Monday, October 5, 2009

يا فتاح يا عليم ..يا مغازلجي يا لئيم





صبــــــــاح الخيــــــــــر


كيف أصبحتم ؟؟؟؟ إنشالله بخيـــــر ؟؟؟


اليوم قعدت من النوم الساعة سبع الصبح .. عندي شغله بخلصها على العشر .. من أمس كنت مقرره إني أصحى مبجر و أروح أقعد لحالي بكوفي شوب عالبحر أغير جو و أقرى كتابي .. بما إن الجو صاير صراحه عجيب الصبح فكانت فرصه أطلع


الساعة ثمان إلا ربع بالضبط كنت قاعده في كاريبو كوفي .. بما إني ما أحب القهوه .. فشربت عصير برتقال و كليت براوني لأني كنت ميته يوع


بلشت أقرى كتابي .. و بعد مرور ربع ساعة بالضبط و إذا بي ..... أسمع صوت تصفـــــيــــــــــــر


إلتفت وراي بشوف شالسالفة (لأن أصلا كان فاضي و مافيه إلا آنا) و ياليتني ما التفت .. ولا شباب أثنين قاعدين يضحكون


قلت بيني و بين نفسي بعد ما رديت راسي بكتابي .. الحمدلله و الشكر !! و الله فراغه !! شمقعدهم هذيل من الصبح ؟؟؟


في أحد يغازل على الريج !!! بعدين شخباري فكرة المغازل أصلا !! منو يصفر هالأيام !! كناري آنا تصفر لي ؟؟


المهم .. تغافلت التصفير و رديت أحاول أركز في كتابي .. حلفت ما أقوم .. آنا طالعه و طاقة طريج من الصبح و الجو شحلاته .. محد يخرب طلعتي



و في وسط إمتعاضي و تحلطمي على روحي و إذا بالشاب رقم واحد يصرخ قائلا


شاب رقم 1 : يا حليــــــــــــــلها قاعده تدرس


شاب رقم 2 : لا و فرنسي بعد

شاب رقم 1 : بووووووووووووووو نجوااااااااااااااااااااااااااااااااااااار


شاب رقم 2: يو قو إكسااااااااام تودااااااااااي ؟؟؟


نعم ؟؟؟؟ بونجوااااار شنو ؟؟؟؟؟ بونجور بس على وزن بونسوار مثلا ؟؟؟؟ و بكيف منو إستنتجت إني قاعده أقرى فرنسي يا خبل يا بو إكساااااام ؟؟


و آناأسمع كلامهم كانت ردت فعلي كالآتي طبعا بيني و بين نفسي

Excuse meeeeeeeeee !!!!!

Seriously !!!!!!!!!!!!


تعوذت من إبليس و قلت أكيد بيذلفون الحين لما يعرفون إني ما راح أرد عليهم .. أصلا طول الوقت و آنا عيني بكتابي و مسويه روحي صمخه بيملوون و يقوموون .. توني قاعده حرام أقوم ألحين أصلا ما قريت شي


و في وسط الإمتعاظ و بعد ما ملوا مني فإذا بهم يتحركون بعيدا .. فكه .. و في طريقهم للخروج و إذا بالشاب رقم واحد يصرخ مره أخرى


بووووووونجوااااااااااار سنيــــــــــــــــــــــــــــورا قـووووووووووووووود بـــــــــــاي


!! يرحم أمك إنت شسويت باللغه !! فرنسي على أسباني على إنجليزي


كله كووووم و بونجواااار بكووووم



يعني آنا حجي ما أعرف أتحجى أقووم أغازل بعد ؟؟؟ لا و بصوت عالي و الساعه ثمان الصبح و بلغة أجنبيه !! تحطمني صراحة ثقة بعض الشباب عندنا

أوووووووووووووف



على ما الإخوان مشو .. إلا الجو الحلو بدى يندثر .. و طلعت شمس الكويت الحنانه .. فما كان أمامي إلا أخذ كتابي الإمريكي بس إللي عطوه جنسية فرنسية و صار من المزدوجين اليوم و قلاص عصيري .. و أكمل مشواري بالسياره


أمم أوربا كلها غازلتني اليوم


من قدي


:/


أشكر الشاب رقم واحد و الشاب رقم أثنين إلي خربوا علي مشواري الصباحي و إلي كانوا وقود هذا البوست


إي وقود .. لأني ناويه أشب حريجه


حسافه على فزعتي من الصبح


و بونجواااار
at

42 comments:

  1. FrankomOctober 5, 2009 at 10:47 AM

    ما اقول الا


    بنجواااااار عليج وكل عام وانتي بخير

    بس ترى على فكرة الكتاب فرنسي مو انجليزي لانج حاطه عليه

    Shhhhhh

    ReplyDelete
  2. DieselOctober 5, 2009 at 10:59 AM

    زين عاد شسويتي بالامتحان؟:p
    ،
    إي والله على قولتج منو ألحين يغازل صج شخباري! صراحة وأنا أقرا قاعد أقول تكفة لا يكون بيقط الرقم آخر شي حدي بنتحر.
    بس استفدنا فايدة الفرع اللي رحتي له من هالكوفي هالحزة ما ينراح له الصبح عشان هالاشكال.
    مشكورة

    ReplyDelete
  3. الزينOctober 5, 2009 at 11:00 AM

    وبونجوارااات

    لوووول

    ذبحتيني ضحك على تحلطمج


    :)

    ReplyDelete
  4. reemasOctober 5, 2009 at 11:32 AM

    LOOOOOOOOOOOOOOOOOOOL

    لا لا مو طبيعيه القصه
    الامم المتحده كلهم غازلوج

    مانقول الا لا حول و لا قوة الا بالله
    و الله المستعان
    مشكلة الثقة الزايده

    ReplyDelete
  5. Sweet RevengeOctober 5, 2009 at 11:55 AM

    واي انا انقهرت
    تحسبي عليهم مالج الا جذي
    المرية الاية اخذي معاج رش فليت عن الذبان الصباحي

    ReplyDelete
  6. ShaikhaOctober 5, 2009 at 12:09 PM

    LOOOL Nice title wallah !
    لول هالاجواء ما تنفع عندنا ، غالباً ودائماً بتلقين هالنمونه واقفين بالمرصاد !

    ReplyDelete
  7. FramboiseOctober 5, 2009 at 12:32 PM

    Hahahaha iqtalatni Bonjwaar:P Bonjour yamalik il madir shino bs tara khif 6eena shababna! loooool

    ReplyDelete
  8. joe October 5, 2009 at 2:04 PM

    لو يدرون الفرنسين انه هالشاب يتكلم فرنسي جان غيروا لغتهم

    عاد هالنوعيه شمقعدهم من الصبح هالنوعيه مال يطلعون الفير

    بالعافيه

    ReplyDelete
  9. الأستاذ مزيكاOctober 5, 2009 at 2:57 PM

    ترى انا للحين اغازل على الطريقة الثمانينية يعني ايام الثمانينات غترة على الجتف واغمز بالعيون

    ضحكتيني يصفر الاخ كناري
    اللي مايرضاه لاهله لايرضاه لغيره من الناس

    بونجوووووور:)

    ReplyDelete
  10. مَـــــعْــــمَــــعَـــــهOctober 5, 2009 at 3:07 PM

    الله ياخذ الع...... بس عفيه عليج ماسكه اعصابج والله والا لو وحده ثانية يمكن تسبحهم بعصير البرتقال

    ReplyDelete
  11. SHOOSHOctober 5, 2009 at 5:42 PM

    Frankom
    ========

    ينجوار عليك إنت

    :)

    شكوو

    shhhhhh

    بالفرنسي ؟؟؟

    ReplyDelete
  12. SHOOSHOctober 5, 2009 at 5:43 PM

    Diesel
    =======

    سقطت

    :p

    ReplyDelete
  13. SHOOSHOctober 5, 2009 at 5:45 PM

    الزين
    ======

    شر البلية ما يضحك

    :)

    ReplyDelete
  14. SHOOSHOctober 5, 2009 at 5:49 PM

    reemas
    ======

    مو الأمم المتحده

    أمم أوربا

    :)

    ReplyDelete
  15. SHOOSHOctober 5, 2009 at 5:49 PM

    Sweet Revenge
    =============

    اي والله .. خربوا علي طلعتي

    ReplyDelete
  16. SHOOSHOctober 5, 2009 at 5:51 PM

    Shaikha
    ========

    yah .. I would never do it again !

    I'll read on bed bs !

    ReplyDelete
  17. SHOOSHOctober 5, 2009 at 5:52 PM

    Framboise
    ==========

    ya3ni fehum 5efat 6ina .. bs not always !!

    aaal shoo ??? aaaal bonjwaaaaaaaar !

    ReplyDelete
  18. SHOOSHOctober 5, 2009 at 5:52 PM

    المباركيه
    =========

    يعافيك

    :)

    ReplyDelete
  19. SHOOSHOctober 5, 2009 at 5:53 PM

    alwasmi
    ========

    شخباري الشماغ اللي عالجتف

    يالشايب

    :)

    ReplyDelete
  20. SHOOSHOctober 5, 2009 at 5:54 PM

    معمعه
    ======

    لا .. آنا ردات فعلي غالبا هاديه

    ما عمري حطيت لساني بلسان واحد يتحرش فيني

    أحقرهم و أهم يوخرون لحالهم

    ReplyDelete
  21. Nikon 8October 5, 2009 at 6:06 PM

    الموقف مزعج
    وصاير ظاهره ... كأن حرام يخلون أحد بحاله
    !
    الحلو بالموقف إنه طلع لنا بوست ظريف
    مسائج عسل
    :)

    ReplyDelete
  22. SHOOSHOctober 5, 2009 at 6:11 PM

    Nikon8
    ======

    إنتي العسل والله
    :*

    ReplyDelete
  23. UnknownOctober 5, 2009 at 10:02 PM

    هذا معدن المغازلجي الكويتي الخالص
    يغازل حتى اخر قطرة بدمة
    :p

    ReplyDelete
  24. -mateOctober 5, 2009 at 11:56 PM

    جان حذفتي عليه شاهد الكتاب
    shhhhhhhhhhhhhhh, i'm trying to read

    ReplyDelete
  25. جبريتOctober 5, 2009 at 11:57 PM

    شخباري تصفر يرقم فلبينيه شنو؟؟؟

    ما اقول الا بنجوار على اللغه الي متعلمها

    شكله كان هوايه يحب البلابل من شان هالشكل دا يصفر لج

    او انه شايف زرزور

    ReplyDelete
  26. lillyOctober 6, 2009 at 12:42 AM

    لووول صراحه ضحكتيني وأنا حدي متعسره
    الله يغربل بليسهم خربوا طلعتج .. هذي سوالف الشباب ماكة شغل بس تفرفر و أذيه بهالبنات

    ReplyDelete
  27. a7mad NabeelOctober 6, 2009 at 3:05 AM

    لووووووول
    سوري بس انا مت من الضحك على سالفتج
    صج
    الحقران يقطع المصران
    هذول من وين يطلعون ؟

    ReplyDelete
  28. فريج سعودOctober 6, 2009 at 3:41 AM

    بلبل ارجنتيني

    ReplyDelete
  29. YusuF.AsKROctober 6, 2009 at 7:05 AM

    ههههههههههههه

    أمم أوربا كلها غازلتني اليوم

    هههههه

    حلوووووه بصرااااحه

    بس ترا سبب إزعاجهم لج إهو الكتاب الامريكي

    أكو أحد يقرأ كتاب أمريكي الصبح ! لاا و بكوفي شوب بعد (:

    والله باايعتها (:

    نسيتي أن بالديره أكو خلايا إيرانيه نائمه !!

    شكووو هههههه

    أنا حولت المسأله سياسيه بحته

    ميييغسي باااكووغ

    ReplyDelete
  30. @alhaidarOctober 6, 2009 at 7:59 AM

    بونجوار ;p

    ما عليه شبابنا الحلوين لازم يطلعون لج من كل حدب وصوب ..

    وخيرها بغيرها انشالله :)

    تحياتي ..

    ReplyDelete
  31. SHOOSHOctober 6, 2009 at 11:01 AM

    Addictioneer
    ============

    صدقت

    :)

    ReplyDelete
  32. SHOOSHOctober 6, 2009 at 11:02 AM

    -mate
    ======

    لووول لا آنا بس اتحلطم

    :)

    ReplyDelete
  33. SHOOSHOctober 6, 2009 at 11:03 AM

    lilly
    ======

    سلامتج من الإستعسار

    :)

    ReplyDelete
  34. SHOOSHOctober 6, 2009 at 11:03 AM

    a7mad nabeel
    =============

    من بيوتهم

    :)

    ReplyDelete
  35. SHOOSHOctober 6, 2009 at 11:04 AM

    جبريت(عنيف سابقا)
    ==================

    ما لقيت احسن من الزرزور ؟؟؟

    قلنا كناري يا يبا

    :)

    ReplyDelete
  36. SHOOSHOctober 6, 2009 at 11:05 AM

    فريج سعود
    ==========
    بلبل أرجنتيني امه بولنديه

    ReplyDelete
  37. SHOOSHOctober 6, 2009 at 11:06 AM

    أبو غرايم
    =========
    بونجواااااار مسيوووووو

    وي وي وي

    جو سوي نو باغلي سياسه

    جو سوي نخاف من أمن الدوله

    :)

    ReplyDelete
  38. SHOOSHOctober 6, 2009 at 11:07 AM

    أحمد الحيدر
    ==========

    جت سليمه

    :)

    هذا أهم شي

    ReplyDelete
  39. هالحـــــزةOctober 6, 2009 at 11:13 AM

    هههههههههههههههههه

    خوووش رأس موضوع شي جميل بصراحة ..

    وخوش قصة بالوقت ذاته ..

    تمنياتي بأسبوع سعيد لج

    ReplyDelete
  40. SHOOSHOctober 6, 2009 at 1:12 PM

    هالحزه
    ======

    تصدق ؟؟؟؟ حتى ىنا وايد عاجبني عنوان موضوعي

    مرات أيدع

    :)

    ReplyDelete
  41. احمد الشلقاميOctober 12, 2009 at 10:08 AM

    السلام عليكم
    اولا انا مش كويتي انا مصري بس مهتم بالمدونات وطرق التدوين وبصراحه كتير شفت مدونين وطرق مختلفة لكن اسلوبك بجد رائع انا مفهمتش اغلب الكلام اللي كتبتيه نظرا لاختلاف اللهجة بس التنوع حتي في الموضوع الواحد باين اوي في كتابتك خاصة الموضوع ده وتعرضك لنقطة مهمة وقضية فعلا ضرورية وهي فئة الشباب وأي حياة يعيشونها موضوع موفق اتمنالك التوفيق وتقبلي مروري

    ReplyDelete
  42. AnonymousOctober 19, 2009 at 2:46 PM

    نعم للاختلاط

    و ارجو محد ايشكك اباعيالنا

    ReplyDelete

Leave me ur comment !