كتـــاب الــوجه .. الفيــس بـــوك

كويتيه كيوووت

هذي ما تطلع إلا بالويك إند .. موعدها كل خميس الساعة عشر بالليل .. يا تروح الأفنيوز يا ثري سكستي

كل خميس الساعة عشر تكتب

كويتيه كيوووت: وااااااي زحمه .. أوووف ليش طلعت ... صارلي ساعه أدور مصفط

وتحط لنا صورة المواقف مادري ليش

كويتيه كيوووت: ويييع متروس ناس ..واااي شنو هالأوادم .. هلااااقه

دام حضرتج ما تحبين الزحمه .. ولا اللويه و الهلاااقه على قولتج .. شكو ما تطلعين إلا تالي الليالي بالويك إند ؟؟

باجي الناس هلااااقه و إنتي مرفوع عنج القلم مثلا ؟؟

مريووومه أل

مريومه أل: وصلت بيروووووت

بعد ساعه

مريومه أل: جو بيروووت مو طبيعي

بعد نص ساعه

مريومه أل: قاعده بالبلكووونه

بعد عشر دقايق

مريومه أل: ويع مر علي قطو

بعد دقيقتين

مريومه أل: قاعده آكل فلافل

مريومه أل: وااااااي فلافلهم مو صج

مريومه أل: كله منكم غصيت

مريومه أل: سبحت و لبست بطلع

مريومة أل: بالتاكسي

مريومه أل: واااااي تخيلوا !!! ضيعنا

مريومه أل: واااحد حلو مر علي

مريومه أل: لا لا لاااااا .. أمبييييه صندلي انقطع

سؤال: إحنا شكو ؟؟

البنات يحبوني

هذا واحد ما غير داز بوسه حق فطومه .. و قلب أحمر حق ساره .. و إغنيه حق شيخه .. يوم الجمعه يقلب

البنات يحبوني: صلاة الجمعه يا شباب و لا تنسون سورة الكهف

البنات يحبوني: ربي إغفر لي ذنبي و يسر لي أمري

البنات يحبوني: اللهم أنت العالم بذنوبنا .. فاغفر لنا و ارحمنا و توفنا مع الأبرار

البنات يحبوني : عن ابن القيم رضي الله عنه ...... ؟

اش سالفة الأدعية ؟؟ يوم الجمعه تقلب من قيس إلى حسن طنون مثلا ؟؟

التايه

التايه: يوعان بس ماأدري وين آكل

التايه: ضايق خلق بس ما أدري شسوي

التايه: بسافر بس مادري وين أروح

التايه: مريض بس ما أحب المستشفي

التايه: بطلع شلبس ؟؟؟

عزيزي التايه .. بخصوص هالأسئلة .. ولدناك و نسيناك مثلا ؟؟

طبعا هذيل غيرالحداده و النجاره و البنايه .. واحد يدور خشب و واحد يدور طابوق و الثالث غزه مسمار

والطباخه اللي تبي طحين

ولا المزارعين اللي يا برتقالهم خاس يا زرعهم كلته صخله بالغلط

هذا غير اللي ضايعه له بطه .. ولا اللي لاقي قطوه ..ولا اللي رافسه حصان

أبيـــــخ حركــــه

لما يسون لك تاق بصورة .. يلعنون خيرك ايميلات .. واحد ورى الثاني .. و آخر شي تطلع إنت مو بالصورة .. ولا تعرف أحد من اللي فيها .. هذا اذا ما طلعت أصلا صورة صمونه ولا قوطي بيبسي

شوووش في المكتب

لظروف خارجة عن إرادتي .. و لضروريات العمل .. تم إنتدابي للعمل في شركة غير الشركة اللي اعمل فيها أساسا لفتره محدده

شغلتي الأساسية بعيدة كل البعد عن التعامل مع الجمهور

فتعاملي محصور بيني و بين اقلامي الرصاص و مساحاتي و مساطري .. مسؤولي في العمل .. خالد زميلي في المكتب و التي بوي

غير هذا .. ما أشوف

بينما الشغلة اللي انتدبت علشان أسويها .. فأساسها التعامل مع جمهور موظفي تلك الشركة .. إللي أقدر أعتبرهم في هذي الحالة عملاء أو كوستمرز

فكان هذا الإنتداب حبيبي القاريء بمثابة الكف

نعم .. كأنه احد صافقني كف بقوة تسعة على مقياس ريختر

أشكال و أرناق من الناس مرت علي ما أضن بتمر علي مره ثانية

ما قصروا

عطوني كورسات في البابلك ريليشنز .. الأنقر مانجمنت .. و حتى الطب البديل

إليكم ما يلي

الإنسان السعيد

و عادة ما يجي أول الصبح .. كله حماس و نشاط و مشيته بالغالب سريعه .. الإبتسامه من هوون ل هونييييك

يدخل بثلاث سلامات

السلام عليكم .. مرحبا .. صباح الخير

يطلع بثلاث سلامات

مع السلامه .. يعطيج العافية ما قصرتي .. قواج الله

وايد سريع و وايد سعيد و وايد مندفع .. من كثر إندفاعه أحسه وده يلقفني من كرسيي و يقعد مكاني

الإنسان العاطفي

أو اللي على حظي يكون هرمون العاطفه عنده طاق السقف

يحدثني قائلا

شنو يا قلبي ؟؟

وين أوقع أبووووي إنتي

مشكوووورة حبيبتي

تخيلوا .. قال لي حبيبتي

اول مرة إنقالت لي هالكلمة عصبت و وقفت و بغيت أطقه بالدباسة .. جنه سابني

ثاني مره قالها واحد آخر بينما كنت آنا منزله راسي أخلص الأوراق .. بس سمعت طيف كلمة حبيبتي مر .. جان أرفع له عيني اليمين و حاجبي اليسار و عطيته نظره خارقه شقت هدومه .. متبوعه ب أووووووف

ثالث مره عاد لاااا .. الوضع تغير .. قمت أتقبل هالنوع من الكلمات بصدر رحب .. و رووح رياضية و قد أكافئه و أعطيه إبتسامه او إثنتين .. و ما اخفي عليكم إني قمت أتضايق لما ما أسمع كلام طيب

الإنسان العصبي

عادة ما يكون كبير بالسن و مغتر و متين

الموظف اللي جدامي حبيبي القاريء كبر أبوي .. إذا مو كبر أبوي كبر جدي

طبعا آنا أناديه أقوله أخوي و بخاطري أقوله أبوي العود

شوش: إسمك مو موجود

هو: نعم !!!! شنو إسمي مو موجود ؟؟ دوري بس مره ثانيه ولي يعافيج

طبعا يحاجيني و أهو يأشر و يحرك شواربه بطريقه غريبه .. يعني أهو يتكلم و نظره رايح يسار لكن شواربه يتحركون يمين

أهو يتكلم عن اوراقه و آنا مركزه بشواربه .. كأن الشارب مخلوق منفصل عن جسمه

يا ماما .. كان فلم رعب

المهم

شوش: ماكو

هو: إنتي مداج تدورين ؟؟ طقطقتي بهاللي جدامج و قلتي مو موجود !! آنا موظف من قبل لا إنتي تنولدين .. جاية إنتي البزر ألحين تقوليلي إسمك مو موجود ؟؟

شوش: آنا بزر ؟؟ الله يسامحك بس هم ماكو

هو: وين مديرج ؟؟؟ لا باااراااك اللله فيكم من ...... حاطين بزران يتدربون على حسابنا

الإنسان الثلج .. السلو مووشين

عاد هذا نوع من انواع الأوادم إللي ما أصبر عليه .. عادي أقوله شغلك مو عندي عشان أفتك منه .. أسوي روحي ما شفته .. عادي

فلم سلوو موووشين

الجملة يبيلها ساعه و و نص علشان تطلع .. و يحرك جسمه كأنه يرقص بريك دانس و آنا طبعي حار .. ما فيني صبر

هو: سلاااام عليييكم

يفصخ نظارته بالبطيىء .. ينزلها و يسكرها .. يطلع قوطي النظاره .. يفتح القوطي .. يصفط قطعة الخام الصغيرة مالت النظاره .. يحط النظاره داخل .. يسكر القوطي .. يحط القوطي على الطاولة

و آنا ما غير متنحه بوجهه أنطر الأخ يخلص

و يقعد عالكرسي

أوووووووووف .. إنت من قالك إقعد و إستريح ؟؟ ألحين شيخلصني

هو: إختي آناااااااا

طبعا ال اااااا مالها نهاية

شوش: اي اي أدري .. عطني هويتك

أقاطعه جود نخلص و نفتك

هو: إختي هويتي بالويست بااااق بالسيارة تنترين أرووح أييبها ؟؟ دقيقه

أمبيه لأ .. ليش قلت له عطني الهوية

شوش: لا لا ما أنتر .. مابي هوية مو لازم .. يولي القانون .. تكفى بس خل نخلص

هو: إختي عندي إستفسااااااار

شوش: يرحم أمك لا تستفسر .. بعدين بعدين خلنا نخلص أوراقك

هو: إختي بنطول ؟؟ عشان ساااحبي ناترني بالسياره

نعم ؟؟ ألحين منو إللي مطولها على منو ؟؟

شوش: لا لا كانا خالصين .. وقع لي الورقة هذي لو سمحت

هو: إيييينشاااااااااالله

يرفع جمومه

يخز الورقه

يطق رقبته يمين

يردها يسار

يخز الأقلام

هو: همممممم

يختار قلم

يمد إيده

ياخذ قلم

يمسك القلم و الورقة

يرد إيده ورى

هو: هممممم لا لا أبي أزرق

يرد القلم الأسود

ياخذ أزرق

يفتح الغطى

هو: وااااي الغطا معلق

شوش: أووووف جيييب جيييب آنا أفجه .. تفضل

يوقع أول ورقه

هو: بااااااعد هذي ؟؟

شوش: اي اي كلهم

الحين عاد لوعة الجبد

يحط صبعه بحلجه

يترسه سعابيل

يحول صبعه إلى ختامه

يختم الورقه بصبعه .. تلزق الورقة أوتوماتيكي

وعلى هذا الحال ليما خلصت منه و افتكيت

طلع و خلصت منه

ما وعيت إلا هو راد

هو:وااي إختي تخيلي ؟؟ نسيت النداااره

الإنسان الراهي

هو: مرحبا أخيتي

شوش: هلا

هو : أخيتي .. يصير أدز المندوب يخلص اوراقي ؟؟

شوش: نعم ؟؟ ليش مندوب ؟؟ مقدم على فيزا ؟؟ لا ما يصير إنت تعال

هو: بس أخيتي تدرين عندي إجتماعات ومو قادر والله أحك راسي

عاد حكيت ولا ما حكيت .. آنا شكو

شوش: ما يصير .. لازم إنت تجي أخوي

هو: شوفي لي مني مناك أخيتي

شوش: ماكو

هو: أقول أخيتي ؟؟

شوش: هلا

هو: منو مديرج ؟؟

الإنسان المطوع

طبعا يحاجيني و أهو يطالع الطوفه

معطيني ظهره

طيب طالع الطوفه ما عندي مشكله

لكن حسك واطي و تتكلم و إنت تطالع الطوفه بالله شلون أفهم

لو مجابلني ممكن ممكن أشوف تعابير وجهك .. أقرى شفايفك أعرف شتبي

ساعدني يعني !! طبعا الحوار الجاي كله و هو يطالع الطوفه و معطيني ظهره

هو: إختي أهلي بإجازة أمومه و جاي أخلص شغلهم

شوش: أهلك منو ؟

هو: أهلي أهلي

شوش: إي منو يعني ؟؟

هو: المره

شوش: أخوي واللي يعافيك .. أبي إسم .. أهلي .. المره شلون أعرف آنا يعني

هو: إختي ما يجوز .. ما تشوفين الصالة متروسه موظفين كيف أقول الإسم ؟؟

منو مديرج جزاج الله خير ؟؟

الكويتيووون و الإستقبــــال

اليوم جتني دعوة من إحدى الصديقات لحضور حفل إستقبال بمناسبة إنها شالت تقويم الأسنان اللي كانت مركبته

متخيل معاي حبيبي القاريء ؟؟

حفل إستقبال و بوفيه و دي جي لأنها شالت التقويم

آنا مادري إذا سوت ليزك و قطت النظاره شبتسوي ؟؟

شسالفة الكويتيين (اللي عنده عقده من هالكلمه يطوف عشان خاطري) و الإستقبال ؟؟

ولدت .. إستقبال

طلعت من الأربعين .. إستقبال

طلع للياهل ضرس .. إستقبال

الضرس نفسه اللي طلع طاح .. إستقبال

قط الحفاظه .. إستقبال

مشى .. إستقبال

تخرج من الروضه .. إستقبال

انفلع و خيطوا راسه .. إستقبال

الولد سافر و رد .. إستقبال

شرى سيكل .. إستقبال

دش سجن و طلع .. إستقبال

سدد قرضه .. إستقبال

ومن هالمناسبات العبيطة إلى الأعبط منها

قبل فتره كنت زايره زميله لي بالدوام والده .. و كالعاده .. أكيد مسوية إستقبال

لا إله إلا الله

عرس عرس مو ولاده

آنا داشه جنه أحد معطيني كف

نادرا ما أروح ..الإستقبالات مو جوي

نص الغرفه الكفر مالها طبعا

و كوشيات منثره تحت عالأرض

نظام الجوارح و الكواسر إذا تذكرون

نوافير و ماي و كوشه و مسرح حاطين السرير فوقه

شالات و قطع خام منثره على الأرض

و الوالده هي و الكفر و الشراشف و الستاره و الطاوله و مطارة القهوه واحد .. كلهم طقم .. لوما هي عندها وجه و تتحرك ما فرقت بينهم

و الياهل يا بعد عيني لافينه بكشكش و كفر و دانتيل و ورد .. زين ما اختنق من الستين قطعه اللي فوقه

آنا أمشي و اطالع عزكم الله مداس رجلي أخاف أدوس على كفرها و لا أشوت لي كوشية بالغلط و آنا مادري وأنزف

طبعا ستعش فلبينية بالغرفه .. كلهم مطقمين مع الكوشه و السرير و الكفر

و يوزعون كيك .. مادري شمع .. مادري صابون

ماني عارفه هذا اللي يتوزع شنو بالضبط ف ما غامرت و جربت آكله

غير الكاكاو اللي مسوين عليه حركات .. لافينه ب تسعين قطعه و ملزقين عليه عشرتعش لعبه

تتحدى ذاتك علشان بس تعرف من وين تفتحها

على ما تفجج فيها إلا إنت طالعه روحك .. هذا اذا ما تنرفزت و عصبت و حذفتها بعيد

من شروط فتح الكاكاو أن يكون معدل الآي كيووو عندك خمسمية نقطة

و طبعا الإخت اللي والده .. عروس ما شاء الله

آنا مادري متى مداها ولدت و خلصت

الميك أب ؟؟ ولا حفل توزيع الأوسكار

أي أوسكار !! الله يحلل ربع الأوسكار .. ما يهولون جذي

المهم .. مكياج و الشعر كاويته .. و بف و على قلبها طقم كاسر رقبتها

و ضحك و سوالف و غشمره

ويييييييييين يقولون بالولاده .. الوحده تموت و تحيا

روووووح تطلع من روووووح

طلعت أمي ما عندها سالفه و تسوي أفلام

حسافة ما خذتها معاي

أوووووه

على طاري الأفلام

اليوم وانا أفتر من قناة إلى قناة ولا مذيعة من مذيعاتنا الشباب في إحدى القنوات

مندفعه و متحمسه تتكلم عن المغالاة في المهور

واهي مندمجه و مشتطه قالت

يــــا جمـــاعة .. الله سبحانه و تعالى قال .. مدوا ريولكم على قد لحافكم

متخيل حبيبي القاريء ؟؟

لا حول ولا قوة إلا بالله .. إستغفر الله العظيم

آنا أموووووت و أعرف الله متى و وين قال هالجمله

ســـــؤال

قبل لا تحمقون

و تعصبون

و تتهموني إني عميــله

و تحللون دمي

أحب أقول لكم إني أحب الكويـــت نفسكم

و إني لا أزايد على وطنية الفضــالة او أي أحد فيكم و لا أشكك بنواياكم

و إني شخص حيادي أحاول أطالع الموضوع من صورة حياديه غير منحازة لأي طرف

أنظــر للموضــوع بغـض النظــر عن شخــوص أطــرافه

و أكرر أعترافي إني ما أعرف بالسياسية نفس كثير منكم

و لما أسـأل مو لأني أبي أغثكــم و أرفــع ضغطكم

مثل ما وصلني من بعضكم بالإيميلات

بس لأني أبي أعرف و أفهــم .. يمكــن إنتوا تنوروني

و بس لاعت جبدي من كثــر ما بررت فووق و ما أحب أبرر بس مضطـره لأني مــادري علامــكم نـاشبيــن لي

المهــــم

ســـؤالي

القضــاء أدان الفضـــالة - حتى اللحظــة على الأقــل - سواء حبس يــوم أو سنــه .. غــرامه دينــار او ألــف

يبقــى القــانون أدان الفضــالة و أصــدر بحــقه حكــم حبس و غرامة

فــأي إنتصـــار و أي حــرية إللي بنظـــري بالغتـــوا فيها أمــس ؟؟

الكويتيووون و الصيــف

ثمانمية ألف من أصحاب الحظوظ الوافرة مسافرين خارج الديره منهم أربعين ألف في تركيا يزورون موقع تصوير الأحلام الضائعة

سبعين ألف قابعين في الشاليهات ما يجرؤون ينزلون البحر من الغبار و الرطوبة

إثنعش ألف من المخلوقات الفضائية في الخيران

مية و عشرين من الغاضبين يتهاوشوون في قاعة عبدالله السالم

ألفين من المتحسرين حاليا و أصحاب الأمراض النفسية مستقبلا في صالة سوق الكويت للأوراق المالية

عشرين ألف من المقاريد صافين دور في قاعات البنوك .. إما للإقتراض أو لزيادة ليمت الماستر و الفيزا

ثلاثمية من أصحاب الحظوظ الردية في المطار .. يا إما طلع عليهم منع سفر فجأة .. يا حجزهم معتفس .. يا عليهم وزن زايد

ثلاثة آلاف من الأشكال المرحة و الوجوه الضاحكه في الأفنيوز

سبعين واحد و وحده كووول صافين دور عند بينك بيري

ثلاثين ألف من المغضوب عليهم فاطسين حر في بيوتهم من غير كهربا

ثمانية آلاف من البرمائيات مسدحين فوق السطوح يسوون تان

ستمية من ذوي الراس اليابس طالعين الحداق بالرغم من الرياح و الزوابع الرملية

خمسين ألف كويتي انقلبوا مزارعين و طباخين و بناية في الفيس بوك منهم واحد و عشرين ألف يدورون خشب و طابوق و سبعتش ألف ضايعتلهم صخله و ثلاث آلاف لاقين بطة لقيطة عند الباب

عشرين ألف يرممون بيوتهم بهالحر و يسوون شقيق في الدور الثالث

مئة ألف أخطبوط مجابليين التلفزيون يشوفون كاس العالم منهم تسعة و تسعين ألف يشجعون أسبانيا

مئتين ألف صعلوك يتابعون مس ليبانون

مليون و نص مجابلين البلاك بيري و يدزون برودكاست يبدى بعزيزي و عزيزتي

حــادث

أمس بعد برنامج المارينا

رحت الشاليه .. و آنا طالعه

تعرضت لحادث ما حفظني فيه غير رب العالمين

الحديد راح و تكسر حته حته

و آنا طلعت بشرخين أثنين و كدمات و جروح تم تضميدها و حروق إنشالله إنها تكون بسيطه على رجلي

حاشني التاير و انكت علي شي حار الظاهر

أو إنه صلخني القار

بصراحه ما أذكر شي

و لاأدري شلون صار في حرق على رجلي لأن كان في دخنه بس ما كان في نار

خطاني السو

و خطتني عين الحسود إنشاءالله

و بفضل من الله تعدتني المنايا

ولا اللي صار كان مرعب

من أمس للحين مو قادرة أنام

تمنياتكم لي بالشفاء العاجل مشكوره مقدما

شوووش علــى المــارينـا إف إم

بعد النجاح الباهر (اشدعوه علي) اللي حققه بوست الكويتيووون في الطياره في برنامج الدوانية على مارينا إف إم

و إللي مادري شلوون وصل لهم

و بجهوود من المارينا .. تم التواصل بين مدير القناة السيد: طلال الياقوت .. و بيني آنا الممثلة الرئيسية لمدونة شوووش

و أبرمت المشاورات عما يلي

واحد: ستتم اليوم إعادة قراءة بوست الكويتيووون في الطيارة على أن يذكروا إسم مدونتي حفظا للحقوق

إثنين: راح يقروون بعد الكويتيووون في السينما

وأنا شوووش بزااااتي .. أشكر الله الموفق أولا .. و المارينا إف إم ثانيا .. ممثلة في برنامج الدوانية و المذيعين الياقوت و الأنصاري

و أشكر كل اللي يقرالي .. و كل اللي يحبني .. و اللي ما يحبني بعد .. و اللي أعجبه .. و إاللي ما أعجبه بعد

إسمعوونا اليوم من الوحده الى الثلاث

على

Marina FM 88.8

or live audio online on: www.marinafm.com

مع تحياتي

SHOOSH

يــــا مـــاكينــة الألمــــان .. حلمــــك عـــلى الغـــلبـــان

إشـــــدعوا عليــــــــــج

حجــــاب إســــلامــي و طــــار

بصـــــراحه

لا أملــك إلا أن

أحيي الزمـــان اللـــي كنتــي فيــه

واضـــح جــدا إن مــاكان عندكـــم معقديـــن و مجــنن نفـــس اللي عندنـــا ألحيـــن

بـــس عـــلى فـــكره

بــــاسج قــــوي

و عـــزومج قـــوية

و مـــا و قفتـــي عنـــد الطــــار

لأني لقيــتج في كليـــب ثـــاني تطقيــن علــى الل

مـــا عليــــنا

المنتخـــب الألمــــاني فعــــلا مقلقنــــي

كــــان الله فــي عــون الأسبـــــان

و ثكلتــــك أمـــــك يــا مـــارادونــا .. ضيعتهــــم بخطـــة دايــــخة

أريـــد حـــلا

صارلي فترة مدخلة روحي عزلة إجبارية

بعد ما أيقنت أن أفضل وقت هو الوقت اللي الواحد يقضيه مع نفسه .. نفسه و بس

وصارلي فترة أكبر لا أقرى جرايد و لا أسمع أخبار و لا أفتح مدونات

فالمواضيع بصفة عامة مكرره و ان إختلفت الأقلام و إختلفت الأطراف المحشورة في كل قصه - مع إحترامي لكتابها

لما شطبت كل ما سبق من حياتي اليومية .. أعترف بأن الكواليتي أوف لا يف صار عندي أفضل .. أو على الأقل أرفع بدرجات

وسيلة إتصال وحده ما قدرت أفك روحي منها و اللي اهيا الموبايل .. و اللي قد أعتبره المصدر الرئيسي للمغثة و الإزعاج .. بس يا ميــــن يفكنــي منه

ظروف خارجية تحتم علي أن أبقى على إتصال دائم

وما أخرجني من عزلتي مع نفسي سوى البرودكاستات و مسجات الوكالات الإخبارية التي تنصب بالعشرات يوميا على جهازي المسكين

كلها بلا إستثناء مليئة بالشكوى و التذمر و السباب و الإمتعاض و التهديد و الوعيد و الصراخ

و بما إني أمتلك عقل فوتقرافي كما يقول لي البعض

فإن خيالي له القدره على أن يصور لي أي خبر أقراه بلمح البصر

أصور الكلمه بأقل من جزء من الثانيه

بمعنى .. لو يجيني مثلا مسج نصه : البراك يهدد الملا

فتلاقيني على طول تخيلت صورته وهو واقف وماد ايده و يصرخ بل تراني أحيانا أغمض عيني بشده و أرفع ايدي و اسد فيها أذني و كأني فعلا أسمع صوته

مزعج التصور و لكن ما في اليد حيلة

لا أنكر أن ثقافتي السياسية بسيطة جدا .. بل قد تكون محدودة .. قاعدة أقول محدودة و ما قلت معدومة

أو أقدر أقول باختصار .. أن ثقافتي السياسية هي نتاج ما مر علي و عايشته من أوضاع في فترة الخمس أو الأربع سنوات الأخيره .. التي حتمت تقريبا على الكل .. إما أن يكون سياسيا .. أو له رأي بالسياسة .. أو على الأقل قادر على أن يتحدث فيها .. سواء بمنطق أو من غير منطق

آنا ما أعرف خالد الفضالة شخصيا .. و لا أعرف الجاسم .. ولا حتى أعرف رئيس مجلس الوزراء

ولا أدري الأول شقال للثاني .. و لا أدري الثاني شقال للأول

ولا حتى يهمني أعرف

كل ما يهمني و يشغل بالي و طلعني من جوي الرايق هي الهندسة اللي انبنت عليها السالفة

الآلية و التكنيك

بغض النظر عن الأشخاص و الأقوال و الأفعال

كل إللي آنا أشوفه ما يلي

إكس تكلم عن واي بالعلن

واي إعتقد إن في كلام إكس نوع من أنواع الغلط و المساس بشخصيته

واي ما يبي يسكت و عنده طريقتين ياخذ حقه فيهم

إما إنه يدبر مكيده و يهجم على إكس على غفلة و ممكن ياذيه أو حتى يذبحه .. أو إنه يمارس حقوقه اللي يكفلها له القانون و يتوجه للقضاء اللي المفروض يعطي كل واحد حقه و يحكم بينهم بالعدل

عاد القضاء يحكم لصالحه - واي - أو مو لصالحه فهذا شي المفروض خارج عن إرادته

هنا أنا أفترض أن واي ليس له تأثير و غير فارض أي نوع من انواع القوى التي قد تغير من المسلك الطبيعي و القانوني للقضاء العادل .. و هو بنفس الوقت ليس بمشرع لأي قانون أو عقوبة من العقوبات التي قد تقع عليه أو على خصمة

فاهميني ؟؟

يعني آنا أستغرب ليش الكل متحامل على واي لأنه توجه للقضاء و هو حق من حقوقه المكفولة

يعني اللوم قد يقع على القوانين أو العقوبات المشرعه أو التقنيات المستخدمه .. بس مش اللي قاعد يصير

أنا بوجهة نظري المتواضعة أرى أن بعض ردود الأفعال للأسف غير حيادية

فمثل ما الحب أعمى .. الكره أيضا أعمى

فبغض النظر عن إيجابيات و سلبيات واي .. أتوقع كل هالنرفزة و الغضب الموجه عليه لأنه إستخدم حق من حقوقه مالها داعي .. كان المفروض لكل هالثورة أن توجه لمصب آخر

يعني اوقف بالشمس و أعتصم و أصرخ و يغمى علي و أمشي بمسيرة من الخيران لي خيطان عشان شخص استخدم حق من حقوقه فهو شيء لا أراه منطقيا

يعني يا أنا مخي فيه خلل يا مادري .. صراحه صرت عاجزه عن فهم أي شي

مظاهرات الشعب وايد .. و اعتصاماته اكثر .. و المسيرات زادت

أحس مرات إني عايشه في اليونان مو الكويت على كل هالثورة الشعبيه في الشوارع

اللي مرات لها مبرر و مرات مو على سنع كلش

يأسفني ان أقول إني كرهت الديره .. و كرهت الناس .. و كرهت حتى الكره فيني

كرهت كل شي إلا الأرض .. لإيماني ان الكل زائل .. إلا الأرض ولو كانت الديمومه وقتيه بس

ما كان يسهرني الليل قبل إلا اني افكر بسيارة جديده .. أو وين بسافر هالصيف

أكبر همي كان تنورة و بنطلون جينز

بس إني أسهر الليل بطوله ليما تشق الشمس أفكر بالكويت فهذا شي جديد علي

الكويت مأرقتني

معيشتني بأرق

بيني و بينكم .. مرات تاخذني الأفكار يمين و يسار .. ليما تخنقني العبره و أقعد أبجي

أبكي بحرقه مثل اللي فاقد له عزيز

ما أدري .. هل حسي الوطني زايد من غير مبرر

أو إني حساسة شوي

أو إن هذي بوادر إكتئاب ؟