Monday, July 19, 2010

الكويتيووون و الإستقبــــال



اليوم جتني دعوة من إحدى الصديقات لحضور حفل إستقبال بمناسبة إنها شالت تقويم الأسنان اللي كانت مركبته


متخيل معاي حبيبي القاريء ؟؟


حفل إستقبال و بوفيه و دي جي لأنها شالت التقويم


آنا مادري إذا سوت ليزك و قطت النظاره شبتسوي ؟؟


شسالفة الكويتيين (اللي عنده عقده من هالكلمه يطوف عشان خاطري) و الإستقبال ؟؟


ولدت .. إستقبال


طلعت من الأربعين .. إستقبال


طلع للياهل ضرس .. إستقبال


الضرس نفسه اللي طلع طاح .. إستقبال


قط الحفاظه .. إستقبال


مشى .. إستقبال


تخرج من الروضه .. إستقبال


انفلع و خيطوا راسه .. إستقبال


الولد سافر و رد .. إستقبال


شرى سيكل .. إستقبال


دش سجن و طلع .. إستقبال


سدد قرضه .. إستقبال


ومن هالمناسبات العبيطة إلى الأعبط منها


قبل فتره كنت زايره زميله لي بالدوام والده .. و كالعاده .. أكيد مسوية إستقبال


لا إله إلا الله


عرس عرس مو ولاده


آنا داشه جنه أحد معطيني كف


نادرا ما أروح ..الإستقبالات مو جوي


نص الغرفه الكفر مالها طبعا


و كوشيات منثره تحت عالأرض


نظام الجوارح و الكواسر إذا تذكرون


نوافير و ماي و كوشه و مسرح حاطين السرير فوقه


شالات و قطع خام منثره على الأرض


و الوالده هي و الكفر و الشراشف و الستاره و الطاوله و مطارة القهوه واحد .. كلهم طقم .. لوما هي عندها وجه و تتحرك ما فرقت بينهم


و الياهل يا بعد عيني لافينه بكشكش و كفر و دانتيل و ورد .. زين ما اختنق من الستين قطعه اللي فوقه


آنا أمشي و اطالع عزكم الله مداس رجلي أخاف أدوس على كفرها و لا أشوت لي كوشية بالغلط و آنا مادري وأنزف


طبعا ستعش فلبينية بالغرفه .. كلهم مطقمين مع الكوشه و السرير و الكفر


و يوزعون كيك .. مادري شمع .. مادري صابون


ماني عارفه هذا اللي يتوزع شنو بالضبط ف ما غامرت و جربت آكله


غير الكاكاو اللي مسوين عليه حركات .. لافينه ب تسعين قطعه و ملزقين عليه عشرتعش لعبه


تتحدى ذاتك علشان بس تعرف من وين تفتحها


على ما تفجج فيها إلا إنت طالعه روحك .. هذا اذا ما تنرفزت و عصبت و حذفتها بعيد


من شروط فتح الكاكاو أن يكون معدل الآي كيووو عندك خمسمية نقطة


و طبعا الإخت اللي والده .. عروس ما شاء الله


آنا مادري متى مداها ولدت و خلصت


الميك أب ؟؟ ولا حفل توزيع الأوسكار


أي أوسكار !! الله يحلل ربع الأوسكار .. ما يهولون جذي


المهم .. مكياج و الشعر كاويته .. و بف و على قلبها طقم كاسر رقبتها


و ضحك و سوالف و غشمره


ويييييييييين يقولون بالولاده .. الوحده تموت و تحيا


روووووح تطلع من روووووح


طلعت أمي ما عندها سالفه و تسوي أفلام


حسافة ما خذتها معاي


أوووووه


على طاري الأفلام


اليوم وانا أفتر من قناة إلى قناة ولا مذيعة من مذيعاتنا الشباب في إحدى القنوات


مندفعه و متحمسه تتكلم عن المغالاة في المهور


واهي مندمجه و مشتطه قالت


يــــا جمـــاعة .. الله سبحانه و تعالى قال .. مدوا ريولكم على قد لحافكم


متخيل حبيبي القاريء ؟؟


لا حول ولا قوة إلا بالله .. إستغفر الله العظيم


آنا أموووووت و أعرف الله متى و وين قال هالجمله
at

39 comments:

  1. FrankomJuly 19, 2010 at 11:07 PM

    بوستج بكبره يبيلة استقبال
    :)

    ReplyDelete
  2. SHOOSHJuly 19, 2010 at 11:14 PM

    Frankom
    ========

    أبي كوشه بعد

    ReplyDelete
  3. DoDoq8July 19, 2010 at 11:29 PM

    شفيها المذيعه معقوله !

    اخاف يعني بتوضح معنى حديث او شي

    استغفر الله بدعو المذيعات

    ReplyDelete
  4. هديــلJuly 19, 2010 at 11:45 PM

    امم ع الاستقبال لااا تعليق

    على قولتج كل شي سووله استقبال :/

    بس هالمذيعة هذي حمدلله والشكر

    يبيلها كف يعلمها شروط المذيعة الناجحة :)

    مشكووووورة شووش =)

    ReplyDelete
  5. مَـــــعْــــمَــــعَـــــهJuly 20, 2010 at 12:03 AM

    محد قالج يا عزيزتي انه الكويتيين فسقانين والاستقبال صار نفس السلام عليكم على كل شي استقبال ... ولا احد يرد من الحج يسوون له استقبال وين قاعدين لا والكاكاو على الكعبه بعد

    وتقول الله يقول مدو ريوولكم ها طيح الله حظها وحظ القناة اللي تطلع فيها " أكيد العداله "

    ReplyDelete
  6. Almost BloggerJuly 20, 2010 at 12:21 AM

    الاستقبال فن كويتي أصيل ...متأصل في عقول البنات وصار جزء من الثقافة العامه...يبيلنا في الكويت اكستريم ميك اوفر لهذه الافكار ...شكله بسوي لي حمله مثل الباجي " استقبال خله بعيد عن البال"

    ReplyDelete
  7. le KoweitJuly 20, 2010 at 12:22 AM

    لوووووووووول
    كله بكوم
    والمذيعة اللي اخر شي بكوم
    لووووول

    هذي سوالف الكويتيات بعد شنقول
    الحمدلله على العقل :p

    على سالفة المذيعة ذكريتني بسالفة مثلها
    احمد الجارالله رئيس تحرير جريدة السياسة
    كاتب مرة افتتاحية الجريدة
    وانا قاعد اقراها انصدمت ابدلية
    كبر راسه ما اترقع
    يقول قال الله عز وجل
    من راقب الناس مات هما
    @_@
    متى ووين وشلون؟؟
    الله العالم :)

    ReplyDelete
  8. QiYaDiYaJuly 20, 2010 at 1:07 AM

    بوست يبرد الجبد،،
    اكره الاستقبال خاصة لما يكون ما عندهم سالفة
    ماحب سالفة
    ملجة = حفلة
    عرس= حفلة و خبة
    ليلحين نتحملها
    بعد سنة و الناس نست انها تزوجت
    استقبال و خبة و لوية
    و بعدها بجم شهر حامل ولدت و خبت عمرها!
    ما نخلص!

    ReplyDelete
  9. ebreeqJuly 20, 2010 at 3:46 AM

    لوووول


    الرجل ياعيني عليه اهو اللي ماكلها
    يدفع عن يد وهو صاغر

    :)))

    أما المذيعه


    صراحه دمها خفيف
    :)

    يبيلها حفل استقبال على هالكلمه

    ReplyDelete
  10. الزينJuly 20, 2010 at 7:42 AM

    شوش

    من كثر ما اكشب بالإستقبالات محد صار يعزمني

    :)))

    شهالعبو
    ناس عندها فلوس زايده وتحبذ التفيشر
    وناس حفاي وقاعدين يقلدونهم

    اقول
    ترى اذا سويتي استقبال عشان اللي خبرج ماني يايه

    :)

    ReplyDelete
  11. AnonymousJuly 20, 2010 at 8:01 AM

    صج؟ قاموا يسوون إستقبال حق شيلة التقويم؟

    عاد الكويت كلها حاطة تقويم! أنا إذا شلته إنشاء الله بسوي إستقبال و بييب لي بوفيه و استفرد فيه بروحي لأني المعزومة الوحيدةو بعوض سنين حرمان البلعة و السبة التقويم

    إنما اجابل الناس شكو؟ لازم أوريهم ضحكتي اليديدة لأني دافعة فيها فلوس؟

    ReplyDelete
  12. AnonymousJuly 20, 2010 at 8:04 AM

    ما عندهم ســـالفة



    اما المذيعة !!
    وخزياااااااه ..ومفروض مثقفة
    مالت
    ************************

    ReplyDelete
  13. الوتيــــــــــنJuly 20, 2010 at 8:31 AM

    كله بصوب والسالفة الاخيره ... الأخت فرعون يب يقره قرآن .. ليش التفلسف دامها ماتعرف وااااااااي

    تدرين عاد شوش سالفة الاستقبالات تييب لي الحارج .. الحارج الصجي مو مجازي .. من تقعدين يلقمون فيج جنج يايه تقرقعين مو تباركين

    بس ترى عن الحلال والحرام نسيتي .. لمن احد يتعرجب .. مايسوون استقبال !!! غريبة


    خوش بوست عالريج
    صباحج استقبال :*

    ReplyDelete
  14. SHOOSHJuly 20, 2010 at 8:40 AM

    يا صبــاح الأنــوار عليكم جميــعا


    كيف أصبحتم ؟؟


    عساكــم بخير ؟؟


    DoDoq8
    =======

    ولا حتى حديث

    آنا ما مر علي حديث فيه رجول و لحاف

    حايسه بين أمثال أمها و كلام ربها

    ReplyDelete
  15. SHOOSHJuly 20, 2010 at 8:41 AM

    هديل
    ====

    كف عاد

    :)

    يا مجرمه

    العفو حبيبتي

    على إيش بس على إيش

    :*

    ReplyDelete
  16. SHOOSHJuly 20, 2010 at 8:43 AM

    معمعمه
    =======

    آنا صارت عندي عقده من الكاكاو


    ما قمت أميز بينه و بين أي شي ثاني يتوزع


    يحوووشني رعب من يعطوني شي

    حتى أخاف أمسكه بيدي

    و القناة يا إنها فلاش يا العداله

    وحده منهم

    ReplyDelete
  17. SHOOSHJuly 20, 2010 at 8:45 AM

    AlmostBlogger
    =============

    لوووول


    حمله بعد


    حج حج مو إستقبال


    :)

    ReplyDelete
  18. SHOOSHJuly 20, 2010 at 8:47 AM

    Le Koweit
    =========

    لووووووووووول


    ايه اللي بيحصل ده ؟؟


    تصدق عاد ؟؟


    عندي رد بس أخاف أكتبه هني صراحه

    لا أجرء

    ReplyDelete
  19. SHOOSHJuly 20, 2010 at 8:49 AM

    QiYaDiYa
    =========


    الناس عاوزه كده


    هذي إهتمامات الشعب

    ReplyDelete
  20. SHOOSHJuly 20, 2010 at 8:51 AM

    ebreeq
    =======


    لوووول


    أي حفل إستقبال


    !!!

    يبيلها إستجواب و انت الصاج

    ReplyDelete
  21. SHOOSHJuly 20, 2010 at 8:52 AM

    الزين
    =====


    لا بسوي


    :)


    و بلبس نفنوف عشر طبقات


    وان ما جيتي يا ويلج


    :)

    ReplyDelete
  22. SHOOSHJuly 20, 2010 at 8:53 AM

    danderma
    =========


    لووووول



    اي والله


    تعبانه على أسنانها


    لزوم تسوي استقبال نشوفهم

    :)

    ReplyDelete
  23. SHOOSHJuly 20, 2010 at 8:56 AM

    aL-NooR
    ========

    من قالج المفروض مثقفه ؟؟


    عادي يبا


    الدنيا سهالات

    ReplyDelete
  24. SHOOSHJuly 20, 2010 at 8:57 AM

    الوتيــــن
    ===========


    :*

    ReplyDelete
  25. AuThoressJuly 20, 2010 at 9:21 AM

    احيانا استقبال رد فعل ع الاستقبال :/ المصيبة الكل يشتكي .. منو عيل اللي يسوي ؟


    تعبنا

    ReplyDelete
  26. Queen alwazzanJuly 20, 2010 at 11:23 AM

    لووووووول
    يعطيج العافيه ضحكتينا على هالصبح :P
    صج لي قالو احنا ناقصات عقل و دين :D

    ReplyDelete
  27. Queen alwazzanJuly 20, 2010 at 11:23 AM

    This comment has been removed by the author.

    ReplyDelete
  28. الرايةJuly 20, 2010 at 11:56 AM

    دستي على الجرح والله

    لاتيبين طاري الاستقبالات ترى ابجي وانووووووووح

    تخليك قاعد يم باب اقرب مسيد وتقول حسنه لله يامحسنين

    البنات هاليومين مصيبه مابقى الا شي واحد ماذكرتيه لما تطلب خدامه وتوصل تسوي استقبال

    والمذيعه هذي عرفتها مو اللي شكلها توه طالعه من المطبخ ومسوية ماش وربيان ؟؟؟

    ReplyDelete
  29. Sweet RevengeJuly 20, 2010 at 12:16 PM

    ماشاء الله عليج ابدعتي الصراحة
    :)

    ReplyDelete
  30. نـ(المطيري)ـازكـJuly 20, 2010 at 6:23 PM

    هالمذيعه دايخة استفرالله هههههههههههه

    يامعوده خليها يمكن يكون بجرها ..

    دام الواحد الله مرهي علية ليش مايسوي ..

    ^_^

    ReplyDelete
  31. MaramJuly 20, 2010 at 7:01 PM

    يدورون اي عذر علشان يسون أستقبال

    أما المذيعه ما أقول الا الحمدلله و الشكر أتثقفوا فضحتونا
    مشكووره علي البوست الحلو

    ReplyDelete
  32. شاي الضحىJuly 21, 2010 at 1:05 AM

    حق التفلسف واغلبهم على قد حالهم

    يضغطون على عمرهم على غير سنع

    وشنو هالمذيعه استغفر الله

    شكلها وايد مثقفه ههههههه

    شكرا

    ReplyDelete
  33. Mariam B.D_Q8July 21, 2010 at 3:58 AM

    لوووووووول
    صج الاستقبالات مصاخه
    او تفلسف على الفاضي
    لا او في منهم ياخذون قروض على شان اتفلسف اللي من غير سنع
    او امه المذيعه بعد هذي فلم ثاني
    اذا القناة الكويتية صدقيني فيها استجواب وزير

    ReplyDelete
  34. why meJuly 21, 2010 at 8:25 AM

    ما كان في دي جي؟


    ;p

    ReplyDelete
  35. Engineer AJuly 21, 2010 at 9:45 AM

    looooooooooooooooool

    SHOOSH

    BDA3TAAAAAY!! :))))))

    wallah 9ajah bkil shy gelteeeh hehehehe 9ij 9ij kil shy 3ndna 9araw esawoon lah esteqbal mo ay estqabaaaaaaaaal 3ers mo9a'3ar!!

    o 3la elmotheee3ah bda3at!! o la ta3leeq !!!

    3laa fekrah tra lel7een ma radait mn USA,, legait lich Munchos yebtlech 5 (kil ellee kaan 3la elraf!!) madree shlon bayebah elq8, shaklah be9eer harees 3la ma ow9al! :)

    ReplyDelete
  36. AnonymousJuly 21, 2010 at 7:52 PM

    الحمدلله اكو كويتيه تنقد على سوالف بنات جنسها
    لا وعلى شنو على الإستقبالات إللي لو ماعندنا شوية نفط
    كان سببت أزمه في الميزان التجاري
    كفو فضحى سوالفهم
    يمكن يتغيرون

    ReplyDelete
  37. رورو الشخبوطهJuly 22, 2010 at 4:32 PM

    اختي عندها هوس استقبال ..

    بخليها تقرا البوست..

    لا لا لا هونت اخاف تطبقه خخ..

    و ع المذيعات اغلبهم مايهتمون بالمضمون كثر ماتهتم شلون تخرع المشاهد اقصد تكشخ ..

    ومشكوره..

    ReplyDelete
  38. fattoJuly 23, 2010 at 3:26 PM

    امبيييه بدعو بدعو بدعو .. والله اسم لستقبال يفشل (عشان شالت التقويم ) يعني على اي سخافه يسوون استقبال .. اللهم لك الحمد والشكر على نعمه العقل .

    والكواسر الصراحه بدعو لووول

    ReplyDelete
  39. AM.SA.CHANNELJuly 27, 2010 at 1:26 PM

    لاحظت إنتو وايد تهتمون بسوالف الإستقبال
    نحنا نسميها عزيمة لكن على وصفج إنتي و البقية اللي كانوا كاتبين بعد عن الإستقبال أحس وايد مزوديينها و أنا على بالي قبل اللي كانت كاتبه أو كاتب نسيت منو إنهم يبالغوون .. لكن اشووف الحين بوستج و الردود إنه ماشاء الله زايده عندكم الإستقبالات هههههههه بس هاي اللي عاقه تقويمها رهيييييييييييييبه هههههههههههه
    ناقص تحط فص على ظرسها عشان الكل يطالع ظرووسها

    و هاي اللي طالعه من الأربعين مازاغت على عمرها و على البي بي حد يصكا بعييييين

    ياربي ما أحب هالسوالف يوم تكثر تتعبين أصلا

    على فكرة مدونتج حلوة و تسلي

    ReplyDelete

Leave me ur comment !