Thursday, October 1, 2009

نشله .. زكام .. رشح .. إلي تبون



السلام


من وين ابتدي ؟؟


يا جرحي الندي ؟؟


حسبي على الأيام


و الحظ الردي


خمس أيام و داشه بالسادس ألحين و آنا للحين فيني نشله


عفيه نشله للحين ما شبعت مني


لاعت جبدي


ودي أقص خشمي


عمرها ما مسكت فيني النشله هالكثر


شدعوا ست أيام


تعبت و آنا أعاطس


قلبي قام يعورني من كثر العطاس


صوتي مسخره


بلاعيمي ما يطق في بالها تسكر و تيبس علي إلا لي بغيت أنام


ستعش مخده تحت راسي عشان خشمي لا يسكر


دلاغات


جاكيتات


كنابل


و هم ماكو فايده


من إنسدح كل شي يتسكر


بلاعيم


خشم


إذن



و كل ما بلعت ريجي سمعت ستميه و سته و ستين صوت بإذني


فقاعات


طقطقه


مادري شالسالفه


لا و موضه يديده


صايره أسمت العطسه .. يعني أقل شي خمس عطسات ورى بعض


أتشوو أتشووو أتشوووو أتشووو أتشوووو


و الأدهى و الأمر


عطسه تسكر إذني معاها


و عطسه تفج إذني


إذن تسكر و إذن تفتح


لا .. و لا تعطس يدام أحد


العطسه الأولى يقولك يرحمك الله


الثانيه يقولك سلامات


الثالثه يخزك


الرابعه يشلع من يمك


!!!!!!!


الحمدالله و الشكر لك يارب


لا و عطستي حقيره


ما تتسلط إلا و آنا أسوق


وإذا آنا قاعده أسوق و يتني العطسه طبيعي أسكر عيوني


و إذا سكرت عيوني يا ألف على الأوادم يا أطق رصيف


ما ظل رصيف بالكويت ما صعدت فوقه


و الأحلى من هذا كله الزيرتك و الكلارينيز


لما آخذ الحبه .. حدي نص ساعه و أبدى أهلوس


الناس لي خذوهم ينامون آنا ما أدري شفيني


ما أنام بس أهلوس .. لاني صاحيه و لاني نايمه


بين الحلم و الواقع


بين الخيال و الحقيقه


بين الوعي و اللاوعي


مادري شيصير حواليني


أسطل


و الدنيا عفسه


فراشي كله كلينكس


قمت أتعرجب بكلينكساتي


و خشمي تشقق


ماظل فازلين ما ظل نيفيا ماكو فايده


إنصلخ


أحلى شي إنهم قاموا يعطوني شاش بدال الكلينكس


لأن صج خشمي راح فيها


و سلامتكم و سلامت خشومكم


سؤال الحلقه: أرسل عدد المرات التي ظهرت فيها كلمة نشله/عطسه على بريدنا الإليكتروني و ستدخل السحب على جهاز بلاك بيري شاشته مكسوره (ممكن تصلحها بشرق) .. لا تدعوا الفرصه تفوتكم


at

35 comments:

  1. enter-q8October 1, 2009 at 2:19 AM

    ولييييه
    بس يوبا بس
    قمت احس اني بنتشل عاد انا فيني السكر يعني يبيلي اسبوعين يالله اطيب
    قاعد اقرى بوستك و حاط الكلينكس على خشمي و معقم ديتول على الشاشة لا تنتقل
    ما تشوفين شر يوبا

    ReplyDelete
  2. YusuF.AsKROctober 1, 2009 at 3:54 AM

    ههههههههه

    سلامتج و ما تشوفين شر

    ياخوفي لاتنتقل العدوى عبر المدونات !

    حزتها شيفكج من حوبتي (:

    هالله هالله بالبصل ترى زيييييين (:

    ReplyDelete
  3. عامرOctober 1, 2009 at 4:56 AM

    إستنشقي بخار ماء يغلي ثلاث مرات يومياً

    ReplyDelete
  4. AnonymousOctober 1, 2009 at 6:26 AM

    LOOOOOOOOOOOOOL :p
    امبيه غشيت من الضحك !!
    سلامات و ما تشوفين شر ..انا صارت فيني نشلة 4 أيام و 6 أيام فقدت الشم و الله خفت ما صرت اشم .. و بعدها خفت الحمدلله بس شربي مشروبات دافية و حطي الفكس و بتطيبين .

    ReplyDelete
  5. الزينOctober 1, 2009 at 7:21 AM

    :)

    ما تشوفين شر

    عليج بالفكس

    وزيت شجرة الشاي مع شوية بخار ماي

    وكل الأمور تتصلح باذن الله

    ReplyDelete
  6. صقر قريشOctober 1, 2009 at 8:18 AM

    باول زيارة لي لهالمدونة اقول حسيت اني منتشل:(

    كلها بأجره ان شاء الله:)

    بصراحة استمتعت بقراءة هذا التذمر

    ReplyDelete
  7. Dark angelOctober 1, 2009 at 8:59 AM

    have some onion soup or cranberry fruit ,and i guarantee that within 2 days you'll be ok :)

    ReplyDelete
  8. DeemaOctober 1, 2009 at 10:12 AM

    wa 3alayaa ma tshoofeen shar!

    ReplyDelete
  9. esTeKaNaOctober 1, 2009 at 10:44 AM

    سلامات يا الغالي سلامات
    غدا الشر من بعد السخووونه
    :p~
    مادري اذا في سخونه
    بس هذي اغنيه شعبيه تغنيها يدتي مع صفقه خفيفه في مثل هذي المناسبات
    :PP~
    ما تشوفين شر يا الغاليه
    البوست مريض مريض
    كسر خاطري هالبوست وصاحبته
    :)

    ReplyDelete
  10. UnknownOctober 1, 2009 at 10:57 AM

    ما تشوفين شر شووش
    من كلامج خفت لا الماوس يعاديني

    على الاقل انتي تعطسين مع صوت وطشار ودنيا
    انا وحدة من اهلى تعطس بدون صوت
    مدري شلون جذي تقمتها

    ReplyDelete
  11. جبريتOctober 1, 2009 at 12:36 PM

    اولا سلامات ما تشوفين شر



    مادري ليش وانا اقرا البوست بأذني ترن اغنية فلسطين عربيه ومحد يحكي حيك وحيك

    اخر شي الفلسطيني الي معاي حاط هالرنه ويدقون عليه وما يرد

    المهم ما ترين شر يا الشوش انشالله واحسن شي يبطل مسامات الخشم


    جدر فيه مايه وتتنشقين البخار الناتج عن الحراره ومنها تنظيف بشره

    انسي العطاس بعد هالعلاج

    ReplyDelete
  12. جبريتOctober 1, 2009 at 12:37 PM

    اي وترا مو انتي الي دعمتي الرصيف اهو الي دعمج الكلب الحيوان لوووول

    ReplyDelete
  13. @alhaidarOctober 1, 2009 at 4:21 PM

    سلامات ما تشوفين شر انشالله :))

    بس قريت اغنية عبد الكريم العود عرفت حجم معاناتج .. الله يعينج

    خطاج السو :)

    ReplyDelete
  14. HamadOctober 1, 2009 at 8:25 PM

    ma tshofeen shar ..


    bs amana 3ogb kil hatha laish laish 3aysha ??!!

    ReplyDelete
  15. Butterfly ChickOctober 1, 2009 at 8:42 PM

    matchofeen shar dear

    go to the hosp better.. esmella 3alaich laykoon swine flue :-# lool esmella 3alaich inshalla :$

    hope you get well soon..

    drink orange juice or lemon.. i guess they r good

    ReplyDelete
  16. بانوراماOctober 1, 2009 at 10:54 PM

    سلامات وما تشوفيين شر

    الظاهر ان خشمج بيطلع لحن يديد بس مو قادر يضبطه

    انصحج تسجليين عطستج

    وتسوينها كاسيت وسيديات

    وتربحيين 1000 بلاك بيري شاشته خربانه

    ReplyDelete
  17. SHOOSHOctober 2, 2009 at 12:05 AM

    Enter-Q8:
    =========

    الشر ما يجيك يوووووبا

    :)

    ReplyDelete
  18. SHOOSHOctober 2, 2009 at 12:06 AM

    أبو غرايم
    =========

    لك حوبه ؟؟

    الله يكافينا شرها

    :)

    ReplyDelete
  19. SHOOSHOctober 2, 2009 at 12:06 AM

    عامر
    =====

    إنشالله

    مشكور

    :)

    ReplyDelete
  20. SHOOSHOctober 2, 2009 at 12:07 AM

    Hanan
    =====

    تشربت فكس

    ماكو فايده

    تشمين ريحة الفكس من بعد ميل

    :)

    ReplyDelete
  21. SHOOSHOctober 2, 2009 at 12:08 AM

    الزين
    =====

    الشر ما يجيج إنشالله يالزين

    زيت شجرة الشاي هذا أشربه و لا أتدهن فيه؟؟؟

    :)

    ReplyDelete
  22. SHOOSHOctober 2, 2009 at 12:09 AM

    صقر قريش
    =========

    أشكر نشلتي اللي خلتك تستمتع

    :)

    لا تقاطع عاد

    ReplyDelete
  23. SHOOSHOctober 2, 2009 at 12:10 AM

    Dark Angel
    ===========

    I might try the cranberry :)

    Thanks :)

    ReplyDelete
  24. SHOOSHOctober 2, 2009 at 12:11 AM

    Deeema
    ======

    el shar ma eyeech :*

    ReplyDelete
  25. SHOOSHOctober 2, 2009 at 12:13 AM

    esTeKaNa
    =========

    أهلا هلا بالغاليه

    نشيد سلامات هذا متوارث

    الكل يغنيه الظاهر

    :)

    ReplyDelete
  26. SHOOSHOctober 2, 2009 at 12:14 AM

    Addictioneer
    =============

    آنا قبل إذا كان حواليني ناس غرب أقمت عطستي

    بس قالولي مو زين

    قمت أعاطس عادي

    ReplyDelete
  27. SHOOSHOctober 2, 2009 at 12:15 AM

    جربيت (عنيف سابقا)
    ===================

    حيك حيك حيك

    ReplyDelete
  28. SHOOSHOctober 2, 2009 at 12:32 AM

    جبريت (عنيف سابقا)
    ==================

    صااااااااااااج

    الرصيف حول

    ReplyDelete
  29. SHOOSHOctober 2, 2009 at 12:36 AM

    Hamad
    ======

    w ma a3eeesh leeeesh ??? amoooot 3shan nashla :)

    ReplyDelete
  30. SHOOSHOctober 2, 2009 at 12:38 AM

    Buttefly Chick
    ==============

    I am mixing orange and lemon in one glass :)

    don' worry .. I have already check eith the Doctor

    I am swine freeeeee :*

    ReplyDelete
  31. SHOOSHOctober 2, 2009 at 12:39 AM

    بانوراما
    =========

    الشر ما يجك

    :)

    ReplyDelete
  32. joe October 2, 2009 at 2:34 AM

    كملي هالمرض سبوع وربحي اي فون بعد شتبين اكثر من جذي لوول

    تصدقين انا وايد اعطس بس مو منشول
    مادري هالمرض شنو نوعه

    ماتشوفين شر بعدوينج ان شاء الله ;p

    ReplyDelete
  33. joe October 2, 2009 at 2:35 AM

    كملي هالمرض سبوع وربحي اي فون بعد شتبين اكثر من جذي لوول

    تصدقين انا وايد اعطس بس مو منشول
    مادري هالمرض شنو نوعه

    ماتشوفين شر بعدوينج ان شاء الله ;p

    ReplyDelete
  34. AnonymousOctober 2, 2009 at 4:51 PM

    امبيه لااا! البووست مالج مستحييل !
    ليش جذي انتي دمج خفيف ؟؟
    XD

    و سلامتج ماتجوووفين شرر!

    ReplyDelete
  35. AnonymousMarch 12, 2012 at 8:52 PM

    الله يشفيك عندنا وعندك خير أنا راح خشمي طماطه أبي علاج يسكر الامطار اللي عندي

    ReplyDelete

Leave me ur comment !