ندوة اليوم .. التدوين في الكويت

ماني متكلمه عن الندوه

بس في شي لازم صفاة و القائمين عليها يعرفونه

و آنا طالعة من الندوة .. و بالتحديد عند إشارة المرينا

وقفتني دورية

نادوني بالسبيكر مالهم و صفطوني يمين

و خالفوني

مخالفة قيمتها 50 دينار

ألحين بتقولون ليش خالفتج الدوريه

آنا طفت الإشارة الحمرا .. بس والله و بالله مو قاصده

تعرفون الوضع إلي .. هااا ؟؟؟ أمشي و لا أوقف ؟؟؟ إلي قرارك بالحالتين غلط ؟؟؟

إلي تكون مسرع و على حظك الإشارة تقلب حمرا ؟؟؟

هذا كان وضعي

ومن رداة حظي الإشارة إلي يدامي بالتقاطع أول سياره فيها دورية

بس ما انتبهت لها إلا عقب ما طفت

مو دورية صغيره !! دورية جمس بعد

المهم ما علينا

أنا أطالب صفاة إنهم يدفعون مخالفتي

بتقولون ليش ؟؟؟

آنا أقولكم

لأنكم لو تحللون السالفة و تردون لي جذور المخالفة بتعرفون إن صفاة المتسبب الأول فيها و بالتالي وجب على صفاة دفع المخالفة

يعني لو آنا مو مجتهده جان ما رحت الندوة

صح ؟؟

بس آنا مجتهده .. و أحب صفاة .. و رحت علشان خاطرهم الندوة و رديت محملة بمخالفة

بالله آنا جم 50 دينار بمعاشي يعني ؟؟؟

يعني لو آنا مو رايحة و قاعدة بالبيت جان محد خالفني

المهم

آنا أناشد كل إخواني و أخواتي المدونين و المدونات

و خصوصا إلي حضروا الندوه

يساعدوني و ينضمون لي في حملة

إدفعــــها

و بميزان أعمالكم إنشالله

:)

العميــــده

عمتي .. بس بالضبط بالضبط هي عمة أبوي .. إخت جدي يعني

أتوقع هي عميدة العايلة .. ما أدري صراحه إذا في أحد أكبر منها و يستحق لقب العمودية أكثر منها

بس إن ما خاب ضني هي أكبر وحده

عمتي هذي مخرفة

بس تخريفها على كيفها و على مزاجها

يعني تفصل و تطقها خرفنه إذا بغت .. و ترد صاحية و مخها يوزن 60 بلد إذا بغت في أحيان أخرى

أكبر إقتصادي بالدنيا ما يقدر يقص عليها بالفلوس

عمتي عايشة في بيت بروحها .. جنية ما تخاف .. ما تبي أحد يقعد معاها .. هي و خداماتها و عندها ممرضه تروح و ترجع عليها

عيالها و عيال عيالها الكل يروح لها ما يقصرون فيهاا .. بس ما تهد بيتها و لا ترضى أحد فيهم يقعد عندها

ما علينا

في المناسبات الرسمية و الأعياد مثل رمضان .. العيدين .. و في حال كانوا الأهل مشغولين .. لازم كل عايلة تدز مندوب منها يسلم على العمة

يعني مثلا إذا أبوي راح بارك لها بالشهر ما يبين بعينها .. لازم أبوي يدز مندوب من عياله عقب يومين أو ثلاث يروح لها بعد

وهكذا هو العرف مع عمتي

وصوني أمر عليها بشهر مضان أبارك لها بالشهر و أوصل لها تحيات العايلة العطرة .. بس بصراحة ما رحت .. أول شي لأن عمري ما رحت لها لحالي .. ثاني شي لأن لسانها طويل .. ثالث شي لأن ماكو شي إن كــومون بيني و بينها

وصوني أروح لها مره ثانية أول أيام العيد .. مو وصوني بالأحرى دبسوني و غصبوني

رحت آنا و إختي

دشينا عليها دارها و لا منسدحة

طبعا هي تستقبل الناس بدارها .. ما يدور عندها صالات و إستقبالات

و كان الحوار التالي

شوش: السلام عليكم عمتي .. ألقي السلام بكل حماس و مجبلة عليها ببوسها بعد

العمة: عمة بعينج إنشالله حتى عمة بعينج

شوش: هذي شفيها !!! الشرهة علينا يايين نسلم عليها

إختي: ما عليج عادي طوفي مره عوده و مخرفه

شوش: تجدمت بحب راسها .. ما كو يأس .. ما شالت راسها يعني بس تحوس فيه يمين و يسار .. تتغلا

إختي: شلونج عمتي ؟؟ شفيج الله يهداج تزفينا ؟؟ إنتي زعلانه؟؟

عمتي: إي زعلانه .. إحد يجي يبارك خامس أيام العيد

لوووووول لا حظوا خامس أيام العيد ها

شوش تساسر إختها: كـــــــــاك .. أي خامس !! العيد العود إن ذبح عمره أربع أيام من وين يابت عمتي خامس

إختي: إي فقيرة ما تدري وين الله قاطها .. هذا أرذل العمر خرفت بعد عمري

شوش: عمتي الله يهداج اليوم أول أيام العيد شفيج !! أصلا ما مرينا على أحد قبلج .. إنتي أول وحدة

عمتي: إي أدري إنه أول يوم بس علامكم محد فيكم مرني برمضان؟؟

شوش: إمبلا عمتي مريناج شفيج نسيتي

إختي: يالنصابة ما مريناها !! ليش تقولين لها مريناج؟؟

شوش: ألحين إنتي مو تقولين مخرفة !!! بالله شدراها جيناها ولا لأ !! قولي إي و خلاص

عمتي: أيا اليواره !!! عبالج ما أعرف !! عبالج ما أذكر !! محد فيكم مرني .. يالله !! يالله قوموا طلعوا من بيتي يالله .. و روحوا قولوا حق اللي مطرشكم مابي أحد فيكم يجبني

إختي: تقوم و تبوس راس العمة .. عمتى الله يهداج شفيج علينا محد مطرشنا بروحنا يايينج إحنا نحبج

العمة: لااااا آنا أدري منو مطرشكم .. ولا إنتوا ما تيوني بروحكم .. هذا أخوووووي مطرشكم

شوش: مالت عليج و على **** فوقج زين .. من دشينا و أهي تسب و تزف و تجعم زين ما قامت طقتنا

إختي: شوش إستحي على ويهج عيب جذي!! المرة مسكينه ما تدري وين الله قاطها قومي يالله خل نروح قبل لا تعصب أكثر

شوش: عمتي ماكو عيدية ؟؟

العمة: إنشالله لما يجي العيد أعايدكم .. تبون ماي؟؟

شوش: صج نصابة !!! مساع كان خامس أيام العيد و ألحين تسوين روحج ما تدرين عن شي

و بس طلعنا

كانت زوراة مضحكة مبكية

بس ما عليكم فيها .. لا مخرفة ولا شي .. تستعبط بس

سؤال أون ذا سايد ماله علاقة بالبوست .. منو من المدونات البنات بيحضرأكيد مؤتمر التدوين اللي بيصير الأثنين الياي؟؟؟ طبعا آنا بكيفي سويته مؤتمر .. المهم .. إذا في أحد بيروح يدز لي إيميل .. لأني بصراحة أخاف أروح و يطلع ماكو بنات .. بإختصار أبي وحدة ألزق فيها و أقعد يمها و أحن على راسها و ألوع جبدها .. لأني خجولة جدا جدا جدا و أستحي و أستاحش من الزحمة و لوية الناس

ملاحظة أخيرة: الصورة مو صورة عمتي

و شكرا

:)

أنــــور الســـــادات

أثناء مشاهدتي للفلم الأمريكي

I Love You, Man

إستوقفني المشهد اللذي يتحدث فيه صديق البطل عن كلبه و إنه مسمي الكلب أعزكم الله أنور السادات

يسأله صديقه إن كان سبب تسميته بهذا الإسم حبه و إعجابه بسياسات الرئيس السابق أنور السادات فيرد عليه و يقوله لا و لكن لأنهم يتشابهون في الشكل

السيدة رقية محمد أنور السادات كريمة الرئيس الراحل كانت قد قدمت بلاغ ضد عرض الفلم و ذلك لأنه يتضمن إساءة لوالدها

في حين أن طلعت السادات صرح بأنه قرر تجاهل الإساءة لإعتقاده إنه فلم تجاري قائم على الكوميديا فيجب التقليل من أهمية الإساءة

و إنه يشعر بالفخر إن إسم أنور السادات معروف لدى الشعب الأمريكي حتى يلجأ أحد الأفلام إلى استخدام الإسم في إطار الكوميديا

جدير بالذكر إن الفلم هو فلم كوميدي احتل مرتبة متقدمة في إيرادات الأفلام الأمريكية طوال 11 أسبوع

الصورة التالية توضح جزء من أسماء فريق العمل داخل الفلم كما ورد في موقع

imdb

و داخل المستطيل إسم الكلب كماجاء بالفلم

وهذا مقطع من الفلم للمشهد المسيء للرئيس الراحل في برنامج عرض على قناة الحياة

العيــــد

بشروا ؟؟؟؟

شلــــون كــــان العيـــــد ؟؟؟؟

صليتوا العيد ولا راحت عليكم نومه ؟؟؟؟

بالديره ؟؟؟؟ و لا سافرتوا ؟؟؟؟

والأهم من هذا كله

خذيتوا عيادي ؟؟؟؟

ولا

وزعتوا عيادي ؟؟؟؟

:)

خير اللهم أجعله خير .. ألبي يرفرف زي الطير

قاعدة أمشي في مول (مجمع تجاري) .. و آنا أمشي في فوقي نسر كبيــــــر .. وين ما أروح يطير وراي

أدش محل يدش معاي .. آنا أمشي تحت و أهو طاير فوق عند السقف .. و كل ما ألف عليه أشوفه يطالعني

أطلع من المحل أمشي بالممرات .. يطلع وراي

أتمشى بالمجمع .. آنا أمشي و أهو طاير فوقي

أوقف .. أهو بعد يبطل يطير و يوقف على العامود

أمشي .. يرجع يطير معاي

طلعت من المول ركبت سيارتي و اهو طاير فوقي بالسما

نسر كبيـــــر .. بالضبط نفس اللي بالصوره .. حجمه وايد عوود و جناحه كبير

شكله يخوف من كبره بس أذكر إني ما كنت خايفه منه .. و كنت كل شوي أطالع فوق أتأكد موجود ولا راح

تالي رحت مكان مثل بر .. فيه زرع خفيف بس الرمل غالب

فعلشان جذي كنت أقول إني بالبر

واهو ليلحين فوقي .. مره وحده نزل تحت لي عندي و خذاني

ما كنت خايفه منه بس لما رفعني فوق خفت وايد

و تالي صحيــــت

هذا حلم حلمته أمس .. و لما قمت كان توه الفجر يشق

تعوذت من إبليس و دفعت صدقه

قلت لرفيجتي حلمي و قالتلي دام النسر خذاج و رفعج فوق بالسما معناته إنج بتموتيــن

:(

خير و لا مو خير ؟؟

إنشاءالله خير

قلبي حــــــــيل ضايج

عالعموم

مبارك عيدكم جميعا إنشاءالله

و تقبل الله صيامكم و قيامكم و طاعاتكم

عسى أيامكم و أيامي كلها عيد إنشاءالله

:*

حـــــرب الــدينـاصـــــورات

هل صحيح إن الرئيس التنفيذي لمؤسسة البترول الكويتية سعـد الشـويب .. بره ؟؟

طبعا بره بذرابه

يعني

إما أن يتم تعيينه كمستشار للمؤسسة

أو يحيلونه للتقاعد

أو إنه يقدم إستقالته

طيب .. إنتهاء العقود باقي له سنه .. يعني تو الناس .. ليش الحنه و المناوشات و نشر الغسيل و ترشيح الأسماء مبلش بدري ؟؟؟

هل ممكن مثل ما تناقلت بعض الصحف إن يكون هذا كله حرب إعلامية و إشاعات الهدف منها الضغط على الشويب علشان يترك القطاع لحاله ؟؟؟

و إذا كان الخبر إلي تناقلته الجرايد فعلا صحيح

فمن بعد الشويـــب ؟؟؟

أتـــوقع بعـــد العيــد بتبدى حرب الديناصورات النفطية .. و كل من بيطلع بلاوي الثاني

دايــــــــم السيــــــــــف

مووودي صاير مووود ميانين .. مره فوق و مره تحت

شوي ميته ضحك و شوي ميته بجي

شوي أصير دينه و شوي أتحلطم على الدين

أصلي القيام تالي الليل لما رجلي تطيح .. ولي خلصت أقعد أطالع روتانا أغاني لي أذان الفجر

شوي أصير فيلسوفه و أتفلسف عالكل و ما أخلى حكمة و لا نظرية إلا و أقطها و آنا أسولف .. و شوي أصير سخيفه و أقعد أنكت و أملق لما تلوع جبدهم مني

أكون ميته يوع و من أشوف الأكل أشبع

شوي راسي حار و مريضه عقبها بساعه أقوم جني غزاله (مو حصان) ما فيني شي

أشتط أمسك كتاب أبي أقرى .. دقيقتين أمل و يصير فيني نومه

الصبح مزاجي عبادي و بالليل أقلب ميامي

أشوف برنامج وثائقي عن هتلر .. عقب ساعتين قاعدة أشوف توم و جيري

أدز مسجات حق رفيجتي و أحن عليها دقي علي بسولف معاج ودي أسولف .. و لما تدق يصير مالي خلقها و أحقرها و ما أرد

رفيجتي متهاوشة مع مسؤولتها بالدوام .. تجي عندي و أستن عليها نصايح و الدنيا ما تسوى و ما يصير جذي و أغير مووود البنت لما ترتاح و تستانس .. تطلع من صوب و أقفل الباب وراها و أقعد أبجي جني ياهل و أقول الدنيا ما فيها خير و الواحد يموت أحسن

مادري شالسالفه

هل ما سبق .. عرض من أعراض إنفلونزا الخنازير ؟؟؟

ما علينا

اليوم قاعده أقرى ديوان شعري حق دايم السيف .. عادي بالليل أقرى قصة يابانيه

:)

المهم .. يا أخي شنو هالإنسان حساس .. أحبه

أترككم مع بعضا من أبياته متمنية أن تحوز على إعجابكم و رضاكم و كل عام و أنتم بخير و حفظ الله الكويت و شعبها من كل مكروه

ومـــا عـــلى الــــدنيا عــجـــــب

THE SEPTEMBER 11 ATTACKS

أغلب ما نحن فيه الآن .. بدأ من هناك

شكرا تنظيم القاعدة .. بفضلكم دخلنا في عقدة لن تنحل أبدا

MAY THE DEPARTED SOULS REST IN PEACE

سكـــــان و تــــاير

ودي أعرف شغله .. ليش كل ما أصفط السياره .. التاير إلي جدام يكون عوي

لما أقول كل ما أصفط فآنا فعلا أعني كل ما أصفط

دااااااايما عوي ياربي مادري ليش

مع إني دايما أتأكد إن السكان يكون سيده

!!!!!!!!!!!!!!

آنا مادري منو معلمني هالشغلة بس أذكر إن في أحد قايل لي إن لازم السكان يكون سيده و مضبوط علشان التاير يكون سيده و مضبوط بعد

بس هالسالفة عمرها ما اضبطت معاي

تتوقعون ليش وين المشكله ؟؟؟

و تقبل الله قيامكم مقدما .. راح الشهر ماشاءالله

بما إني من سكان جنيف .. و بما إنا إحنا حاليا في فصل الخريف .. فيرجى ملاحظة ورقة من أوراق أشجار الخريف المتساقطة و إهيا متعلقة ب تايرالسياره

وترى هذا التاير إلي ورى .. العوي إلي يدام شكله مسخره

Al SABAH BAKERY مخبـــز الصبــــاح

Al Sabah Bakery (Located in Fahaheel, Mecca St.) is one of the very old and traditional bakeries in Kuwait. The Bakery was
established in 1967.

They bake traditional, old fashion cakes and deserts in addition to new cakes of new recipes, petit four, biscuits, bread, toast and others.

All their cakes are natural with no flavorings or preservatives. They use basic materials only such as flour, eggs, butter and oil.

Other than the bakery it self, you can find their delicious cakes at many co-ops here in kuwait as they distribute to them.

You can find it in Shamiya, Qadsiya, Dasma, Salwa, Keifan, Police co-op, Sabah Al-Salem, Jaber Al-Ai, Regga, Sabahiya, Ali Sabah Al-Salem and Fahaheel.

The place has been renovated, but the owners have no intention to change anything to their delicious old fashion recipes as people just love it the way it is!

The cake is very famous specially for Eid early morning breakfast, You can enjoy it along with ur milk, tea, coffe or 7atta pepsi :)

Yaaaah ! and I guess they deliver !

Sallaaaaaaaaaam !

نجمة داود

نجمة داود

بالعبرية: ماجين داويد أي درع داود

Star of David

صارلي تقريبا أسبوع و آنا أقرى مني و مناك و ادور بالإنترنت علي أجد إجابة لتساؤلاتي

ما كو فايده

كل موضوع يناقض اللذي قبله

أبي أعرف أصل نجمة داود ؟؟

أصلا هل كان لداود نجمة و لا لزقوها فيه ؟؟

كيف أصبحت نجمة داود رمزا لليهود ؟؟

لماذا أستخدمت نجمة دواد كشعار للنازيين في الحرب النازية ؟؟

هل لتميزهم فقط و كي يكون لهم شعار حالهم حال غيرهم ؟؟

هل للنجمة أصول يهودية في ديانة اليهود ام إنهم اتخذوها رمزا لهم لتأثرهم بالمسيحية و تقليدا لهم ؟؟

يعني المسيح عندهم صليب احنا ما يصير ما عندنا شي !! أوكي ناخذ النجمة شعار

هل صحيح إن اليهود عندما أخذوا يبحثون في ماض لهم و لم يجدوا شيئا اخذوا هذه النجمة و خطوها على كل حجر قديم أو مخطوطة قديمة و جدوها في القدس ؟؟

متى ظهرت نجمة داود اول مرة ؟

هل صحيح إنها وجدت في الحضارة المصرية قديما و كانت مرسومة على آثارها و إنها كانت رمزا للإله حورس ؟

و تستخدم منذ أكثر من عشرة آلاف سنة عند الهندوس كرمز للقوة ؟؟

و وجدت مرسومة على مساجد للمسلمين في عهد صلاح الدين الأيوبي و إنها أصلا زخرف من الزخارف الإسلامية ؟؟

في بعض الديانات هي رمز للخصوبة و في بعض المعتقدات ما هي إلا تعبير عن علم الفلك و التنجيم

هل إستخدمت في أي حادثة تاريخية موثقة قبل أن يستخدمها اليهود شعارا لهم ؟؟

لماذا يستخدمها المورمن و هم أحد الطوائف المسيحية في كنائسهم ؟

هل كان سيدنا داود يصنع دروعا قد تكون بشكلها قريبة للنجمة و لذلك أرتبط إسمه بهذه النجمة ؟؟

إذا كان الجواب نعم فلماذا نحارب نجمة داود و نحن كمسلمين مكلفين بالإيمان و التصديق بجميع الرسل و الديانات السابقة و بكل ما جاء به هؤلاء الانبياء لأنه جاء بأمر من الله ؟؟

لماذا أقحم إسم داود بالنجمة إن لم يكن له علاقة بها و إذا كانت بالفعل رمز مستحدث ؟؟

لماذا داود مو غيره ؟؟

أسألتي مخربطة و مو عارفة أرتبها بس ودي ألقى جواب

إهيا صح ؟؟؟

تغلط

تزعل

تبكي

ما تنام

تمرض

تكره نفسها

تكره الناس

تحقد

تقسو على نفسها

تلعن حظها

تشتم دهرها

ترجع تبكي

تتعب

فتنام

تحلم

كوابيس

تفزع

تبكي حتى تنام

تصحى مرة أخرى

تحاول أن تنسى

فقد تعب عقلها

و كلت روحها

ومرض جسدها

تفكر من جديد

تفكر أكثر

تقسو على نفسها

تقرر أن تضع الماضي على جنب

تتعلم من غلطها

تحاول أن تسامح نفسها


تغفر لنفسها

فالله غفور رحيم

تقرر ان الماضي أصبح تاريخ

وان اليوم هو اليوم

و الغد هو المستقبل

تعرف نفسها جيدا

مؤمنة بنقاوة قلبها

فلا أحد يعرفها كما تعرف تفسها

تعطي روحها فرصة جديدة

فما يؤنب نفسه سوى ذو الضمير الحي

تنهض من سريرها انسانة جديدة

تبحث عن سلام في داخلها أولا

ومع غيرها ثانيا

تلجأ إلى أصحاب الإختصاص ليساعدوها للخروج من هذه الدوامه

من غير خجل أو حرج

غير مبالية بما يقوله الآخرون

تبحث عن هواية

تقرأ .. و لو كانت قرآءتها من غير إدراك و لا حتى فهم

ترسم .. و لو كانت رسوماتها شخابيط من غير معني

تصور .. و لو كانت صورها مهتزه و غير واضحه

المهم

تبدأ من جديد

سؤالي : إهيا صح ؟؟؟ ممكن الإنسان يبدى من جديد ؟؟؟

كاااااااااااااااااك

قد لا يخفى على بعضكم حقدي الدفين و كرهي البغيض على وانيتات الرقي المنتشره على الخطوط السريعة و الدواوير

و قد سبق لي أن تحدثت في بوست سابق شلون كان ممكن أموت و أدش بشبه و السبه إن الآوادم يقررون إنهم يبون رقي مره وحده و يا يدوس بريك قوي جدامك يا يلف عليك

بالحالتين ممكن إنه يودرك

و يودر اللي وراك بعد

كل يوم و آنا أطالعه من الدوام أشوفهم و أمتعض يعني أتحلطم و أتأفأف و أتمنى لو يشوفونهم البلديه و يفكونا من شرهم

كل يوم أنطر الإشارة تفتح علشان آخذ الخط و أشوف راحوا و لا للحين الجماعة غافلين عنهم

ودائما ما أصاب بخيبة أمل و ينكسر خاطري و ألقاهم ماخذين راحتهم

إشي وانيت أحمر

إشي وانيت أبيض

إشي رقي

إشي فقع

إشي رمان

حتى كلينكس و فوط يبيعون

لوهلة تضن إنك بسوق اليمعه مو الخط السريع

ناقص يجيبون شواذي و طيور و يبيعونهم عالشارع بعد

المهم

اليوم و لله الحمد صوتي وصل و ربي أخذ بثاري

واقفة بالإشاره إلي تنزل على الخط السريع

و وراي دورية

تأملت فيها خير

بس دشينا الخط السريع آنا و زميلتي الدورية

و لا أصحاب الوانيتات يختبون

إشي مداه يشيل بضاعته و يروح

و إشي واحد توهق قاعد يحاسب زبون

و إشي واحد ما مداه يسكر دبة سيارته عدل

و إشي

إشي

إشي واحد نط بوانيته على طول و نسى الرقيه فوق

كااااااااااااااااااااااااااااااااااااااااااااااااااااك

فطست عليه ضحك

إستغفر الله يارب

بدددددددددع

لدرجة إني خذيت يمين وراه بس علشان أصوره

و تالي توهقت و ضيعت

لوووووووول

يمهل و لا يهمل

يمهل و لا يهمل

ملاحظة: الصورة الأولى وأهم توهم بينحاشون و الثانيه أخينا إلى نسى رقيته و مانزلها