طـــواريء

أسوء ست مادري سبع مادري خمس ساعات قضيتها بغرفة الطواريء

اي نعم .. مريضه .. و لوهله عبالي اني بمووت

المهم

كنت سرير رقم ثلاثه

سرير رقم واحد عليه بنت بالثانويه مستعبطه

إلا غصب رجلي مكسووووره

لا و تبجي ما تبي تطلع و ترد البيت

يقول لها الدكتور ما فيج شي

ملزمه و راكبه راسها .. لأ رجلي مكسوووره .. سووولي أشعه

و لما سوولها أشعه و طلع ماكو كسر قامت تصيح

رجلي فيها تمزق

لوووووووول

مزقتي قلبي من الضحك يالعبيطه

المهم

سرير رقم أثنين عليه مره عجوز فيها أقل شي ثمانين تسعين سنه

الله يشافيها و يطول بعمرها

الحجيه جايه الطواريء تمشي على رجولها و مصره أيضا

مو بس مصره عندها إيقان إن فيها شلل

تصيح رجلي انشلت و رجلي انشلت

ما أحس فيهم .. رجلي تحرقني

يقول لها الدكتور ما انتي بتمشي يا ست

ترد عليه .. اي امشي بس رجلي منشله

يا حليلها .. عورت قلبي بس فطستني ضحك

انا عاد ما كان عندي سيرفس و لا أكو شي أضيع وقتي فيه .. بالعاده هذا وقت البلاك بيري

جان أتليقف و أكلم الحجيه

قلت لها خاله ترى لو رجلج منشله ما تقدرين توقفين عليها تطيحين

آنا آاااال يعني بفهمها

جان تقولي .. اي انتي ما شفتيني طحت ؟؟

قلت لها لأ !! شفتج تمشين

جان تعطيني كف لغوي و قالت لي .. بلاج مثل الدكتور ما تفهمين ولا تعرفين بالشلل

ما يعرف للشلل إلا اللي منشل مثلي

لووووول

المهم

هذيل يهونون

انا الممرضات مجابليني و مدلعييني .. الي تشربني ماي .. و اللي تدلكني .. و اللي تغطيني

و الحياة عندي فله

لين جت صاحبة السرير رقم أربعه

يا إلهي

من دشت كل الممرضات هدوني و ركضوا لها

والله إني نص ساعه أنادي و أطق جرس محد معبرني

المغذي خلص أبي أحد يشيله حاقريني

عمك أصمخ

كلهم تجمعوا عليها و ناموا تحت سريرها يخدمونها

و اكشتوا فيني انا و العجوز أم شلل كاذب و البنيه أم تمزق

السؤال الآن

اللي يقول لي صاحبة سرير رقم أربعه منو له مني هديه

المفروض بسرعه تعرفونها

:)

أخيرا

إحسب كم عددالمرات التي ظهرت فيها كلمة رجل .. رجولي .. رجلي بالبوست و إرسلها على بريدنا الإلكتروني و اربح معنا مليون ريال سعودي

يالله

ناطره الشاطر فيكم

:)