شووووش في الأفنيووووز

قد لا أخفي عليكم أعزائي القراء

و متابعين مدونتي الأحباء الأوفياء اللطفاء الكرماء و أي شي زين ينتهي بآااااء

إني ما أحب .. بل قد أكون لا أواطن بعيشة الله الأفنيــــوز

وذلك لأنه دايما لويه و زحمه و عفسه و متروس مراهقين و ما تعرف تتسوق فيه و تركز من كثر المناظر الخلابة اللي تشوفها

يعني عادة إذا بروح .. أروح بالنهار أو الصبح و أدش على طول المحل اللي ابيه و آخذ أغراضي و أطلع

ولـــــــــــــــــــــــــــكـــــن

أن أدخل الأفنيوز الساعة ثنتين الظهر و أقعد بفرايديز

و أطلع من المطعم الساعه ثلاث و نص و أروح أقعد بستار بوكس

و أطلع من ستار بوكس الساعه خمس و أقعد أتمشى و أتفرفر بهدف التمشي لا التسوق لي الساعه سبع

و الساعه سبع أرجع أتسمر بستار بوكس

لا و يوم جمعه بعد

هذا شيء أول مره أسويه بحياتي

المهم

إليكم المخلص المفيد

واحد : ما عندنا بالكويت يهال

خلاص اليهال انقرضوا فالكل عنده بلاك بيري و الكل حاط مكياج و الكل مسوي سبايكي و الكل مسوي بف

ثانيا: كل الكويت ذوق واحد

فالكل لابس بولو و هاكيت و الكل لابس برشلونه و ريال مدريد

فجأة الكويت كلها تحب كرة القدم

ثالثا: ممكن بعد فتره قصيره بنات الكويت يطيرون و السبه الريش

تيجان ريش

شباصات ريش

بروشات ريش

رابعا: شباب الكويت كلهم حب و حنان لبعض

و الدليل إن أغلبهم شابكين اياديهم في يعض طول ما أهما يتمشون

وييييع ويييييع لوعتوا جبدي

خامسا: الكويت كلها و لله الحمد مصورين محترفين

فقد شاهدت عدد لا بأس به معلق كاميرا كانون و يفتر

سادسا و بس لأني مليت: تراوى لي لوهلة إني قاعده في حفل تعارف مو مول

فالكل عارض إسمه

يا مطبوع عالملابس

يا تاج على الراس

يا إسواره بالإيد

يا بروش

يا خاتم

حتى على الجناط

ألحين كل هذا مو مشكله

يعني

عادي

البلاك بيري أحبه

و برشلونه أعشقهم

و السبياكي يونسني

و الريش يدلدغني

المشكله

هل كيف شعب كامل يهب بالشي جذي مره وحده و الكل يصير قالب واحد ؟؟

خارج الموضوع

فكرة القعده بالكوفي شوبات و مراقبة الأوادم يازتلي .. إدعوا لي بس ما أتعلق بهالعادة - عادة كويتية خليجيه سيئة

ثاني شي

قبل لما كنا يهال .. كنا نلعب لعبه .. جنه كنا نركض و واحد يلحقنا و يصيدنا

و كان الشاطر اللي ما يصيده و يروح يجيس الطوفه و مرات كان باب السكه و يقول حي الميد مادري الميت مادري شنو

هل اللعبه عانه علي من أمس

أموت و أعرف .. الميد هذا منو ؟