Saturday, September 26, 2009

العميــــده



عمتي .. بس بالضبط بالضبط هي عمة أبوي .. إخت جدي يعني


أتوقع هي عميدة العايلة .. ما أدري صراحه إذا في أحد أكبر منها و يستحق لقب العمودية أكثر منها


بس إن ما خاب ضني هي أكبر وحده


عمتي هذي مخرفة


بس تخريفها على كيفها و على مزاجها


يعني تفصل و تطقها خرفنه إذا بغت .. و ترد صاحية و مخها يوزن 60 بلد إذا بغت في أحيان أخرى


أكبر إقتصادي بالدنيا ما يقدر يقص عليها بالفلوس


عمتي عايشة في بيت بروحها .. جنية ما تخاف .. ما تبي أحد يقعد معاها .. هي و خداماتها و عندها ممرضه تروح و ترجع عليها


عيالها و عيال عيالها الكل يروح لها ما يقصرون فيهاا .. بس ما تهد بيتها و لا ترضى أحد فيهم يقعد عندها


ما علينا


في المناسبات الرسمية و الأعياد مثل رمضان .. العيدين .. و في حال كانوا الأهل مشغولين .. لازم كل عايلة تدز مندوب منها يسلم على العمة


يعني مثلا إذا أبوي راح بارك لها بالشهر ما يبين بعينها .. لازم أبوي يدز مندوب من عياله عقب يومين أو ثلاث يروح لها بعد


وهكذا هو العرف مع عمتي


وصوني أمر عليها بشهر مضان أبارك لها بالشهر و أوصل لها تحيات العايلة العطرة .. بس بصراحة ما رحت .. أول شي لأن عمري ما رحت لها لحالي .. ثاني شي لأن لسانها طويل .. ثالث شي لأن ماكو شي إن كــومون بيني و بينها


وصوني أروح لها مره ثانية أول أيام العيد .. مو وصوني بالأحرى دبسوني و غصبوني


رحت آنا و إختي


دشينا عليها دارها و لا منسدحة


طبعا هي تستقبل الناس بدارها .. ما يدور عندها صالات و إستقبالات


و كان الحوار التالي


شوش: السلام عليكم عمتي .. ألقي السلام بكل حماس و مجبلة عليها ببوسها بعد


العمة: عمة بعينج إنشالله حتى عمة بعينج


شوش: هذي شفيها !!! الشرهة علينا يايين نسلم عليها


إختي: ما عليج عادي طوفي مره عوده و مخرفه


شوش: تجدمت بحب راسها .. ما كو يأس .. ما شالت راسها يعني بس تحوس فيه يمين و يسار .. تتغلا


إختي: شلونج عمتي ؟؟ شفيج الله يهداج تزفينا ؟؟ إنتي زعلانه؟؟


عمتي: إي زعلانه .. إحد يجي يبارك خامس أيام العيد


لوووووول لا حظوا خامس أيام العيد ها


شوش تساسر إختها: كـــــــــاك .. أي خامس !! العيد العود إن ذبح عمره أربع أيام من وين يابت عمتي خامس


إختي: إي فقيرة ما تدري وين الله قاطها .. هذا أرذل العمر خرفت بعد عمري


شوش: عمتي الله يهداج اليوم أول أيام العيد شفيج !! أصلا ما مرينا على أحد قبلج .. إنتي أول وحدة


عمتي: إي أدري إنه أول يوم بس علامكم محد فيكم مرني برمضان؟؟


شوش: إمبلا عمتي مريناج شفيج نسيتي


إختي: يالنصابة ما مريناها !! ليش تقولين لها مريناج؟؟


شوش: ألحين إنتي مو تقولين مخرفة !!! بالله شدراها جيناها ولا لأ !! قولي إي و خلاص


عمتي: أيا اليواره !!! عبالج ما أعرف !! عبالج ما أذكر !! محد فيكم مرني .. يالله !! يالله قوموا طلعوا من بيتي يالله .. و روحوا قولوا حق اللي مطرشكم مابي أحد فيكم يجبني


إختي: تقوم و تبوس راس العمة .. عمتى الله يهداج شفيج علينا محد مطرشنا بروحنا يايينج إحنا نحبج


العمة: لااااا آنا أدري منو مطرشكم .. ولا إنتوا ما تيوني بروحكم .. هذا أخوووووي مطرشكم


شوش: مالت عليج و على **** فوقج زين .. من دشينا و أهي تسب و تزف و تجعم زين ما قامت طقتنا


إختي: شوش إستحي على ويهج عيب جذي!! المرة مسكينه ما تدري وين الله قاطها قومي يالله خل نروح قبل لا تعصب أكثر


شوش: عمتي ماكو عيدية ؟؟


العمة: إنشالله لما يجي العيد أعايدكم .. تبون ماي؟؟


شوش: صج نصابة !!! مساع كان خامس أيام العيد و ألحين تسوين روحج ما تدرين عن شي


و بس طلعنا


كانت زوراة مضحكة مبكية


بس ما عليكم فيها .. لا مخرفة ولا شي .. تستعبط بس


سؤال أون ذا سايد ماله علاقة بالبوست .. منو من المدونات البنات بيحضرأكيد مؤتمر التدوين اللي بيصير الأثنين الياي؟؟؟ طبعا آنا بكيفي سويته مؤتمر .. المهم .. إذا في أحد بيروح يدز لي إيميل .. لأني بصراحة أخاف أروح و يطلع ماكو بنات .. بإختصار أبي وحدة ألزق فيها و أقعد يمها و أحن على راسها و ألوع جبدها .. لأني خجولة جدا جدا جدا و أستحي و أستاحش من الزحمة و لوية الناس


ملاحظة أخيرة: الصورة مو صورة عمتي


و شكرا


:)


at

27 comments:

  1. الأستاذ حمامSeptember 26, 2009 at 9:53 PM

    بروها.. هذا عمرها
    لها ولكم طولة العمر

    ReplyDelete
  2. FrankomSeptember 26, 2009 at 10:50 PM

    كلاكيت ثاني مرة :)

    ***

    وين كنا ؟

    إي كما تدين تدان
    باجر انتي بتصيرين جذي واحفادكم يتطنزون عليج

    احم

    ReplyDelete
  3. YusuF.AsKRSeptember 26, 2009 at 11:31 PM

    هههههههههههه

    عمتج ماتبي عريس (:

    اذا رحتي لها ثاني مره إخطبيها لي (:

    الله يخليها لكم إنشالله

    ReplyDelete
  4. enter-q8September 27, 2009 at 12:10 AM

    يوبا الكبار بركة الدار

    في واحد محسوب علي الذكور بالغلط بيروح
    يعني ما يفرق عن البنات بشي
    ههههههههه

    ReplyDelete
  5. Abu AzizSeptember 27, 2009 at 12:19 AM

    يا حليلك يا يدتي
    الله يرحمها ما عمرها زفتني ولاقالت شي
    حتى ابوي رغم انه ما كان يجي يسلم عليها دايم الا كنه عيد لا منه جا يسلم عليها
    ونفس الشي خالتي حصه ...اختها
    الله يرحمها
    ذيك ان شافتني صاحت من الفرحه
    حتى خالتي هيا ...ام مرت ابوي
    بس ذيك يمكن عشانها تقرب لابوي من بعيد شوي فعشان كذا مطينتي وجه ههههه
    بس والله عمتكم رهيبه الله يعدي عنها و يرفعها بالعافيه و يهديها عليكم

    ReplyDelete
  6. مركبناSeptember 27, 2009 at 1:39 AM

    ههههههههه

    اهم شئ ان الصورة مو صورتها (=

    زوغه والله
    اشوة انها ما تستعمل الاسلحه (=

    جزاكم الله خير على وصلها (=

    ReplyDelete
  7. فريج سعودSeptember 27, 2009 at 4:35 AM

    يبي عمتج المؤتمر وانا اجتمع فيها واطلع الصجية منها

    ReplyDelete
  8. reemasSeptember 27, 2009 at 5:42 AM

    LooooL
    منتي هينه يا شوش
    و ماخده اختج عشان كل شوي تقولج شوش
    هههههه
    nice funny story
    thx for sharing
    :))

    ReplyDelete
  9. esTeKaNaSeptember 27, 2009 at 8:34 AM

    يا صباح البر بالوالدين والعمه
    :)
    واي كسرت خاطري
    ذكرتني بجده ابوي الله يرحمها
    انا مسيرة اسلم عليها وودش بنفس الوقت واحد من الشباب يصير حق ابوي انا مكتره وساكته فجأة طالعتنا انا وياه قالت :
    عيل وين العيال؟
    انا ويهي صار كبر جف ايدي
    اي عيال يمه؟
    !!
    ابد مصممه ان هاللي يمي ابونا على قولتها،وتوصيه عليه وتقولي يا زين ما اخترتي
    مادري اهي الله يرحمها كانت مضيعه
    مادري اهي تضبط اموري
    :Pp~
    بس بدعتي منتي هينه
    :))

    ReplyDelete
  10. SHOOSHSeptember 27, 2009 at 10:03 AM

    صباح الخير جميعا

    شلون الدوام من عقب الإجازه ؟؟؟

    أستاذ حمام
    ==========
    بارينها و مو قادرين على لسانها

    هو إحنا نإدر ؟؟؟؟

    :)

    ReplyDelete
  11. SHOOSHSeptember 27, 2009 at 10:04 AM

    Frankom
    =======

    آنا بس ؟؟؟ حتى إنت

    :)

    ReplyDelete
  12. SHOOSHSeptember 27, 2009 at 10:05 AM

    أبو غرايم
    ========
    عريس شتسوي فيه بالله ؟؟؟

    لوووووول

    لا لا ما تبي

    ReplyDelete
  13. SHOOSHSeptember 27, 2009 at 10:06 AM

    Enter-Q8
    ========
    أكيد .. هم الخير و البركه

    ReplyDelete
  14. SHOOSHSeptember 27, 2009 at 10:06 AM

    Abu Aziz
    =========
    أهلا اهلا اهلا

    نورت

    :)

    ReplyDelete
  15. SHOOSHSeptember 27, 2009 at 10:07 AM

    مركبنا
    =======
    إنتي من صجج ؟؟؟

    ألي بالصورة احلى منها بواااااايد

    :)

    ReplyDelete
  16. SHOOSHSeptember 27, 2009 at 10:08 AM

    فريج سعود
    ==========
    اهليــــن

    منور

    ولا اوباما يقدر يطلع منها شي

    عمتي فيها لواته ما صارت ولا استوت

    بتحضر المؤتمر ؟؟

    عاجبتني كلمة مؤتمر

    ReplyDelete
  17. SHOOSHSeptember 27, 2009 at 10:09 AM

    reemas
    =======

    Thanks for stopping by :)

    ReplyDelete
  18. SHOOSHSeptember 27, 2009 at 10:10 AM

    esTeKaNa
    =========
    أهلا يالغاليه

    :*

    كانت تضبطج ما عليج

    :)

    ReplyDelete
  19. t.q8September 27, 2009 at 11:23 AM

    يمكن عمتج من الناس
    الي ماتعرف تعبر عن حبها
    فعلشان جذي تزفكم

    ReplyDelete
  20. SHOOSHSeptember 27, 2009 at 12:06 PM

    t.q8
    =====
    أمحق حب ما عرف يطلع إلا جذي

    :)

    ReplyDelete
  21. UnknownSeptember 27, 2009 at 2:34 PM

    انا ما تعاملت مع كبار سن جذي مرة
    وجدتي الحمدلله هادية
    بس فجاة تفصل وتقول: ماما تزوج... بشوف عيالك
    وتبجبج
    اهني انا اهديها شوي
    بعدها اشرد عشان ما تقعد تسطرلي اسامي بنات عمي كلهم
    :)

    الشخص الوحيد اللي التعامل معاه صعب هو الوالد
    بس اغلط غلطة يسبني سب.... طشار سعابيل السب كله بويهي
    بس عادي... اتحمل.... الوالد... راس المال
    هو بالاخير قعد يسب نفسه
    :)

    في مؤتمر مدونين
    متى ووين الاعلان؟

    ReplyDelete
  22. joe September 27, 2009 at 5:33 PM

    الله يعطيها طولة العمر

    اي هذي سوالف لكبار يحبون يتحلطمون لول

    عيدج مبارك مأخرا

    ReplyDelete
  23. DiLLi O MiLLiSeptember 27, 2009 at 7:34 PM

    متأكده هذي موو صورة عمتج؟
    :)

    صلة الرحم زينة ،،، حطوا في بالكم أن راح أيي يوم ونصير بمكانها
    ذيك الساعه نبي أحد يمر ويسأل علينا
    مو جذيه؟
    :)


    بعدين تقولين أنها أكبر أقتصادية
    شكووو طالبه منها عيدية !!؟؟
    لوووول

    :)

    ReplyDelete
  24. SHOOSHSeptember 28, 2009 at 8:11 AM

    Addictioneer
    =============
    إي .. في ندوة إنشالله بتكون اليوم على الساعة سبع في فندق المارينا

    و الله يعينك على الطشار

    :)

    ReplyDelete
  25. SHOOSHSeptember 28, 2009 at 8:12 AM

    المباركيه
    =========
    أيامك سعيده

    :)

    ReplyDelete
  26. SHOOSHSeptember 28, 2009 at 8:13 AM

    DiLLi O MiLLi
    ==============
    إي .. هذي وايد أحلى من عمتي

    طلبت منهاعيدية قلت يمكن تكون فاصله ألحين و تعطيني شي يسوى

    بس ماكو فايده

    :)

    نورتي

    ReplyDelete
  27. outlawSeptember 28, 2009 at 4:52 PM

    والله طلعتي انتي تخرعين اكثر منها :P

    المره شكبرها وانتي كله معصبه عليها :P

    الله يخليها لكم وتجابلينها كل سنه قولي آمين

    ReplyDelete

Leave me ur comment !