي الأمر لايستهان به يستحق ما أخذ من زخم إعلامي وهم في نفس الوقت يحتاج الى حبة ركاده
عزيزتي مها
لي ساعه و زود أتناقش مع العزيز عاجل و الزين و لو كويت
زي ما قلت لهم أقولك
انا أبدا مو مع الضرب و استخدام العنف
ولا مع اهدار الكرامات
لان أولاو اخيرا .. كرامة الناس من كرامتي انا كوني وحده من الشعب
انا قاعده انتقد الطريقة اللي الناس قاعده تعالج فيها الموضوع و تظن انها جذي قاعده تحله
انتي تتصورين ان الحل اني انام جدام باب المجلس ثلاث ايام و ما اكل ؟
الحل اجمع الناس غصبا على القانون و اقول اللي فيها فيها و تالي نزعل لي صار شي ما نبيه ؟
الحل بالسب و اللعن ؟
ضرب الناس بدال ما يكون قضية لازم تتعالج صار للأسف حجه لكل ما في قلبه شي على غيره
الموضوع مو بهالسهوله
انا علموني ان الدستور حقوق و واجبات
زي مالك حقوق .. عليك واجبات
و اذا تبي ان يكون لك .. لازم ترضى ان يكون عليك
الشعب عاطفي للأسف .. نبي شوية ركاده و عقلانية علشان تتضح الرؤية
الموضوع كبير
وجهة نظر أحترمها، لا و بل أقدرها. و لكن أليس من المفترض عندما نرى الطرف الأحق بمساندته أن نأخذ بيده و نرد له حقه.
أنني لأجد تفسيرا لما يفعله الشعب - و ليس بالضرورة أن يكون التفسير مبررا لهم - إلا أنني لا أجد عذرا للحكومة.
المصيبة الأعظم عندما يخرج الدكتور عبيد الوسمي دون إثبات أية تهمة عليه، حينها ستكون الحكومة بموقف لا تحسد عليها أبدا، و حينها لن أصبر على من يجد المبررات لضرب الوسمي.
بالأخير، أتفق معكي بأن هناك حلولا أفضل، و لكن أين هي؟ لذلك دعينا نستنكر ما حدث و نسعى لرد حقوق الشعب لا أن نذكره بواجباته، فما حدث من بعض فئات المجتمع كان ردة فعل لعمل عقيم لم أتخيل أن يحدث في كويتنا الحبيبة!
اشهد انج يبتيها عدل
النعمه زواله ويبيلها مداراه والكويت ما تستاهل هالمزايدات وتصفيه الحسابات
مادة 29
الناس سواسية في الكرامة الانسانية
مادة 31
ولا يعرض اي انسان للتعذيب او للمعاملة ..الحاطة بالكرامة
مادة38
للمساكن حرمة
مادة 44
للأفراد حق الاجتماع دون حاجة لأذن أو أخطار سابق ولا يجوز لأحد من قوات الأمن حضور اجتماعاتهم العامة
انتي قاعده تناقشين تصرفات افراد ونسيتي المبدأ
اللي صار اختراق لمواد الدستور
يمكن طرق تعبير البعض عن الرفض كانت مو بالوعي الكافي
بس المبدأ هو هو
وبعدين من قال ان مافي ركاده
الكل مهدي لغاية ما نشوف نتيجه الإستجواب
كانت يحتجون ويناقشون هذا مو معناته تصعيد للوضع
وارد اكررها
100% معاج ان الإسلوب خاطيء
بس المبدأ صح
:*
صباحج مرتوي بحلا روحج يارب
يا ترى .. لو المواطنين ما (انطقوا) ماذا كانت ستكون الحجه ؟
لا والله ؟ وضرب المواطنين ؟!
^
^
^
^
^
شايب مزيون
شعار الثورة البلشفية كان
العدالة والمساواة والحرية
وشعار الثورة الفرنسية كان
حرية وإخاء ومساواة
ومن فجر التاريخ إلى نهايته
ستظل هذه الشعارات تدور باختلاف يسير
بين كل أصحاب السلطة والمصلحة وطلابها
العبرة مو في المبدأ ولا في الشعار
المبدأ في الالتزام فيه
وهذا هو الفرق .. ولا لما شفنا اختلاف
بين الثورة البلشفية في روسيا
والثورة الفرنسية في باريس
Post a Comment